‘වත්මන් ආරක්ෂක මාණ්ඩලික ප්‍රධානී සහ යුද්ධ හමුදාපති ජෙනරල් ශවේන්ද්‍ර සිල්වා මහතාගේ ධුරය නීත්‍යනුකූල සේවා දිගුවක් නොමැතිව සිදුකර ඇති බවට සමාජ මාධ්‍ය ජාලා ඔස්සේ ප්‍රචාරය වන තොරතුරු ආරක්ෂක අමාත්‍යාංශය තරයේ ප්‍රතික්ෂේප කරනු ලැබේ. යුද්ධ හමුදාපති ජෙනරාල් ශවේන්ද්‍ර සිල්වා වෙත ලබාදී ඇති සේවා දිගුව තවමත් වලංගු වන අතර එය 2021 දෙසැම්බර් මස 31 දින සිට බලපැවැත්විණි’
මෙසේ සඳහන් කර ඇත්තේ ආරක්ෂක අමාත්‍යාංශය විසින් අප්‍රේල් 11 දින නිකුත් කර ඇති මාධ්‍ය නිවේදනයකය. මෙම මාධ්‍ය නිවේදනයට නිමිත්ත සැපයූවේ අප්‍රේල් 10 දින අප පුවත්පතේ පළවූ ලියුම්කරු විසින් ලියන ලද ‘ශවේන්ද්‍ර හමුදාපතිකමේ ඉන්නේ නීත්‍යනුකූලවද?’ මාතෘකාවෙන් හා ‘සේවා දිගුවකට අදාල නිවේදන හෝ ගැසට් නැත, ජනපතිගේ ආවතේවකාර ඔහුටත් ඉල්ලා අස්වන ලෙස බලකළ යුතූය’ යන්නෙන් පළවූ ලිපිය සම්බන්ධයෙන්ය. එම ලිපියේ ඇති කරුණු පසුව එස්එල් දේශය යූටියුබ් නාලිකාවේ විග්‍රහයක් වශයෙන් යොදාගනු ලැබීය. එහිදී ඔහුන් පැහැදිලිව සඳහන් කළේ එම කරුණු අපගේ පුවත්පතේ ඉදිරිපත් කර ඇති ඒවා බවත්, ඒ සම්බන්ධයෙන් ලියුම්කරු වන අපගෙන් යළි විමසීමක් කළ බවත්ය. සමාජ මාධ්‍ය ඔස්සේ මෙම ලිපිය හා ඊට අදාළ කරුණු පැතිරෙන්නට ඇත. අපගේ වෙබ් අඩවියේ පවා එම ලිපිය පළවී තිබේ. අපට දැනගන්නට ඇති පරිදි යුද හමුදාපතිවරයාද එම ලිපිය සමාජ මාධ්‍යවල පළවීමට පෙර දැක තිබේ. ඒ යුද හමුදා මාධ්‍ය අංශය විසින් එය ඔහුට ඉදිරිපත් කිරීමෙන්ය. ආරක්ෂක අමාත්‍යාංශයට අයත් මාධ්‍ය අංශයත් මෙම ලිපිය දැක තිබුණාට සැක නැති අතර ඔවුන්ට සම්බන්ධ කාරණයක් නිසා එය ආරක්ෂක අමාත්‍යාංශ ලේකම්වරයා ඇතුළු බලධාරීන්ට යොමු කර තිබුණාට සැක නැත.
ඒ අනුව එම ලිපිය සම්බන්ධයෙන් ආරක්ෂක අමාත්‍යාංශය සෘජුව පිළිතරු සැපයිය යුත්තේ අපටය. එහෙත් එය එසේ වී නැත. කෙසේ වෙතත් දැන් අපගේ ලිපියේ අඩංගූ කරුණු සම්බන්ධයෙන් ආරක්ෂක අමාත්‍යාංශය පිළිතුරක් ලබාදී ඇත. ඒ ගැන කෙටියෙන්ම අපට කිව හැක්කේ එම පිළිතුර අසම්පූර්ණ එකක් බවය. ඊට හේතූව සමාජ මාධ්‍ය ඔස්සේ හෝ වෙනත් ආකාරයට සංසරණය වූ අපගේ ලිපියේ ප්‍රශ්න කරනු ලැබූ කරුණුවලට ඉන් පිළිතුරු ලැබී නැති නිසාය. අපගේ ලිපියෙන් ප්‍රශ්න කරනු ලැබුවේ යුද හමුදාපති ශවේන්ද්‍ර සිල්වාගේ සේවා දිගුවලට අදාල රජයේ ගැසට් නිවේදන ගැනය. අප පෙන්වා දුන්නේ ඊට අදාල කිසිදු ගැසට් නිවේදනයක් සොයා ගන්නට නොමැති බව හා ඊට අදාල ගැසට් නිවේදන තිබේ නම් ඉදිරිපත් කරන ලෙසය. අපගේ තර්කය වූයේ, එසේ ශවේන්ද්‍ර සිල්වාගේ සේවා දීර්ඝයන් සම්බන්ධයෙන් ගැසට් නිවේදන නැත්නම් ඔහු එම ධුරයේ සිටින්නේ නීත්‍යනුකූල පදනමකින් නොවන බවයි. මන්ද යුද හමුදා අධිකාරි ලත් නිලධාරීන්ගේ පත්වීම්, උසස් වීම්, විශ්‍රාම යෑම් හා සේවය දීර්ඝ කිරීම් සම්බන්ධයෙන් ජනාධිපතිවරයා විසින් හා ජනාධිපතිවරයාගේ අනුමැතිය යටතේ ගැසට් නිවේදන පළකළ යුතු නිසාය. ඒ නිසා ආරක්ෂක අමාත්‍යාංශ නිවේදනය මගින් අපගේ ලිපියේ ඇති කරුණු ප්‍රතික්ෂේප කරනවා යැයි වචනාර්ථයෙන් කීම ප්‍රමාණවත් නැත. එම නිවේදනයේම ඇති කරුණ අනුව 2021 දෙසැම්බර් 31 දින සිට ඉදිරියට ඔහුගේ සේවා දිගුව ක්‍රියාත්මක වන්නේ නම් එම දිනයේ හෝ ඊට අදාලව නිකූත් කළ ගැසට් පත්‍රයේ විස්තර ප්‍රකාශයට පත්කළ යුතුය. එමෙන්ම එම දිනයට පෙර ඔහුට සේවා දිගුූ ලබාදීම් සම්බන්ධයෙන් නිකූත් කළ ගැසට් නිවේදනවලට අදාල විස්තරද ප්‍රකාශයට පත්කළ යුතූය.
මෙසේ අධිකාරි ලත් සෑම නිලධාරියෙකුගේම පත්වීම, උසස් කිරීම, විශ්‍රාම ගැන්වීම හා සේවය දීර්ඝ කිරීම යන අවස්ථා සම්බන්ධයෙන් නිකුත් කරනු ලබන ලිපිවල පැහැදිලිවම සඳහන් කරන්නේ එම කරුණට අදාලව රජයේ ගැසට් පත්‍රයේ නොපමාව පළකිරීමක් සිදුකරන බවය. එසේ නොවුණහොත් එහි නීත්‍යනුකූලභාවය අභියෝගයට ලක්වීම ඒ මගින් කියා පායි. ඊට අදාල නෛතික ක්‍රියාවලිය 1993 අගෝස්තු 17 වැනිදා අංක 780/7 දරන අති විශේෂ ගැසට් පත්‍රය මගින් ප්‍රකාශයට පත්කර ඇති අතර එය ප්‍රකාශයට පත්කර ඇත්තේ යුද හමුදා පනත යටතේ ජනාධිපතිවරයා සෑදූ නියෝගයක් වශයෙන්ය. එහි මෙසේ සඳහන් කර තිබේ. ‘වැඩ බැලීමේ පත්වීම්ද ඇතුළු සියලු යුද හමුදා පත්වීම්, මාරුකිරීම්, ඉල්ලා අස්වීම්, ජ්‍යෙෂ්ඨතාවය ප්‍රතිශෝධනය කිරීම්, ධුරයේ කටයුතු කිරීමෙන් අත්හිටුවීම්, ඉවත් කිරීම්, ද්විතීයනය කිරීම්, මේජර් නිලය ඇතුළු ඊට ඉහළ නිලවලට උසස් කිරීම් ජනාධිපතිවරයා විසින් අනුමත කිරීමෙන් පසු ගැසට් පත්‍රයේ පළකළ යුතුය.’
එමෙන්ම එහි දැක්වෙන්නේ හමුදාපතිවරයා ලෙස පත්කරන නිලධාරියා ඔහුගේ වයස අවුරුදු 55 ඉක්මවීමෙන් පසු නිල කාලය දීර්ඝ කිරීමෙන් පසු හෝ විශ්‍රාම යෑමෙන් පසු ඔහුව නැවත පත්කිරීමෙන් ජනාධිපතිවරයාට සේවයේ රඳවාගත හැකි බවය. එහි රෝම ඉලක්කම් 6 වන කොටසේ විශ්‍රාම ගැන්වීම්, ඉල්ලා අස්වීම් හා ඉවත් කිරීම් යටතේ සඳහන් කරන්නේ අනිවාර්ය විශ්‍රාම ගැන්වීමට යටත්ව සිටින නිලධාරියකු එසේ විශ්‍රාම ගැන්වීමේ දිනට කලින් දිනට පසුව රාජකාරියේ රඳවා නොගත යුතුය යනුවෙන්ය.
ඒ අනුව වත්මන් යුද හමුදාපති ශවේන්ද්‍ර සිල්වා සම්බන්ධයෙන් පමණක් පාලක රාජපක්ෂවරුන්ට මෙන් වෙනම නීතියක් රටේ පැවතිය නොහැකිය.
ඔහුගේ සේවා දිග සම්බන්ධයෙන් අනිවාර්යෙන් රජයේ ගැසට් පත්‍රයේ පළකිරීම් තිබිය යුතූමය. එහි ඊට බැහැරින් වෙනත් නෛතික පදනමක් තිබිය නොහැකිය. වයස අවුරුදු 55 සම්පූර්ණ වීමෙන් පසු සෑම යුද හමුදා නිලධාරියකුම විශ්‍රාම ගතයුතු අතර යුද හමුදා පනත යටතේ ජනාධිපතිවරයා විසින් සාදා ඇති 1981 යුද හමුදා විශ්‍රාමික හා පාරිතෝෂික සංග්‍රහයේ ඒ බව පැහැදිලිවම සඳහන් කර තිබේ. තවදුරටත් ඔවුන්ට සේවයේ සිටිය හැක්කේ අප සේවය දීර්ඝ කිරීම වශයෙන් සඳහන් කරන ජනාධිපතිවරයා විසින් ඔහුව ‘කොමිෂන්’ හෙවත් අධිකාරි පත් කිරීමක් ලබාදීමෙන් පමණය. ඒ සඳහා ඕනෑ තරම් උදාහරණ රජයේ ගැසට් පත්‍රයෙන් සොයාගත හැකිය. යුද හමුදාවෙන් හෝ වෙනත් හමුදාවකින් විශ්‍රාම ගන්වන නිලධාරීන් එම විශ්‍රාම ගැන්වීමෙන් පසු තවදුරටත් සේවය කිරීම සඳහා ස්වෙච්ඡා හමුදාවට අනුයුක්ත කිරීමේදී එම කොමිෂන් පත්කිරීම ජනාධිපතිවරයා රජයේ ගැසට් නිවේදනයක් ලෙස නැවත සිදුකරන නිසාය.
එය තවදුරටත් පැහැදිලි කර ගැනීම සඳහා ජනාධිපතිවරයා විසින් පත්කරනු ලබන කොමිෂන් සභා ආදියෙන්ද උදාහරණ ගත හැකිය. ඒවාට සාමාජිකයින් පත්කිරීමද ‘කොමිෂන්’ පත්කිරීමක් වන අතර රජයේ ගැසට් පත්‍රයේ ඒ සඳහා වූ නිශ්චිත කාලයක් සඳහන් කරන්නේ ඒ නිසාය. එමෙන්ම එම නිශ්චිත කාලය තූළ අදාල කොමිසමට එම කාර්යය කිරීමට නොහැකි වන අවස්ථාවල එකී කොමිෂන් කාලය දික්කර ජනාධිපතිවරයා ගැසට් නිවේදන මගින් පළකිරීම් සිදු කරන්නේ ඒ නිසාය.
අපි අප්‍රේල් 14 දින ඊමේල් මාර්ගයෙන් ජනාධිපති කාර්යාලය, ආරක්ෂක අමාත්‍යාංශය හා යුද හමුදාව යන ආයතනවල තොරතුරු නිලධාරීන්ට 2016 අංක 12 දරන තොරතුරු දැනගැනීමේ පනත යටතේ තොරතුරු ඉල්ලීමේ ඉල්ලුම් පත යොමු කෙරුවෙමු. එම තොරතුරු ඉල්ලීම් ලැබුණ බවටවත් මෙම ලිපිය ලියන අප්‍රේල් 19 දින වන විටත් පිළිතුරක් ලැබී නැත. ඒවායින් අප ඉල්ලා ඇත්තේ වත්මන් යුද හමුදාපති ජෙනරාල් ශවේන්ද්‍ර සිල්වාට වයස අවුරුදු 55 සම්පූර්ණවීමෙන් පසු ලබාදුන් සේවා දිගවලට අදාල ගැසට් පත්‍රවල විස්තරය. ඒ අනුව ඉල්ලා ඇත්තේ ඔහුගේ එක්එක් සේවා දිගුවට අදාල රජයේ ගැසට් පත්‍රයේ අංකය, ඒවා නිකුත් කළ දින හා එකී සේවා දිගු සඳහන් කර ඇති ගැසට් පත්‍රයේ පිටුවල පිටපත්ය.
ආරක්ෂක අමාත්‍යාංශය නිකුත් කරන මාධ්‍ය නිවේදනයක වචනාර්ථයෙන් පමණක් අප මතුකළ කරුණු ප්‍රතික්ෂේප කරනවා යැයි කීම ප්‍රමාණවත් නැත. ඒ වෙනුවට යුද හමුදාපතිවරයාගේ සේවා දිගු සම්බන්ධයෙන් තොරතුරු අනිවාර්යයෙන් ලේඛනගතව තිබිය යුතු ජනාධිපති කාර්යාලය, ආරක්ෂක අමාත්‍යාංශය හා යුද හමුදාව යන ආයතන අපගේ තොරතරු ඉල්ලීම්වලට අදාල සියලු තොරතරු ලබාදිය යුතූය. ඒ අනුව අපගේ ගැටලුවද, අපගේ ප්‍රශ්න කිරීම් සමාජ මාධ්‍ය ඔස්සේ ප්‍රචාරයවීම නිසා රටට මතූවී ඇති ගැටලුවද විසඳාගත හැකිය. එය එසේ නොවන්නේ නම් අපට තවදුරටත් එළඹිය හැකි නිගමනය වන්නේ යුද හමුදාපතිවරයා සිය ධුරයේ රැඳී සිටින්නේ නීත්‍යනුකල නොවන පදනමකින් යන්නය. එසේ ඔහු නීත්‍යනුකල පදනමකින් තොරව ධුරයේ කටයුතූ කිරීමෙන් ඇතිවන අනෙක් ප්‍රශ්නය වන්නේ ඔහු විසින් සිදුකරන යුද හමුදා සාමාජිකයින් සේවයේ පිහිටුවීම, උසස් කිරීම, සේවයෙන් පහ කිරීම, විශ්‍රාම ගැන්වීම ඇතූළු අනෙකූත් කටයුතූ නීත්‍යනුකුලද යන්නය. යුද හමුදාව තූළ ඔහු මෙතෙක් ලබාදුන් නියෝග නීත්‍යනුකුලද යන්නය. එමෙන්ම යුද හමුදාපති ධුරය වෙනුවෙන් ඔහු නියෝජනය කරන ජනාධිපතිවරයාගේ කාර්යසාධක බලකා ඇතූළු අනෙකූත් කටයුතූ නීත්‍යානුකුලද යන්න හා ඒවායේ තීන්දු තීරණ නීත්‍යනුකුලද යන්නය. අප මේ මතූ කරන ප්‍රශ්න සම්බන්ධයෙන් නීතියේ ආධිපත්‍යය පිළිබඳව කටයුතූ කරන ආයතන හා පුද්ගලයින් සිය අවධානය යොමු කරමින් කටයුතු කළ යුතූය. මන්ද නීත්‍යනුකල නොවන තත්වයකට ඉඩදීමක් වූ කලි නීතියේ ආධිපත්‍යයය පිළිනොගැනීමක් වන නිසාය.■
