■ අමන්දිකා කුරේ
හිඟයකදී ගත හැකි පරිදි ආහාර කොමසාරිස් දෙපාර්තමේන්තුව විසින් ගබඩා කරගත යුතු ආරක්ෂිත සහල් තොගය පසුගිය කාලය පුරාම ප්‍රමාණවත් අන්දමින් පවත්වාගෙන නොගිය බව එක්සත් සහල් නිෂ්පාදකයන්ගේ සංගමයේ සභාපති මුදිත් පෙරෙරා පවසයි.
2020 දී අමාත්‍ය මණ්ඩල යෝජනාවක් අනුව ආරක්ෂිත සහල් තොග තබා ගැනීමට මිලියන 300ක් සහ 2021දී තවත් මිලියන 200ක් ලබා දී ඇතත් මෙතෙක් ප්‍රමාණවත් අන්දමින් එම තොග පවත්වාගෙන නොමැති බව ඔහු පෙන්වා දෙයි.
මුදිත් මහතා පවසන්නේ එවැනි ආරක්ෂිත තොගයක් පවත්වාගෙන ගියේ නම් මෙවැනි හිඟයකදී එම සහල් තොග භාවිතයට ගැනීමට හැකිවන බවයි.
ආහාර කොමසාරිස් දෙපාර්තමේන්තුවේ ප්‍රධාන ගණකාධිකාරීවරයාගේ අනුදැනුම මත පවතින සහල් තොගත් පුද්ගලික අංශයට නීති විරෝධී අන්දමින් විකුණන බවත් ඒ පිළිබඳව 2021 දී තමා විසින් අල්ලස් හෝ දූෂණ විමර්ශන කොමිසමේ පැමිණිල්ලක්ද යොදා ඇතැයි ඔහු පවසයි.
එසේ පැමිණිල්ලක් දමා තිබිය දීත් ඒ පිළිබඳව මෙතෙක් කිසිඳු විමර්ශනයක් සිදුව නැතැයි ඔහු චෝදනා කරයි.■
