දේශපාලන නරි නාඩගම් සහ විලම්බීත හමුවේ ජනවරමක් රහිත රජයේ මුදල් අමාත්‍යවරයා වන ජනාධිපතිවරයා තවත් අයවැයක් පසුගිය සතියේ ඉදිරිපත් කළේය. ආර්ථික වර්ධනය ඇති කරන උපායමාර්ග කිසිවක් ඒම ලේඛනයේ නොමැත. ඉතිරි ණය වාරික මූල්‍ය අරමුදලින් ලබා ගැනීම සඳහා රාජ්‍ය වියහියදම් ඉලක්කම් ලැයිස්තුගත කර ඇත්තේ ජනතාවට නුදුරු අනාගතයේ තමන් පත්වී ඇති අසහනකාරී ආර්ථික අර්බුදයෙන් කිසිම ගැලවිල්ලක සේයාවක් වත් ඇති නොවෙන තරමටය. ජාත්‍යන්තර මූල්‍ය අරමුදලේ කෝකටත් තෛලය වන භාණ්ඩ සහ සේවා මත පනවන බදු ඉහළ දැමීමෙන් ජනතාවගේ ජීවන බර තවත් බැරෑරුම් අඩියකට වැටෙනු ඇත.
සාම්ප්‍රදායික ඡන්ද ගුණ්ඩු කිහිපයක් ඔබ්බවා ඇත්තේ රජයේ සේවකයින්ගේ අනුකම්පාවෙන් සහ කොළඹ දිස්ත්‍රික්කයේ තට්ටු නිවාසලාභීන්ගේ ඡන්දයෙන් රනිල් වික්‍රමසිංහ මහතාට අඩුම තරමින් පාර්ලිමේන්තුවට හෝ තේරීපත් විය හැකිවෙතැයි යන විශ්වාසයෙන් විය හැක.
රජයේ ආර්ථික වටිනාකමක් ඇති දේපළ විකුණා රට කොරවන්නට මසුරං සොයා ගැනීම එකම විකල්පය හැටියට එළිදක්වා ඇත. රාජපක්ෂ සහෝදර සමාගමේ ආර්ථික කළමනාකරණ වැඩපිළිවෙළ සකස්කර තිබුණේ දේශීය ගජමිතුරු කල්ලිවලට රාජ්‍ය සම්පත් කුණුකොල්ලයට විකිණීමට සෙලන්දිවා නම් සමාගමක් අටවා ගැනීමෙනි. ඒ අටියෙන්ම දැන් ක්‍රියාත්මක වීමට සැරසෙන විකුණොමික්ස් වැඩපිළිවෙළ වෙනස් වන්නේ රජයේ දේපළ විදේශීය ගජමිතුරන්ට පැවැරීමට ප්‍රමුඛත්වය දීමෙන්ය. සෙලන්දිවා සමාගමේ වැඩපිළිවෙළට නැගුණු ජනතා විරෝධය ගෝඨාගෝහෝම් ව්‍යාපාරය තරම්ම උස් හඬකින් පවත්වාගැනීමට රටේ මහජන සුභසිද්ධිය වෙනුවෙන් කටයුතු කරන සිවිල් සංවිධාන සහ වෘත්තීය සමිති පෙරමුණ ගත්හ.
ඔවුන් ගෙනගිය ව්‍යාපාර ජාති හිතෛෂී බව ඔප්පුකරවීමට ශ්‍රේෂ්ඨාධිකරණය අතිවිශ්වසනීය තීන්දුවක් 2023 නොවැම්බර් මස 14 වැනිදින ප්‍රකාශ කළේ ශ්‍රී ලංකා ආර්ථිකය බංකොලොත් කළ මහදැනමුත්තා සහ ගෝලබාලයන් ටික නම් කරමින්ය. රට මුහුණදී ඇති ආර්ථික, සමාජීය සහ දේශපාලන ගැටලු විසඳාගත හැකි ක්‍රියාපිළිවෙළකට නායකත්වය දිය හැකි පාලන තන්ත්‍රයක් තෝරාපත් කරගැනීම වෙනුවට ඡන්දදායකයින් නොමඟ හැර හුදු ජාතික-ජනප්‍රියත්වය තුළින් රාජ්‍ය බලය ලබාගෙන රටවැසියන් අන්ත අසරණ තත්වයකට පත්කොට මුළු ආර්ථිකයම ණය බරින් ගිල්ලවා බංකොලොත් කරවීමට වසර දෙකක්වත් ගතවූයේ නැත. ජනහිතවාදී කණ්ඩායම් පාලකයන් පන්නා දැමීමට වීදි බැස අරගල කළේ මේ නිසාය. ඒ අභීත අරගලකරුවන්ගේ කැපවීමට අධිකරණය නිසි වටිනාකමක් ලබාදී ඇත.
පාරිභෝගිකයින් තම දෛනික අවශ්‍යතාවන් ඉටුකර ගැනීමට දැන් අන්තර්ජාල සහ ජංගම දූරකථන ඔස්සේ ශීඝ්‍රයෙන් ව්‍යාප්තවන ඉ-කොමර්ස් හෙවත් සංඛත වාණිජමය කටයුතුවලට හුරු වී හමාරය. මෙම තාක්ෂණික පරිණාමයන් තුළ සාම්ප්‍රදායික බැංකු, මූල්‍ය, තැපැල් සහ ආශ්‍රිත සේවාවන් ශීඝ්‍රයෙන් වෙනස්වන නිසා මෙකී ආයතනවල ආදායම් සහ ලාභදායිතාව රැක ගැනීමට සිය සේවාවන් නව ක්ෂේත්‍රවලට ව්‍යාප්ත නොකළහොත් සිදුවන්නේ ඩයිනසෝරයන්ට සිදුවූ ඉරණමය.
ඉ-කොමර්ස් කටයුතුවලට භාණ්ඩ හුවමාරු කිරීමට අවශ්‍ය යටිතල පහසුකම් සැපයීමට කොළඹ නගරයේ වරාය ආශ්‍රිත විශාල ගොඩනැඟිලිවලට අවශ්‍ය නවීන තාක්ෂණික සේවාවන් සපයා එම කටයුතුවල නිරත ව්‍යාපාරිකයින්ගෙන් සෘජු ආදායම් කුලී හෝ බදු පදනමකින් උපයා ගත හැක. තැපැල් දෙපාර්තමේන්තුවට අමතර ආදායම් උපයාගත හැක. ඉ-කොමර්ස් කටයුතුවලට ඉක්මනින් යොමු නොවුණොත් එම කටයුතුවල වාසිය පෞද්ගලික අංශය වෙත ගලා යනු ඇත. තැපැල් දෙපාර්තමේන්තුව සතු දිවයින පුරා විහිදී ඇති ශාඛා ජාලය මෙම ව්‍යාපාර කටයුතු සාර්ථක කරගැනීමට පිටිවහලක් කර ගැනීමට දෙපාර්තමේන්තු බලධාරීන් ඉදිරි දැක්මක් සහිත සැලසුම් කළ යුතුව ඇත.
තැපැල් දෙපාර්තමේන්තුවේ පෞරාණික වටිණාකම් සහිත දේපල විදේශීය හිතමිතුරු සමාගම්වලට විකිණීමට එරෙහිව තැපැල් සේවකයින්ගේ සටනට ආශීර්වාද කළයුතු මෙන්ම, එය විරෝධයකට පමණක් සීමා නොකොට සියලු දෙනාටම ඒකතුවී සිය දේපළ සහ සම්පත්වලින් නව තාක්ෂණික ක්‍රමවේදයන් භාවිත කරමින් පාරිභෝගිකයන්ට නව සේවාවන් සපයා දීමෙන් තැපැල් දෙපාර්තමේන්තුවේ ආදායම් වැඩි කරගැනීමට ඉදිරිපත් විය යුතුව ඇත.
සංචාරකයින් වැඩිදෙනෙක් ගැවසෙන නුවර, නුවරඑළිය, ගාල්ල සහ කොළඹ ඇති තැපැල් කන්තෝරු සහ ගොඩනැඟිලි නවීකරණය කොට, විදේශිකයින්ට ශ්‍රී ලාංකේය නිෂ්පාදන පහසුවෙන් ඇණවුම් කර ගෙන්වා ගැනීමේ ඉ-කොමර්ස් සහ ලොජිස්ටික්ස් කටයුතුවලට යොදාගැනීම දේපළ විකුණන විකුණොමික්ස් බංකොලොත් වැඩපිළිවෙළට පැහැදිලි විකල්පයක් කරගත හැක. දේශීය වෙළඳපළ පමණක් ඉලක්ක කරගනිමින් නොව මුළු දකුණු ආසියා වෙළඳපළ හරිහැටි අවබෝධ කරගෙන කොළඹ වරාය වැදගත් උපායමාර්ගික වෙළඳ මධ්‍යස්ථානයක් කරගනිමින් ජාත්‍යන්තර වෙළඳාමේ ප්‍රතිලාභ මතු පරම්පරාවට උරුමකර දිය හැක්කේ දූරදර්ශීව කටයුතු කළොත් පමණි. මෙම අනගි ව්‍යාපාරික අවස්ථාවන් හොඳින් වටහාගෙන පාලකයින් රවටාගෙන දත කන්නේ ජාතියේ සම්පත් කුණුකොල්ලයට ගැනීමටය. මතු පරපුර වෙනුවෙන් මෙම සම්පත් බේරාගැනීමට සියලු දෙනාම කැපවිය යුත්තේ ඒ නිසාය.
