No menu items!
22.3 C
Sri Lanka
7 October,2024

ඔක්තෝබර් මාසයේ ලංවිමට රුපියල් කෝටි 200ක ලාභයක්

Must read

විදුලි ගාස්තු වැඩි කිරීමේදී ඔක්තෝබර් මාසය සඳහා ලංකා විදුලි බල මණ්ඩලය පුරෝකථනය කළ වියදම් අඩු වීම නිසා එම මාසයේදී පමණක් රුපියල් බිලියන 20ක් හෙවත් රුපියල් කෝටි 200ක ආසන්න ලාභයක් එම මණ්ඩලයට ලැබෙන බව මහජන උපයෝගිතා කොමිෂන් සභාවේ තාක්ෂණික කාර්ය මණ්ඩලය විසින් ගණනය කර තිබේ.


එම ගණනය කිරීම්වලට අනුව ලංකා විදුලි බල මණ්ඩලය ඔක්තෝබර් මාසයේදී විදුලිය විකිණීමෙන් උපයන ආදායම ආසන්න වශයෙන් රුපියල් බිලියන 50.66ක් වන අතර එය රුපියල් කෝටි 506ක ආසන්න අගයක් ගනී. එමෙන්ම එම මාසයේ විදුලිය උත්පාදනය කිරීම වෙනුවෙන් එම මණ්ඩලය දරා ඇති වියදම රුපියල් බිලියන 22.54ක් හෙවත් රුපියල් කෝටි 225ක ආසන්න අගයක් ගනී. එමෙන්ම එම මාසයේ විදුලි සම්ප්‍රේෂණය සඳහා රුපියල් මිලියන 1426.06ක්ද, විදුලිය බෙදා හැරීම සඳහා රුපියල් මිලියන 5789.89ක්ද, මූල්‍ය වියදම් වශයෙන් රුපියල් මිලියන 2489.43ක්ද ඊට අමතරව ලංවිමට වැයවන බව ගණනය කර ඇති අතර ඒ අනුව ඔක්තෝබර් මාසයේ ලංවිම සම්පූර්ණ වියදම රුපියල් බිලියන 32.24ක් හෙවත් රුපියල් කෝටි 322ක් වශයෙන් ගණනය කර තිබේ. එම ආදායමේ හා වියදමේ පරතරය හෙවත් ලංවිම ලාභය රුපියල් බිලියන 19.16ක් හෙවත් රුපියල් කෝටි 200ක් බව ආසන්න වශයෙන් ගණනය කර ඇත.


පසුගිය ඔක්තෝබර් මාසයේදී ගිගාවොට් පැය 1303ක විදුලිය උත්පාදනය කිරීමට සිදුවනු ඇතැයි ලංකා විදුලි බල මණ්ඩලය පුරෝකථනය කර ඇතත් ඔක්තෝබර් මාසයේදී ඇත්තටම උත්පාදනය කර ඇත්තේ ගිගාවොට් පැය 1265ක විදුලියක් පමණය. එසේම එම මාසයේදී පුරෝකථනය කළ ගිගාවොට් පැය 432ක් වෙනුවට ගිගාවොට් පැය 548ක් ප්‍රධාන ජල විදුලි බලාගාරවලින් ජල විදුලිය නිපදවා ඇති අතර අඟුරුවලින් ගිගාවොට් පැය 494ක් විදුලිය උත්පාදනය කිරීමට පුරෝකථනය කර ඇතත් උත්පාදනය කර ඇත්තේ ගිගාවොට් පැය 356ක් පමණී.


මීට අමතරව නොවැම්බර් සහ දෙසැම්බර් මාස සඳහා ලංවිම පුරෝකථනය කර ඇති දත්ත සම්බන්ධයෙන්ද ගණනය සිදු කිරීම් කර ඇති අතර ඒ මගින් පෙන්නුම් කර ඇත්තේ එම මාස දෙකේ පිළිවෙලින් රුපියල් බිලියන 15ක් හෙවත් රුපියල් කෝටි 150ක හා රුපියල් බිලියන 18ක් හෙවත් රුපියල් කෝටි 180ක ආදායම් වියදම් පරතරය අනුව ලංවිම ලාභ ලබන බවයි.

- Advertisement -spot_img

පුවත්

LEAVE A REPLY

Please enter your comment!
Please enter your name here

- Advertisement -spot_img

අලුත් ලිපි