රට පුරා කර්මාන්ත ශාලා හා සේවා ස්ථාන 2000ක් පමණ වැසී ඇති බවත්, එම ආයතනවල වෘත්තීය සමිති නැති බැවින් ඒවායේ සේවකයින් නිහඬව සිටින බවත් නිදහස් වෙළඳ කලාප සහ පොදු සේවා සේවක සංගමය නිවේදනයක් නිකුත් කරමින් සඳහන් කරයි.
රජයේ ජනලේඛන හා සංඛ්‍යාලේඛන දෙපාර්තමේන්තුව නිකුත් කර ඇති නවතම වාර්තා අනුව කර්මාන්ත ශාලා සේවකයින් 384,000කට හා සේවා අංශයේ 137,699කට රැකියා අහිමි වී ඇති බව සඳහන් වන බවත් එම නිවේදනයේ සඳහන් කරයි.
එසේම මෙසේ කර්මාන්ත ශාලා හා සේවා ස්ථාන වසා දැමීමට අමතරව අතිකාල අහිමි කරමින්, මූලික වැටුපෙන් සියයට 50ක් ගෙවමින් උපායමාර්ගිකව රැකියා ස්ථාන වසා දමමින් සිටින බවද සඳහන් කර තිබේ.
එම තත්වයන් හෙළිදරව් කිරීමේ හා ඒ සඳහා විරෝධය දැක්වීමේ වැඩසටහනක් නොවැම්බර් 05 වැනිදා කොළඹ විහාර මහා දේවී එළිමහන් රංග පීඨයේදී හා ඒ අසලදී පැවැත්වෙන බවද එම සංගමය වැඩිදුරටත් නිවේදනය කරයි.
ඉඳුවර බණ්ඩාර
