■ ධනුෂි ලිහිණිකඩුව
මේ වන විට ශ්‍රී ලංකාවේ ඇති වී ඇති ආර්ථික අර්බුදය හමුවේ රටේ බැංකු පද්ධතිය කඩා වැටීමකට ලක් විය හැකි බවත් ඉන්ධන, අත්‍යවශ්‍ය භාණ්ඩ සහ ඖෂධ ආදියෙහි පැහැදිලි හිඟයක් ඇති විය හැකි බවත් ආර්ථික විද්‍යා විශේෂඥයෝ අනතුරු අඟවති.
මහාචාර්ය සිරිමල් අබේරත්න, මහාචාර්ය අමින්ද මෙත්සිල පෙරේරා යන ආර්ථික විද්‍යා විශේෂඥයින් එම අනතුරු ඇඟවීම කළේ ශ්‍රී ලංකාවේ භාවිත කළ හැකි විදේශ සංචිත ප්‍රමාණය මේ වන විට ඇමෙරිකානු ඩොලර් මිලියන 50කට වඩා අඩු බවට මුදල් අමාත්‍ය අලි සබ්රි මැයි 04 වන දා පාර්ලිමේන්තුවේ දී කළ ප්‍රකාශය පිළිබඳ අනිද්දා කළ විමසීමේදී අදහස් දක්වමිනි.
කොළඹ විශ්වවිද්‍යාලයේ ආර්ථික විද්‍යාව පිළිබඳ මහාචාර්ය සිරිමල් අබේරත්න වැඩිදුරටත් අදහස් දක්වමින් අනිද්දා වෙත ප්‍රකාශ කළේ විදේශ විනිමය හිඟයත්, විදේශ විනිමය ඉපයීමේ මාර්ග පිළිබඳ අවධානය නොයෙදීමත් හේතුවෙන් ඉදිරි සති දෙක තුන තුළ මෙරට ආර්ථික තත්ත්වය අතිශය තීරණාත්මක වන බවයි. ණය ලබා ගත්තත් එය ද කළ හැක්කේ ඉතා කෙටි කාලයක් පමණක් බව ඒ මහතා වැඩිදුරටත් අදහස් දක්වමින් ප්‍රකාශ කළේ ය.
පවතින මුදල් සංචිතය පිළිබඳ පමණක් සිතා දෛනිකව මෙරටට ලැබෙන ඩොලර් ප්‍රමාණය අමතක කළ මුදල් ඇමතිවරයාගේ ප්‍රකාශය නිර්භීත එකක් වුව ද ඒ හරහා ජනතාව විශාල ලෙස නොසන්සුන් වන බවත් වයඹ විශ්වවිද්‍යාලයේ ආර්ථික විද්‍යා මහාචාර්ය අමින්ද මෙත්සිල පෙරේරා වැඩිදුරටත් ප්‍රකාශ කළේ ය.
මුදල් ඇමතිවරයාගේ එම ප්‍රකාශය සම්බන්ධයෙන් අදහස් දක්වමින් කොළඹ විශ්වවිද්‍යාලයේ ආර්ථික විද්‍යා මහාචාර්ය චන්දන අලුත්ගේ ප්‍රකාශ කළේ මුදල් ඇමතිවරයා කළ ප්‍රකාශයත් සමග කලු කඩ ව්‍යාපාරය ශක්තිමත් වීමට ඉඩකඩ පවතින බවයි. අසංවිධිත ආර්ථික කටයුතුවල වර්ධනයක් ඇතිවන බවත් ඒ හරහා වෙළඳපොල විධිමත් පාලනයෙන් ගිලිහී යන බවත් ඔහු වැඩිදුරටත් පැවසීය.■
