රටේ උද්ගතව තිබෙන සියලු ප්‍රශ්න රාජපක්ෂලාගේ බළ තෘෂ්ණාව හේතුවෙන් ඇතිවුණ ඒවා බව කිව යුතු නොවේ. රාජපක්ෂලා මහජන මුදල් කොල්ල කෑ බව – සාපරාධී මනුෂ්‍ය ඝාතන සිදු කළ බව නීති ගරුක පුරවැසියන් රටට පවසා සිටිය ද රටේ වැඩි පිරිසක් යථාර්ථවාදී අන්දමින් ඒ සත්‍යයන් පිළිගත්තේ නැත. පිළිගත්තේ නම් යහපාලන ආණ්ඩුව රාජපක්ෂලාට නීතිය ක්‍රියාත්මක කරන්නට අසමත් වූ විට යළි රට භාර දෙන්නට ඔවුන්ව තෝරා ගන්නේ නැත. රාජපක්ෂලාට රට යළි භාර දුන්නේ යහ පාලනයට රිදවන්නට ද?
සිංහල බෞද්ධයෝ මහත් බැතියෙන් දළඳා වදින්නට යති. දළඳා වඳින්නට යන අරමුණෙන් නුවර යන්නට ගොඩ වුණ කෝච්චිය පීලී පැන්න නිසා දළදා වැඳිය යුතු නැතැයි මරිමෝඩයෙකු වත් සිතනු නැත. එහෙත් සිංහල බෞද්ධයෝ එසේ සිතුවෝ නොවෙත් ද? මට හිතෙන්නේ යහපාලනයට ද්‍රෝහීවීම දළදා වැඳිය යුතු නැත යන මුග්ධ තීරණය සදිසි බවය.
නීතියේ ආධිපත්‍යය තහවුරු කර ගන්නට ගත් සාර්ථක වෑයම කණපිට හැරවූ ජනතාවට අද එහි විපාක විඳින්නට සිදුව ඇත. එය නිවැරදි කරගැනීමට රටේ තරුණයෝ අභීත ප්‍රයත්නයක නිමග්නව සිටිති. ඒ වෙනුවෙන් රටේ නීති ගරුක පුරවැසියන් ස්ව කැමැත්තෙන් පාරට බැස ඇත. මේ වූ කලී යහ පාලනයක් රටට අවශ්‍ය බව රටම කොන්දේසි රහිතව පිළිගෙන තිබෙන අවස්ථාවකි. මේ රටේ දේශපාලන සංස්කෘතිය සාධනීය තැනකට එසවීමට ලැබී තිබෙන අගනාම අවස්ථාව වන්නේය. රාජපක්ෂලා ලේ වගුරුවා එය කණපිට හරවන්නට කල්පනා කර තිබේ. රටේ ආර්ථිකය එහෙම පිටින්ම විනාශ කළ ඔව්හු මනුෂ්‍ය ඝාතන මතින් බලයේ තව දුරටත් රැඳී සිටින්නට කල්පනා කිරීමට මොනම අයුරකින්වත් ඉඩක් තිබිය යුතු නැත. සැබවින්ම රට බේරා ගැනීමට අවශ්‍ය මොහොත යථාරූපී අන්දමින් එළඹ ඇත. තරුණ මව්වරුන් කිරිදරුවන් උරයේ හොවා පාරට බසින්නේ ඒ අරමුණ පෙරටු කරගෙනය. මේ වූ කලී කෘත්‍රිම – ව්‍යාජ දේශප්‍රේමයක් නොවේ. මේ වූ කලී යථාර්ථවාදී අවධිවීමකි.
ගෝඨා ගෝ හෝම්
‘ගෝඨා ගෝ හෝම්‘ යන්නේ මතුපිට අදහස ගෝඨාභයට ඉල්ලා අස්වෙන්න යන්න ය. ඔහු රටේ ආර්ථිකය හා නීතියේ ආධිපත්‍යය විනාශ කළ පාලකයා බැවින් ද, සියල්ල ඔහුගේ හස්තයෙන් මුග්ධව හසුරුවන වන බැවින් ද ඔහු තව දුරටත් රාජ්‍ය පාලනය සුදුස්සෙක් නොවේ. මේ වූ කලී නිසි ඉලක්කය ගැනීමය. එසේ වුව, එහි ගැඹුරුම අදහස ‘විධායක ජනාධිපති පදවිය’ තව දුරටත් අවශ්‍ය නැති බව යථාර්ථවාදීව වටහාගෙන එය අහෝසි කර දැමීමේ පරම පැතුම යයි සිතමි. නිසි නිලය අල්ලාගෙනය විරෝධය ගොඩ නැඟී තිබෙන්නේ.
සෑම අංශයකින්ම ගෝඨාභයගේ අසාර්ථකභාවය සම්බන්ධ ඥානය පමණක් නොව තරුණ පරපුර වටහා ගන්නේ. එක පුද්ගලයෙකු අත අසීමිත බලයක් මිට මොළවාගෙන සිටීම රටක යහ පැවැත්මට කිසි ලෙසකින් හෝ සුදුසු නැති බව ඔව්හු වටහාගෙන සිටිති. එපමණක් නොව, ‘වෙන්ඩ ජනාධිපතිලාටත්‘ මේ තුළින් පණිවිඩයක් නිකුත් කර තිබේ.
විධායක ජනාධිපති පදවිය අහෝසි කරන බවට ප්‍රතිඥා දීමේ ඉතිහාසය සැබවින්ම බලය මිට මොළවා ගැනීමේ උප්පරවැට්ටියක්ම විය. හැම කෙනාම කළේ මෙරිගෝ රවුමේ යාම ය. ඒ බල තෘෂ්ණාව ඉහට ගසන නිසාය. නීති ගරුක පුරවැසියන් කවර ප්‍රයත්නයක් දැරුවත් මේ විධායක ජනාධිපති ක්‍රමය අහෝසි කිරීමට ජනතාව නිසි ඉලක්කයක් ඔස්සේ පෙළ ගැස්සවීමට පුළුවන් කමක් නොලැබුණි. මේ අවස්ථාව වූකලී රටේ අතිබහුතර ජනතාව පෙළ ගැසී සිටින අවස්ථාවය. මා විශ්වාස කරන්නේ ‘ගෝඨා ගෝ හෝම්‘ අරගලය ගෝඨාභය ඉවත් වීමෙන් නිමාවක් කරා සේන්දු වන්නේ තාවකාලිකවය. නිමාව, නිමාවක්ම වන්නේ විධායක ජනාධිපති පදවිය අහෝසි කිරීමේ මහජන ව්‍යාපාරයක් සක්‍රිය අන්දමින් බලාත්මක වීමෙන් යයි සිතමි. එය එසේ විය යුතු අතර, සියලු සිවිල් සංවිධාන ඒ අරමුණ වෙනුවෙන් සවිඥානිකව ජනතාව අවධි කළ යුතු ද වන්නේය.
මේ රටට අත්වුණ නපුර විධායක ජනාධිපති ක්‍රමය – ගෝඨාභය අසීමිත බලතෘෂ්ණාවකින් ගොඩ නඟාගෙන සිටින අසීමිත බලය බව තරුණ පරපුර අවබෝධ කර ගැනීම රට යළි ගොඩ නැගීමේ සමාරම්භය වනු ඇත. ප්‍රජාතන්ත්‍රවාදයේ සාරවත් ලක්ෂණ මත ශිෂ්ට සම්පන්න රාජ්‍ය පාලනයක් උදෙසා නියම පදනම ගොඩ නගන්නට ද එය නිසැකව ඉවහල් වනු ඇත.
‘ගෝඨා ගෝ හෝම්‘ අරගලය විධායක ජනාධිපතික්‍රමය අහෝසි කර දැමීමෙන් කෙළවර කර ගන්නට කොන්දේසි රහිතව සියලු පුරවැසියන් කැපවිය යුතු වේ.
චරිත තුනක්
‘ගෝඨා ගෝ හෝම්‘ අරගලය තුළ මූලිකව විරෝධය ගොඩ නැඟීම සිදු වන්නේ චරිත තුනක් මුල් කරගෙනය. ඒ චරිත තුන වන්නේ ගෝඨාභය – මහින්ද සහ බැසිල් ය. මේ වූ කලී ආණ්ඩුවට විරෝධය පළ කිරීම සම්බන්ධයෙන් අදාළ මර්මස්ථාන හරියටම අල්ලා ගැනීම වේ. රාජ්‍ය පාලනය හා සම්බන්ධ සියලු තත්වයන් පමණක් නොව, පාර්ලිමේන්තුව අම්බලමක් බවට පත්වීම හා රටේ ආර්ථිකය විනාශ කිරීම සම්බන්ධයෙන් එහෙම පිටින්ම වගකිව යුත්තේ මේ තිදෙනාය. මේ තිදෙනා ඉලක්ක කරගෙන නිර්මිත සටන් පාඨවල ‘හොරා‘ යන පදයත් ‘මෝඩයා‘ යන පදයත් කැපී පෙනෙන අතර ගෝඨාභය සම්බන්ධව එකී පද දෙකට අතිරේකව ‘පිස්සා‘ යන පදයත් පරිහරණය කෙරේ. ‘හොරා‘ සහ ‘මෝඩයා‘ යන වචන දෙක රාජපක්ෂ පවුල වෙනුවෙන්ම අදාළත්වයක් තිබෙන අන්දම අරගලභූමිය තුළ සැරි සරන කාට වුව විවිධ මට්ටම්වල විරෝධතා පළ කිරීම් ඔස්සේ විද්‍යමාන වේ. තරුණ අරගලය තුළින් උද්දීපනය වන්නේ රට විනාශයට පත් කළේ හොරකම හා මෝඩකම බව යයි හැඟුණි. හොරකම යනු අසාමාන්‍ය තෘෂ්ණාවය. මෝඩකම යනු ‘නොදියුණු‘ කම ය. පිරිහුණු සංඝ පිරිසක් නඩත්තු කරමින් ආගමික අන්තවාදය පැතිරවීම – ජාතිවාදය අවියක් කර ගැනීම නොදියුණුකම හෙවත් මෝඩකම ය. රාජපක්ෂලා මේ නොදියුණු සොබාවය යුද්ධය පළිහක් කරගෙන සමාජ ගත කිරීම ද ‘නොදියුණු කමේ‘ ම සොබාවයකි. එබැවින් තරුණයන් අපේක්ෂා කරන අන්දමේ දියුණු රටක් නිර්මාණය කර ගැනීමට නම් හොරකමට තිත තැබිය යුතුය. අනුවණකම් දුරලිය යුතුය. එබැවින් අරගල භූමිය තුළ ”විගණනය” යන වචනය ප්‍රබලව ඉස්මතු වෙන්නට පටන් ගෙන තිබෙන්නේ. රාජපක්ෂ පවුලේ සියලු දෙනාම ‘චෞර‘ චෝදනාව ලබන්නෝ වෙති. ඔවුන්ගේ අනුගාමිකයන් හා ඔවුන්ට ප්‍රශස්ති ගයන දේශපාලනඥයෝ ද චෞර චෝදනාව ලබන්නෝ වෙති.
‘හොරකම‘ – ‘මෝඩකම‘ සහ ‘විගණනය‘ රාජපක්ෂලාට පමණක් ද අදාළ වන්නේ? ඔවුන්ගේ අනුගාමියකයන්ට හා සහචරයන්ට පමණක් ද අදාළ වන්නේ. නැත. කිසිසේත් අදාළ නැත. කරළියට අවතීර්ණව සිටින දේශපාලනඥයන්ටත්, කරළියට ගොඩ වෙන්නට බලා සිටින දේශපාලනඥයන්ටත් මේ වචන තුළින් නිකුත් වන සංඥාවන් අදාළ ය.
ශ්‍රී ලංකාව සාවද්‍ය ආණ්ඩුකරණ හේතුවෙන් විනාශය කරා තල්ලු වී ගිය ද, එහි කූට ප්‍රාප්තිය හෙවත් රට බංකොලොත් කිරීම මහින්ද – බැසිල් සහ ගෝඨාභය සහ බැසිල් යන තිදෙනාගේ අසීමිත ධන තෘෂ්ණාව සහ බල තෘෂ්ණාව නිසා කල් ගතව හෝ රටම වටහා ගැනීම අලුත් රටක් ගොඩ නැඟීමට අවශ්‍ය ප්‍රඥාව උත්පාදනය කර ගැනීමට මහෝඝයක් සේ අඛණ්ඩව ගලා බැසීමේ ආරම්භය 2022 වසරේ දී ආරම්භ වී ඇති බව මම දකිමි.
කැබිනට් එක සහ ජාතිය ඇමතීම
ගෝඨාභයට අදෘශ්‍යමාන ප්‍රහාරයක් හෙමින් හෙමින් එල්ල වන්නේ ආණ්ඩුව ඇතුළෙන්මය. ප්‍රහාරය එල්ල කරන්නට පෙරමුණ ගත්තවුන් සහ එකතුවුණ එවුන් පාරිජිකා වූවන් වුව ආණ්ඩුව ‘විනාශයක්‘ බව ඔවුන්ගෙන් ගම්‍ය විය. රාජපක්ෂ වන්දනාවේ පංචායුධය පවසා සිටියේ රාජපක්ෂලාගේ දේශපාලනය අවසන් කරන බවය. එපමණක් නොව මේ විරුද්ධවූවන් ඉල්ලා සිටියේ අගමැති ඇතුළු කැබිනට් මණ්ඩලය ඉවත් වී අලුත් අගමැති කෙනෙකු සහ කුඩා කැබිනට්ටුවකින් අන්තර්වාර පාලනයක් ඇති කරන ලෙසය. මේ වූ කලී ව්‍යවස්ථාවට අනුව කළ හැකි කාර්යයකි. අරගලය විසින් ඉල්ලා සිටිනු ලැබුවේ ගෝඨාභය අස්විය යුතුය යන්නය. සැබවින්ම ගෝඨාභය ඉල්ලා අස්වී නම් ව්‍යවස්ථාවට අනුව අන්තර්වාර පාලනයකට ව්‍යවස්ථාවෙන් ලැබෙන ප්‍රතිපාදන භාවිතයට ගෙන අන්තර්වාර පාලනයක් ඇති කළ හැකිය. එසේ වී නම් අගමැති සහ ආණ්ඩුව නිමි.
විනාශය දුර දිග නොයන්නට කල්පනා කළේ ගෝඨාභය ඉල්ලා අස්විය යුතුව තිබුණි. එහෙත් ඔහු ඉල්ලා අස්නොවන තැනකට සේන්දු විය. ඉන් මෙහා යම් තීරණයක් ගැනීමට තිබුණි නම් අගමැති ඇතුළු කැබිනට් මණ්ඩලය ඉල්ලා අස්වී අලුත් අගමැති කෙනෙකු සහ අලුත් කැබිනට්ටුවක් පත් කොට අන්තර් වාර පාලනයක් ඇති කොට ක්‍රමයෙන් යම් තත්වයක් කරා පිය නැඟීමය. එහෙත් මහින්ද රාජපක්ෂ අස් නොවීම ගල් පර්වතයක් සේ සිටීම – ගෝඨාභයට මහින්දව ඉවත් කිරීමට හයියක් නැතිකම යනාදි කාරණා මත කැබිනට් මණ්ඩලයේ ඉල්ලා අස්වීමක් සිදු විය. එය අමු විකාරයක් විය. අවසන අතීසාරයට අමුඩය ගසන්නා සේ ගෝඨාභය අලුත් කැබිනට් මණ්ඩලයක් පත් කළේය. ඒ කැබිනට් මණ්ඩලය රටට විිදහා පෑවේ ගෝඨාභයගේ තරම ය. ඔහුගේ වපසරිය ය. දිග පළල ය. ඊටත් වඩා ඛේදය වන්නේ ජාතිය අමතමින් තමා රටට කෙළවා ඇති බව පිළිගැනීමය.
ගෝඨාභය ජාතිය අමතමින් කළ කතාව ලියූ තැනැත්තා කවුරුන් වුව ඔහු නම් අර්බුදයක ගිලී සිටින නායකයෙකුට ජාතිය අමතන කතාව ලිවීමට නොව, නායකයාගේ අපිරිසිදු වස්ත්‍රය සෝදා පිරිසිදු කර දෙන්නටත් දැනුමක් නැත්තෙකු බව විශද විය. ඒ කතාවෙන් ගෝඨාභය අද හතර ගාතෙන් වැටී සිටින බවය පැහැදිලි වන්නේ. ගෝඨාභය ඒ කතාවට අනුව තව දුරටත් බලයේ රැඳී සිටීම අනුවණය. රට විනාශ කළේ මම බව පිළි ගත් පසුව තව දුරටත් පදවිය දැරීම ඔස්සේ සිදු වන්නේ කුමක් ද? සිදු වෙන්නට කිසිම යහපත් දෙයක් නැත. සිදුවන දේ නිරායුධ තරුණ විරෝධතාකරුවන් සාපරාධී අන්දමින් ඝාතනය කිරීමෙන් අද ලෝකයටම දකින්නට පුළුවන් වී ඇත. විවිධ අන්දමින් ගෝඨාභයම පෙන්වා සිටින්නේ තමන්ට තව දුරටත් රාජ්‍ය පාලනය කළ නොහැකි බවය. තමා අසාර්ථකත්වයේ උපරිමය ද පසු කර සිටින බවය. එබැවින් ඊළඟට සිදු වන්නේ අති භයානක දේවල්ය.
මහින්දගේ අශීලාචාරකම
ධන තෘෂ්ණාව හා බල තෘෂ්ණාව නිසා මහින්ද සිය පවුලට ගැලවීමක් නැත යන භීතියෙන් සලිත බවකි පෙනී යන්නේ. අගමැති පදවිය දැරීම නොව පාර්ලිමේන්තු සභා ගර්භයේ පැයක් එක දිගට වාඩි වී සිටින්නට හෝ නොහැකි තත්වයකය ඔහු පසු වන්නේ. එහෙත් බලය වෙනුවෙන් පිදුරු ගසක හෝ එල්ලෙන්ටය තව දුරටත් මාන බලන්නේ. ඔහුගේ දේශපාලනික අත්දැකීම් යනු මොනවාද? ඔහු පරිණත දේශපාලනඥයෙක් ද? සැබවින්ම මහින්දගේ දේශපාලනය එහෙම පිටින්ම චෞර මනසකින් නිර්මිත එකක් බව පැහැදිලිය.
මහින්දගේ අතීතය ගැන ඡායාරූපය සාක්ෂි කලක සිට සමාජ මාධය ඔස්සේ ප්‍රචාරය වේ. ඔහුත්, ඔහුගේ බිරිඳ හා දරුවනුත් කවර තැනක ද සිටියේ යන්න පැහැදිලිය. ඒ සමඟම අද ඔහු සහ ඔහුගේ පවුල අත්පත් කරගෙන තිබෙන දේවල් හඳුනා ගන්නටද ඡායාරූපමය සාක්ෂි අප්‍රමාණව ඇත.
කෑදරකම ගැන නිර්මිත ජන කතාවක කියවෙන්නේ කුකුළු මස් බුදින්නට අසීමිත කෑදර කමක් තිබුණත් දරුණුම පෙරේතයෙකුටවත් කුකුළන් දහ දෙනෙක් හෝ බුදින්නට බැරි බවය. එසේම අපට වටහා ගත හැකි කාරණාව නම් මිනිහෙකුට ධනය රැස් කිරීමට හැකි වුවත් ඒ ධනයෙන් ඔහුට නොමැරී සිටින්නට පුළුවන්කමක් නැති බවය.
මහින්ද අධ්‍යාපනයෙන් කිසි දීප්තියක් ලත් කෙනෙක් නොවේ. (ඔහුගේ පරම්පරාවටම එය අදාළ වෙන්නට පුළුවන) සැබවින්ම මහින්දට තිබෙන්නේ තමන්ගේ පැවැත්ම වෙනුවෙන් මිනිස්සු මුළා කිරීමේ කුසලතාව පමණි. දේශපාලනයේ ඉහළට ඔහු ගමන් කර තිබෙන්නේ නොමනා ක්‍රියාවන් ඔස්සේය. දේශපාලනයේ ඉහළට ගිය පසු ඔහු ගාණක් නැතිව බොරු කියන්නට හිරිකිතයක් නැති කෙනෙක් විය.
මහින්ද මහජන ධනය කොල්ල කෑමට බලය කොල්ල කන්නට නම් සමතෙකි. අද රටම මහා අවුලකට තල්ලුව තිබෙන සාධක අතර ප්‍රධාන සාධකයක් වන්නේ ඉන්ධනවල අධික මිලය, ඉන්ධන නැතිකමය. බලය අහිමිව සිටි මහින්ද රුපියල් දෙකකින් යහපාලන සමයේ ඉන්ධන මිල වැඩිවුණ විට තම චෞර පිරිස සමඟ බැරි බැරි ගාතේ බයිසිකල්වලින් පාර්ලිමේන්තුවට පැමිණියේය. ඒ සමයේ බඩු මිල අඩු කර තිබුණ සංදර්භයක ඔහු ජනතාවගෙන් අසා සිටියේ කන්ඩ නෑ නේද යන්නය. වෙනස සැප ද යන්නය.
අද මහින්දට හැම විධිහකටම කළ පව් පළ දෙන්නට පටන් ගෙන ඇති බවය දක්නට ලැබෙන්නේ. මට අවංකවම හිතෙන්නේ අද වන විට මහින්ද අව සිහියෙන් මරු කියවන බවය. ඔහුට බිරිඳ සහ දරුවන් නිසා බලය අත්හරින්නට හයියක් ද නැත.
මහින්ද සපථ කර සිටින්නේ කළ පව් අපාගත නොවී කාට වුව විඳවන්නට සිදු වෙන බවයයි මට සිතේ. ඔහුට සිහි කල්පනාව හොඳින් තිබේ නම් පුදුම විඳවීමක් විඳවනවා ද වෙන්නට පුළුවන.
විනාශය තුළින් පිබිදීම
අකමැත්තෙන් වුව අපට පිළිගන්නට සිදුව තිබෙන්නේ ලංකාව විනාශ වී තිබෙන බවය. මේ විනාශය ඇත්ත වශයෙන්ම රාජපක්ෂලා දේශපාලන භූමියෙන් අතුගෑ වී යාමෙන්ම නතර වන්නේ නැත. දේශපාලනයට අවතීර්ණව සාපරාධී අන්දමට මුල්‍ය අපරාධ කළ පුද්ගලයන් ඇතුගෑවී යාමෙන්ද නතර වන්නේ නැත.
හෙට අනිද්දා වන විට බහුතරයක් රට වැසියන්ට ජීවත් වීම බරපතළ ප්‍රශ්නයක් වන්නට පුළුවන. කිසිම ප්‍රශ්නයකට ගෝඨාභයට – ඔහුගේ ආණ්ඩුවට විසඳුම් නැත. ගහන හැම තුරුම්පුවක්ම වැරදෙන අන්දම ඇස් පනා පිට සනාථ වේ.
මොන අන්දමකින් බලහත්කාරෙන් බලය අල්ලාගෙන ඉන්නට කල්පනා කළත් ගෝඨාභයට එය කළ නොහැකිය. ඉතා ඉක්මනට ගෝඨාභය – මහින්ද පරිච්ඡේදය අවසන් වෙන එක නම් නියතය.
ඉන් පසු කළ යුත්තේ කුමක් ද?
විනාශය තුළින් යළි පිබිදෙන්නට නම් ඒ වෙනුවෙන් හැම පැත්තකින්ම සාධනීය ලක්ෂණ පෙන්වා සිටින අලුත් ආණ්ඩුක්‍රම ව්‍යවස්ථාවක් ගොඩ නගා ගැනීම අවශ්‍ය වේ. ව්‍යවස්ථා විශේෂඥයන් දිවා රෑ නොබලා අලුත් ව්‍යවස්ථාවල් ලියන්නට පටන් ගත යුතුය. කවුරුන් හෝ රාජ්‍ය පාලනයට වරමක් ලබාගෙන ඉන් අනතුරුව ව්‍යවස්ථාවක් නිර්මාණය කර ගන්නට සිතනවා නම් එය ද තවත් අසාර්ථක ප්‍රයත්නයක් වනවාට සැකයක් නැත. ජේ. ආර්.
ව්‍යවස්ථාවක් නිර්මාණය කරගෙන සිටියේ තමන්ට බලය ලැබෙන බවට පූර්ව නිගමනයක පිහිටා බලය ලැබුණ පසුව එය සම්මත කර ගැනීමටය. හරි හෝ වැරදි හෝ ඔහු ඔහුට අවශ්‍ය අන්දමට ව්‍යවස්ථාවක් කල් නොමරා සම්මත කර ගන්නට වග බලා ගත්තේය. ඉන් සාධනීය පාඩමක් ඉගෙන ගන්නට ඇත.
අලුත් ව්‍යවස්ථාව තිළින් තරුණ අරගලයෙන් ඉල්ලා සිටින අලුත් රටක් ගොඩ නැඟීමට අවශ්‍ය ශිෂ්ට සම්ප්‍රදායන් නොඅඩුව පූරණය කළ යුතු ද වේ.
මට අවංකවම හිතෙන්නේ ලංකාව විනාශය තුළින් යළි පිබිදෙන බවයි. එහි නායකත්වය ලබා ගන්නේ දියුණු රටක් ගැන සබුද්ධික උගත් තරුණ පරම්පරාවක් යයි ද මම සිතමි. එහි යම් යම් පෙර නිමිති අරගලය තුළින් නිරීක්ෂණය කරන්නටද හැකිවිය.
ගෝඨා කළ එක් දෙයක් වේ
ලංකාව බලය වෙනුවෙන් මනුෂ්‍ය සමාජය බෙදා භේද බින්න කළ රටකි. මහින්ද ජාතිවාදයෙන් හා ආගමික අන්ත වාදයෙන් තමන්ගේ බල ව්‍යුහය හදා ගත්තේය.
ගෝඨාභය රුවන්වැලිසෑයේ දිව්රුම් දී සිංහල බෞද්ධ නායකයෙකු බවට වහසි බස් දෙඩුවේය. ඔහුගේ බල කොල්ලයට පදනම් වූයේ ද ජාතිවාදයයි ආගමික අන්තවාදයයි.
නීති ගරුක පුරවැසියන් ජාතිවාදයෙන් තොර – ආගමික අන්තවාදයෙන් තොර රටක් වෙනුවෙන් රටට අධ්‍යාපනයක් ලබා දෙන්නට ගත් උත්සාහයන් අප්‍රමාණය. එහෙත් ඒ අධ්‍යාපනයෙන් යම් දීප්තියක් ලත් සමාජ තීරු කිහිපයක් හැරුණ විට රාජපක්ෂලා රටම ජාතිවාදයේ හා ආගමික අන්තවාදයේ ගිල්වා නඩත්තු කර ගන්නට වග බලා ගත්හ. ඒ වෙනුවෙන් පිරිහුණු භික්ෂු සමාජයක් නිර්මාණය කරගෙන නඩත්තු කළේය. ගිහි සමාජය තුළින් ද ඊට භූමිතෙල් සපයන සංවිධාන හා පුද්ගලයන් එකතු වුණ හැටි දකින්නට පුළුවන් විය.
අරගල භූමිය තුළ ජාතිවාදය – ආගමික අන්තවාදය පිපිරී තිබුණ අන්දම ආස්වාදජනකය. මහින්ද ගෝඨාභය යුද්ධය පළිහක් කරගෙන රට භුක්තියට සවි කර ගන්නට නිති අවුළුවා නඩත්තු කළ ජාතිවාදයට තරුණ පරපුරේ විරෝධය මැනවින් විද්‍යමාන විය.
ඇත්ත වශයෙන් ගෝඨාභය රාජපක්ෂ බලය වෙනුවෙන් බෙදා වෙන් කළ සමාජය එක භූමියක එක අරමුණක් කරා යන ගමනකට සූදානම් කිරීම දෛවයේ සරදමක් වැන්න.
කළු වලා අතුරින් නැඟී තිබෙන රිදී රේඛාවේ දීප්තිය අවබෝධ කරගෙන ශීලාචාර රටක් වෙනුවෙන් අලුත් ව්‍යවස්ථාවක් නිර්මාණය කරන විශේෂඥයන් ලංකාව දුප්පත් කළ – විනාශ කළ ජාතිවාදය – ආගමික අන්තවාදය නිමා කරන්නට කල්පනාකාරීව පියවර ගත යුතුව ඇත.
රාජපක්ෂලා අවසන් වන්නේ බල තෘෂ්ණාව විෂයෙහි අගනා පාඩම් කීපයක් රටට උරුම කරමිනි.
රාජපක්ෂලා අවසන් වන්නේ ධන තෘෂ්ණාව විෂයෙහි අගනා පාඩම් කීපයක් රටට උරුම කරමිනි.
අගනාම දේ වන්නේ ‘තාරුණ්‍යයට හෙටක්‘ නම් මගඩියක් අටවාගෙන නාමල් රාජපක්ෂ රටේ ඊළඟ නායකයා වෙන්නට තබා ගත් බලාපොරොත්තුව සුන් කර ගන්නට සිදු වීමය. ඒ සුන් කිරීම ”තාරුණයේ නැඟිටීම” තුළින් සිදුවීම ම කවර නම් අරුමයක් ද!■
