අධ්‍යාපන අමාත්‍යාංශ ලේකම්වරයා විදුහල්පතිවරුන්ට ලිපි 3308ක් නිකුත් කරලා
විදුහල්පතිවරුන් සිසුන් 2237ක් ඇතුළත් කරගෙන
මැති ඇමතිවරුන් ළමයින්ගේ ලැයිස්තු ඉදිරිපත් කරලා
රජයේ මුළු පාසල් සංඛ්‍යාව 2022 වර්ෂය වනවිට 10,165කි. ඉන් පාසල් 396 ක් ජාතික පාසල් වශයෙන් පවත්වා ගෙන යමින් තිබේ. එම පාසල් විමධ්‍යගත කරන ලද පාසල් අධ්‍යාපනය යටතේ පළාත් සභාවලට අයත් නැති අතර ඒවාහී පරිපාලනය සෘජුවම අධ්‍යාපන අමාත්‍යාංශය විසින් සිදු කරනු ලබයි. මේ ආකාරයට රජයේ පාසල් පද්ධතිය තුළ වෙනස් ආකාරයට පරිපාලනය වන පාසල් පද්ධතියක් අවශ්‍ය වී ඇත්තේ පැහැදිලිවම ප්‍රභූ අවශ්‍යතා සඳහාය. මෙම ජාතික පාසල්වල අවස්ථාව හිමි වන්නේ දේශපාලනඥයින්ගේ ළමයින්ට, ඔවුන් විසින් නිර්දේශ කරන පුද්ගලයින්ගේ ළමයින්ට, අධ්‍යාපන සේවයේ ළමයින්ට, පරිපාලන සේවයේ ළමයින්ට, විදේශ සේවයේ ළමයින්ට, වෛද්‍ය සේවයේ ළමයින්ට, හමුදා සේවයේ ළමයින්ට හා පොලිස් සේවයේ ළමයින්ටය. කෙටියෙන්ම කිවහොත් ඇති හැකි අයගේ ළමයින්ටය.
ඒ නිසාම මෙම පාසල්වලට සෑම වසරකම ඉතා වැඩි මූල්‍ය පහසුකම් රජයෙන් ලබාදීම සිදු කරයි. ඒ සඳහා හේතුවක් ලෙස දක්වන්නේ මෙම පාසල්වල අධ්‍යාපන ප්‍රතිඵල විශිෂ්ට මට්ටමක තිබෙන බවයි. එම හේතුවේ ඇත්තේ සම්පූර්ණ සත්‍යය නොවේ. පහ වසර ශිෂ්‍යත්ව විභාගයෙන් ඉහළම ලකුණු ලබා ගන්නා හොඳම ළමයින් පිරිස මෙම පාසල් වසරක් පාසා උරා ගැනීම සිදු කරයි. ඊට අමතරව අපොස සාමාන්‍ය පෙළ හොඳම ප්‍රතිඵල පෙන්වන ළමයින්ද මෙම පාසල් උරා ගනියි. ඒ මගින් විශිෂ්ට ප්‍රතිඵල පෙන්නීම අරුමයක් නොවේ. එහෙත් එම ඇත්ත දේශපාලනඥයින්ටවත්, රාජ්‍ය නිලධාරීන්ටවත් අදාළ වන්නේ නැත. ඒ රජයෙන් විශේෂ ලෙස නඩත්තු කරමින් එම පාසල් පවත්වාගෙන යන්නේ ඔවුන්ගේ ළමයින්ට වන නිසාය.
ඉහත ආකාරයේ පැහැදිලි කිරීමක් කිරීමට සිදු වූයේ විගණකාධිපතිවරයා විසින් එකී ජාතික පාසල්වල අතරමැදි ශ්‍රේණිවලට ළමුන් ඇතුළත් කිරීම සම්බන්ධයෙන් විශේෂ විගණන වාර්තාවක් නිකුත් කර ඇති නිසාය. එම විගණන වාර්තාවෙන් මූලික වශයෙන් අවධානය යොමු කර ඇත්තේ 2020 ජනවාරි 01 දින සිට 2022 මැයි 31 දින දක්වා කාලයට වන අතර ඒ මගින් අනාවරණය කර ඇති කරුණු අනුව ජාතික පාසල්වලට ළමයින් ඇතුළත් කිරීම සම්බන්ධයෙන් මෙතෙක් එල්ල වූ චෝදනා සත්‍ය බව නිල වශයෙන් සනාථ කර ඇත. ළමයින් ඇතුළත් කිරීම සම්බන්ධයෙන් සිදුවී ඇති අක්‍රමිකතාවල තත්වය කොතෙක්ද කිවහොත්, ඒ සඳහා සම්බන්ධ වූ දේශපාලනඥයින් හා රජයේ නිලධාරීන් ළමයින් ඇතුළත් කිරීමේ ක්‍රියාවලිය සම්බන්ධයෙන් වූ චක්‍රලේඛ නම් වූ නීති රීති සම්බන්ධයෙන් කිසිදු තැකීමක් කර නැති බව එම විගණන වාර්තාව අනුව පෙනී යයි.
එමෙන්ම පහ වසර ශිෂ්‍යත්ව විභාගයෙන් ඉහළ ලකුණු ලබා සමත්වන සිසුන්ගේ අවස්ථා පවා මෙම ජාතික පාසල් උදුරාගෙන ඊට පෙර වසරවලදී ළමයින් ඇතුළත් කර ඇති බවද පෙනී යයි.
සිය විගණනයට හේතු වශයෙන් විගණකාධිපතිවරයා සඳහන් කරන්නේ එම අතරමැදි ශ්‍රේණි සඳහා ළමයින් ඇතුළත් කිරීමට දෙමාපියන් විවිධාකාරයෙන් උත්සාහ කරනු ලබන බවත්, එම තරගකාරිත්වය පාලනය කිරීම සඳහා අමාත්‍ය මණ්ඩලය හා අධ්‍යාපන අමාත්‍යාංශය විසින් චක්‍රලේඛ මගින් උපදෙස් හා නිර්ණායක හඳුන්වා දුන්නද එම විධිවිධාන ඉක්මවා කටයුතු කිරීම මෙම වැඩිදුර පරීක්ෂාවට හේතු වූ බවයි.
පාසලක 1 ශ්‍රේණියේ සිට 5 ශ්‍රේණිය දක්වා පන්තියක උපරිම සිසුන් 40ක් හා 6 ශ්‍රේණියේ සිට 11 ශ්‍රේණිය දක්වා එක් පන්තියක උපරිම සිසුන් 45ක් සිටිය යුතු බවට විධිමත් පරදි නිශ්චය කර ඇතත්, ප්‍රමාණය ඉක්මවා සිසුන් ඇතුළත් කර තිබීම හේතුවෙන් සිසුන් මෙන්ම ගුරුවරුන්ද මානසික වශයෙන් මෙන්ම භෞතික වශයෙන්ද පීඩාවට පත්වී ඇති බව එම වාර්තාවේ විගණකාධිපතිවරයා සඳහන් කරයි.
එම වාර්තාවේ ඇති තොරතුරුවලට අනුව 2020 ජනවාරි 01 දින සිට 2022 මැයි 31 දක්වා චක්‍රලේඛ මගින් හඳුන්වා දී ඇති විධිමත් ක්‍රමවේදයන්ගෙන් බැහැරව අධ්‍යාපන අමාත්‍යාංශයේ ලේකම්වරයා විසින් විදුහල්පතිවරුන් අමතා නිකුත් කර ඇති ලිපි උපයෝගි කරගෙන සිසුන් 2237ක් ඇතුළත් කර ගැනීමට විදුහල්පතිවරුන්ට සිදුවී ඇත.
ඒ සඳහා විධිමත් ක්‍රමවේදයෙන් බැහැරව අධ්‍යාපන අමාත්‍යාංශ ලේකම්වරයා විදුහල්පතිවරුන්ට ලිපි 3308ක් නිකුත් කර ඇති අතර ඉන් ලිපි 2367ක පමණ ප්‍රමාණයක් හෙවත් සියයට 72ක ප්‍රමාණයක් නිකුත් කර ඇත්තේ අමාත්‍යවරුන්ගේ, පාර්ලිමේන්තු මන්ත්‍රීවරුන්ගේ, අනෙකුත් මහජන නියෝජිතයන්ගේ, දෙපාර්තමේන්තු ප්‍රධානීන්ගේ, ජනාධිපති කාර්යාලයේ, අගමැති කාර්යාලයේ ආදි විවිධ තැනැත්තන්ගේ හා කාර්යාල වෙතින් ලද ඉල්ලීම් අනුවය.
අධ්‍යාපන අමාතයාංශයේ ලේකම්වරයා වෙත ඉල්ලීම්/ නිර්දේශ/ අනුග්‍රහකත්ව/නියෝග ලෙස ලැබී ඇති මුළු ලිපි සංඛ්‍යාව 2367ක් වන අතර ඒ අමාත්‍යවරුන්ගෙන් 861ක්, පාර්ලිමේන්තු මන්ත්‍රීවරුන්ගෙන් 654ක්, අමාත්‍යාංශ ලේකම්වරු/ දෙපාර්තමේන්තු ප්‍රධානීන්ගෙන් 190ක්, අගමැති කාර්යාලයෙන් 160ක්, පූජ්‍ය පක්ෂයෙන් 72ක්, ප්‍රාදේශීය සභා මන්ත්‍රීවරුන්ගෙන් 53ක්, අධිකරණ සේවා කොමිෂන් සභාවෙන් 46ක්, අධ්‍යාපන අමාත්‍යාංශයේ කාර්ය මණ්ඩලයෙන් 45ක්, පාර්ලිමේන්තු මන්ත්‍රීවරුන්ගේ පෞද්ගලික කාර්ය මණ්ඩලයෙන් 43ක්, අධ්‍යාපන අමාත්‍යාංශයේ නිලධාරීන්ගෙන් 40ක්, පාසල්වල ආදි ශිෂ්‍ය සංගම්වලින් 39ක්, දේශපාලන පක්ෂවලට සෘජු සම්බන්ධ සමිති/ වෘත්තීය සමිති/සංවිධානවලින් 36ක්, විවිධ වෘත්තිකයන්ගේ සංගම්වලින් 25ක්, පාර්ලිමේන්තුවෙන් 24ක්, ආරක්ෂක අංශ ප්‍රධානීන් සහ රණවිරු සේවා අධිකාරියෙන් 20ක්, ජනාධිපති කාර්යාලයෙන් 20ක්, පළාත් සභා මන්ත්‍රීවරුන්ගෙන් 15ක්, අධ්‍යාපන ඇමතිවරයාගේ පෞද්ගලික කාර්ය මණ්ඩලයෙන් 10ක්, විදේශ කටයුතු අමාත්‍යාංශයෙන් 06ක්, විවිධ මුද්‍රිත හා විද්‍යුත් මාධ්‍යයන්ට සම්බන්ධ පුද්ගලයන්ගෙන් 05ක් හා ආණ්ඩුකාරවරුන්ගෙන් 02ක් වශයෙනි.
තවද අධ්‍යාපන අමාත්‍යාංශය හා එයට අනුබද්ධ ආයතනවල සේවය කරනු ලබන නිලධාරීන්ගේ දරුවන් ජාතික පාසල්වලට ඇතුළත් කිරීමේදී අනෙකුත් දෙමාපියන්ට ලබාදී නොමැති වරප්‍රසාද ලබාදීමට කටයුතු කර ඇති බවත්, විධිමත් අයැදුම් පත්‍රයක් හෝ ඉදිරිපත් කර නොමැති අවස්ථාවලදී විදුහල්පතිවරුන් අමතා අධ්‍යාපන අමාත්‍යාංශ ලේකම්වරයා සෘජුවම ලිපි නිකුත් කර ඇති බවත්, විධිමත් ක්‍රමයෙන් තොරව නිකුත් කර ඇති ලිපි දෙමාපියන්ට සෘජුව ලැබීමට සැලැස්වීමෙන් තොරව බාහිර පාර්ශවයන් වෙතට පත් කිරීම සිදු කර ඇති බවත් එම වාර්තාව සඳහන් කරයි.
ඒ අනුව පාසල්වලට ලිපි නිකුත් කිරීමේදී විධිමත් අයැදුම් පත්‍රයක් තිබූ අවස්ථා 251කට මෙන්ම විධිමත් අයදුම් පත්‍රයක් නොතිබූ අවස්ථා 3308කට ද අධ්‍යාපන අමාත්‍යාංශ ලෙක්ම්වරයා ලිපි නිකුත් කර ඇත.
එමෙන්ම ලිපිගොනු නම් කිරීමේදී සිසුවා/දෙමාපියන්/භාරකරුවන්ගේ නමින් නම් කිරීම වෙනුවට අධ්‍යාපන අමාත්‍යාංශයට එම ඉල්ලීම් යොමු කළ මහජන නියෝජිතයන්/ දේශපාලන අධිකාරිය හෝ වෙනත් බලපෑම් කළ හැකි පුද්ගලයන්ගේ නමින් නම්කර තිබුණ බවද විගණකාධිපතිවරයා සඳහන් කරයි. එසේම දේශපාලන නියෝජිතයන් විසින් සකස් කරන ලද ලේඛනයකට ප්‍රමුඛතාව දෙන ලෙස ඉල්ලමින් අධ්‍යාපන ලේකම් වෙත ඉල්ලීම් ඉදිරිපත් වී තිබුණ බවත්, මෙම සියලු කරුණු හේතුවෙන් බලපෑම් කළ හැකි කණ්ඩායම්වල අනුග්‍රහයක් නොමැති දෙමාපියන්ගේ සුදුසුකම් සපුරාලන සිසුන්ට ජනප්‍රිය ලෙස හඳුනාගෙන ඇති ජාතික පාසලකට ඇතුලත් වීමේ සම ප්‍රවේශ අවස්ථාව අහිමි වී ඇති බැවින් එම තත්වය නිවැරදි කිරීමට ලබාදී ඇති නිර්දේශයන් කෙරෙහි අවධානය යොමුකළ යුතු බවද විගණකාධිපතිවරයා සඳහන් කරයි.
එම නිර්දේශයන් ලෙස දක්වා ඇත්තේ, ජාතික පාසල්වලට සිසුන් ඇතුලත් කිරීමේදී නීතිරීති, රෙගුලාසිවලට අනුගත වීම, විශේෂ වරප්‍රසාද ලබාදීමේ අවස්ථාවන් නැවත විමර්ශණය කිරීම, සිසුන්ට නිදහස් මනසකින් අධ්‍යාපනය ලැබීමට අවස්ථාව ලබාදීම, සිසුන් ඇතුළත් කිරීමේ ක්‍රියාවලිය සම්බන්ධයෙන් වැඩිදුර පරීක්ෂා කිරීම, රජයේ නිලධාරීන්ගේ කාර්යභාරය තුළ බාහිර පාර්ශ්වයන්ගේ මැදිහත්වීම ඉවත් කිරීම, සියලු රජයේ පාසල්වල ගුණාත්මක මට්ටම උසස් කිරීමට අවශ්‍ය විධිවිධාන ඇති කිරීම, සිසුන් ඇතුළත් කිරීම සඳහා විදුහල්පතිවරුන් වෙත සිදු කරනු ලබන අනිසි බලපෑම් ඉවත් කිරීම, අතරමැදි ශ්‍රේණි සඳහා සිසුන් ඇතුළත් කිරීමේ අභ්‍යන්තර පාලන ක්‍රමවේදය විධිමත් කිරීම යන ඒවාය.
එමෙන්ම චක්‍රලේඛ මගින් විදුහල්පතිවරුන් විසින් පත්කරන ලද අතරමැදි පන්තිවලට සිසුන් ඇතුළත් කිරීමේ කමිටුවලට පරිබාහිරව අධ්‍යාපන අමාත්‍යාංශ ලේකම්වරයා විසින් 2020 නොවැම්බර් 05 දින සිට 2021 පෙබරවාරි 28 දින දක්වා පත්කරන ලද කමිටුවක් මගින් ලබාදෙන ලද නිර්දේශයන් ඇතුළත් ලිපි ගොනු 70ක ඇතුළත් ලිපි පිටපත් 1467ක්ද විගණනය පරීක්ෂාවට ලක්කර ඇත.
අධ්‍යාපන අමාත්‍යාංශ ලේකම්වරයා සෘජුවම පත්කළ කමිටුවට ඉල්ලීම්/ නිර්දේශ/ අනුග්‍රහකත්ව/ අභියාචනා/ නියෝග ලෙස ලිපි 227ක් ලැබී ඇති අතර ඒ විවිධ වෘත්තිකයන්ගෙන් සමන්විත සංගම් වෙතින් 99ක්, අධිකරණ සේවා කොමිෂන් සභාවෙන් 13ක්, පාර්ලිමේන්තු මන්ත්‍රීවරුන්ගෙන් 48ක්, ජනාධිපති කාර්ය මණ්ඩලයෙන් 02ක්, අගමැති පෞද්ගලික කාර්ය මණ්ඩලයෙන් 24ක්, පූජ්‍ය පක්ෂය හා පූජනීය ස්ථාන භාරකරුවන්ගෙන් 05ක්, අමාත්‍යාංශ ලේකම්වරු සහ දෙපාර්තමේන්තු ප්‍රධානීන්ගෙන් 12ක් ලෙසය. එම ලිපි යොමුකළ පිරිස අතර අධ්‍යාපන අමාත්‍යවරයාගේ පෞද්ගලික කාර්ය මණ්ඩලය හා අධ්‍යාපන අමාත්‍යාංශයේ කාර්ය මණ්ඩලය, විදුහල්පතිවරුන්, ආදි ශිෂ්‍ය සංගම්, රජයේ ආරක්ෂක අංශ හා ආණ්ඩුකාරවරුද ඇතුලත් බව එම වාර්තාවේ රූප සටහන්වල දැක්වේ.
එසේම එම ලිපි නිකුත් කිරීමේදී කොන්දේසි සහිත ලිපි මෙන්ම කොන්දේසි රහිත ලිපිද නිකුත් කර ඇත. ශිෂ්‍යයන් ඇතුළත් කළ බව අනුමත කළ බව සඳහන් කරමින් කොන්දේසි රහිත ලිපි 2864ක් නිකුත් කර ඇති අතර චක්‍රලේඛ විධිවිධාන ප්‍රකාරව අනුමත ශිෂ්‍ය සංඛ්‍යාවට යටත්ව සිසුන් ඇතුලත් කරන ලෙස දන්වා ලිපි 159ක් නිකුත් කර ඇත. පුරප්පාඩු ඇත්නම් ශිෂ්‍යයා ඇතුළත් කරන ශ්‍රේණිභාර ගුරුවරයාගේ තහවුරුව මත සිසුන් ඇතුළත් කරන ලෙස දන්වා ලිපි 123ක්ද, ශිෂ්‍යයන් ඇතුළත් කිරීමේ වගකීම විදුහල්පති භාරගත යුතු බව දන්වමින් ලිපි 24ක්ද, විදුහලේ අදාළ ශ්‍රේණියේ පවතින ශිෂ්‍ය සංඛ්‍යාව පවතින ආයතනික විධිවිධානවලට අනුකූල වේ නම් පාසලට ඇතුළත් කිරීම සම්බන්ධව කාරුණිකව සලකා බලන ලෙස දන්වමින් ලිපි 295ක්ද, ‘ඉල්ලීමක් ඉදිරිපත්ව ඇත මේ සම්බන්ධයෙන් අවශ්‍ය කටයුතු සලකා බලන ලෙස කාරුණිකව දන්වන අතර ඔබ දක්වන සහයෝගයට කෘතඥ වෙමි’ යනුවෙන් සඳහන් කරමින් ලිපි 11ක්ද, වෙනත් ලිපි 85ක්ද නිකුත් කර ඇත.
අතිශය තරගකාරී පාසල් 34කට හා විගණනය විසින් ඇතැම් දිස්ත්‍රික්කවල තෝරාගත් තරගකාරී පාසල් වෙත ළමයින් ඇතුළත් කිරීම සම්බන්ධයෙන් අධ්‍යාපන අමාත්‍යාංශ ලේකම්වරයා විසින් නිකුත් කර ඇති ලිපි ප්‍රමාණයන් මෙසේය.
ආනන්ද විද්‍යාලයට 236, විශාකා විද්‍යාලයට 183, රාජකීය විද්‍යාලයට 138, සිරිමාවෝ බාලිකා විද්‍යාලයට 130, නාලන්දා විද්‍යාලයට 122, නුගේගොඩ අනුලා බාලිකා විද්‍යාලයට 120, කුරුණෑගල මලියදේව විද්‍යාලයට 119, ධර්මරාජ විද්‍යාලයට 116, මාතර රාහුල විද්‍යාලයට 108, හොරණ තක්ෂිලා විද්‍යාලයට 104, ගම්පහ බණ්ඩාරනායක විද්‍යාලයට 102, මහනුවර උසස් බාලිකා විද්‍යාලයට 96, පොළොන්නරුව රාජකීය විද්‍යාලයට 95, කුරුණෑගල මලියදේව බාලිකා විද්‍යාලයට 90, මාතර සුජාතා බාලිකා විද්‍යාලයට 75, කිංස්වුඩ් විද්‍යාලයට 74, ගම්පහ රත්නාවලී බාලිකා විද්‍යාලයට 73, හෝමාගම මහින්ද රාජපක්ෂ විද්‍යාලයට 71, මහනුවර මහාමාමා බාලිතා විද්‍යාලයට 70, මිලාගිරිය ශාන්ත පාවුළු බාලිකා විද්‍යාලයට 65, රිච්මන්ඩ් විද්‍යාලයට 64, කොළඹ මහනාම විද්‍යාලයට 63, අනුරාධපුර මධ්‍ය මහා විද්‍යාලයට 61, හංවැල්ල රාජසිංහ මධ්‍ය මහා විද්‍යාලයට 56, ගාල්ල සංඝමිත්තා බාලිකා විද්‍යාලයට 50, පන්නිපිටිය ධර්මපාල විද්‍යාලයට 47, බදුල්ල මධ්‍ය මහා විද්‍යාලයට 45, ඉසිපතන විද්‍යාලයට 44, රත්නපුර සීවලී විද්‍යාලයට 44, වේයන්ගොඩ බණඩාරනායක විද්‍යාලයට 43, කිරිබත්ගොඩ විහාරමහා දේවි බාලිකා විද්‍යාලයට 42, රත්නපුර ෆර්ගසන් උසස් බාලිකා විද්‍යාලයට 40, දේවි බාලිකා විද්‍යාලයට 35, ගාල්ල සවුත්ලන්ඩ්ස් බාලිකා විද්‍යාලයට 35, කුලියාපිටිය මධ්‍ය මහා විද්‍යාලයට 34, බණ්ඩාරවෙළ මධ්‍ය මහා විද්‍යාලයට 30 හා හේනේගම ජාතික පාසලට 19 වශයෙනි.
චක්‍රලේඛ සීමාව ඉක්මවා රාජකීය, දේවී බාලිකා, නාලන්දා, ඩීඑස් සේනානායක, විශාකා, සිරිමාවෝ බණ්ඩාරනායක, ආනන්ද, මලියදේව බාලිකා, මලියදේව, ධර්මරාජ, උසස් බාලිකා, කිංස්වුඩ්, මහාමායා බාලිකා, පුෂ්පදාන බාලිකා, ගම්පහ බන්ඩාරනායක හා ගම්පහ රත්නාවලී බාලිකා යන පාසල් සිසුන් ඇතුළත් කර ඇත. ඒ අනුව එම පාසල්වල සිසුන් 1ත් 5ත් අතර සංඛ්‍යාවක් වැඩියෙන් ඇතුළත් කර ඇති පන්ති සංඛ්‍යාව 419ක් වන අතර සිසුන් 6ත් 10ත් අතර වැඩියෙන් ඇතුළත් කර ඇති පන්ති සංඛ්‍යාව 250කි. සිසුන් 11ත් 15ත් අතර වැඩියෙන් ඇතුළත් කර ඇති පන්ති සංඛ්‍යාව 32ක් වන අතර සිසුන් 16ට වැඩියෙන් ඇතුළත් කර ඇති පන්ති සංඛ්‍යාව 2කි.
විගණනයට භාජනය කරන ලද ජාතික පාසල් 16 අතුරින් පාසල් 12ක ප්‍රාථමික පන්ති පැවැත්වෙන අතර එම පාසල් 6 ශ්‍රේණියේ පවතින පුරප්පාඩු සඳහා ශිෂ්‍යත්ව ප්‍රතිඵල මත සිසුන් ඇතුළත් කර ගැනීමෙන් තොරව එම පුරප්පාඩු 7 ශ්‍රේණිය හෝ ඊට ඉහළ ශ්‍රේණියකදී පිරවීමට කටයුතු කර ඇත. එම පාසල් වශයෙන් රාජකීය විද්‍යාලය හා කොළඹ ඩීඑස් සේනානායක විද්‍යාලය හඳුනාගෙන ඇත. ඒ අනුව රාජකීය විද්‍යාලය පුරප්පාඩු 5ක් ඉතිරි කරගෙන ඇති අතර ඩීඑස් සේනානායක විද්‍යාලය පුරප්පාඩු 17ක් ඉතිරි කරගෙන ඇත.
එමෙන්ම චක්‍රලේඛවලින් අනුමත සංඛ්‍යාව ඉක්මවා 5 ශ්‍රේණියට සිසුන් ඇතුළත් කර ගැනීම හේතුවෙන් අධ්‍යාපන අමාත්‍යාංශය විසින් යොමු කරන ලද 5 ශ්‍රේණිය ශිෂ්‍යත්වලාභීන් මුළු සංඛ්‍යාවම එකී පාසල් බඳවාගෙන නැත.
ඒ අනුව විශාකා විද්‍යාලය 41ක්, ආනන්ද විද්‍යාලය 48ක්, නාලන්දා විද්‍යාලය 38ක් සිරිමාවෝ බණ්ඩාරනායක විද්‍යාලය 33ක්, මලියදේව විද්‍යාලය 31ක්, මලියදේව බාලිකා විද්‍යාලය 48ක්, ධර්මරාජ විද්‍යාලය 29ක්, මහාමායා විද්‍යාලය 30ක්, කිංස්වුඩ් විද්‍යාලය 15ක් උසස් බාලිකා විද්‍යාලය 31ක් වශයෙන් වැඩිපුර සිසුන් 5 ශ්‍රේණියේදී බඳවාගෙන ඇත.
ප්‍රවාහන අපහසුතා හේතුවෙන් පදිංචියට ආසන්න පාසල් වෙත සිසු සිසුවියන් තාවකාලිකව අනුයුක්ත කිරීම යටතේ ජාතික පාසල් අධ්‍යක්ෂ විසින් ලිපි නිකුත් කර ඇති අතර ඒ මගින් කියා ඇත්තේ තාවකාලිකව සිසුන් අනුයුක්ත කිරීමේදී තාවකාලිකව ඉල්ලුම් කරනු ලබන පාසලේ ශිෂ්‍යත්ව කඩඉම් ලකුණු අදාළ සිසුන්ගේ නිත්‍ය පාසලේ ශිෂ්‍යත්ව කඩඉම් ලකුණු නොඉක්මවිය යුතු යන්නය. ඒ ආකාරයට තාවකාලිකව ඇතුලත් කළ සිසුන් ස්ථීරවම ඇතුළත් කළ අවස්ථා හමුවී ඇත. ඒ කොළඹ රත්නාවලි බාලිකා විද්‍යාලයෙන් කොළඹ සිරිමාවෝ බාලිකා විද්‍යාලයට, මතුගම සීඩබ්ඩබ් කන්නන්ගර විද්‍යාලයෙන් කොළඹ සිරිමා බණ්ඩාරනායක විද්‍යාලයට, පන්නිපිටිය ධර්මපාල විද්‍යාලයෙන් කොළඹ ආනන්ද විද්‍යාලයට, මහනුවර අඹතැන්න ආදර්ශ පාසලෙන් මහනුවර මහාමායා බාලිකා විද්‍යාලයට හා සසෙක්ස් විද්‍යාලයෙන් මහනුවර මහාමායා විද්‍යාලයටය.
විගණකාධිපතිවරයා තොරතුරු කැඳවූ නියැදි පාසල් 41න් පාසල් 4ක් ඒ සඳහා තොරතුරු ලබාදී නැති බවද එම වාර්තාව වැඩිදුරටත් සඳහන් කරයි. මෙම කරුණු අපට යළි යළිත් පෙන්නුම් කරන්නේ ළමයින් පාසල්වලට ඇතුළත් කිරීමේ ක්‍රියාවලිය කොතරම් දූෂිත යන්න පමණක් නොවේ. ඒ සඳහා මොනයම් ආකාරයකින් හෝ දායක වී ඇති පිරිස බලවත් පුද්ගලයින් බවයි. ඒ නිසාම කිසිවකුගේ විරුද්ධත්වයක් නැතිව ජාතික පාසල් නම් වූ ප්‍රභූ පාසල් පද්ධතිය මහජනයාගේ බදු මුදල් වැඩියෙන් වැය කරමින් ප්‍රභූ දරුවන්ගේ අධ්‍යාපන අවශ්‍යතා සඳහා ඒ ආකාරයෙන්ම පවත්වාගෙන ගොස් ඇති බවයි.
