මහින්ද තැබූ ගින්න ඇවිළ ගිය හැටි

■ ධනුෂි ලිහිණිකඩුව

ශ්‍රී ලාංකීය ඉතිහාසය තුළ එදා මෙදාතුර පැවති සාමකාමී ම අරගලයට මාසයක් ඉක්මවූ දිනය අරගලයේ අතිශය තීරණාත්මක දිනක් විය.

එදින හිටපු අගමැතිවරයාගේ ආධාරකරුවන් පිරිස ගාලු මුවදොර පිටියට පිවිසීමත් සමග රට පුරා එතෙක් පැවති සාමකාමී අරගලය නොසන්සුන්කාරී විය. ඉදිරියට පැමිණෙමින් සිටින පිරිසට ජල හා කඳුළු ගෑස් ප්‍රහාර එල්ල කිරීමට ආරක්ෂක අංශ ප්‍රමාද කිරීමත් සමග පිරිස ආරක්ෂක අංශ නොතකා ඉදිරියට ඇදෙමින් ගෝටා ගම කුටිවලට සහ එහි රැඳී සිටි අරගලකරුවන්ට පහර දෙන්නට විය. ඒ සමග දෙපිරිස අතර ඇති වූයේ කලහකාරී තත්ත්වයකි. රට ම උණුසුම් වීමට ගත වූයේ සුළු මොහොතක් පමණි.

ඒ අනුව හිටපු අග්‍රාමාත්‍යවරයාට සහාය දක්වමින් පැමිණි පිරිසට පහර දීම්, ඔවුන් පැමිණි බස් රථවලට පහර දී ගිනි තැබීම්, ආණ්ඩු පක්ෂයේ මහජන නියෝජිතයින්ගේ නිවාස සහ දේපලවලට පහර දී ගිනි තැබීම් ආදි සිදු වීම් රැසක් වාර්තා විය. දෙපිරිස අතර සිදු වූ කලහකාරී තත්ත්වය හේතුවෙන් මේ වන විට (මැයි 11) සිදු වූ ජීවිත හානි සංඛ්‍යාව 8ක් ලෙස වාර්තා වේ. තුවාල ලද පිරිස 400කට අධික වන අතර රෝහල්ගතව ප්‍රතිකාර ලබන පිරිස 218කි.

නිර්පාක්ෂික සාමකාමී අරගලයට කඩා වැදී කලහකාරී තත්ත්වයක් නිර්මාණය කිරීම හමුවේ රට පුරා ජනතාව නොසන්සුන් වූ අතර ආණ්ඩු පක්ෂයේ මහජන නියෝජිතයින්ගේ සහ ආධාරකරුවන්ගේ නිවාස 38ක් සම්පූර්ණයෙන් ම ගිනිබත් වී ඇති අතර නිවාස 65කට පමණ හානි වී ඇති බව වාර්තා වේ. බස් රථ ඇතුළු වෙනත් වාහන ගිනිබත් කිරීම් ගණන 47 ලෙස සටහන් ව ඇති අතර වාහන 41කට පමණ අලාභ හානි සිදු කිරීමට ප්‍රකෝප වූ පිරිස් කටයුතු කර ඇත.

එලෙස ජීවිතක්ෂයට පත් වූවන් අතරට ශ්‍රී ලංකා පොදුජන පෙරමුණේ පාර්ලිමේන්තු මන්ත්‍රී අමරකීර්ති අතුකෝරල මහතා සහ ඔහුගේ පෞද්ගලික ආරක්ෂකයා ද අයත් වේ. මූලික පොලිස් පරීක්ෂණවල දී අනාවරණය වී ඇති ආකාරයට පාර්ලිමේන්තු මන්ත්‍රීවරයා මිය ගොස් ඇත්තේ පහරදීමකින් බව ද වාර්තා වී ඇත.

එම සිදුවීම නිට්ටඹුව නගර මධ්‍යයේ සිදු වූ කලහකාරී තත්ත්වය හේතුවෙන් වූවක් බවත් එහි දී තුවාල ලැබූ පිරිස අතරින් තවත් එක් අයෙක් මිය ගොස් ඇති බවත් වාර්තා වේ. එලෙස මිය ගියේ විසි හත් හැවිරිදි හර්ෂ නදීශාන් නැමැති අයෙකි.

මේ අතර වීරකැටිය ප්‍රාදේශීය සභා සභාපති සරත් කුමාරගේ (69) නිවසට හානි කර ඇති අතර පහර කෑමට ලක් වූ සභාපතිවරයා රෝහල්ගත කිරීමෙන් අනතුරුව හෘදයාබාධයක් ඇති වීමෙන් ජීවිතක්ෂයට පත් ව ඇත. එම පහරදීම් අවස්ථාවේ තුවාල ලැබූවන් හය දෙනෙකු රෝහල් ගත කරන ලද අතර වීරකැටිය රෝහලේදී එක් අයෙක් සහ තංගල්ල රෝහලේ දී එක් අයෙක් වශයෙන් දෙදෙනෙකු මිය ගොස් තිබේ.

මේ අතර ගැටුම්කාරී සිදුවීම් අතර මැද කඳුළු ගෑස් අවිය ක්‍රියාත්මක කිරීමට යාමේ දී එය පිපිරීමෙන් උප පොලිස් පරීක්ෂකවරයෙකු ජීවිතක්ෂයට පත් ව ඇත. මෙසේ මියගොස් ඇත්තේ කැරලි මර්දන ඒකකයේ රාජකාරී කළ රංගන තුෂාර ප්‍රනාන්දු නැමැති 45 හැවිරිදි දෙදරු පියෙකි. මාර්තු 10 වන දින රාත්‍රී කාලයේ අරලියගහ මන්දිරය ඉදිරිපිට උද්ඝෝෂණය කළ කලහකාරී පිරිස් ඉවත් කිරීමට යාමේ දී මෙම සිදු වීම සිදුව ඇති බව වාර්තා වේ. කෙසේ වෙතත් මිය ගිය පිරිස අතර පොලිස් නිළධාරීන් දෙදෙනෙකු සහ සිවිල් වැසියන් 7 දෙනෙකු සිටින බව හිටපු ආරක්ෂක ලේකම් කමල් ගුණරත්න ප්‍රකාශ කර සිටියේ ය.

මේ අතර පහරදීම්වලට ලක් වූවන් අතර ඇන්ඩෲ දේවදාසන් පියතුමා, බස්නාහිර පළාත් භාර ජ්‍යෙෂ්ඨ නියෝජ්‍ය පොලිස්පති දේශබන්දු තෙන්නකෝන්, ශ්‍රී ලංකා නිදහස් ගුරු සේවා සංගමයේ සභාපතිනි වසන්තා හඳපාන්ගොඩ, ශ්‍රී ලංකා ස්වයං රැකියා නියුක්තිකයන්ගේ සංගමයේ සභාපති මහින්ද කහඳගම ඇතුළු අරගල භූමියේ රැඳී සිටි සාමකාමී අරගලකරුවන් සහ එම ස්ථානයට කඩා වැදුණු අගමැති ආධාරකරුවන් රැසක් සිටින බව වාර්තා වේ.

ප්‍රකෝප වූ ජනතාව විසින් මැති ඇමතිවරුන් රැසකගේ නිවාස හා දේපලවලට පහර දී ඒවා ගිනි තබා විනාශ කර තිබේ. එසේ හානි වූ නිවාස අතරට හිටපු අගමැති මහින්ද රාජපක්ෂගේ කුරුණෑගල නිවස, මැදමුළන රාජපක්ෂ වලව්ව, චමල් රාජපක්ෂගේ දෙබර වැව සහ මාගම පිහිටි නිවෙස්, ශෂින්ද්‍ර රාජපක්ෂගේ සෙවණගල නිවස, තිස්ස කුට්ටි ආරච්චි, ජනක් බණ්ඩාර තෙන්නකෝන්, ප්‍රසන්න රණතුංග, සිරිපාල ගම්ලත්, රමේෂ් පතිරණ, කණක හේරත්, අරුන්දික ප්‍රනාන්දු, ජොන්ස්ටන් ප්‍රනාන්දු, සනත් නිශාන්ත, විමල් වීරවංස, නිපුණ රණවක්, ගාමිණී ලොකුගේ, සනත් නිශාන්ත, ශෙහාන් සේමසිංහ, සාන්ත බණ්ඩාර, මහින්දානන්ද අලුත්ගමගේ, කෙහෙලිය රඹුක්වැල්ල, බන්දුල ගුණවර්ධන, නිමල් ලංසා, අලි සබි්‍ර, අකිල එල්ලාවල, ප්‍රසන්න රණවීර, කාංචන විජේසේකර, මොහාන් පී. ද සිල්වා සහ අශෝක ප්‍රියන්ත යනාදි මැති ඇමැතිවරුන්ගේ නිවෙස් අයත් වේ. මීට අමතරව තවත් කිහිපදෙනෙකුට අයත් දේපලවලට හානි සිදු කර ගිනි තබා තිබූ බව වාර්තා වෙයි.

හිටපු අගමැතිවරයාගේ ආධාරකරුවන් පැමිණි බස් රථවලට ගිනි තබා ඇතැම් ඒවා බේරේ වැවට දැමීමට ජනතාව කටයුතු කරන ආකාරයක් ද දක්නට ලැබුණි. බේරෙ වැවට දැමූ රථ වාහන අතර හිටපු අමාත්‍ය ජොන්ස්ටන් ප්‍රනාන්දුට අයත් මෝටර් රථයක් ද තිබූ බව වාර්තා වේ. මේ අතර හිටපු අගමැතිවරයාගේ ආධාරකරුවන් මහ මග දණ ගස්වා තැබීමත් කොළඹ බේරේ වැවට දැමීමටත් ජනතාව කටයුතු කළ ආකාරය දැක්වෙන වීඩියෝ පට සමාජ මාධ්‍ය ඔස්සේ සංසරණය විය.

අගමැති ආධාරකරුවන් ගාලු මුවදොර භූමියට පහර දී ප්‍රතිප්‍රහාර හමුවේ පලා යමින් සිටින අවස්ථාවේ නගරවලට රැස් වූ ජනතාව එම බස් රථ පරීක්ෂා කර මගීන් ඉන් බිමට බස්සවා පහර දී බස් රථ ද විනාශ කිරීමෙන් මෙම ගැටුම්කාරී තත්ත්වය කොළඹින් පිට නගරවලට ද ශීඝ්‍රයෙන් පැතිර යන්නට විය. ඒ අනුව නගරවල රැස් වූ ජනතාව ප්‍රදේශයේ හිටපු මන්ත්‍රීවරුන් සහ ඇමතිවරුන්ගේ නිවෙස් ඉදිරිපිට විරෝධතාවල නිරත වන අයුරු දක්නට ලැබුණි. නිවෙස් ගිනිබත් කිරීමට උත්සාහ ගෙන ඇත්තේ ඉන් අනතුරුවයි.

මේ අතර තංගල්ලේ ඩී. ඒ. රාජපක්ෂ පිළිරුව සහ මැදමුළන ඩී.ඒ. රාජපක්ෂ සහ දන්දිනා රාජපක්ෂ අනුස්මරණ ස්මාරකයද මුළුමනින් ම බිඳ දැමීමට කටයුතු කර ඇත. තව ද මීගමුව ඇවෙන්රා ගාඩ්න් අවන්හලට සහ ජොන්ස්ටන් ප්‍රනාන්දු හිටපු ඇමතිවරයාට අයත් සුරාසැලක් ද ලග්ගල ප්‍රදේශයේ ගොවිපළක් ද ගිනි බත් කර ඇති බව වාර්තා වේ. පිරිසක් මහීපාල හේරත්ට අයත් පොලොන්නරුව දිඹුලාගල පිහිටි ගොවිපළකටත් පහර දී ගිනි තබා එහි ගබඩා කර තිබූ වී සහ පොහොර මිටි තොග 200ක් සහ 400ක ප්‍රමාණයක් රැගෙන ගොස් ඇත. ප්‍රසිද්ධ සංගීත නිර්මාණ ශිල්පී ඉරාජ් වීරරත්නගේ පොල්හේන්ගොඩ පිහිටි නිවසටත් පිටකෝට්ටේ ඇවන්ගාඩ් ගොඩනැගිල්ලට සහ තංගල්ල කාල්ටන් පෙරපාසල් ගොඩනැගිල්ලට ද පහර දීම් සිදුව ඇත. මේ අතර ඉකුත් 09 වන දා රාත්‍රියේ ප්‍රාදේශීය දේශපලානඥයන් කිහිපදෙනෙකුගේ නිවාස කිහිපයකටත් සාමාන්‍ය ජනතාව කිහිප දෙනෙකුගේ වෙළඳසැල් ඇතුළු දේපළවලටත් හානි සිදු කර ඇත.

රට පුරා ඇති වූ නිවාස ගිනි තැබීම් ආදියට අමතරව නුවර ප්‍රදේශයේ පිහිටි ගෝටා ගෝ ගමට ද පිරිසක් විසින් ප්‍රහාර එල්ල කර තිබේ. ඉකුත් මැයි 09 වන දා ගාලු මුවදොර ගෝටා ගෝ ගමට ප්‍රහාර එල්ල කළ දිනයේ දී ම මෙම සිදුවීම වාර්තා වීම විශේෂත්වයකි.

කෙසේ වුව ද හිටපු අගමැති මහින්ද රාජපක්ෂ මෙම ගැටුම්කාරී තත්ත්වය මැද සිය ධුරයෙන් ඉල්ලා අස් වීමට කටයුතු කළ අතර ඔහු විසින් සංවිධානය කළ ජනතා හමුවෙන් අනතුරුව මුළු රට ම එකම යුද පිටියක් බවට පත් වූ බවත් ජීවිතවලින් වන්දි ගෙවීමට ද ජනතාවට සිදු වූ බවත් සැමට නොරහසකි. එහෙත් මේ වන තුරු නීතියේ රැහැනට හසුව ඇත්තේ හාල්මැස්සන් පමණි. තෝරු මෝරු නිදැල්ලේ එමෙන් ම ආරක්ෂිත ව පිහිනමින් සිටිති.■