■ මැරයන් වළක්වන්න අසමත් වුණා
■ දේශබන්දු හිටියේ මැරයන්ගේ පැත්තේ
■ කඳුළු ගෑස්, වතුර ගැහුවේ අරගලකරුවන්ටමයි
■ තාමත් අත්අඩංගුවට ගත් කෙනෙක් නෑ
■ අමන්දිකා කුරේ
ගෝඨාභය රාජපක්ෂ ජනාධිපතිවරයාට හා ආණ්ඩුවට ඉල්ලා අස් වන ලෙස බලකරමින් ඇරඹි ගාලුමුවදොර මහජන විරෝධතාවට මාසයක පමණ කාලයක් ගත වී තිබේ. එම කාලය අතරතුර වරින් වර අගමැතිවරයා ඉල්ලා අස් වන බවට විවිධ ප්‍රචාර ගිය ද ඒ සෑම අවස්ථාවකම හිටපු අගමැති මහින්ද රාජපක්ෂ ප්‍රකාශ කළේ තමා ධුරයෙන් ඉවත් නොවන බවයි. එවැනි තත්වයක් තිබිය දී දිගටම අරලියගහ මන්දිරයට ප්‍රාදේශීය දේශපාලනඥයන් සහ පළාත් සභා දේශපාලනඥයන් ගෙන්වමින් මහින්ද රාජපක්ෂ මහතාට ඉල්ලා අස් නොවන ලෙස වැඩසටහන් කිහිපයක්ද පවත්වා තිබුණි. ඒ අනුව මහින්ද රාජපක්ෂ මහතා සිය ධුරයෙන් මැයි 09 වන දින ඉල්ලා අස් වන බවට නැවත වතාවක් විවිධ තොරතුරු හුවමාරු වූ අතර ශ්‍රී ලංකා පොදුජන පෙරමුණේ ප්‍රාදේශීය නායකයන් සහ කැබිනට් ඇමතිවරු ඇතුළු පිරිසක් එදිය සිය පාක්ෂිකයන් ගෙන්වා මහින්ද රාජපක්ෂ මහතාට ඉල්ලා අස් නොවන ලෙස බල කරන රැස්වීමක් පැවැත්වීමට සංවිධානය කර තිබේ.
ජොන්ස්ටන් ප්‍රනාන්දු, සනත් නිශාන්ත, රෝහිත අබේගුණවර්ධන ඇතුළු හිටපු ඇමතිවරුන් ඇතුළු පිරිසක්ද මේ සඳහා ක්‍රියාකාරීව වැඩ කර තිබේ. ඒ අනුව ශ්‍රී ලංකා පොදුජන පෙරමුණේ ප්‍රාදේශීය දේශපාලනඥයන් සහ ආධාරකරුවන් පිරිසක් මැයි නම වන දින උදෑසනම අරලියගහ මන්දිරය වෙත පැමිණ තිබුණි. එම අවස්ථාවේදී තමා ධුරයෙන් ඉවත් නොවන බවට අගමැති මහින්ද රාජපක්ෂ ප්‍රකාශ කළ අතර එම අවස්ථාවට සම්බන්ධ වී සිටි ජොන්ස්ටන් වැනි ඇමතිවරුන් විසින් ගාලු මුවදොර ගෝඨා ගෝ ගමට සහ අරලියගහ මන්දිරය ඉදිරිපිට ඇති මයිනා ගෝ ගමට පහර දිය යුතු බවට ජනතාව උසි ගැන්වීම් සිදු කරනු දක්නට ලැබුණි. පැය කිහිපයක් තිස්සේ අරලියගහ මන්දිරය තුළ පැවැති මෙම රැස්වීමෙන් පසුව පිරිසක් කඩු පොලු රැගෙන අරලියගහ මන්දිරයෙන් පිටතට පැමිණ එහි ඉදිරිපිට රැඳී සිටි විරෝධතාකරුවන්ට පහර දීමට පටන් ගත්තේය.
සැක සිතී පැමිණිල්ලක්
මෙවැනි පහරදීමක් ඇතිවේ යැයි සැක සිතුණු බැවින් ජනතා නීතිඥයෝ වෙනුවෙන් සේනක පෙරේරා නීතිඥවරයා මැයි නම වන දින උදෑසන කොල්ලුපිටිය පොලීසියට පැමිණිල්ලක් කර තිබුණේ මෙවැනි ගැටුමක් ඇති වේ යැයි සැක සහිත බැවින් එම ගැටුම වළක්වා ගැනීමට කටයුතු සූදානම් කරන ලෙසයි. කෙසේ වෙතත් එවැනි ගැටුමක් මැඩ පවැත්වා ගැනීම සඳහා පොලීසියේ ප්‍රමාණවත් සූදානමක් තිබී නොමැති අතර ඉතා විශාල පිරිසක් පැමිණ මයිනා ගෝ ගම සිටි සුළු පිරිසකට පහරදීමට කටයුතු කර තිබුණි. එම පහර දෙන ස්ථානයේ හිටපු ඇමති සනත් නිශාන්ත, මොරටුවේ නගරාධිපති සමන් ලාල් ඇතුළු දේශපාලන දේශපාලනඥයන් ද රැඳී සිටි ආකාරය දක්නට ලැබුණි. ඔවුන්ද පොලු රැගෙන පහරදීමට උත්සාහ කළහ.
සනත් නිශාන්ත සහ සමන්ලාල්
එම අවස්ථාවේදී මයිනා ගෝ ගම සිට පහර කෑමට ලක් වූ තරුණයෙකු අප සමගි අදහස් දැක්වූයේ මෙසේයි.
” මයිනා ගෝ ගම එහෙමත් නැතිනම් මහින්ද රාජපක්ෂ මහතා මහතාට අගමැති ධුරයෙන් ඉල්ලා අස්වන ලෙස බල කරමින් අපි කළ විරෝධතා භූමිය තිබුණේ අරලියගහ මන්දිරය ඉදිරිපිටයි. අපි නම වන දා උදෑසන සිට එම ස්ථානයේ රැඳී සිටියා. අපි විසිපස් දෙනෙකු පමණ තමයි එතැන සිටියේ. එක්වරම අරලියගහ මන්දිරයේ සිට දෙදහසක පමණ පිරිසක් ආයුධ සමග එළියට බැස්සා. අපට කරන්නේ කුමක්ද කියා සිතා ගන්නවත් බැරි වුණා. අපි දුවගෙන ගිහින් එතන තිබුණ බස් හෝල්ට් එකක් පිටුපස සැඟවුණා. අපට ඉදිරියෙන් පොලිසියේ අය සිටියත් ඔවුන්ට එම තත්වය පාලනය කර ගැනීමට නොහැකි බව අපට පෙනුණා. එම මැර කණ්ඩායම සිටියේ අපට ඉතාම ළඟින්. අපේ ඇතැම් අයට එතැන දී පහර කෑමට සිදු වුණා. අප සමග සිටි පියතුමෙක්ටත් පහර දුන්නා. එසේ පහර දුන් ඒ අය හිටපු ඇමති සනත් නිශාන්ත, මොරටුවේ නගරාධිපති සමන්ලාල් කියන අයව අපි පැහැදිලිවම හඳුනා ගත්තා. පොලිසිය එම තත්වය පාලනය කරන්න කිසි සූදානමක් තිබුණේ නැති බවයි අපට තේරුනේ. පොලිසියේ සුළු පිරිසක් එතැන සිටියේ. පසුව හමුදා සාමාජිකයන් පිරිසක් එතැනට පැමිණෙනවා. ඔවුන් පසුකර යාමට විරෝධතාකරුවන්ට හැකියාවක් ලැබුණේ නැති නිසා අපි එතැනින් ආරක්ෂිත වුණා. නමුත් අපිව සිරවෙලා සිටියේ. විරෝධතාකරුවන් දහස් ගණනක් අපිව වට කරගෙන සිටියා. අපිට මේ විදිහට පහර දෙන බව දුටු ඒ ආසන්නයේ සිටි කාර්යාලවල සේවය කළ ගොඩක් අය අප බේරාගන්නට පහළට බැහැලා ආවා. අපි රැඳී සිටි කඳවුරු සියල්ල ගිනි ගිනිබත් කළ පසු ඔවුන් හැමෝම ගාලුමෝදර පැත්තට ගියා. පිරිසක් පොලු රැගෙන අරලියගහ මන්දිරය ඉදිරිපිට රැඳී සිටියා. අපව නැවත ගාලු මොද්ර පිටියට රැගෙන ඒමට පැය කිහිපයක් ගත වුණා. ඒ යන විටත් එතනත් විශාල ගැටුමක් ඇති වෙලා. අපි ඉතාම අනතුරුදායකය තත්වයකයි අරලියගහ මන්දිරය ඉදිරිපිට හිටියේ. හරියට අහු වුණානම් ඔවුන් අපිව මරා දමන්න පවා ඉඩ තිබුණා.’
මෙවැනි තත්වයක් ඇතිවන බවට විවිධ පාර්ශ්ව අනතුරු හඟවා තිබියදී පොලීසිය විසින් එම තත්වය පාලනය කර ගැනීමට අදාළ අවශ්‍ය මැදිහත්වීමක් සිදු නොකිරීම විවිධ පාර්ශ්වවල විවේචනයට හේතුවී තිබේ. අරලියගහ මන්දිර මන්දිරයේ පැත්තේ සිට ගාලු මුවදොර දක්වා තිබුණා මාර්ගය අවහිර කිරීමක් හෝ සිදුනොකර තිබූ අතර තාවකාලික මාර්ග බාධක කිහිපයක් යොදා තිබුණි. ඒවා කඩාගෙන ගාලු මුවදොර දෙස පැමිණීමට අරලියගහ මන්දිරයේ සිට පැමිණි පිරිස කටයුතු කර තිබුණි.
දෙවැනි ප්‍රහාරය
ගෝඨා ගෝ ගමට පහර දෙන මොහොතේ එහි ද විශාල පිරිසක් නොසිටි අතර එක්වරම අරගල භූමියට කඩා වැදුණු මැරයන් විසින් කලා ස්මාරක සහ කුටි කඩා දැමීමට කටයුතු කර තිබූ අතර ඔවුන් ඇතැම් ඒවා ගිනිබත් කර තිබුණි. ගෝඨා ගෝගම සිටි නිරායුද වැසියන් බහුතරයක් පහරකෑමට ලක්ව සිටි අතර තවත් විශාල පිරිසකට තුවාල සිදුවී තිබුණි. එම අවස්ථාව මැඩ පවත්වා ගැනීම සඳහාද ප්‍රමාණවත් පොලිස් නිලධාරීන් පිරිසක් එම ස්ථානයේ සිට නොමැත. මයිනා ගෝ ගමට පහරදීම සිදුවන විට ගෝඨා ගෝ ගමට පැමිණි බස් බස්නාහිර පළාත භාර නියෝජ්‍ය පොලිස්පති දේශබන්දු තෙන්නකෝන් පවසා තිබුණේ එම ස්ථානයේ රැඳී සිටින අරගල අරගලකරුවන්ගේ ආරක්ෂාව පිළිබඳව කටයුතු කරන බවයි. කෙසේ වෙතත් පහරදීම සිදුකරන අවස්ථාවේදී සනත් නිශාන්ත සමඟ දේශබන්දු තෙන්නකෝන් මහතාද උද්ඝෝෂකයන්ට පහර දීමට පැමිණි පිරිස සමඟ පැමිණෙන ආකාරය මාධ්‍ය විසින් වාර්තා කර තිබුණි. මෙලෙස පහරදීමට පැමිණි පිරිසක් ගාලු පාර දිගේ පැමිණ තිබූ අතර ඇතැම් පිරිසක් බාලදක්ෂ මාවත හරහා පැමිණ තිබුණි.
පොලු මුගුරුවලින් පහරදීම නිසා කිහිප දෙනෙකුම බරපතළ තුවාල ලබා රෝහල් ගත කිරීමට සිදුව ඇත. මෙම තත්වය පිළිබඳව තොරතුරු හුවමාරු වීමත් සමඟ ඉතාම ඉක්මනින් ඒ ආසන්නයේ සිටි පිරිස් රාජකාරි කටයුතුවලින් බැහැර වී මෙම ස්ථානයට පැමිණි අතර ඒ අනුව දෙපිරිස අතර ගැටුමක් නිර්මාණය විය. එය මැඩ පැවැත්වීම සඳහා පොලිසිය විසින් කඳුළු ගෑස් සහ ජල ප්‍රහාර එල්ල කර තිබේ. ඊට අමතරව පොලිසිය විසින් ගාලු මුවදොර රැඳී සිටි විරෝධතාකරුවන්ට පහර දී තිබෙන බවට අපට තොරතුරු සෙවීමේ දී අනාවරණය විය. එලෙස පොලිසියේ පහර කෑමට ලක්ව රෝහල්ගත වීමට සිදු වූ දමිළ ජාතික තරුණියක අප සමඟ අදහස් දැක් වූ අතර ඇයගේ අදහස් දැක්වීමේ සිංහල පරිවර්තනය පහත පරිදිය.
බේරාගන්නවා වෙනුවට පහර දීම
”මගේ නම නිලුශනා. මම ගෝඨා ගෝ ගමට ආවේ අම්පාරේ සිටයි. දින විසි එකක් තිස්සේ මම මෙහි රැඳී සිටිනවා. අප මෙහි රැඳී සිටියේ කූඩාරම් ගසාගෙනයි. මැයි නම වන දින ගෝඨා ගෝ ගමට කඩා වැදුණු මැරයන් විසින් අපේ ගමට පහර දුන්නා. අපි රැඳී සිටි කූඩාරම් කඩා දැමුවා. සමහර ඒවා පිළිස්සුවා. පොලිසිය මේ තත්වය පාලනය කරන්න උත්සාහ කළේ නැහැ. පොලීසිය විසිනුත් අපට පහර දුන්නා. මගේ යාළුවාට අරලියගහ මන්දිරයේ පැත්තේ ඉඳගෙන ආව අයෙක් පහර දුන්නා. මම ඒක බේරන්න ගියා. එතකොට මට පොලිස් නිලධාරියෙක් හොඳටම පහර දුන්නා. මම ඔහුගෙන් ඇහුවා අපට පහර දෙන්න අවශ්‍ය නියෝග ලැබිලා තියෙනවද කියලා. නමුත් ඔහු ඒ පිළිබඳ කිසිදු තැකීමක් නොකර දිගටම මට පහර දුන්නා. ඒ පහර දීම නිසා මට ඇවිදගන්න බැරි තරමටම කකුලට හානි වුණා. ඊට පසුව මාව ජාතික රෝහලට ඇතුළත් කළා. පසු දිනයේදී මාව ප්‍රතිකාර ලබාදී නැවත එව්වා. ප්‍රතිකාර ලබා ගෙන නැවත මම අරගල භූමියට ආවා. පොලිස් නිලධාරීන් එදා අපිව පහර දෙන අයගෙන් බේරාගන්නවා වෙනුවට අපට පහර දුන්නු එකයි කළේ.”
පහරදීම සිදුවූ අවස්ථාවේදී ගෝඨා ගෝ ගම රැඳී සිටි වෛද්‍ය ශිෂ්‍යයෙකු වන අනුෂ්ක ගයාන් ලක්මාල් අප සමඟ මෙලෙස අදහස් පළකළේ ය. ”අපට කලින් ඉඳන්ම තොරතුරු ආවා මෙතනට මහින්දගේ ආධාරකරුවන් පහර දෙන්න සූදානමක් තියෙනවා කියලා. ඒ නිසා අපටත් අදහසක් තිබුණා යම් සිදුවීමක් ඇති වේවි කියලා. දහවල් එකත් දෙකත් අතර අපට ආරංචි වුණා මයිනාගෝ ගමට ආධාරකරුවන් විසින් පහර දීලා කියලා. මයිනා ගෝ ගම පැත්තේ ඉඳලා යතුරුපැදිවලින් පැමිණි තරුණ පිරිසක් අපට කෑ ගහගෙන ගියා පහරදෙන පිරිස මග පැමිණෙමින් ඉන්නවා කියලා. ඒ නිසා අපි එතැනින් වටිනා කියන බඩු ටික හැකි ඉක්මනින් ඉවත් කර ගත්තා. අපි පොලු මුගුරු අතට ගත්තේ නැහැ. ගුටි කාලා මැරෙන්න හරි හැමෝම එකට ඉමු කියලා කතා වුණා. සඳුදා දවසක් වුන නිසා එදා හිටියෙත් සුළු පිරිසයි. ඒත් එක්කම අපි අපට පෙනුණා ගාලු පාර දිගේ කලහකාරී පිරිසක් පොලු මුගුරු අතට අරගෙන කෑගහමින් ඒ ආසන්නයේ තිබුණු කූඩාරම් පුච්චමින් ඉදිරියට එන ආකාරය. නමුත් ඔවුන්ව නවත්වන්න අවශ්‍ය මැදිහත්වීමක් පොලීසිය පැත්තෙන් සිදුවුණේ නැහැ. අපිව ආරක්ෂා කරන්න තරම් අවශ්‍ය පොලිස් නිලධාරීන්වත් එතන හිටියේ නැහැ. මේ කලහකාරී පිරිස රතු රතුකුරුස කඳවුර දක්වාම පහර පහරදෙමින් පැමිණියා. අපි දුටුවා ශාන්ත ජෝන් ගිලන් රථ හමුදාවට අයත් කූඩාරමට පවා පහර දීලා තිබුණා. ගාලු මුවදොර තිබුණ කලා නිර්මාණ ගොඩක් ඒ අය කඩලා විනාශ කරලා තිබුණා. මේ අය ඇවිල්ලා රතු රතුකුරුස කඳවුර දක්වා පහර දෙනකම් පොලිසිය මුකුත් මැදිහත්වීමක් කළේ නැහැ. ගොඩක් අයට පහර පහර දීලා ගොඩක් දේවල් කඩා දැමුවාට පසුව තමයි පොලිසිය ජල ප්‍රහාරක රථ අරගෙන ආවේ. පොලීසිය කලහකාරී පිරිස පහර දෙනවා වෙනුවට විරෝධතාව සාමකාමීව හිටපු අපිටත් කඳුළු ගෑස් ප්‍රහාර එල්ල කළා. තමන් විකුණන්න ගෙනැවිත් තිබුණ වතුර බෝතලය පවා වතුර විකුණන අය කඩලා අපට ඒ වෙලාවේ දුන්නා. ප්‍රහාරය එල්ල වන බව ආරංචි වුණ ගමන්ම ඒ අවට කාර්යාලවල හිටපු පිරිස් දුවගෙන ආවා. පොලිසිය මැදිහත් වීමටත් වඩා ඒ කලහකාරී පිරිස පාලනය වුණේ එහෙම වට පිටින් ආව අය නිසයි. අපේ සහයෝගයට පැමිණි පිරිස් ඒ කලහකාරී පිරිස පහර දෙන්න පටන් ගත්ත නිසා පසුබැස්සා. මේ තත්වය පාලනය කරන්න පොලිසිය කරන්න ඕන මැදිහත්වීම කළේ නෑ කියන එක නම් පැහැදිලිව පෙනුණ දෙයක්.”
කඳුළු ගෑස් අරගලකරුවන්ටම ගසයි
එලෙස කලහකාරී ලෙස ගාලුමුවදොරට පැමිණි පුද්ගලයන් විසින් කළ පහරදීම් නිසා බරපතළ තුවාල ලැබූ කිහිපදෙනෙකුම රෝහල් දැඩිසත්කාර ඒකකවල ප්‍රතිකාර ලැබූ අතර මේ වන විට බහුතරයකගේ තත්වය යහපත් අතට හැරෙමින් තිබේ. පහරදීම සහ විනාශ කිරීම් සිදු කළ පසු පොලිසිය විසින් කඳුළු ගෑස් හා ජල ප්‍රහාර එල්ල කර තිබුණද ඒවයින් වැඩි කොටසක් ගාලුමුවදොර සාමකාමී අරගලකරුවන් ඉලක්ක කර එල්ල කළ බවට විරෝධතාකරුවෝ චෝදනා කරති. ඔවුන් පෙවා දෙන්නේ ජලප්‍රහාරක රථ ජල ප්‍රහාර එල්ල කර ඉදිරියට යනවා වෙනුවට ජල ප්‍රහාර එල්ලකරමින් ආපස්සට පැමිණි බවයි. මෙන් ම වැඩි කඳුළු ගෑස් ප්‍රමාණයක් ගාලුමුවදොර අරගලකරුවන්ටම එල්ල කළ බවයි.
කෙසේවෙතත් පසුව මෙම ස්ථානයට විශේෂ කාර්ය බලකා සාමාජිකයන් ගෙන්වූ අතර ඔවුන් ටීපනස් හය ගිනි අවිද රැගෙන පැමිණ සිටිය හ. පසුව එම ස්ථානයට හමුදා සාමාජිකයන් කණ්ඩායමක් ද පැමිණි අතර ඔවුන් සියලු දෙනාම ආයුධ සමග පැමිණ තිබුණි. නමුත් ඔවුන් වර එක් එක් ස්ථානවල හුදෙකලා පහරදීම් සිදු වූ අතර පහර දීමෙන් පැය දෙකකට පසුව මයිනා ගෝ ගම සිරවී සිටි කණ්ඩායම යළි ගාලුමුවදොර බලා පැමිණිය හ.
කෙසේවෙතත් මෙම පහරදීම නිසා උරණ වූ ජනතාව මහින්ද රාජපක්ෂ මහතාගේ ආධාරකරුවන්ට දිවයිනේ විවිධ ස්ථානවල දී පහර දී තිබූ අතර ඔවුන් පැමිණි බස් රථ වලට ද ගිනි තබා තිබුණි. එමෙන් ම මෙම තත්වය ඇති කිරීමට ජනතාව මෙහෙය වූ ජොන්ස්ටන් ප්‍රනාන්දු, සනත් නිශාන්ත ඇතුළු ඇමතිවරුන් කිහිපදෙනෙකුගේම නිවාසවලට එදින සවසම ගිනිතැබීමට කෝපයට පත් ජනතාව කටයුතු කළහ. මෙම ගැටුම අතරතුරදීම බස්නාහිර පළාතට පොලිස් ඇඳිරි නීතිය යෙදූ අතර ටික වේලාවකින් එය මුළු දිවයිනටම ඇඳිරි නීතිය ලෙස සංශෝධනය විය. මෙම ප්‍රහාරයෙන් පසුව මහින්ද රාජපක්ෂ මහතා සිය ධුරයෙන් ඉල්ලා අස් වීමේ ලිපිය ජනාධිපතිවරයාට යොමු කර තිබිණ.
රාත්‍රියේ දී ගාලුමුවදොර ගෝඨා ගෝ ගම ආශ්‍රිතව කිසිදු කලහකාරී සිදුවීමක් වාර්තා නොවූ අතර අරලියගහ මන්දිරය ඉදිරිපිට විරෝධතාකරුවන් අඛණ්ඩ විරෝධතාවක් දක්වමින් සිටි අතර ඔවුන් අරලියගහ මන්දිරයේ තාප්ප සහ ගේට්ටු කඩා බිඳ දමා තිබුණි. එය මැඩපැවැත්වීම සඳහා හමුදාව විසින් අහසට වෙඩි තැබූ අතර පසුව එම ස්ථානයේ ආරක්ෂාව තවදුරටත් තර කරන ලදි.
මෙම තත්වය සම්බන්ධයෙන් පාර්ශ්ව ගණනාවක් මේ වන විට පොලිස් ස්ථානවලට සහ මානව හිමිකම් කොමිසමට පැමිණිලි සිදු කර ඇත. ශ්‍රී ලංකා මානව හිමිකම් කොමිෂන් සභාව විසින් පොලිස්පතිවරයාව සහ හමුදාපතිවරයාව මෙම සිදුවීම සම්බන්ධයෙන් ප්‍රකාශ සටහන් කරගැනීමට කැඳවා තිබුණේ මැයි 11 වනදාය.
එමෙන් ම නීතිඥ මෛත්‍රී ගුණරත්න විසින් කොටුව මහේස්ත්‍රාත් තිළිණ ගමගේට පැමිණිල්ලක් සිදු කර තිබෙන්නේ මෙම තත්වය ඇතිකිරීමට කටයුතු කළ අය නීතිය හමුවට පමුණුවන ලෙසයි.
එම පැමිණල්ලේ සැකකරුවන් ලෙස හිටපු අගමැති මහින්ද රාජපක්ෂ, පාර්ලිමේන්තු මන්ත්‍රීවරුන් වන සනත් නිශාන්ත, ජොන්ස්ටන් ප්‍රනාන්දු, නාමල් රාජපක්ෂ, රෝහිත අබේගුණවර්ධන යන අය ද, මොරටුව නගරාධිපති සමන් ලාල් ප්‍රනාන්දු, මහින්ද කහඳගම, රේඛා කහඳගම, බන්ධනාගාර අධිකාරී තුෂාර උපුල්දෙණිය, බස්නාහිර පළාත භාර නියෝජ්‍ය පොලිස්පති දේශබන්ධු තෙන්නකෝන්, ඩෑන් ප්‍රියසාද් ඇතුළු විසි දෙනෙකුගේ නම් ඇතුළත් කර තිබේ.
කෙසේවුවත් මෙම ප්‍රහාරයට අදාල කිසිවෙකු තවම අත් අඩංගුවට ගෙන නොමැති අතර අප කළ විමසීමක දී පොලිස් මාධ්‍ය ප්‍රකාශක නිහාල් තල්දූව පැවසුවේ ඒ පිළිබඳ පරීක්ෂණ අපරාධ පරීක්ෂණ දෙපාර්තමේන්තුවට ලබා දී ඇති බවයි. පහර දුන් අයගේ පැහැදිලි ඡායාරූප සහ වීඩියෝපට තිබිය දීත් එම පාර්ලිමේන්තු මන්ත්‍රීවරුන්ව අත් අඩංගුවට නොගැනීම අරුමයකි. එසේම හිටපු අගමැතිවරයාගේ පටන් ජොන්ස්ටන් ප්‍රනාන්දු මන්ත්‍රීවරයා වැනි අය පවා මෙලෙස ප්‍රහාරයකට ජනතාව උසි ගැන්වීම් කර්ටන වීඩියෝපට ප්‍රසිද්ධ මාධ්‍යයේ පවා විකාශය විය. නමුත් තවමත් මෙම ප්‍රහාරයට වගකිව යුත්තන් නීතිය හමුවට ගෙන ඒමට පොලිසිය කටයුතු නොකිරීම සහ ප්‍රහාරය මැඩපැවැත්වීමට පොලිසිය කටයුතු නොකිරීම පිළිබඳව ඇත්තේ විශාල සැකයකි.■
