මුස්ලිම් විරෝධය හා පලස්තීන ජන සංහාරය

සමාජ මාධ්‍ය තුළ එක් විචාර ලිපියක් ආරම්භ කර තිබුණේ මෙසේය. – ‘පලස්තීනය යුද පිටියක් වී තිබේ. ගාසා තීරයේ ඉස්ලාම් අන්තවාදී හමාස් සංවිධානය, ඊශ්‍රායලයට එල්ල කරන ලද රොකට් හා ත්‍රස්ත ප්‍රහාරවලින් පසුව, ඊශ්‍රායලය විසින් එල්ල කරනු ලබන ප්‍රතිප්‍රහාරවලින් පලස්තීන ජනයාට සිදුවන හානිය අති මහත්ය.’

මේ වනාහි කොයිතරම් අවිචාරවත් විචාරයක්ද? මෙය කියවන ඉතිහාසය නොදත් පාඨකයාට සෘජුව සන්නිවේදනය කරන්නේ මේ විනාශකාරී යුද්ධයට ඉස්ලාම් අන්තවාදීන් වගකිව යුතුය. ඊශ්‍රායලය සිදු කර ඇත්තේ තම ගෙදරට ප්‍රහාරයක් එල්ල වෙද්දී ප්‍රතිප්‍රහාර දැක්වීමකි. පලස්තීනය යුද පිටියක් වී ඇත්තේ ඒ නිසාය යනාදි කරුණු නොවෙත්ද?

සත්‍යය කුමක්ද?

1948 සිට වසර 75 පුරාවට ඊශ්‍රායලය විසින් ඇමරිකා-යුරෝපා සහාය ඇතිව පලස්තීන ජන සංහාරයක් ක්‍රියාත්මක කරමින් සිටින බවයි. විටින් විට මෙවැනි දරුණු ගැටුම් සිදුවූවද දිගින් දිගටම දිනපතා ඊශ්‍රායලය පලස්තීනුවන්ට එරෙහි ජන සංහාරයක් ක්‍රියාත්මක කරමින් සිටින ඝාතන භූමියක් බවට පලස්තීනය පත්ව ඇති බවයි. ඒ වනාහි මුස්ලිම් අන්තවාදය නිසා සිදුවන්නක් නොවේ. බටහිර ජනමාධ්‍ය විසින් මුස්ලිම් අන්තවාදය යන වචනය නිෂ්පාදනය කිරීමට දශක ගණනකට පෙර සිට සිදුවන ක්‍රියාවලියකි. හමාස් සංවිධානය බිහි වීමට බොහෝ කලක සිට සිදුවන ක්‍රියාවලියකි.

බොහෝ අවිචාර විචාරවල ‘මුස්ලිම් අන්තවාදය’ යන වචනය නිතර නිතර වර නගතත් ඊශ්‍රායල් අන්තවාදී ත්‍රස්තවාදය, ඒ පිටුපස පවතින ඇමරිකා-යුරෝපා අධිරාජ්‍යවාදී ත්‍රස්තවාදය මග හැරේ. මග හරියි.

ඉතිහාසය තුළ ඊශ්‍රායල් ජුදා ජනතාව ජන සංහාරයකට ලක් කළෝ කව්රුහුද? ඒ වනාහි පලස්තීනුවන් හෝ මැද පෙරදිග අරාබි ජනයා නොවේ. ජර්මනිය ඇතුළු යුරෝපය ජුදෙව්වන් මිලියන ගණනක් මරා දැමුවේය. ජුදෙව්වන්, රටක් නැති පිරිසක් බවට පත් කළෝ අද ඊශ්‍රායල් ජුදා ජාතිකවාදය පාවිච්චි කරමින් තම ධනබල වුවමනා ඉටුකර ගැනීමට ක්‍රියාකරන පිරිසය. පළමු ලෝක යුද්ධයට පෙර සිටම සියොන්වාදය ප්‍රවර්ධනය කරමින් ඊශ්‍රායල් ජුදා ජනයා රවටමින් තම බල අරමුණු සඳහා භාවිත කළෝ මේ අධිරාජ්‍යවාදී යුරෝපීයයෝය.

අනිත් අතට හිස්බුල්ලා හමාස් වැනි සංවිධාන බිහිවීමට පාර කැපුවෝද මේ ඇමරිකා-යුරෝපා හවුලමය. ඇත්තටම විය යුත්තේ ඊශ්‍රායල්වරුන්ද පලස්තීනුවන්ද මේ ඇමරිකා-යුරෝපා ධනබල හවුලට එරෙහිව කටයුතු කිරීමයි. 1948 දී මැද පෙරදිග තම වුවමනා වෙනුවෙන් ඊශ්‍රායලය බිහි කරන්නේ බි්‍රතාන්‍ය අධිරාජ්‍යවාදීන් විසිනි. බි්‍රටිෂ් පෙට්රෝලියම් වැනි දැවැන්ත තෙල් සමාගම් සමග සම්බන්ධවූ බටහිර අධිරාජ්‍යවාදී න්‍යාය පත්‍රයක් ඒ සමග බැඳී තිබුණි. බැඳී තිබේ. 1948 ඊශ්‍රායලය බිහි කරන්න මේ භූමියේ සිටි ලක්ෂ ගණනක් පළවා හැර විශාල ජන සංහාරයක් කරන ලදි.

මේ පසුබිම තුළ 1948 ඊශ්‍රායලය ඇති කිරීමට පෙර පලස්තීන භූමියේ සිටි ජනතාවගේ අයිතීන් වෙනුවෙන් (පලස්තීන ජනයා කියන්නේ මුස්ලිම්වරු පමණක් නොවෙති. ක්‍රිස්තියානිහුද තවත් අයද වෙති) පෙනී සිටින සංවිධානවල ඒකාබද්ධ සංවිධානයක් බිහි වීම තාර්කික අවශ්‍යතාවයක් විය. 1964 දී පලස්තීන විමුක්ති සංවිධානය (පීඑල්ඕ) බිහි වන්නේ ඒ අවශ්‍යතාව වෙනුවෙනි.

පී.එල්.ඕ. සංවිධානය 1980 වන විට ස්වාධින පලස්තීන රාජ්‍යයක් පිළිබඳ ඉල්ලීමට ලෝකයේ කැමැත්ත දිනා ගැනීමට සමත් වී තිබුණි. ස්වාධීන පලස්තීන රාජ්‍යයක් පිළිගත් රටවල් 133න් ලංකාවද එකකි. නමුත් ඊශ්‍රායලය පී.එල්.ඕ සංවිධානයටද විරුද්ධව කටයුතු කරමින් එයට ත්‍රස්ත ලේබලය අලවමින් එය දිය කර හැරීමටත් ස්වාධීන පලස්තීන රාජ්‍යයට එරෙහිව ක්‍රියා කිරීමත් සිදු කරනු ලැබීය.

හමාස් බිහි වන්නේ 1987 දීය. එක්තරා ආකාරයකට ප්‍රජාතන්ත්‍රවාදී ප්‍රවාහයට එමින් පලස්තීන රාජ්‍යයක් දිනාගැනීමේ තැනට ළඟා වූ පී.එල්.ඕ.ට විරුද්ධව භාවිත කළ හැකි සංවිධානයක් ලෙස හමාස් යොදා ගැනීමට ඇමරිකා-බටහිර ඊශ්‍රායල් අශුද්ධ සැඟවුණු රාජ්‍යය ක්‍රියා කළ බව පෙනෙන්නට තිබේ. පසුකලෙක හමාස් පලස්තීනයේ ප්‍රමුඛ ප්‍රවාහය බවට පත් වෙමින් ඡන්දයකින්ද ජයග්‍රහණය කරන තත්ත්වයක් ඇතිවු බවද අප මතක තබාගත යුතුයි.

අදින් වසර 30 කට පෙර

කෙසේ වෙතත් ඊශ්‍රායලය බිහි කර අවුරුදු 45ක් ඇවෑමෙන් 1993දී, එනම් මීට වසර 30කට පෙර සුප්‍රසිද්ධ ඔස්ලෝ ගිවිසුම හෙවත් පලස්තීන විමුක්ති සංවිධානයේ නායක අර්ෆත් හා එවකට ඊශ්‍රායල් අගමැති රබින් අතර ඇති වූ සාම ගිවිසුම රාජ්‍ය දෙකක විසඳුම පිළිගත්තේය. මේ ගිවිසුමේ කපුවා වූ එවකට ඇමරිකන් ජනපති ක්ලින්ටන් ස්වාධීන පලස්තීන රාජ්‍යයට සහාය දීමට එදා ශපථ කළේය.

අප අද ඇසිය යුතු ප්‍රශ්නය වන්නේ ඒ එකඟතාව (එක්සත් ජාතීන්ද පිළිගත්) වසර 30 ක් පුරා ක්‍රියාත්මක නොවූයේ ඇයි? එය විනාශ කළෝ කව්ද?
ඔස්ලෝ ගිවිසුමෙන් වසරක් යාමට පෙර 1994 දී මුස්ලිම් පල්ලියකට කඩා වැදී යාච්ඥාවේ නිරත 29 දෙනෙකු ඝාතනය කළෝ ඊශ්‍රායල්වරුය.1995 දී සාම රැළියක් ඇමතු පසුව රබින්ව ඝාතනය කළේ සියොන්වාදී ඊශ්‍රායලියෙකු මිස පලස්තීනුවන් නොවේ.

අද තම සියලු අවුල් වසා ගැනීමට ඊශ්‍රායල් රාජ්‍ය ත්‍රස්තවාදය පලස්තීනුවන් වෙත මුදා හරින නෙතන්යාහු 1998දී පොරොන්දු වූයේ හෙබ්රොන්වලින් තම මිලිටරිය ඉවත් කර ගන්නා බවටයි. නමුත් ඒ වන විට දිගින් දිගටම පී.එල්.ඕ දුර්වල කරමින් හමාස් ක්‍රියාකාරකම් පී.එල්.ඕ. පිට පටවමින් පලස්තීන ජනයා අතර පී.එල්.ඕ.හි පිළිගැනීම විනාශ කරමින් කටයුතු කළේ නෙතන්යාහුලාමය.

දිගු කතා නිමාකොට පෙනෙන්ට තිබෙන තිත්ත ඇත්තට අවදි වෙමු. ඇමරිකා-යුරෝපා- ඊශ්‍රායල් හවුලට අවශ්‍යව ඇත්තේ ගාසා තීරයද තම ආධිපත්‍යයට යටත් කරගෙන පලස්තීන ජනයා සංහාරයට ලක් කරමින් තම ධන බල වුවමනා ඉටුකර ගැනීමටයි. ඒ සඳහා ගෝලීය අර්ථයෙන් ඔහු නිපදවූ පොදු සතුරා මුස්ලිම් අන්තවාදයයි. ඒ අනුව මුළු ලොවක් එකඟවු රටවල් දෙකේ විසඳුම මහ දවල් උල්ලංඝනය කරමින් ඊශ්‍රායල් ව්‍යාප්තවාදය ත්‍රස්තවාදය ක්‍රියාත්මක වෙයි.

‘හමාස් මුස්ලිම් අන්තවාදීන් එල්ල කළ ප්‍රහාරවලින් පසුව’ වැනි විස්තර කිරීම් සඟවන්නේ එකී යථාර්ථයයි. ඔක්තෝබර් 7ට කලින් වසරක් තුළ සිදුවූ දේවල් පමණක් සලකා බැලුවද පලස්තීනුවන්ට පහර දීම, සිරගත කිරීම, පලස්තීනුවන් සිටින ප්‍රදේශ යටත් කර ගැනීම, පලස්තීන නිවාස කඩා දැමීම, ඊශ්‍රායල් ජනපදකරණය, පලස්තීන ප්‍රදේශවල සිදු කිරීම දිනපතා සිදුවීමයි.

මේ ප්‍රහාර සැක උපදවනසුලුය

ලෝකයේ ශක්තිමත්ම දේශ සීමා රැකීම් තිබෙන, ලෝකයේ දක්ෂතම රහස් ඔත්තු සේවා තිබෙන ඊශ්‍රායලය තුළට ඇතුල් වී සිදු කළ මේ ප්‍රහාරය ඊශ්‍රායල ඔත්තු සේවා, ඊශ්‍රායල් රාජ්‍යයේ රහස් හස්තය නොදැන සිදුවූවා යැයි සිතීම දුෂ්කරය. ප්‍රහාරයෙන් පසු ඇති වී ඇති තත්ත්වය තුළ ශක්තිමත් වූයේ දැඩි ජනතා අප්‍රසාදයට පත්ව සිරගත වීමට පවා සිදුවේ යැයි සිතු නෙතන්යාහුය. ඔහුගේ හෙළවෙන දතක් වන් ආණ්ඩුවට විපක්ෂයේ සහාය ලැබුණි. ඇමරිකාව ප්‍රංශය බි්‍රතාන්‍යය ඇතුළු ඇමරිකා-යුරෝපා හවුල ශක්තිමත්ව එකට එක් වී ඇති අතර ඇමරිකානු ජනපති මෙන්ම ඇමරිකානු සොල්දාදුවෝ දහස් ගණනක්ද ඊශ්‍රායලයේ සහයට මැද පෙරදිගට පැමිණියෝය. තම අරමුණ සඳහා තම රටේ මිනිසුන් දෙතුන් දහක් ඝාතනය වීමට ඉඩහැරීම අධිරාජ්‍යවාදී ධනවතුන්ට සරල කාරණයක් බව අප අමතක කළ යුතු නැත. ඔවුන් ඉතිහාසය පුරා එය සිදු කර ඇත.

වසර දෙක තුනක් තුළ, ලෝක ජනමාධ්‍යවල යම් පමණකට බැස යමින් තිබු මුස්ලිම් විරෝධය නැවත අළු ගසා දමා නැගිට ඇත. පලස්තීන ජනයා මත ක්‍රියාත්මක ජන සංහාරය වේගවත් වී ඇත. බටහිරම පවසන මුස්ලිම් අන්තවාදය මෙන්ම සියොන්වාදී සමූහ සංහාර ත්‍රස්තවාදය ද ඇමරිකා-යුරෝපා අධිරාජ්‍යවාදීන්ගේ ක්‍රියාවල ප්‍රතිඵලයකි.

ගාසාහි සිදුවීම් සමග ලංකාව තුළද නැවත මුස්ලිම් විරෝධය ඉස්මතු වෙමින් ඇත. පසුගියදා මුස්ලිම්වරුන් සිටින ප්‍රදේශ කීපයක නගර ආශ්‍රිතව පොලිස් හා හමුදා බාධක කැඳවා තිබුණි. එය මුස්ලිම්වරුන් නැගිටිතැයි යන්න හඟවන සංකේතාත්මක ක්‍රියාවකි. ඔක්තෝබර් 07 ඇරඹි මෙම ගැටුමේ නව අදියර සමග නැවත පාස්කු ඉරුදින ප්‍රහාරයට පසු ඇති වූ ඊනියා සංහිඳියාවත් අප රට තුළ ඉස්මතු වෙමින් පවතී. කුරුසය හා ධර්ම චක්‍රය යොදා වෙසක් කූඩු සාදමින් මෛත්‍රිය හා ප්‍රේමය වෙනුවට ඉස්ලාම් විරෝධී වෛරය වැපිරූ ආකාරයේ සන්ධානවල සිංහ කොඩිය හා ඊශ්‍රායල් කොඩිය එකට ලෙළදෙනු පෙනේ. මේවා සංවිධානාත්මක ක්‍රියාවන්ය.

පීඩිත පලස්තීනුවා වෙනුවෙන් සිට ගැනීම සියොන් ජාතිවාදයට එරෙහිව පලස්තීන ජාතිවාදය සමග සිට ගැනීමක් නොවේ. එය ඇමරිකා-යුරෝපා-ඊශ්‍රායල් අධිරාජ්‍යවාදී ත්‍රස්තවාදයට එරෙහිව පීඩිත පලස්තීනුවා සමග සිට ගැනීමකි. පීඩිත පලස්තීනුවා සමග සිට නොගැනීමට හමාස් සංවිධානය කිසිසේත් හේතුවක් නොවිය යුතුය. හමාස් සංවිධානයේද ඉල්ලීමක් වූ පමණින් අප පලස්තීනුවාගේ ස්වයංනිර්ණය අයිතිය වෙනුවෙන් පෙනී සිටීමත්, ගාසා තීරය මුළුමනින්ම තමන්ට යටත්කර ගැනීමේ අරමුණ උදෙසා ගාසාවල ඊශ්‍රායලය දිගින් දිගටම කරන ඝාතන, පැහැර ගැනීම්, සිරගත කිරීම්, නිවාස විනාශ කි5ීම් වහා නතර කරන ලෙස ඉල්ලීමත් අපි අත් නොහරිමු. නෙල්සන් මැන්ඩෙලා නිවැරදිව ප්‍රකාශ කළා සේ පලස්තීනයට විමුක්තිය උදාවන තුරු ලෝකයට විමුක්තිය උදා නොවේ.

පලස්තීන-ඊශ්‍රායල් ප්‍රශ්නයේ හේතුව වන ඇමරිකා-යුරෝපා-ඊශ්‍රායල් සංහාරවාදී හිංසනයට විරුද්ධ වීමත්, පීඩිත පලස්තීන ජනයා වෙනුවෙන් පෙනීසිටීමත්, පලස්තීන ජනයාගේ නිදහස් රාජ්‍යයක අයිතිය තහවුරු කිරීමට කැපවීමත් පමණය, පලස්තීනයේ කවර හා සංවිධානයක් වෙතින් මතුවන ප්‍රතිචාරාත්මක හිංසනයට නැවතීමේ තිත තැබිය හැකි එකම මාර්ගය. පී.එල්.ඕ. ‘ත්‍රස්තවාදීන්’ කොට පහරදී දුර්වල කරමින් විසඳුම ක්‍රියාත්මක නොකර හමාස් කැඳවාගත් ඇමරිකා-යුරෝපා-ඊශ්‍රායල් වෙත ධන බල හවුල තේරුම්ගත යුත්තේ නිදහස් පලස්තීනයක් ලබාදී පලස්තීන සංහාරය නවත්වන්නේ නැත්නම් අනාගතයේදී අදටත් වඩා විනාශකාරී සංවිධානවලට මුහුණ දීමට සිදුවීම අනිවාර්යයක් වන බවයි.