පවතින ආර්ථික අර්බුදයට වගකිව යුතු ජනාධිපතිවරයා ඇතුළු ආණ්ඩුව ඉල්ලා අස්වන ලෙස බලකරමින් සිදුකෙරෙන ජනතා උද්ඝෝෂණවලට සහාය පළකරමින් එළඹෙන අලුත් අවුරුදු කාල සීමාවෙන් පසු රාජ්‍ය සහ අර්ධ රාජ්‍ය අංශයේ අඛණ්ඩ වැඩ වර්ජනයක් ක්‍රියාත්මක කිරීමට වෘත්තීය සමිති තීරණය කර ඇත.
ඒ සම්බන්ධයෙන් වූ මූලික පියවරක් වශයෙන් අප්‍රේල් 08 වැනිදා සංකේත වැඩ වර්ජනයක් ක්‍රියාත්මක කිරීමටද එම වෘත්තීය සමිති පියවර ගෙන ඇත. එම සංකේත වර්ජනය සඳහා කළමනාකරණ සේවය, සංවර්ධන නිලධාරීන්, ග්‍රාම නිලධාරීන්, පළාත් රාජ්‍ය සේවයේ සේවකයන්, රාජ්‍ය සේවාවේ අනෙකුත් සේවකයින්, සෞඛ්‍ය, තැපැල් ඇතුළු රාජ්‍ය අංශයේ සේවක වෘත්තීය සමිති තීරණය කර ඇතැයි ඒ සම්බන්ධයෙන් කළ විමසීමකදී සමස්ත ලංකා කළමනාකාරණ නිලධාරි සංගමයේ සභාපති උදේනි දිසානායක පැවසීය.
එමෙන්ම ඔහු වැඩිදුරටත් පැවසුවේ මෙම සංකේත වර්ජනය සඳහා වරාය සේවා ඇතුළු අර්ධ රාජ්‍ය අංශයේ සහාය පළවී ඇති බව හා වෘත්තීය සමිති ලෙස මෙම සංකේත වර්ජනයට නිල වශයෙන් සහභාගි නොවන වෘත්තීය සමිතිද සිය සාමාජිකයින්ට ඒ සඳහා සහභාගි විය හැකි බවට දැනුම් දී ඇති බවයි. එමෙන්ම සංකේත වර්ජන දිනය වන අප්‍රේල් 08 වැනිදා කොළඹ ලිපිටන් වටරවුමේදී ආණ්ඩුවට ඉල්ලා අස්වන ලෙස බලකරමින් උද්ඝෝෂණයක නිරතවන බවද ඔහු පැවසීය.
මේ සම්බන්ධයෙන් කරුණු පැහැදිලි කිරීම සඳහා මාධ්‍ය සාකච්ඡාවක්ද එම වෘත්තීය සමිති අප්‍රේල් 07 දින නාරාහෙන්පිටදී පවත්වා තිබුණි.
මේ අතර බැංකු, ගුරු, ටෙලිකොම් ඇතුළු ක්ෂේත්‍ර නියෝජනය කරන වෘත්තීය සමිති බහුජන සංවිධානද ඒකාබද්ධ කරගනිමින් ජනාධිපතිවරයා ඇතුළු ආණ්ඩුවට ඉල්ලා අස්වන ලෙස බලකරමින් කොටුව දුම්රියපොල ඉදිරිපිටදී අප්‍රේල් 07 වැනිදා උද්ඝෝෂණයක් පැවැත් වූ අතර ඊට පෙර එය නියෝජනය කරන වෘත්තීය සමිති සිය සේවා ස්ථාන අසල උද්ඝෝෂණවල නිරත වී තිබුණි. මෙම වෘත්තීය සමිති සන්ධානය ඉදිරි පියවර සම්බන්ධයෙන් මෙතෙක් තීරණයක් ගෙන නැතැයි ඒ සම්බන්ධයෙන් කළ විමසීමකදී ලංකා බැංකු සේවක සංගමයේ ලේකම් රන්ජන් සේනානායක පැවසීය.■
