■ අමන්දිකා කුරේ
සර්වපාක්ෂික ආණ්ඩුවක් නිර්මාණය කිරීමට නායකත්වය ගැනීමට ඔබේ පක්ෂයට ලැබුණු අවස්ථාවක් මගහරවා ගත්තා කියලා ඔබට සිතෙන්නේ නැද්ද?
රනිල් වික්‍රමසිංහ මහතා දැන් නිර්මාණය කරලා තිබෙන ආණ්ඩුව සර්වපාක්ෂික ආණ්ඩුවක් නෙවෙයි කියන එක දැන් පැහැදිලියි. සියලුම පක්ෂ නියෝජනය කරන අය ඒ ආණ්ඩුවේ නෑ. එක එක පක්ෂවලින් සාමාජිකයන් බිලී බාගෙන, හෝ සාමාජිකයන් පක්ෂවලින් පැහැරගෙන හදන ආණ්ඩුවක් සර්වපාක්ෂික ආණ්ඩුවක් වෙන්නේ නෑ. ඒ නිසා මම හිතනවා රනිල් වික්‍රමසිංහ මහතාට සැබැවින්ම සර්වපාක්ෂික ජාතික ආණ්ඩුවක් හදන්න ඕනෑ නම් එක පියවරක් පසුපසට අරන් අනෙකුත් පක්ෂ එක්ක කතා කරලා හොඳ වැඩපිළිවෙළක් එක්ක ඒ අය එකතු කරගන්න ඕනෑ.
සර්වපාක්ෂික ආණ්ඩුවක් හදන්න අවශ්‍ය නායකත්වය ගන්න අපට තිබුණු අවස්ථාවක් මගහැරුණු බව මමත් හිතනවා. ඒක යම් යම් හේතු කාරණා නිසා මගහැරුණා. නමුත් දැන් එතැන නැවතිලා ඉන්නේ නැතිව ඉදිරියට කරන වැඩ ගැන අවධානය යොමු කළ යුතුයි.
මේ තිබෙන තත්වය කළමනාකරණය කරගැනීමට ඔබේ පක්ෂය කළ යුතු යැයි ඔබ සිතන්නේ මොනවාද?
පක්ෂ නායකයන්ට විශාල වගකීමක් තියෙනවා මේ රටේ අනාගතය ගැන. ඒ අයට එකතු වෙලා හොඳ තීරණයක් ගන්න හොඳ අවස්ථාවක් දැන් ලැබිලා තියෙන්නේ. ඒ නිසා විපක්ෂය නියෝජනය කරන සමගි ජන බලවේගය, ජාතික ජන බලවේගය වගේ ම දමිළ ජාතික සන්ධානය වගේ පක්ෂවලට ආණ්ඩු පක්ෂයෙන් විධිමත් ආරාධනාවක් කරනවා නම් එය සලකා බැලිය යුතුයි කියලා මම හිතනවා. හැමදේටම කලින් අපේ පක්ෂවලට ඡන්දය දීපු ජනතාව ගැන අපි හිතන්න ඕනෑ. ඒ මිනිස්සු කාලා බීලා අවශ්‍ය බෙහෙත් එහෙම අරගෙන හොඳින් ජීවත් වෙන්න ඕනෑ. ඒ නිසා මේ වෙලාවේ පක්ෂ බෙදීම් පැත්තකින් තියලා ඒක කරන්න පුළුවන් නම් වඩා හොඳයි. රනිල් වික්‍රමසිංහ අගමැතිතුමාත් තනි තනි අයට කතා කරලා බිලී බාගන්න යන්නේ නැතිව විධිමත් විදිහකට එක මේසයකට ඇවිත් සමගි ජන බලවේගයේ නායකයා එක්ක කතා කරලා තීරණයක් ගන්නවා නම් වඩා හොඳයි.
ඔබට අමාත්‍යධුරයක් බාරගන්න අගමැතිතුමා ආරාධනා කළොත් ඔබ එය බාරගන්නේ නෑ?
එවැනි තීරණයක් ගන්න පුළුවන් පක්ෂයේ අනුමැතියක් විදිහට පක්ෂයේ තීරණයක් ආවොත් පමණයි. මම පක්ෂයක් නියෝජනය කරන මහජන නියෝජිතයෙක් නිසා පෞද්ගලිකව තනි කෙනෙක් විදිහට මට තීන්දු ගන්න බෑ. ඒ නිසා මහජනතාවගේ මතය මොකක්ද කියලා අපි අවධානය යොමු කළ යුතුයි. මිනිස්සු ඡන්දය දුන්නේ අපේ පක්ෂයටත් එක්ක. මම ඡන්දය ඉල්ලපු වෙලාවේ වෙන පක්ෂයකින් මම ඡන්දය ඉල්ලුවා නම් මාව පාර්ලිමේන්තුවට තේරෙන්නෙ නෑ. ඒ නිසා පක්ෂයේ අනන්‍යතාව රැකගැනීමත් මගේ වගකීමක්. මහජනතාව කියන අදහස තමයි අපි පක්ෂයක් විදිහට ඉදිරියට ගෙන යන්න වෙන්නේ. අපේ පක්ෂයේ ඉතාම උගත් සහ දක්ෂ අය ඉන්නවා. රට වැටිලා තියෙන තැනින් ගොඩ ගන්න ඒ අයගේ දැනුමත් ඉතා වැදගත්. ඒ නිසායි මම කලිනුත් කිව්වේ පක්ෂ නායකයන් සමග අගමැතිතුමා හොඳ සාකච්ඡාවක් ඇතිකරගත යුතුයි කියලා. මට ඒ විදිහට පෞද්ගලික ආරාධනා පිළිගන්න බෑ. යනවා නම් යන්නේ පක්ෂයක් විදිහට. දූරකථනය ලකුණ ඉස්සරහ ඡන්දය දීලා තමයි මිනිස්සු මට මනාපය පළකළේ. ඒ නිසා මට ඒ වගකීම තිබෙනවා.
පක්ෂ නායකයන් සමග එලෙස සාකච්ඡා කර ආණ්ඩු පිහිටුවීමට පොදුජන පෙරමුණේ මන්ත්‍රීවරුන්ගේ සහයෝගය අගමැතිතුමාට ලැබේවිද?
එදා නියෝජ්‍ය කතානායක ධුරයට ඡන්දය පැවැත්වුණු අවස්ථාවේදී මම කිව්වා මේ තමයි පරාජයන් වැලක ආරම්භය කියලා. ඒ වගේ සුළු කාරණයකටවත් අගමැතිතුමා නියෝජනය කරන පක්ෂයේ එකඟතාව ගන්න බැරි නම් ඉදිරි තීරණ ගැනීම්වලදී මොනවගේ දේවල්වලට එතුමාට මුහුණ දෙන්න වේවිද කියන ගැටලුව අපට පෙනෙන්නට තිබෙනවා. අගමැතිතුමා ඒ ධුරය භාරගත්තේ රට හදන්න නම් පළමුවෙන් එතුමාගේ ස්ථාවරත්වය රැකගන්න අවශ්‍යයි. ඒ නිසා ස්ථාවරත්වය රැකගැනීමට නම් මීට වඩා විදිමත් ක්‍රමවේදයක් අනුගමනය කරන්න එතුමාට සිදු වෙනවා.
අපට සල්ලි තිබුණු වෙලාවක් නම් මේ වෙලාවේ ඡන්දයකට ගිහින් ස්ථාවර රජයක් පිහිටුවන්න තිබුණා. නමුත් මේ වෙලාවේ කන්න බොන්න තියෙන සල්ලි ටික ඡන්දයකට යොදවන්න බෑ. එහෙම කරන්න තිබුණා නම් හොඳයි.
ඉදිරියේදී ආහාරවලට වියදම් කරන්න මුදල් අපට නැති වේවිද?
අනිවාර්යයෙන් ම ආහාර අර්බුදයක් එනවා. මම මේ ගැන කිව්වේ කාබනික පොහොරක් අල්ලගෙන ගොවියන්ට යන එන මං නැති කරපු අවස්ථාවෙයි. ඒ ගැන පාර්ලිමේන්තුවේ කතා කරපු පළමු අවස්ථාවේ සිටම මම ඒ ගැන කිව්වා. ගිය මහ කනයේ අපේක්ෂිත අස්වැන්න ලැබුණේ නෑ. දැන් යල කන්නය පටන් අරන් තියෙන්නේ. ඒ අයටත් පොහොර නෑ. රටේ වැඩිම අස්වැන්නක් ලැබෙන්නේ මහ කන්නයෙන්. යල කන්නයේත් මිනිස්සු වගා අරලා තියෙන්නේ කුඹුරුවලින් බාගයක් විතර.
උඩරට ගොවීන්ගේ එළවළු වගාවනුත් විනාශ වෙමින් යනවා. ඔවුන්ට දිළීර නාශක නෑ. ඒ ප්‍රශ්න වැඩියි උඩරට පළාත්වල. ගොවියෝ හැම කෙනෙක්ගෙම නිෂ්පාදනය අඩු වෙලා. ඔවුන්ට වෙළඳපොළට නිෂ්පාදන දාන්න බෑ. අපට ආනයනය කරන්නත් මුදල් නෑ. බදු මුදලුත් ඉතාම අධිකයි. ආහාර සුරක්ෂිතතාව ඉතාම අවදානම් තැනක ඉන්නේ. ඒ නිසා මන්දපෝෂණ තත්වයක් ඇති වෙන්න පවා ඉඩ තිබෙනවා. මේ ආණ්ඩුවෙන් අපට විසඳුම් ලැබෙයි කියලා හිතන්න බෑ. ඒ නිසා මම ගෘහණියන්ට ආරාධනා කරනවා ඔබේ දරුවන් වෙනුවෙන් මොනවා හරි දෙයක් වගා කරලා තියාගන්න. ඔබේ දරුවන් බඩගින්නේ හඬන්න ඉඩ තබන්න එපා. නමුත් මහල් නිවාසවල ඉන්න ජනතාවට වගා කරන්න අවස්ථාවක් නෑ.
ඒ වගේ ම කාන්තාවන්ට අවශ්‍ය සනීපාරක්ෂක ද්‍රව්‍ය ගන්න විදිහක් නෑ. ඒ නිෂ්පාදනවලත් මිල ඉහළ ගිහින්. පහුගිය ජනාධිපතිවරණයේ දි අපේ අපේක්ෂකයා ඒ ගැන තිබෙන ගැටලු ගැන කතා කළා ම පොදු ජන පෙරමුණේ ඇතැම් කාන්තාවන් කිව්වා අපට අවශ්‍ය සනීපාරක්ෂාව නෙවෙයි ආරක්ෂාව කියලා. අද වන විට ආරක්ෂාවත් නෑ සනීපාරක්ෂාවත් නෑ.
ජනතාවගේ මේ ප්‍රශ්න ගැන කතා කරන අරගලකරුවන්ව දඩයම් කිරීම ආරම්භ වෙලා. විපක්ෂය නියෝජනය කරන මන්ත්‍රීවරියක් හැටියට මේ මර්දනය ඔබ දකින්නේ කොහොමද?
ප්‍රචණ්ඩත්වයට මමත් විරුද්ධයි. කාගෙ වුණත් ගෙදරක් ගිනි තබලා විනාශ කරනවා නම් ඒක වැරදියි. මගේ ගෙදර ගිනි තබලා විනාශ කළොත් මට ආපහු ගෙදරක් හදාගන්න අමාරුයි. එවැනි තත්වයකදී කෙනෙක්ට ගෙයක් හදාගන්නකන් තාවකාලිකව තැනක් දුන්නාට කමක් නෑ. කෙනෙක්ගේ දේශපාලන මතවාදයක් නිසා දේපළ විනාශ කිරීම මම අනුමත කරන්නේ නෑ. වත්කම් පිළිබඳව ගැටලුවක් තිබෙනවා නම් අපට ඒවාට එරෙහිව නීතිමය ක්‍රියාමාර්ග ගන්න පුළුවන්. දැන් මේ තරම් ප්‍රශ්නයක් වෙලා, ඒ ප්‍රශ්නය ඇතිකරන්න මුල් වුණු අය බොහෝමයක් අත්අඩංගුවට අරගෙන නෑ. තාම කටඋත්තර ගන්නවා විතරයි. දේපල නීත්‍යනුකූලව හම්බ කරපු දේවල්ද කියන එක යට ගිහින් දැන් දේපල විනාශ කරපු එක ගැනයි පරීක්ෂණ යන්නේ.
මේ වෙනකොට අරලියගහ මන්දිරය ඇතුළට එදා ඔවුන්ගේ පාක්ෂිකයන් ගියේ පොලු අරගෙන නෙවෙයි. නමුත් එළියට එන විට අපි දකිනවා ඔවුන් එන්නේ පොලු අරගෙන කියලා. එහෙනම් මේ පොලු ලැබෙන්න ඕනෑ ඔවුන් ඇතුල්වීමත් පිටවීමත් කියන අතරෙදියි. පොලු අතට දුන්නේ කවුද? ඒ අයගේ ආවේගය ඇවිස්සුවේ කවුද? එක පැත්තක ගේට්ටුවක අරගලයක් තියෙද්දි තව පැත්තේ ගේට්ටුවකින් 3000ක් විතර ගේන්න යෝජනා කළේ කවුද? මේ වගේ ගැටුමකට මග පෑදුවේ කවුද? කියන ඒවා පිළිබඳව සිදුවෙන වගවිභාග අඩුයි. නමුත් ඒ ගැන සොයන්නේ නැතිව එහි අතුරු ප්‍රතිඵලයට සම්බන්ධ වුණු හැමකෙනෙක්වම කුදලාගෙන යන තත්වයට පත් වෙලා තියෙනවා. මේ පරීක්ෂණ සමබරව යන්න ඕනෑ පරීක්ෂණ. අගමැති කෙනෙක් කියන්නේ රටේ දෙවැනි පුරවැසියා. රටේ දෙවැනි පුරවැසියා වෙලා ඉඳපු කෙනාට තේරෙන්න නැතිද මෙහෙම ගැටුමක් ඇතිවෙන්න පුළුවන් කියලා. යුද්ධය නැති කරපු නායකයා කියලනේ එතුමා කියන්නේ. එහෙනම් මේ වගේ ගැටුමක් නවත්වා ගන්න බැරිවුණේ ඇයි? ඒ නිසා මහින්ද රාජපක්ෂ මහතාගේ සිට ඒ සඳහා අනුබල දීපු හැම කෙනාටම විරුද්ධව නීතිය ක්‍රියාත්මක විය යුතුයි.
21 වන ආණ්ඩුක්‍රම ව්‍යවස්ථා සංශෝධනය ගැන දැන් ඉදිරිපත් වෙලා තිබෙන යෝජනාව ගැන ඔබේ අදහස කුමක්ද?
21 වන ව්‍යවස්ථාව සංශෝධනය ගත්තාම විවිධ මතවාද තියෙනවා . මේ වෙලාවේ මේ රටේ විසඳිය යුතු ප්‍රශ්න ලෙස බඩගින්න, පොහොර ප්‍රශ්නය, ඖෂධ හිඟය, ආර්ථිකය, ගෝඨාභය රාජපක්ෂ ඉවත්වීම මෙන්ම ව්‍යවස්ථාව සංශෝධනයක අවශ්‍යතාව දකින පිරිස වගේම ඉහත කාරණා සියල්ල සමඟ ව්‍යවස්ථාව සංශෝධනය ගැන අවශ්‍යතාවක් හෝ අවබෝධයක් නැති පිරිස. මෙන්න මේ අන්ත දෙක අතරේ අඩු වැඩි වශයෙන් දෝලනය වෙන ජනතාවක් ඉන්න බව පේනවා. නමුත් බහුතරය ගෝඨාභය රාජපක්ෂ ගෙදර යායුතු බව කියනවා. ආර්ථිකය කඩා වැටීම ඇතුළු සියලු ප්‍රශ්නවලට මුල ගෝඨාභය රාජපක්ෂ බව ජනතාව විශ්වාස කරනවා.
ඒ අතරේම ලෝකයේ ජනාධිපතිවරෙකුට අනවශ්‍ය විදියට බලතල දීපු ව්‍යවස්ථාවක් අපිට තියෙන්නේ. ජයවර්ධන ජනාධිපතිවරයාටත් වඩා බලතල වර්තමාන ජනාධිපතිවරයාට තියෙනවා . ඒක භයානකයි . මේ වෙලාවේ මට මතක් වෙනවා 78 ව්‍යවස්ථාව ගේනකොට ප්‍රශ්න කලා පිස්සෙකුට මෝඩයෙකුට මේ බලය ලැබුනොත් මොනවා වේවිද කියාලා. එයින් අදහස් කලේ බලය අවභාවිතා කරන්නෙකුට ලැබුනොත් කුමක් වේවිද කියන එක. අද අපි ඒක අත්විඳිනවා. පාර්ලිමේන්තුවට වග නොකීම තුළ ගත් තීන්දු අපි අනතුරේ හෙළා තියෙනවා බදු ප්‍රතිපත්තිය වෙනස් කිරීම , පොහොර ප්‍රතිපත්තිය වෙනස් කිරීම, මුදල් අච්චු. ගැසීම ආදි තීරණ අපිව අමාරුවේ දැම්මා . ඒ වගේ ස්වාධීන අධිකරණ , ස්වාධීන කොමිෂන් සභා ප්‍රජාතන්ත්‍රවාදී රටක හොඳ ලක්ෂණ ඒවා 19 වන සංශෝධනය තුළ තිබුණා.
ඒ නිසා ජනාධිපති බලතල අඩු කළ යුතුයි.■
