මීට පෙර අහෝසි කරන ලද බන්ධනාගාර කළමනාකරණ හා සිරකරුවන් පුනරුත්ථාපන කටයුතු රාජ්‍ය අමාත්‍යාංශය ජනාධිපතිවරයා යළි ස්ථාපිත කර ඇත.
එම රාජ්‍ය අමාත්‍යාංශය යටතේ තිබී එය අහෝසි කිරීමත් සමඟ අධිකරණ අමාත්‍ය අලි සබ්රි යටතට පත්කළ ආයතන නැවතත් රාජ්‍ය අමාත්‍යාංශය යටතට යළි පත්කර ඇත.
එමෙන්ම මෙම විෂයන් සංශෝධනයේදී අලි සබ්රි අමාත්‍යවරයා යටතේ තිබූ ජාතික සමගිය හා ප්‍රතිසන්ධානය සඳහා වන කාර්යාලය ඔහුගෙන් ඉවත් කර තිබේ. එම ආයතනය මෙම ගැසට් පත්‍රයෙන් වෙනත් අමාත්‍යාංශයක් යටතට පත්කර නැති අතර ඒ අනුව එය ජනාධිපතිවරයා යටතට පත්වේ.
ඒ පෙබරවාරි 23 වෙනිදා නිකුත් කරන ලද අමාත්‍යාංශ විෂයන් වෙන් කිරීමේ අති විශේෂ ගැසට් පත්‍රය මගින්ය.
මීට පෙර මෙම රාජ්‍ය අමාත්‍ය ධුරයේ ලොහාන් රත්වත්තේ කටයුතු කළ අතර අනුරාධපුර හා වැලිකඩ බන්ධනාගාරවලට ඇතුළුවී සිරකරුවන්ට මරණ තර්ජන කරමින් කළ හැසිරීම හේතුවෙන් ඔහුට එම රාජ්‍ය අමාත්‍ය ධුරයෙන් ඉල්ලා අස්වන්නට සිදුවිය.■
