■ ඇන්තනී වෙරංග පුෂ්පික
ජනාධිපති සහ ආණ්ඩුව සමග ශ්‍රී ලංකා නිදහස් පක්ෂයට කළ ආරාධනය අනුව සාකච්ඡාවකට ගියත් හවුල්කාර පක්ෂ 11 සමග සිදු කරන දේශපාලන කටයුතු ඉදිරියටත් එලෙසම සිදු කරන බව ශ්‍රී ලංකා නිදහස් පක්ෂයේ උප සභාපති ෂාන් විජයලාල් ද සිල්වා මාර්තු 10 වන දින අනිද්දා කළ විමසීමකදී ප්‍රකාශ කළේය.
ජනාධිපති සමග පැවැත් වූ සාකච්ඡාවට යාමට පෙර ශ්‍රී ලංකා නිදහස් පක්ෂය හා එක්ව කටයුතු කරන හවුල්කාර පක්ෂ දැනුවත් කළ බවත් සාකච්ඡාවෙන් පසුවද එහිදී සාකච්ඡා කළ කරුණු පිළිබඳව අනෙක් පක්ෂ දැනුවත් කළ බවත් ෂාන් විජයලාල් මන්ත්‍රීවරයා පැවසීය.
මාර්තු 8 වන දින ජනාධිපති සහ ශ්‍රී ලංකා නිදහස් පක්ෂය අතර පැවැත් වූ සාකච්ඡාව සඳහා ජනාධිපති ගෝඨාභය රාජපක්ෂට අමතරව අගමැති, මුදල් ඇමති සහ ශ්‍රී ලංකා පොදු ජන පෙරමුණේ මහ ලේකම් සාගර කාරියවසම් ද එක් වූ බවත් එම සාකච්ඡාවේ දී ශ්‍රී ලංකා නිදහස් පක්ෂය ගෙන ආ වසරක් තුළ නව ව්‍යවස්ථාවක් සැකසීමට කටයුතු කිරීම, පළාත් සභා සහ පළාත් පාලන ඡන්ද නොපමාව පැවැත්වීම, දේශපාලන අස්ථාවරත්වය කළමනාකරණය කිරීම, සර්ව පාක්ෂික සමුළුවක් කැඳවීම ඇතුළු සියලු යෝජනාවලට ජනාධිපති ගෝඨාභය රාජපක්ෂ එකඟ වූ බවත් ෂාන් විජයලාල් මන්ත්‍රීවරයා වැඩිදුරටත් පැවසීය.■
