■ ඉඳුවර බණ්ඩාර
ජනතාව මුහුණ දෙන ගැටලු සම්බන්ධයෙන් ක්‍රියාමාර්ග ගන්නා ලෙස ඉල්ලා ත්‍රෛනායික මහානායක හිමිවරුන්ගේ ඒකාබද්ධ නිවේදන ඉදිරියේදී නිකුත් නොවීමේ තත්වයක් නිර්මාණය වී ඇතැයි වාර්තාවේ.
ඊට හේතුවී ඇත්තේ අප්‍රේල් 20 වැනිදා ත්‍රෛනායික මහානායක හිමිවරුන්ගේ සිහිකැඳවීමක් ලෙසට ජනාධිපතිවරයාට නිකුත් කළ නිවේදනයේ ඇතුළත් සිය අත්සන සම්බන්ධයෙන් අස්ගිරි පාර්ශ්වයේ මහානායක හිමියන් විරෝධය පළකිරීමේ සිදුවීමක්ය.
එම අප්‍රේල් 20 වැනිදා නිවේදනය නිකුත් කර තිබුනේ ඊට පෙර ජනාධිපතිවරයාට යවන ලද විසඳුම් යෝජනා සම්බන්ධයෙන් ප්‍රතිචාර නොදැක්වීම මත සිහිකැඳවීමක් වශයෙන් වන අතර එම සිහිකැඳවීමේ නිවේදනයට තම අත්සන යොදා ඇත්තේ අනුමැතියකින් තොරව බවට අස්ගිරි මහානාහිමියන් චෝදනා කර ඇත. ඒ අනුව එම නිවේදනය සකස්කළ මල්වතු පාර්ශ්වයේ හිමිවරුන් දෙදෙනෙකු කැඳවා අවවාද කිරීමෙන් පසු එම හිමිවරු දෙදෙනා අස්ගිරි මහානායක හිමියන්ගෙන් සමාව ගෙන ඇත.
එහෙත් මල්වතු පාර්ශ්වයට සම්බන්ධ අපගේ ආරංචි මාර්ග පවසන්නේ නිවේදනයට ඇතුළත් වන කරුණු සම්බන්ධයෙන් මහානායක හිමිවරුන් දැනුවත් කිරීමෙන් පසු එකී නිවේදන සකස් කරන බවත්, එම අනුමැතිය මත මහානායක හිමිවරුන්ගේ ස්කෑන් කරන ලද අත්සන් යෙදීම මෙතෙක් සිදුකළ බවත් හා ඒ සම්බන්ධයෙන් විරෝධයක් පෑවේ මෙම අවසන් අවස්ථාවේදී බවත්ය.
ජනාධිපතිවරයා සිය යෝජනා ක්‍රියාත්මක නොකළහොත් සංඝ සම්මුතියක් නිකුත් කරන බව අවසන් නිවේදන මගින් ත්‍රෛනායික මහානායක හිමිවරුන් නිවේදනය කර තිබුණි.■
