මහනායක හිමිවරුන් විසින් මේ වනවිට අනතුරු අඟවා ඇති පරිදි සංඝ සම්මුතියක් නිකුත් කළහොත් ජනාධිපතිවරයා ඇතුළු ආණ්ඩුවේ කිසිදු දේශපාලනඥයෙකුට එම හිමිවරුන් ඇතුළු එකී සංඝ සභා නියෝජනය කරන කිසිදු හිමිනමක් හමුවීමේ අවස්ථාව නොලැබී යනු ඇත.
සංඝ සභාවක් මහනායක හිමි ඇතුළු හිමිවරු 20 දෙනෙකුගෙන් සමන්විත වන අතර ඒ අනුව එම සංඝ සභා නියෝජනය කරන කිසිදු හිමිනමක් හමුවීම හෝ ඔවුන්ගෙන් අවවාද අනුශාසනා ලබා ගැනීම ජනාධිපතිවරයාට හා ආණ්ඩුවේ සාමාජිකයින්ට අහිමි වනු ඇත.
සංඝ ආඥාවක් නිකුත් කරනු ලබන්නේ සංඝ සම්මුතියක් නිකුත් කිරීමෙන් පසුවය.
රට තුළ මතුවී ඇති අර්බුදකාරි තත්වයට විසඳුම් ලබාදීම සම්බන්ධයෙන් අප්‍රේල් 04 වැනි දින ජනාධිපතිවරයාට යොමු කරන ලද නිවේදනයක් මගින් අස්ගිරි, මල්වතු, රාමඤ්ඤ හා අමරපුර යන සංඝ සභාවල මහානායක හිමිවරුන් ඉල්ලා තිබුණේ අගමැතිවරයා ඇතුළු කැබිනට් මණ්ඩලය විසුරුවා හැර අන්තර් කාලීන ආණ්ඩුවකින් විසඳුම් ලබාදෙන ලෙසය.
ඒ සම්බන්ධයෙන් ජනාධිපතිවරයා අවධානය යොමු නොකොට නව කැබිනට් මණ්ඩලයත් පත්කිරීමෙන් පසු අප්‍රේල් 11 වැනිදා මල්වත්ත මහා විහාරයට රැස්වූ මහානාහිමිවරුන් තීරණය කර තිබුණේ ඒ සම්බන්ධයෙන් සංඝ සම්මුතියත් නිකුත් කිරීමටය. එම සංඝ සම්මුතිය පිළිබඳ අනතුරු ඇඟවීම එකී නිකායන්ට හා පාර්ශ්වවලට අයත් ලේඛකාධිකාරි හිමිවරුන් විසින් එදිනම නිවේදනයක් නිකුත් කරමින් දන්වනු ලැබූහ. එම දැනුම් දීමෙන්ද ප්‍රතිඵලයක් නොවූ තැන සිය යෝජනා සම්බන්ධයෙන් සිහි කැඳවමින් මහනායකහිමිවරුන් විසින් අප්‍රේල් 20 දින නිවේදනයක් නිකුත් කරනු ලැබූහ.
රට තුළ පවතින තත්වයට විසඳුම් ලබාදෙන ලෙස ඉල්ලා අස්ගිරි හා මල්වතු මහනාහිමිවරුන් විසින් මාර්තු 17 වන දින මුලින්ම නිවේදනයක් නිකුත් කළ අතර ඉන්පසු අස්ගිරි, මල්වතු, රාමඤ්ඤ හා අමරපුර යන සංඝ සභාවලට අයත් මහනායක හිමිවරු ඒකාබද්ධව නිවේදනයක් නිකුත් කළහ.■
