ශ්‍රී ලංකා ක්‍රිකට් බොරු කියයි..!

ජනාධිපති මාධ්‍ය අංශය බොරු කියයි
කෝප් සභාපති පක්ෂග්‍රාහී වෙයි
මන්ත්‍රීවරුන් විරුද්ධ වෙයි

‘අයිසීසී තහනම ඉවත් කර ගැනීම සහ ක්‍රිකට් තරගාවලි අහිමිවීම පිළිබඳ සාකච්ඡා කර තීරණ ගැනීමේ බලය අමාත්‍ය අනු කමිටුවට’ එම උධෘතයෙන් යුතු ප්‍රවෘත්තියක් පලකර ඇත්තේ ජනාධිපති මාධ්‍ය අංශයේ නිල වෙබ් අඩවිය තුළය. ඒ නොවැම්බර් 14 දින සහිතවය. ජනපති කැබිනට් මණ්ඩලයේදී තීරණය කරයි යනුවෙන් එහි උප ශීර්ෂයක්ද යොදා තිබේ.

ජනාධිපති මාධ්‍ය අංශයේ එම සම්පූර්ණ වාර්තාව මෙසේය. ‘ දැනට පනවා ඇති ජාත්‍යන්තර ක්‍රිකට් කවුන්සිලයේ (icc) තහනම ඉවත් කිරීමට අදාළ කටයුතු මෙහෙයවීමත්, යම් ක්‍රිකට් තරගාවලියක් ශ්‍රී ලංකාවට අහිමි වීමේ අවදානමක් පවතින්නේ නම් ඒ පිළිබඳව සාකච්ඡා කර වහාම තීරණ ගැනීමේ බලයත් ක්‍රිකට් සඳහා පත්කර ඇති විදේශ අමාත්‍ය අලි සබි්‍ර මහතාගේ ප්‍රධානත්වයෙන් යුත් අමාත්‍ය අනුකමිටුව වෙත පැවරීමට ඊයේ (13) පැවති කැබිනට් මණ්ඩල රැස්වීමේදී ජනාධිපති රනිල් වික්‍රමසිංහ මහතා තීරණය කළේය.

එසේම මින් ඉදිරියට අතුරු කමිටු පත් කරන්නේ නම් ඊට කැබිනට් මණ්ඩලයේ අනුමැතිය අත්‍යවශ්‍ය බවටද කැබිනට් මණ්ඩලයේදී තීරණය කෙරිණි.’ මේ නිවේදනය සම්බන්ධයෙන් ප්‍රතිචාර දක්වමින් ක්‍රීඩා ඇමති රොෂාන් රණසිංහ සඳහන් කර ඇත්තේ එවැනි කිසිදු කැබිනට් නියෝගයක් නැති බවත්, ඒ පිළිබඳ සාකච්ඡාවක්ද නොතිබූ බැවින් ජනාධිපති මාධ්‍ය අංශයේ නිවේදනය නිවැරදි කළ යුතු බවයි.

නොවැම්බර් 13 වැනිදා පැවති කැබිනට් මණ්ඩල තීරණ රජයේ නිල වෙබ් අඩවිය වන www.news.lk හෝ කැබිනට් මණ්ඩල වෙබ් අඩවිය වන www.cabinetoffice.gov.lk යන වෙබ් අඩවිවල නොවැම්බර් 16 වැනිදා පෙරවරුව වනවිටත් පලකර තිබුණේ නැත. ක්‍රීඩා ඇමති රොෂාන් රණසිංහ නිවේදනය කර ඇති පරිදි ජනාධිපති මාධ්‍ය අංශය පැල කරන ලද බොරුව වසා ගැනීම සඳහා කැබිනට් තීරණ එසේ පල නොකළාද විය හැකිය. නැත්නම් එම වෙබ් අඩවිවල කැබිනට් මණ්ඩල රැස්වීමට පසුදා කැබිනට් මණ්ඩල තීරණ පලකිරීම සිදුකරයි.( එහිදී සියළු කැබිනට් තීරණ පල නොකරන බව හා විශේෂයෙන් මහජනතාව වැදගත් වන තීන්දු ප්‍රකාශයට පත් නොකරන බවද මතක තබා ගන්න)

ජනාධිපති මාධ්‍ය අංශය මේ ආකාරයට පුවත් පැල කිරීම පටන් ගත්තේ පළාත් පාලන මැතිවරණය සම්බන්ධ මහත් වාද විවාද තිබූ කාලයේදීය. එහිදීත් ජනාධිපති මාධ්‍ය අංශයේ නිල නිවේදන මගින් මෙතරම් නිර්ලජ්ජිතව බොරු සමාජ ගත කළේ නැත. එහිදී සිදුකලේ ජනාධිපති මාධ්‍ය අංශයේ සේවකයන් විසින් මාධ්‍යවේදීන්ට හා මාධ්‍ය ආයතනවලට එම පැල කරන ලද ප්‍රවෘත්ති පෞද්ගලික මට්ටමින් යොමු කිරීමය.

ක්‍රිකට් සම්බන්ධයෙන් තමාට පෞද්ගලික ලැදියාවක් නැතැයි ජනාධිපතිවරයා කෙසේ කීවත් ජනාධිපති මාධ්‍ය අංශයේ මෙවැනි ප්‍රවෘත්ති පැල කිරීම් මගින් පෙන්නුම් කරන්නේ ක්‍රිකට් සම්බන්දයෙන් ජනාධිපතිවරයාගේ ඇති ලැදියාවය. ඔහු ක්‍රීඩා ඇමති රොෂාන් රණසිංහ විසින් පත්කළ ක්‍රිකට් අතුරු කමිටුවට විකල්පයක් ලෙස පත්කළ අලි සබ්රි ඇමතිගේ ප්‍රධානත්වයෙන් යුත් ඇමති කමිටුව පෙන්නුම් කළේද එම ලැදියාවය. ඊටත් පෙර එම ලැදියාව ඔහු පෙන්නුම් කරනු ලැබුයේ ක්‍රීඩා පනත සංශෝධනය කිරීම සඳහා ඇමති රොෂාන් රණසිංහ කැබිනට් මණ්ඩලයට ඉදිරිපත් කළ කෙටුම්පත සම්බන්ධයෙන් සාගල රත්නායකගේ ප්‍රධානත්වයෙන් කමිටුවක් පත් කිරීම මගින්ය. ක්‍රීඩා ඇමති රොෂාන් රණසිංහ ඒ ගැන පාර්ලිමේන්තුවේදී කියූ කරුණු අනුව සාගල රත්නායක උත්සාහ කර ඇත්තේ හොරුන්ට තවත් හොරකම් කළ හැකි ආකාරයේ සංශෝධන කරන ලෙස බලපෑම් කිරීමය.

ජනාධිපති මාධ්‍ය අංශයේ නිවේදනය බොරුවක් වූවත් ඒ මගින් අවධාරණය කරන කරුණ ඉතා භයානක එකකි. ඒ ක්‍රීඩා පනත යටතේ ක්‍රීඩා ඇමතිවරයාට ලබාදී ඇති බලතල ක්‍රියාත්මක කිරීමද විධායකය හෙවත් කැබිනට් මණ්ඩලයේ අනුමැතිය ඇතිව සිදුකළ යුතු බවට තීරණය කිරීමය. නීති පනවන්නේ ව්‍යවස්ථාදායකය හෙවත් පාර්ලිමේන්තුව වන අතර ඒවා සංශෝධනය කිරීමේ බලය ඇත්තේද පාර්ලිමේන්තුවටය. වගකීමේ බෝලය අනුන්ට පාස් කරන්නට ඕනෑ වූ අවස්ථාවලදී නීති සෑදීමේ බලය ඇත්තේ මට නොවේ පාර්ලිමේන්තුවට යැයි කියා ඇඟ බේරා ගන්නා ජනාධිපති මේ අවස්ථාවේ නම් ව්‍යවස්ථාදායකය වෙනත් අයකුට ලබාදුන් බලයකට ඇඟිලි ගසා ඇත. මේ අවස්ථාවේ ඔහු කරන්නට උත්සාහ කර ඇත්තේ එසේ ව්‍යවස්ථාදායකය විසින් ක්‍රීඩා ඇමතිවරයාට ලබාදී ඇති බලයක් ඔහු යටතට ගැනීමට උත්සාහ කිරීමය. නැත්නම් එම බලය නැවැත්වීමට උත්සාහ කිරීමය.

ක්‍රීඩා ඇමති රොෂාන් රණසිංහ ශ්‍රී ලංකා ක්‍රිකට් ආයතනයේ ලියාපදිංචිය අත්හිටුවා ඇත්තේ 1973 අංක 25 දරන ක්‍රීඩා පනතේ 32 වන වගන්තිය යටතේ ඔහුට පවරා ඇති බලය යටතේය. එසේම එම අත්හිටුවීමත් සමඟ ශ්‍රී ලංකා ක්‍රිකට් ආයතනය සඳහා අතුරු කමිටුවක් ඔහු පත්කර ඇත්තේද එම පනතේ 33 වන වගන්තිය යටතේ ඔහුට ලබාදී බලතල යටතේය. සියල්ලම තීරණය කරන්නේ ජනාධිපතිවරයා නම් ඇමතිවරුන්ද, ඔවුන්ට බලය පැවරුණ ව්‍යවස්ථාදායකය විසින් සම්මත කරන ලද නීති ද ඵලක් වන්නේ නැත.

ක්‍රීඩා ඇමතිවරයාගේ අතුරු කමිටුව අත්හිටුවමින් අභියාචනාධිකරණය ලබාදුන් තීන්දුවෙන් පසු ඒ සම්බන්ධයෙන් ක්‍රීඩා ඇමතිවරයා මේ වනවිට විරෝධතා ගොනු කර ඇති අතර ඒ සඳහා නීතිපතිවරයාගේ සහාය ලබාගෙන නැත. ශ්‍රී ලංකා ක්‍රිකට් සම්බන්ධ පාර්ලිමේන්තු විවාදයේදී රොෂාන් රණසිංහ කීවේ ක්‍රිකට් සම්බන්ධයෙන් වූ අධිකරණ කටයුතු ඔහු දැනුම් දුන්නද නීතිපතිවරයා මඟහැරි බව හා ඒ සම්බන්ධයෙන් ඉදිරියට ඔහු පෞද්ගලික නීතිඥවරුන්ගේ සහාය ලබා ගන්නා බවයි.

එම අත්හිටුවීමේ තීන්දුව ලබාදුන් අභියාචනාධිකරනයේ සභාපති විනිසුරු නිශ්ශංක බන්දුල කරුණාරත්න එම විනිශ්චය මණ්ඩලයෙන් මෙම සටහන ලියන මොහොත වනවිට ඉවත් වී ඇති අතර ඒ සඳහා හේතුව වශයෙන් ඔහු ප්‍රකාශ කර ඇත්තේ ක්‍රීඩා ඇමතිවරයා හා තවත් මන්ත්‍රීවරු පාර්ලිමේන්තුවේදී ඔහු සම්බන්ධයෙන් අසාධාරණ විවේචනයන් ඉදිරිපත් කර ඇති බවය. එමෙන්ම එම නඩුව විභාග කළ විනිසුරු ධම්මික ගනේපොලද නඩුවෙන් ඉවත් වී ඇති අතර ඒ පෞද්ගලික හේතුවක් බව ප්‍රකාශ කරමින්ය. මේ නිසා එම නඩුව සඳහා වෙනත් විනිසුරු මඩුල්ලක් අභියාචනාධිකරණ සභාපති විනිසුරු නිශ්ශංක බන්දුල කරුණාරත්න විසින්ම පත් කිරීමට නියමිතය.

ජනාධිපතිවරයා පත්කළ ජනාධිපති කාර්යාලයේ රැස්වූ අලි සබ්රිගේ කමිටුව හමුවට ශ්‍රී ලංකා ක්‍රිකට් ආයතනයේ නිලධාරීන් කැඳවූ බවට මාධ්‍ය වාර්තා පළ වූවත් එහිදී සිදුවී ඇත්තේ කුමක්ද යන්න වාර්තා වූයේ නැත. එහෙත් ශ්‍රී ලංකා ක්‍රිකට් ආයතනයේ නිලධාරීන් පාර්ලිමේන්තුවේ කෝප් කමිටුව හමුවට නොවැම්බර් 14 වැනිදා කැඳවා තිබූ අතර තවදුරටත් ශ්‍රී ලංකා ක්‍රිකට් ආයතනය සම්බන්ධයෙන් විමර්ශන ඉදිරි දින තුනකදී පැවැත්වීමට ද තීරණය කර ඇත. නොවැම්බර් 14 දින කැඳවීම සම්බන්ධයෙන් පාර්ලිමේන්තුවේ සන්නිවේදන අංශය නිවේදනයක් නිකුත් කර ඇති එහි සඳහන් වන්නේ විගණකාධිපතිවරයාගේ විශේෂ විගණනය සඳහා සඳහා හේතු වූ ටී 20 ලෝක කුසලාන තරගාවලියට සහභාගී වීම සඳහා ක්‍රීඩා ඇමතිවරයා අනුමැතිය ලබාදී නැති බවත්, ආවරණ අනුමැතියට යටත්ව ක්‍රීඩා අමාත්‍යාංශයේ හිටපු ලේකම්වරයා අනුමැතිය ලබාදී ඇති බවත්ය. ඒ නිසා හිටපු ලේකම්වරයා කෝප් කමිටුව හමුවට කැඳවීමට තීරණය කර ඇත.

එම ඕස්ටේලියනු සංචාරය වෙනුවෙන් විධායක කමිටු සාමාජිකයන් සඳහා ගෙවිය යුතු බවට ගිණුමගත කර තිබූ රුපියල් මිලියන 8කට ආසන්න මුදලක් විගණන පරික්ෂාව අතරතුර ගිණුම්වලින් ඉවත් කිරීම සහ ඊට අදාළ බිල්පත් විගණනයට ඉදිරිපත් නොකිරීම පිළිබඳ සාකච්ඡා කර තිබේ. එම සංචාරය සඳහා වීසා ලිපි නිකුත් කිරීම, ගුවන් ටිකට් පත් මිලදී ගැනීම, මාධ්‍ය ආයතන තෝරා ගැනීම සාකච්ඡා කෙරී ඇති අතර ශ්‍රී ලංකා ක්‍රිකට් අභ්‍යන්තර විගණනය ශක්තිමත් කිරීම සම්බන්ධයෙන්ද සාකච්ඡා කෙරී ඇත.

එම කෝප් කමිටු සාකච්ඡාව සම්බන්ධයෙන් ඊට වඩා වැඩි තොරතුරු වාර්තා කරමින් මාධ්‍ය වාර්තා කර ඇත්තේ ශ්‍රී ලංකා ක්‍රිකට් සභාපති ෂම්මි සිල්වා ඔහුගේ පවුලේ සාමාජිකයන්ට හා හිතවතුන්ට වීසා ලබා ගැනීමට ලිපි නිකුත් කළ බව පිළිගෙන ඇති බවයි. එසේම ශලනි තාරුකා ඇතුළු රංගන ශිල්පිනියන්ට වීසා ලිපි නිකුත් කළේ ජයන්ත ධර්මදාසගේ ඉල්ලීමට බව කියා ඇති බවයි. එමෙන්ම ජ්‍යෙෂ්ඨ නියෝජ්‍ය පොලිස්පති දේශබන්දු තෙන්නකෝන්ට ආරක්ෂක උපදේශක තනතුරක් ඉදිරිපත් කළ බවද ඔහු එය ප්‍රතික්ෂේප කළ බවද ක්‍රිකට් බලධාරීන් පිළිගෙන ඇත.

එහිදී පැමිණ සිටි මන්ත්‍රීවරු ප්‍රශ්න කර ඇත්තේ එවැනි තනතුරක් පොලිස් සේවයේ සිටින තැනැත්තකුට ඉදිරිපත් කරන්නේ කෙසේද යන්නයි. කණ්ඩායමේ වෛද්‍යවරයා සම්බන්ධයෙන්ද එහිදී ප්‍රශ්න කර ඇති අතර එහිදී හෙළිවී ඇත්තේ එම වෛද්‍යවරයා ක්‍රීඩා වෛද්‍යවරයකු නොවන බව හා ඔහු විසින් ලබාදෙන ‘වන්ෂොට්’ බෙහෙත් නිසා ක්‍රීඩකයින් පසුව අනතුරුවලට ලක්වන බවයි.

එසේම වැඩිදුරටත් ශ්‍රී ලංකා ක්‍රිකට් බලධාරීන් ප්‍රකාශ කර ඇත්තේ ලැබෙන මුදල්වලින් ක්‍රීඩකයන් සඳහා ගෙවන්නේ සියයට 25ක මුදලක් පමණක් බවයි. හෙළිවූ කරුණු එසේ වුවද එම කෝප් කමිටු රැස්වීම සම්බන්ධයෙන් ඊට පසු දින පාර්ලිමේන්තුවේදී දැඩි විවේචන කෝප් කමිටු සභාපති මහාචාර්ය රංජිත් බණ්ඩාරට එල්ල වී ඇත. ඒ මන්ත්‍රීවරුන්ට ශ්‍රී ලංකා ක්‍රිකට් ආයතනයේ නිලධාරීන් ප්‍රශ්න කිරීමට අවස්ථාව ලබා නොදෙමින් බාධා කළ බවටත්, මන්ත්‍රීවරුන්ගේ ප්‍රශ්නවලට පිළිතුරු ලබා නොදෙන ලෙසට ඔහු ක්‍රිකට් බලධාරීන්ට සංඥා මගින් උපදෙස් ලබාදුන් බවටත්ය.

ඒ නිසාම ශ්‍රී ලංකා ක්‍රිකට් ආයතනය ඉදිරි දිනවලදී කැඳවීමේදී මහාචාර්ය රංජිත් බණ්ඩා නොවන සභාපතිවරයකු යටතේ කෝප් කමිටුව කැඳවන ලෙස විපක්ෂ මන්ත්‍රීවරුන් කතානායකවරයාගෙන් ඉල්ලූ අතර ඒ සඳහා ආණ්ඩු පක්ෂය නියෝජනය කරන ප්‍රේමනාත් සී දොලවත්ත මන්ත්‍රීවරයාද එකඟතාව පළකිරීම පෙන්නුම් කරන්නේ කෝප් කමිටු සභාපතිවරයාගේ ශ්‍රී ලංකා ක්‍රිකට් සම්බන්ධයෙන් වන පක්ෂග්‍රාහී හැසිරීමයි. මෙහිදී නිතැතින්ම මතකයට නැඟෙන්නේ මීට දින කිහිපයකට පෙර ශ්‍රී ලංකා ක්‍රිකට් සභාපති ෂම්මි සිල්වා කී කතාවක්ය. ඒ ඔහු සමඟ කාපු බීපු නැති මන්ත්‍රීවරුන් සිටින්නේ අතලොස්සක් බවය.

ඉහතින් සඳහන් කර ඇති බොහෝ කරුණු විගණකාධිපතිවරයාගේ විශේෂ විගණන වාර්තාවේ ඇතුලත් කරුණු වන අතර ශ්‍රී ලංකා ක්‍රිකට් ආයතනය අත්හිටුවීම සඳහා ක්‍රීඩා ඇමතිවරයා ඉදිරිපත් කරන ලද කරුණ වන්නේද එම විශේෂ විගණන වාර්තාවයි. විගණකාධිපතිවරයාගේ එම කරුණු සත්‍ය නම් එවැනි පරිපාලනයක් ගෙන ගිය ශ්‍රී ලංකා ක්‍රිකට් වත්මන් බලධාරීන් එම තනතුරුවලම තවදුරටත් තබාගෙන සිටීමේ තේරුමක් නැත. එමෙන්ම එම නිලධාරීන්ව එම තනතුරුවල තබාගෙන ඒ සම්බන්ධයෙන් තවදුරටත් ගැඹුරු පරීක්ෂණයක් කිරීමටත් හැකි වන්නේ නැත.

ශ්‍රී ලංකා ක්‍රිකට් සම්බන්ධයෙන් සිදුවිය යුත්තේ ටී 20 ලෝක කුසලානය සම්බන්ධයෙන් දැනට හෙළි වී ඇති කරුණු සම්බන්ධයෙන් වෝහාරික විගණනයක් මෙන්ම ඊට පෙර සියළු තරගාවලි හා සියලු ගනුදෙනු සම්බන්ධයෙන්ද වෝහාරික විගණනයකි. එහෙත් ජනාධිපතිවරයාට ඇතැයි පෙනෙන ක්‍රිකට් ලැදියාවන් නිසා ඒවා ඒ ආකාරයෙන්ම කළ හැකිදැයි සැක සිතේ. මන්ද ඇත්ත නැත්ත කිරීමටත් නැත්ත ඇත්ත කිරීමටත් විවිධ ගේම් ගැසීමේ ඔහු දක්ෂයෙක් වන නිසාය.