රඹුක්කනදී පොලිසිය දුවන මිනිසුන්ට වෙඩි තබා මරයි

■ අමන්දිකා කුරේ

මහජන විරෝධතාවලට වෙඩි තැබීම සහ එයින් මිනිස් ජීවිත අහිමි වීම පිළිබඳව අවසාන වරට අපට අසන්නට ලැබුණේ මීට වසර කිහිපයකට ඉහත දීය. ඒ වර්තමාන ජනධිපති ගෝඨාභය රාජපක්ෂයේ සොයුරු වර්තමාන අගමැති මහින්ද රාජපක්ෂ ජනාධිපතිවරයාව සිටි සමයේ දී ය. කටුනායක නිදහස් වෙළඳ කලාපයේ සේවකයන්ගේ පාගමනට වෙඩි තැබීමෙන් රොශේන් චානක මිය යාම, හලාවත ධීවර උද්ඝෝෂණයේ දී ඇන්ටන් මිය යාමේ පටන්, බීමට වතුර ඉල්ලූ රතුපස්වල ජනතාවට වෙඩි තැබුවේ ද එම කළු පැල්ලම් සහිත මහින්ද රාජපක්ෂ ආණ්ඩුව කාලයේය. නැවත වතාවක් ජනතා විරෝධතා උණ්ඩයෙන් විසඳූ අවස්ථාවක් පිළිබඳ පුවතක් වාර්තා වන්නේ පසුගිය අප්‍රේල් 19 වන දින රඹුක්කන දීය. ඛනිජ තෙල් අර්බුදයට විසඳුම් ඉල්ලූ ජනතාවට වෙඩි තැබීම නිසා එක් අයෙකු මිය ගොස් තවත් පිරිසක් මේ වන විට තුවාල ලබා රෝහල්ගතව ප්‍රතිකාර ලබන අතර එයින් කිහිපදෙනෙකුගේ තත්වය බරපතළ බව නම නිර්නාමිකව සිටිනු කැමති වූ වෛද්‍යවරයෙක් අනිද්දා වෙත ප්‍රකාශ කළේ ය.

මේ තත්වයට හේතු වූයේ කුමක් ද?

පසුගිය අප්‍රේල් 18 වන දින හදිසියේ ම ඛනිජ තෙල් නීතිගත සංස්ථාවේ ඉන්ධන මිල ද ඉන්දියානු තෙල් සමාගමේ මිල ගණන් හා සමාන වන ලෙස ඉහළ දැමූ අතර විවිධ ප්‍රදේශවල ජනතාව මාර්ග හරස් කරමින් එම තීරණයට එරෙහිව විරෝධතා දැක්වූහ. රඹුක්කන ජනතාවද දින කිහිපයක් තිස්සේ ඉන්ධන නොමැතිව රඹුක්කන සමූපකාර ඉන්ධන පිරවුම් හලේ ඉන්ධන බලාපොරොත්තුවෙන් රැඳී සිට තිබේ. ඉන්ධන මිල වැඩි කිරීමට පෙර පැමිණීමට නියමිතව තිබූ ඉන්ධන රැගත් බවුසරයක් හදිසියේ ම නොපැමිණ තිබෙන අතර ඒත් සමග දින කිහිපයක් ඉන්ධන නොමැතිව පෝලිම්වල රැඳී සිටීමට ජනතාවට සිදුව තිබේ. අප්‍රේල් 18 රාත්‍රියේ ඉන්ධන මිල හදිසියේ ම ඉහළ දැමීමට විරෝධය පළ කරමින් එලෙස පෝලිම්වල රැඳී සිටි හා ප්‍රදේශවාසි ජනතාව විසින් මාර්ගය හරස් කරමින් අප්‍රේල් 19 දින පෙරවරු 2.00 පමණ සිට විරෝධතාවක් ආරම්භ කර තිබේ.

රඹුක්කන ප්‍රදේශයේ ම ජීවත්වන සහ එදින මෙම විරෝධතාවට මැදිහත් වූ ඇසින් දුටු සාක්ෂිකරුවෙකු වන ඉන්දික මහතා මෙම සිදුවීම පිළිබඳව පහත පරිදි විස්තර කළේ ය.
”අපි පාන්දර ඉඳන් විරෝධතාවයේ යෙදිලා සිටියේ. පසුව අපි දුම්රිය මාර්ගය රඹුක්කනින් වසා දැමුවා. රඹුක්කනට ඇති සියලු ප්‍රවේශ මාර්ගත් වසා දැමුවා. අපට අවශ්‍ය වුණා මේ උද්ඝෝෂණය මේ පාලකයන්ට දැනෙන්න කරන්න. අපි මාර්ග හරස් කළත් මානුෂීයව ගිලන් රථවලට සහ පාසල් ළමුන්ට යන්න ඉඩ දුන්නා. අපි ඉල්ලුවේ තෙල් මිල අඩු කරලා දෙන්න කියලා. ජාති භේදයක් එතන තිබුණේ නෑ වෛද්‍යවරු පවා විරෝධයේ හිටියා, පොලිසිය මැදිහත් වෙලා පසුව තෙල් බවුසරයක් ගෙනාවත් අපේ ඉල්ලීම වුණේ පරණ මිලට තෙල් දෙන්න කියන එක. ඒ නිසා අපි බවුසරයේ මග හරස් කරගෙන සිටියා. නමුත් අපි කිසි කෙනෙක් බවුසරයට අතක්වත් තිබ්බේ නෑ. පොලිසිය කඳුළු ගෑස් ගහන තෙක්ම කිසි කෙනෙක් ගලක්වත් අතට ගත්තේ නෑ. අපි පොලිසිය එක්කත් කතා කළා. පොලිසියෙන් කිව්වෙත් අපි සාමකාමීව ඉන්න නිසා පහර දෙන්නේ නෑ කියලා උද්ඝෝෂණයට. අපි උදෑසන කෑමත් එතන හදලා කෑවා. දවල් කෑමත් හදලා කෑවා. කඳුළු ගෑස් ගහන මොහොතේ අපි සිටියේ රෑ කෑම සකස් කරමින්. ඒ කිසිම අවස්ථාවක අපි බවුසරයට හානියක් කළේ නෑ. බවුසරයේ රියැදුරාට කෑම එක පවා පෞද්ගලිකව මමයි දුන්නේ.

උද්ඝෝෂකයන්ට කඳුළු ගෑස්, ගල් හා වෙඩි ප්‍රහාර

ඉන්දික පවසන අන්දමට සවස හතරෙන් පසුව එක්වරම කඳුළු ගෑස් ප්‍රහාරයක් එල්ල කිරීමට පොලිසිය කටයුතු කර තිබේ. කඳුළු ගෑස් ගසන ලෙසත් කඳුළු ගෑස් ගසන අවස්ථාවේදීම උද්ඝෝෂකයන්ට පහර දී පන්නා දමන ලෙසත් එම ස්ථානයේ සිටින උසස් පොලිස් නිලධාරියෙකු විසින් පොලිස් නිලධාරීන්ට අණ දෙන ආකාරය දැක්වෙන වීඩියෝවක් මාධ්‍ය හරහා ප්‍රචාරය විය. උද්ඝෝෂකයන්ට පොලිසිය විසින් ද ගල් ප්‍රහාර එල්ල කළ බව ඉන්දික පවසයි. පොලිස් නිලධාරියෙකු ගලක් තබාගෙන සිටින බව දැක්වෙන ඡායාරූපයක්ද මේ වන විට සමාජ මාධ්‍ය තුළ පැතිර යමින් පවතියි. කඳුළු ගෑස් එල්ලවනවාත් සමගම මහජනතාවද පොලිසියට ගල් ප්‍රහාර එල්ල කර තිබේ.

එයින් ටික වේලාවකට පසුව කඳුළු ගෑස් ප්‍රහාර එල්ල වන අතරම පොලිසිය වෙඩි තැබීම සිදු කර ඇත. ඒ පිළිබඳව තමා දුටු දේවල් ඉන්දික මෙලෙස විස්තර කළේ ය.

”උද්ඝෝෂකයන් දිවුවේ ප්‍රධාන පාර දිගේ. කිසි කෙනෙක් ගිනි තියන්න සම්බන්ධ වුණේ නෑ. උද්ඝෝෂණය කරපු අය ගිනි නිවපු එකයි කළේ. වෙඩි වැදුණු පුද්ගලයා උද්ඝෝෂකයන් අතර සිටි කෙනෙක් නෙවෙයි. ඔහු සිටියේ ඉන්ධන පිරවුම්හලෙන් තරමක් එහායින් තිබුණු අතුරු පාරක. ඔහු මේ වෙන්නේ මොකක්ද කියලා බලාගෙන ඉඳලා තියෙන්නේ. ඒ විදිහට හිටගෙන ඉඳපු මනුස්සයාට තමයි පොලිසියෙන් වෙඩි තබලා තියෙන්නේ.”

වෙඩි තැබීම සිදුවූ ස්ථානයේ වෙඩි වැදුණු පුද්ගලයා සමග සිටි තවත් පුද්ගලයෙකු පැවසුවේ පොලිසියේ කිහිපදෙනෙකු එක්වරම අතුරු මාර්ගයට පැමිණි බවත් කිසිවෙකු අපේක්ෂා නොකළ මොහොතක එක් අයෙකු වෙඩි තැබූ බවත් ය. වෙඩි තැබූ අය වෙඩි තැබීමෙන් පසුව එතනින් දිවගොස් තිබේ. මෙම පුද්ගලයා ද ඇතුළුව වෙඩි වැදුණු බහුතරයකට දණිස්සෙන් ඉහළට වෙඩි තබා තිබීම පුදුම සහගත කරුණකි. ඒ අනුව වෙඩි වැදුණු පුද්ගලයන් 14ක් මේ වන විට කෑගල්ල රෝහලේ ප්‍රතිකාර ලබමින් සිටිති.

වෙඩි තිබ්බේ තෙල් බවුසරයට ගිනි තැබූ නිසා – පොලිසිය

මෙම සිදුවීමෙන් පසුව පොලිස්පතිවරයා මාධ්‍යට නිකුත් කළ ප්‍රකාශයේ සඳහන් වන්නේ උද්ඝෝෂකයන් විසින් තෙල් බවුසරයකට සහ ත්‍රීරෝද රථයකට ගිනි තැබූ බවත් එම තත්වය පාලනය කරගැනීම සඳහා වෙඩි තැබූ බවත් ය. නව මහජන ආරක්ෂක කැබිනට් ඇමති ප්‍රසන්න රණතුංග ද අප්‍රේල් 20 වන දින පාර්ලිමේන්තුවේ දී ප්‍රකාශ කළේ තෙල් බවුසරය ගිනි තැබූ නිසා විශාල හානියක් වළක්වා ගැනීම සඳහා මෙම වෙඩි තැබීම සිදු කළ බවයි.

වාහන ගිනි තැබුවේ කවුද?

උද්ඝෝෂකයන් පවසන්නේ ඔවුන් කිසිදු වාහනයක් ගිනි නොතැබූ බවයි. සිද්ධියේ වීඩියෝ දර්ශනවල ද උද්ඝෝෂකයන් විසින් වාහන ගිනි තබන බව නොපෙනේ. එසේ නම් මෙම වාහනවලට ගිනි තැබුවේ කවුද? ත්‍රීරෝද රථය ගිනි ගන්නා අවස්ථාව දැක්වෙන වීඩියෝ පටයේ දැක්වෙන්නේ පොලිසියෙන් පැමිණ එම ත්‍රීරෝද රථයට ගිනි තබා ගිය බවයි.

අප්‍රේල් 20 වන දින කෑගල්ල මහේස්ත්‍රාත් අධිකරණයේ දී මේ පිළිබඳ නඩුව කැඳවූ අතර පසුව මහේස්ත්‍රාත්වරිය සාක්ෂි පරීක්ෂා කිරීමට සිද්ධිය සිදුවූ ස්ථානයට ගිය අවස්ථාවේ ත්‍රීරෝද රථයේ හිමිකරු සාක්ෂි දී තිබෙන්නේ මුහුණ ආවරණය කරගත් පොලිස් නිලධාරීන් දෙදෙනෙකු පැමිණ තම ත්‍රීරෝද රථයට ගිනි තැබූ බවයි.

එමෙන් ම අප්‍රේල් 20 වන දින සිරස නාලිකාව හරහා විකාශය වූ වීඩියෝ පටයක දැක්වෙන්නේ කඳුළු ගෑස් ප්‍රහාර හමුවේ ජනතාව ඉන්ධන පිරවුම්හලෙන් ඈතට පලවා හරින බවයි. එලෙස පලවා හැරීමට පෙර ඉන්ධන පිරවුම්හල ආසන්නයේ යම් දෙයක් ගිනිගන්නා අතර එක් උද්ඝෝෂකයෙක් එය නිවීමට කටයුතු කරයි. ජනතාව එම ස්ථානයෙන් පලවා හැරිය පසු පහළොස් දෙනෙකුගේ පමණ කණ්ඩායමක් පැමිණ ඉන්ධන පිරවුම්හල ඉදිරියේ කළහකාරී ලෙස හැසිරෙන දර්ශන එම නාලිකාව හරහා විකාශය වූ වීඩියෝවේ දැක්වේ. ඉන්පසුව පුද්ගලයෙකු ඉන්ධන පිරවුම්හල අසල නවතා තිබෙන තෙල් බවුසරයක ඉදිරිපස කොටසට ගිනි තබා එන ආකාරය එම වීඩියෝවේ දැක්වේ. ගිනි තබා ඔහු පළා යන්නේ ද නොමැති අතර බවුසරය ආසන්නයේම පොලිස් කණ්ඩායම් ද රැඳී සිටියි. ගිනි තැබූ පුද්ගලයා යළි කළහකාරීව හැසිරෙන පිරිස වෙත පැමිණ නැවත වතාවක් බවුසරය අසලට ගොස් ගින්දර ඇවිලීම යළි සකස් කර එයි. ඒ අවස්ථාවේවත් පොලිස්පතිවරයා කියන ආකාරයේ බවුසරය බේරාගැනීමේ අරමුණින් සිදු කළ වෙඩි තැබීමක් සිදුවන්නේ නෑත. අප සම්බන්ධ කරගත් ප්‍රදේශවාසීන් පවසන්නේ මෙම ගිනිතැබූ පුද්ගලයා හා කලහකාරී ලෙස හැසිරුණු කණ්ඩායම එම ප්‍රදේශයේ ප්‍රදේශවාසීන් නොවන බවයි. එම කණ්ඩායමේ කිසිවෙකුත් රෝහල්ගතව හෝ තුවාල ලබා හෝ නොමැත. වීඩියෝ පටයේ දැක්වෙන්නේ බවුසරය ආසන්නයේ ම පොලිස් නිලධාරීන් කණ්ඩායමක් ද සිටින බවයි.

මිරිහානේ බස් – රඹුක්කන ලොරි

මාර්තු 31 වන දා මිරිහානේ ජනාධිපතිවරයාගේ නිවස ආසන්නයේ පැවති විරෝධතාව අතරතුර දී බස් රථයකට ගිනි තැබූ අතර පොලිසිය බලා සිටිය දී එම පුද්ගලයා ගිනි තබා යාම ද විශේෂ කරුණක් විය. මේ සිදුවීමේ දී ද සිදුව ඇත්තේ එවැනි සිදුවීමකි. මිරිහානේ දී ද බස් රථය ගිනි තැබූ පුද්ගලයාව නිශ්චිතව අත්අඩංගුවට ගැනීමට හැකියාව තිබිය දී අත්අඩංගුවට නොගත් අතර පොලිසිය පසුව ඒ සඳහා මහජන සහාය පැතීය. මෙම සිදුවීමේ දී ද සිදුව ඇත්තේ එවැන්නකි. ගිනිතැබූ පුද්ගලයාව නිශ්චිතව අත්අඩංගුවට ගැනීමට පොලිසියට හැකියාව තිබිය දී එම ස්ථානයෙන් පලවා හැරි උද්ඝෝෂකයන්ට බවුසරය බේරා ගැනීමට වෙඩි තැබීමේ තර්කය කුමක් ද? අප්‍රේල් 20 දින කෑගල්ල මහේස්ත්‍රාත් අධිකරණයට උද්ඝෝෂකයන් වෙනුවෙන් පෙනී සිටි නීතීඥයන් විසින් ගිනි තැබූ පුද්ගලයාගේ ඡායාරූපයක් ඉදිරිපත් කර ඇති අතර ඔහුව වහාම අත්අඩංගුවට ගෙන අධිකරණයට ඉදිරිපත් කරන ලෙස මහේස්ත්‍රාත්වරිය පොලිසියට නියෝග කර තිබේ. ප්‍රදේශවාසී මහජනතාව පවසන්නේ මෙලෙස කලහකාරී ලෙස හැසිරුණු කණ්ඩායම එම ප්‍රදේශයේ ප්‍රාදේශීය දේශපාලනඥයෙකුගේ මැර කණ්ඩායමක් බවයි.

සීසීටීවී දර්ශන කෝ?

මෙම සමුපකාර ඉන්ධන පිරවුම් හලේ සවිකර ඇති සීසීටීවී කැමරා හරහා මෙම බවුසර් ගිනි තැබූ පුද්ගලයන් පහසුවෙන් හඳුනාගත හැකි අතර එම සීසීටීවී දර්ශන පරීක්ෂා කරන ලෙස නීතිඥයන් අධිකරණයෙන් ඉල්ලා තිබේ. එවිට පෙනී ගොස් ඇති කරුණ වන්නේ එම සීසීටීවී කැමරා කඩා බිඳ දමා ඇති බවයි. අප්‍රේල් 20 වන දින සවස මහේස්ත්‍රාත්වරිය ස්ථානීය පරීක්ෂාව සඳහා ගිය අවස්ථාවේදී සිද්ධිය ඇසින් දුටු සාක්ෂිකරුවන් විසින් සාක්ෂි ලබා දී ඇත්තේ පොලිස් නිලධාරීන් විසින් එම කැමරා කුඩු කළ බවටයි. ඒ අනුව මහේස්ත්‍රාත්වරිය නියෝග කර තිබෙන්නේ එම කැමරාවල දෘඪ තැටිය වහාම කොළඹ විශ්වවිද්‍යාලයේ පරිගණක විද්‍යා අංශයට රැගෙන ගොස් එම කැමරා කඩා දමන අවස්ථාව වන තෙක් දර්ශන වහාම අධිකරණයට ඉදිරිපත් කරන ලෙසයි.

අවම බලය උපරිම ලෙස යෙදවීම

පොලිස්පතිවරයා අප්‍රේල් 19 නිකුත් කළ ප්‍රකාශයේ දැක්වෙන්නේ විශාල අනතුරක් වළක්වා ගැනීමට අවම බලය භාවිත කළ බවයි. කෙසේ වෙතත් සාමාන්‍යයෙන් උද්ඝෝෂණ මර්දනය කිරීමට භාවිත කරන කඳුළු ගෑස්, ජල ප්‍රහාර, බැටන් පොලු ප්‍රහාර ඉක්මවා යමින් කඳුළු ගෑස් ප්‍රහාර අතරම වෙඩි තැබීමේ මෙම සිදුවීමේ ඇති විවාද සම්පන්න කාරණයකි. පොලිස්පති හා මාධ්‍ය ප්‍රකාශක නිහාල් තල්දූව පවසන අන්දමට වෙඩි තැබීම සිදු කළේ තෙල් බවුසරය ගිනි ගැනීම වැළැක්වීමට නම් ගිනි තබන සිදුවීම සිදුවන විටත් එතැනින් පළවා හැර සිටි මහජනතාවට වෙඩි වැදුණේ කෙසේ ද? වෙඩි තැබීමෙන් මිය ගිය පුද්ගලයා සිට තිබෙන්නේ නිරායුධව ය. අතුරු මාර්ගයකය. ඉන්ධන පිරවුම්හලෙන් මීටර පන්සියකටත් වඩා ඈතින් වෙඩි වැදුණු ස්ථාන අප්‍රේල් 20 වන දින මහජනතාව විසින් කෑගල්ල මහේස්ත්‍රාත්වරියට පෙන්වා තිබේ, පොලිසිය පසුපසින් පන්නාගෙන ගොස් වෙඩි තබන දර්ශනද මාධ්‍යට නිකුත්ව තිබේ. කිහිපදෙනෙකුටම වෙඩි වැදී ඇත්තේ පසුපසින් ය. එසේ නම් පොලිසිය වෙඩි තබා ඇත්තේ එතැනින් ඉවත් වෙමින් සිටි ජනතාවට ය. පොලිස්පති කියනා ආකාරයට දණහිසෙන් පහළට වෙඩි තැබුවා නම් මිය ගිය පුද්ගලයා ඇතුළු කිහිපදෙනෙකුගේ උදර ප්‍රදේශවලට වෙඩි වැදීම, විරෝධතාවට සම්බන්ධ වී සිටි විශ්වවිද්‍යාල ශිෂ්‍යයෙකුගේ අතට වෙඩි වැදීම සිදු වූයේ කෙසේ ද?

අපගේ ආරංචිමාර්ග අනුව ප්‍රදේශවාසීන් පවසන්නේ පොලිසිය විසින් නිරායුධව තනි තනිව සිටි පුද්ගලයන් ඉලක්ක කර මෙලෙස වෙඩි තැබූ බවයි. ප්‍රදේශවාසීන් පවසන්නේ පසුව විශේෂ කාර්ය බලකායේ සෙබළුන් ද පැමිණ වෙඩි තැබූ බවයි. රාත්‍රි 8.30 වන තෙක් ම තැනින් තැන වෙඩි ශබ්ද ඇසුණු බව ප්‍රදේශවාසීහු පවසති. අවම බලය මෙලෙස වෙඩි තැබීම නම් පොලිසියේ උපරිම බලය කුමක් ද?

පොලිසියෙන් සාක්ෂිකරුවන්ට තර්ජන

අප්‍රේල් 20 වන දින සිද්ධිය වුණු ස්ථානයේ සිට කෑගල්ල මහේස්ත්‍රාත් වාසනා නවරත්න විසින් ප්‍රදේශවාසීන්ගෙන් සාක්ෂි විමසූ අවස්ථාවේ දී නීතිඥයන් හරහා ප්‍රදේශවාසීන් දැනුම් දී තිබෙන්නේ සාක්ෂි ලබා නොදෙන ලෙසට ඔවුන්ට පොලිස් නිලධාරීන් විසින් තර්ජනය කර ඇති බවටයි. පසුව එලෙස තර්ජනය කළ නිලධාරීන් සොයා වහාම විනය පරීක්ෂණ සිදු කරන ලෙසට මහේස්ත්‍රාත්වරිය පොලිස්පතිවරයාට නියෝගයක් නිකුත් කර තිබේ. එම නියෝගය නිකුත් කිරීමෙන් පසුව විශාල ප්‍රමාණයක් සාක්ෂි දීමට ඉදිරිපත් වී ඇති අතර සාක්ෂි කැඳවීම දෙවැනි දිනටත් අප්‍රේල් 21 වන දින සිදු කෙරිණි.

ශ්‍රී ලංකා නීතිඥ සංගමය විසින්ද මෙම අපරාධ වින්දිතයන් සහ සාක්ෂිකරුවන්ට පොලිසියෙන් එල්ල වී ඇති තර්ජන පිළිබඳව සොයා බලා වහාම එම වින්දිතයන්ගේ සහ සාක්ෂිකරුවන්ගේ ආරක්ෂාව තහවුරු කරන ලෙස ඉල්ලමින් අපරාධ වින්දිතයන් සහ සාක්ෂිකරුවන් ආරක්ෂාකිරීමේ ජාතික අධිකාරියට, ශ්‍රී ලංකා මානව හිමිකම් කොමිසමට හා පොලිස්පතිවරයාට ලිපි යොමු කර තිබේ. පොලිසිය සාක්ෂි විනාශ කිරීමේ ප්‍රයත්නයක යෙදන බව ප්‍රදේශවාසීහු පවසති. ඔවුන් පවසන්නේ වෙඩි උණ්ඩ ද පොලිසිය විසින් අහුලාගෙන යාමට කටයුතු කර ඇති බවයි. සීසීටීවී විනාශ කිරීමේ සිදුවීමද එවැන්නක් බව ප්‍රදේශවාසීන් පෙන්වා දෙති.

උද්ඝෝෂකයන්ට වඩා පොලිසියේ තුවාලකරුවන් රෝහලේ

වෙඩි ප්‍රහාරවලට අමතරව පොලිසිය ඉතා අමානුෂික අන්දමින් උද්ඝෝෂකයන්ට පහර දී තිබෙන අතර එක් වීඩියෝවක දැක්වෙන්නේ එක් තරුණයෙකුට පොලිසියේ පිරිසක් වටකරගෙන අමානුෂික අන්දමින් පහර දී පසුව පොලිසියේ ලොරියක් වෙත ඇදගෙන ගොස් ඔහුගේ හිස ද එහි ගසා එම ලොරිය තුළට තල්ලු කර දමනා ආකාරයයි. එම පුද්ගලයාව පසුව මග දමා යාමට පොලිසිය කටයුතු කර තිබේ. විශාල උද්ඝෝෂකයන් පිරිසක් මෙම සිදුවීමෙන් තුවාල ලබා ඇති අතර වෙඩි වැදුණු පුද්ගලයන් සහ බරපතළ තත්වයේ ඇති අය පමණක් 14 දෙනෙකු මේ වන විට කෑගල්ල රෝහලේ ප්‍රතිකාර ලබමින් සිටිති. පුදුමයට කරුණ නම් උද්ඝෝෂකයන්ටත් වඩා එනම්, පොලිස් නිලධාරීන් 15 දෙනෙකු කෑගල්ල රෝහලේ නෙවාසිකව ප්‍රතිකාර ලැබීමයි. රෝහල් ආරංචි මාර්ගවලට අනුව සුළු සීරීම්වලට ප්‍රතිකාර ලබා ගැනීමට බහුතරයක් මෙලෙස රෝහල්ගතව සිටිති. මෙම ස්ථානයේ අණදුන් ජ්‍යෙෂ්ඨ පොලිස් අධිකාරීවරයා ද තුවාල ලැබූ බව කියමින් මහනුවර රෝහලට ඇතුළත්ව තිබේ.

ඒ අතර මියගිය පුද්ගලයාට නඩු දෙකක් තිබූ බවට නියෝජ්‍ය පොලිස්පති අජිත් රෝහණ මාධ්‍යට ප්‍රකාශ කර තිබේ. නඩු දෙකක් තිබීම පුද්ගලයෙකු මරා දැමීමට සමාවට කාරණයක් වන්නේ කෙසේ ද?

මේක මිනීමැරුමක් – නීතිඥ නුවන් බෝපගේ

”පොලිසියට හෝ මහජන සාම නිලධාරියෙකුට යම් කළහකාරී තත්වයක් පාලනය කිරීම සම්බන්ධයෙන් අපරාධ නඩු විධාන සංග්‍රහයේ 95,96 වගන්තිවල සඳහන් කරලා තිබෙනවා. ඒ අනුව යම් අවස්ථාවක දී පොලිසිය හෝ සාම නිලධාරියෙකු හෝ මැදිහත් වීම අත්‍යවශ්‍ය වන අවස්ථාවක ඒ සඳහා අවම බලය පාවිච්චි කළ යුතුයි. ඒ අවම බලය එම විරෝධතාව හෝ උද්ඝෝෂණය විසුරුවා හරින්න අවශ්‍ය ප්‍රමාණයට වඩා භාවිත කරන්න බෑ. ඒ අනුව ඒ අවශ්‍ය ප්‍රමාණය කියන එක බද්ධ වෙනවා පොලිස් දෙපාර්තමේන්තු නියෝග සමග. එහි සඳහන් කරලා තිබෙනවා අවම බලය පාවිච්චි කළ යුතු ආකාරය ගැන. ඒ අනුව පොලිසියට යම් උද්ඝෝෂණයක් විසිරුවා හැරීමට මෙවලම් විශාල ප්‍රමාණයක් තිබෙනවා. හැකියාව තිබේ නම් මුල් අවස්ථාවේදීම අධිකරණ නියෝගයක් ලබා ගත හැකියි විරෝධතාවය පැවැත්වීම වාරණය කරමින්. එසේත් නැතිනම් සීමාව තුළ සිටිමින් කඳුළු ගෑස්, බැටන් පොලු ප්‍රහාර, ජල ප්‍රහාර වගේ ක්‍රම පාවිච්චි කරලා විසුරුවන්න පුළුවන්. මේ සියලු දේවල් කරලත් කලහකාරී තත්වයක් තිබෙනවා නම් වෙඩි තැබීමේ හැකියාව තිබෙනවා.

රඹුක්කන සිද්ධියේ දී ඉතාමත් පැහැදිලියි මූලිකව එම උද්ඝෝෂණය විසිරුවා හරින්න අවශ්‍ය අවම බලය ඉක්මවලා කටයුතු කර තිබෙන බව. මේ මූලික පියවර කිසිවක් නොගෙන ඔවුන් කඳුළු ගෑස් ප්‍රහාරයක් එල්ල කරනවා. ඊට පස්සේ තිබෙන වීඩියෝ දර්ශන අනුව පුද්ගලයන් විසිරිලා යනවා. රේල් පාර අවහිර කරගෙන සිටි පුද්ගලයන් පවා එතැනින් යනවා. ඒ වගේ ම සමාජ මාධ්‍යවල හුවමාරු වන ඡායාරූපවල පෙනෙනවා මිනිස්සු සාමාන්‍ය විදිහට තමන්ගේ බයිසිකල් පවා නවත්තලා ඒ තැන්වලින් විසිර ගිහින් තිබෙනවා. එහෙම විසිර ගියාට පස්සේ නැවත බලයක් පාවිච්චි කරන්න අවශ්‍යතාවක් නෑ. අවම බලය පාවිච්චි කළ යුත්තේ උද්ඝෝෂණය විසුරුවන්න. විසුරුවන්න අවශ්‍ය කඳුළු ගෑස් ප්‍රහාර සහ අනෙකුත් පොලිස් මැදිහත්කිරීම් සිදු කළාට පස්සෙත් වෙඩි තැබුවා නම් ඒක අනිවාර්යයෙන් ම බලය ඉක්මවා කටයුතු කිරීමක්. එය මිනීමැරීමේ වරද දක්වා යන තත්වයක්. ඒ අනුව පැහැදිලිව කිව හැකියි උද්ඝෝෂකයන්ව ඝාතනය කිරීමේ චේතනාවෙන් පොලිසිය ක්‍රියාකරලා තිබෙනවා. එහෙම නැතිව මේ උද්ඝෝෂණය විසුරුවා හැරීමේ චේතනාවෙන් නෙවෙයි ඔවුන් කටයුතු කර තිබෙන්නේ. උපරිම බලය භාවිත කරලා වම බලය භාවිත කළා කියලා පොලිස්පති කියන්නේ කොහොමද? දණහිසින් පහළට වෙඩි තැබුවා නම් මිනිස්සු මැරෙන්න කොහොමද?”

පොලිසිය අධිකරණයට ලබා දුන් වාර්තා විකෘති කරයි.

මේ සම්බන්ධ නඩුව කෑගල්ල මහේස්ත්‍රාත් අධිකරණයේ දී අප්‍රේල් 20 දින කැඳවූ අවස්ථාවේ දී අධිකරණයට පොලීසිය මුලින් ඉදිරිපත් කළේ ඒආර් වාර්තාවකි. එනම්, සිදුවීමක් සිදුවීමෙන් පසුව, සැකකරුවන් නැති අවස්ථාවක අධිකරණයට යොමු කරන වාර්තාවකි. නමුත් වෙඩි ප්‍රහාර නිසා පුද්ගලයෙකු මියගොස් තිබෙන නිසා මහේස්ත්‍රාත්වරිය ඒආර් වාර්තාවක් භාර ගැනීම ප්‍රතික්ෂේප කර තිබේ. උද්ඝෝෂකයන් වෙනුවෙන් පෙනී සිටි නීතීඥයන් ද එයට දැඩි විරෝධයක් දක්වා තිබේ. ඉන්පසුව පොලීසිය කඩිනමින් බී වාර්තා දෙකක් සකස් කර අධිකරණයට ඉදිරිපත් කර තිබේ. එක් වාර්තාවක එහි අපරාධ නඩු විධාන සංග්‍රහයේ 298 වගන්තිය ගැන සඳහන්ව තිබූ බව නීතීඥවරුන්ගේ ආරංචිමාර්ග පවසයි. එම වගන්තිය අදාළ වෙන්නේ සාවද්‍ය මනුෂ්‍ය ඝාතනය යන කරුණට ය. ඒ කියන්නේ පොලීසියම මෙතැන මිනීමැරුමක් වූ බව පිළිගන්නා තත්වයකි.

මේ අතර පොලිස්පතිවරයා විසින් මෙම සිදුවීමේ දී පොලිසිය බලය ඉක්මවා කටයුතු කළේ දැයි සොයා බැලීමට පත් කළ ස්වාධීන පරීක්ෂණ කමිටුවේ නිලධාරියෙකු, නියෝජ්‍ය පොලිස්පති අජිත් රෝහණ සමග අධිකරණයට පැමිණ සිට තිබේ. ඔහු මැදිහත්වී පොලීසිය විසින් අධිකරණයට භාරදුන් වාර්තාවේ 298 වගන්තියට අදාළ කොටස මැකුම් දියරයකින් මකා දැමීමට කටයුතු කර තිබේ. පසුව මේ ගැන නීතිඥයන් අධිකරණයට දැනුම් ඇති බව නීතිඥවරු පවසති. එම නිලධාරියාට දැඩිව අවවාද කළ මහේස්ත්‍රාත්වරිය අධිකරණ ලේඛන මකා දමමින්, විකෘති කරමින් අධිකරණයට අපහාස කිරීම පිළිබඳව පරීක්ෂණයක් පවත්වන ලෙස පොලිස්පතිවරයාට දැනුම් දී තිබේ. එමෙන් ම එම නිලධාරීන් දෙදෙනාට එම අවස්ථාවේදී අධිකරණයෙන් සමාව ගන්නා ලෙසට ද මහේස්ත්‍රාත්වරිය නියෝග කර තිබේ.

දෙවැනි බී වාර්තාව අත්අඩංගුවට ගනු ලැබූ පාසල් ශිෂ්‍යයෙකුට එරෙහිව පොදු දේපල පනත අයතේ ගොනු කර ඇති නමුත් එම සිසුවාට අප්‍රේල් 20 වන දින ඇප ලබා දී තිබේ.

පොලිස්පති ස්වාධීන කමිටුවේ වැරදි හොයන්න තව පොලිස්පති කමිටුවක්

පොලිස් මාධ්‍ය කොට්ඨාසය විසින් අප්‍රේල් 20 පෙරවරුවේ නිකුත් කළ මාධ්‍ය නිවේදනයක දැක්වෙන්නේ රඹුක්කන සිදුවීමේ දී පොලිසිය බලය ඉක්මවා කටයුතු කළේ ද යන්න පිළිබඳව සොයා බැලීමට ස්වාධීන පරීක්ෂණ මණ්ඩලයක් පත් කළ බවයි. කෙසේවෙතත් එදින සවසම එම ස්වාධීන පරීක්ෂණ මණ්ඩලයේ සාමාජිකයෙකු පිළිබඳ සොයා බැලීමට තවත් ස්වාධීන කමිටුවක් යෙදීමට පොලිස්පතිවරයාට සිදුව තිබේ.

මානව හිමිකම් කොමිසමෙනුත් දෝස්මුරයක්

රඹුක්කන අපරාධ ස්ථානය නිරීක්ෂණය කිරීමට ගිය මානව හිමිකම් කොමිසමේ නිලධාරීන් පෙන්වා දෙන්නේ වෙඩි වැදුණු ස්ථානවල පරීක්ෂණ සිදු කිරීමට හැකි වන පරිදි එම ස්ථාන ආවරණය කිරීමක් වත් පොලිසිය විසින් සිදු කර නොමැති බවයි. සිද්ධිය සිදු වූ දින ම මාධ්‍ය වෙත අදහස් දැක්වූ මානව හිමිකම් කොමිසමේ නිලධාරීන් පැවසුවේ මෙම වෙඩි තැබීම නීති විරෝධී ක්‍රියාවක් බවත් ඒ පිළිබඳව සොයා බලා වැරදිකරුවන්ට දඬුවම් ලබා දෙන ලෙසත් ය.
මෙම සිදුවීම පිළිබඳව තවමත් අධිකරණ ක්‍රියාවලිය සිදුවෙමින් පවතියි. නමුත් බැලූ බැල්මටම පිටපතේ වැරදුණු තැන් රාශියක් හඳුනාගත හැකිය. අප සැමට ඇති අත්දැකීම් අනුව මීට වසර ගණනාවකට පෙර ද උද්ඝෝෂණ මර්දනය කිරීමට කටයුතු කළේ ද එම ආකාරයෙන් ය. ජනාධිපතිවරයා කැබිනට් මණ්ඩලය පත් කළ දින කීවේ පෝලිම්වල සිටින ජනතාවගේ ප්‍රශ්නවලට තමා සංවේදී බවයි. ඔහුගේ සංවේදීභාවයේ උපරිමයට මුහුණ දීමට රඹුක්කන ජනතාවට සිදුව තිබේ. හිටපු ඇමති ජොන්ස්ටන් ප්‍රනාන්දු ටික කලකට පෙර කියූ ආකාරයට කාක්කෙකු මරා තට්ටක් එල්ලීමට ආණ්ඩුව කටයුතු කර තිබේ. දැන් ඇත්තේ පාර්ලිමේන්තුවේ ජනතා නියෝජිත ජනතාව වෙනුවෙන් පෙනී සිටිය යුතු වාරයයි.■