■ අමන්දිකා කුරේ
ත්‍රස්තවාදය වැළැක්වීමේ පනතට ගෙන ආ නව සංශෝධනය සම්බන්ධයෙන් ඔබගේ අදහස කුමක් ද?
ත්‍රස්තවාදය වැළැක්වීමේ පනතට නව සංශෝධනයක් මේ ආණ්ඩුව දැන ගෙනැල්ලා තිබෙනවා. එහි යම් යම් වෙනස්කම් ප්‍රමාණයක් සිදු කරලා තිබුණා. කලින් මාස 18ක් දක්වා තිබුණු රඳවා තබාගැනීමේ නියෝගය මාස 12ක්ට අඩු කරන්න කටයුතු කර තිබෙනවා. නමුත් අපි දන්න කිසිම කෙනෙක් ව මාස 18 අවසන් වුණා කියලා නිදහස් කරලා නෑ. අවුරුදු ගණන් මේ පනත යටතේ අත්අඩංගුවට ගත් අය ඉන්නවා. මේ මාස 18 කියන්නේ උසාවි නියෝග නැතිව රඳවාගෙන ඉන්න පුළුවන් කාලය. එතැන දී එවැනි සැකකරුවෙක් උසාවියට ඉදිරිපත් කළාමත් මහේස්ත්‍රාත්වරයෙකුට පුළුවන් නඩුව අවසන් වන තෙක් සැකකරුව රිමාන්ඩ් කරන්න කියලා විතරයි. ඒ නිසා රඳවා තබා ගැනීමට අදාළ නිශ්චිත කාලයක් මේ පනත යටතේ අත්අඩංගුවට පත් වන අයට නෑ. ඒ නිසා නියෝග නැතිව රඳවා තබා ගැනීමේ කාලය මාස 18 සිට මාස 12 දක්වා අඩු කරනවා කියන්නේ බොරු වැඩක්. පනතෙ වෙනසක් වෙලා තිබුණත් මහපොළොවේ ක්‍රියාත්මක වන විට කිසිදු වෙනසක් සිදු වෙලා නෑ.
ඒ වගේ ම අභියාචනාධිකරණයෙන් ඇප ගන්න පුළුවන් කියලානේ කියන්නේ. නමුත් අභියාචනාධිකරණයෙන් ඇප නියම වුණාට පස්සේත් ඊට පහළින් ඉන්න මහාධිකරණයට පුළුවන් නැවත රිමාන්ඩ් කරන්න. කොහෙද එහෙම නීතියක් තියෙන්නේ? ඉහළ උසාවියකින් තීන්දුවක් දුන්නාට පස්සේ පහළ උසාවියකින් ඊට ප්‍රතිවිරුද්ධ දෙයක් කරනවා. ඒ වගේ දේවල් නීතියේ නෑ. මේ සංශෝධනය කියලා බොරු සංශෝධනයක් ගෙනැවිත් තියෙන්නේ. ප්‍රායෝගිකව කිසිම වෙනසක් මේ තුළින් සිදුවෙන්නේ නෑ.
මේක ගේන්න හේතුව තමයි මේ ආණ්ඩුව කීප වතාවක් විවිධ පාර්ශ්වවලට පොරොන්දු දීලා තියෙනවා ත්‍රස්තවාදය වැළැක්වීමේ පනත අහෝසි කරනවා කියලා. ඒක අහෝසි කරන්නේ නැතිව අපි සංශෝධනයක් ගේනවා කියලා තමයි දැන් මේ නාමමාත්‍රික සංශෝධනයක් අරගෙන ඇවිල්ලා තියෙන්නේ. ඒ නිසා අපි කියන්නේ දුන් පොරොන්දු ඉටු කරලා මේ පනත වහාම අහෝසි කරන්න කියලා. ඒ වෙනුවෙන් අපි මේ දිනවල දීප ව්‍යාප්ත පෙත්සමක් අත්සන් කරනවා. මේ පනත නිසා අපහසුතාවට පත්වුණේ දමිළ ජනතාව විතරක් නෙවෙයි. 80 දශකයේ දී සිංහල තරුණයන්ව මර්දනය කරන්නත් මේ පනත යොදාගත්තා. මෑත කාලීනව මුස්ලිම් ජනතාව මර්දනය කරන්නත් පාවිච්චි කළා. ඒ නිසා මේ පනත තමයි ඉතිහාසයේ වැඩියෙන් ම අවභාවිත වුණු පනත. අපි දමිළ ජනතාව විතරක් නෙවෙයි හැම ජනතාවක් ම එකතු වෙලා තමයි මේ පනත අහෝසි කරන්න කියලා කියන්නේ. මේක මාස 3කට ගෙන ආව තාවකාලික පනතක්. ඒ වගේ පනතක් තමයි අවුරුදු හතලිස් ගානක් තිස්සේ ජනතාව මර්දනය කරන්න යොදා ගත්තේ. ඒ නිසා මේ පනත අහෝසි කරන්න අදාළ මැදිහත්වීම උපරිමයෙන් කරන්න අපි බලාපොරොත්තු වෙනවා.
ඔබ හිතන විදියට ඉදිරියේ දී ජිනීවා මානව හිමිකම් සැසිවාරවල දී ශ්‍රී ලංකාවට මොන වගේ තත්වයකට මුහුණ දෙන්න සිදු වේවිද?
ශ්‍රී ලංකාවේ මානව හිමිකම් කඩවීම සම්බන්ධයෙන් මහකොමසාරිස්තුමියගේ වාර්තාවක් ශ්‍රී ලංකාවේ රජයට ලබා දෙනවා ඉදිරියේ දී. පෙබරවාරි 28 වනදාට එම වාර්තාව එළියට දානවා. ඒ වාර්තාව අනිවාර්යයෙන් ම එන්නේ රජයට එරෙහිව තමයි. ඒ නිසා බොරු සංශෝධන සංදර්ශන කරලා ජාත්‍යන්තර සමාජය රවට්ටන්න බෑ කියලා රජය දැන්වත් තේරුම් ගන්න ඕනෑ.
උතුරේ ධීවරයන් මුහුණ දී තිබෙන ප්‍රශ්නයේ වර්තමාන තත්වය කොහොමද?
ඒ ප්‍රශ්නය කිසිම විසඳුමකින් තොරව තවමත් තියෙනවා.
අපි කියන්නේ ඒ සිද්ධියට නීතිය ක්‍රියාත්මක කරන්න කියලා. දැන් නීති සංශෝධන කරලා තියෙනවා 2017 දී තහනම් පන්න ක්‍රම ගැන. ඒක කරන්නේ ඉන්දියානු ධීවරයන් වෙන්න පුළුවන්. නැතිනම් ශ්‍රී ලංකාවේ ම ධීවරයන් වෙන්න පුළුවන්. ශ්‍රී ලංකා මුහුදු සීමාව ඇතුළේ එහෙම දෙයක් වෙනවා නම් නීතිය ක්‍රියාත්මක කරන්න කියලායි අපි කියන්නේ. මේ කරන වැඩේ අපේ පරිසරයට හානිකරයි. ඒවාට අදාළ පනත් තියෙනවා. සංශෝධන තිබෙනවා නමුත් ක්‍රියාත්මක කරන්නේ නෑ. ධීවර ඇමතිතුමාත් තැන් තැන්වල බොරු කතා කියමින් යනවා. ඊට පස්සේ ධීවර සංගම්වලට බැනලා තර්ජනය කරනවා. පසුගිය දවසකත් එහෙම ගිය ධීවරයන්ට බැනලා යන්න ගියා. ඒක මාධ්‍ය හරහාත් විකාශය වෙලා තිබුණා. එතුමා හරහා මේ ප්‍රශ්නයට කිසිම විසඳුමක් ගන්න බෑ. අපි කියන්නේ මේ ප්‍රශ්නයට විසඳුම් දෙන්න බැරි නම් ධීවර ඇමති ඉල්ලා අස් වෙලා යන්න ඕනෑ.
පසුගිය දිනවල ඔබගේ මූලිකත්වයෙන් ආර්ථිකය සම්බන්ධව සාකච්ඡාව කැඳවලා තිබුණා නේද?
දැන් රට මුහුණ දීලා තියෙන ලොකුම ප්‍රශ්නය තමයි ආර්ථික ප්‍රශ්නය කියලා කියන්නේ. ඒකට අදාළ වගකීම තිබිය යුතු වන්නේ පාර්ලිමේන්තුව තුළ. මූල්‍ය බලය තියෙන්නේ පාර්ලිමේන්තුවට. ආණ්ඩුක්‍රම ව්‍යවස්ථාවෙත් ඒ බව සඳහන් වෙනවා. එහෙම තිබියදීත් විපක්ෂ නායකතුමා මූල්‍ය පිළිබඳ ප්‍රශ්නයක් ඇහුවා, ඒ සඳහා තවමත් පිළිතුරු ලැබිලා නෑ ආණ්ඩු පක්ෂයෙන්. ඒ නිසා මේ ගැටලු සම්බන්ධයෙන් සාකච්ඡා කරන්න ආණ්ඩු පක්ෂ හා විපක්ෂ මන්ත්‍රීවරුන්ට මම ආරාධනා කළා. සියලු පක්ෂ නායකතුමන්ලාට, රජයේ මූල්‍ය කමිටුවල සභාපතිවරුන්ට ආරාධනා කළා. ඔවුන් හැමෝම වගේ සම්බන්ධ වුණා. එතන දී අපි එකඟතාවකට ආවා ගෙවන්න තිබෙන ණය සම්බන්ධයෙන් කඩිනමින් ක්‍රියාත්මක වෙන්න ඕනෑ කියලා. ඒ වගේ ම ණය දුන්න අය එක්ක වහාම සාකච්ඡා කරලා ඒ ණය ප්‍රතිව්‍යුහගත කරන්න ඕනෑ.
නිකන් පාර්ලිමේන්තුවේ වාඩි වෙලා හිටියා කියලා වැඩක් වෙන්නේ නෑ. ඒ නිසා එම ණය ප්‍රතිව්‍යුහගත කරගැනීමට අදාළ මැදිහත්වීම අපි සිදු කළ යුතුයි. එහෙම කළොත් විදෙස් මුදල් සංචිත ටිකක් හරි ඉතිරිවේවි. ඒවා අපේ අත්‍යවශ්‍ය භාණ්ඩ ගෙන්වීමට පාවිච්චි කරන්න පුළුවන්. ඒ වගේම දුප්පත් සාමාන්‍ය ජනතාවට බල නොපාන පරිදි එම ණය ප්‍රතිව්‍යුහගත කිරීම් සිදුකරන්න ඕනෑ කියලාත් අපි එතැනදී එකඟතාවකට ආවා. සංවිධානයක් විදිහට නෙවෙයි මේ සාකච්ඡාව කැඳවූවේ. මම පෞද්ගලිකව තමයි ඒ අයට ආරාධනා කළේ.
මේ වගේ අවස්ථාවක අපි එකතුවෙලා කටයුතු කළ යුතුයි. පාර්ලිමේන්තු කමිටු සභාපතිවරුන් වන අනුර ප්‍රියදර්ශන යාපා, මහචාර්ය චරිත හේරත්, මහාචාර්ය තිස්ස විතාරණ යන අයත් මගේ ආරාධනාව පිළිගෙන ආවා. අපි යෝජනා ඇතුළත් කරලා සකස් කළ ලියවිල්ලට මහාචාර්ය තිස්ස විතාරණ අත්සන් කළා. අපි දැන් ඉදිරිපත් කරලා තියෙනවා ඔවුන් හරහා අපේ යෝජනා. ඒවාට අනුව කටයුතු කරන්න තමයි දැන් ආණ්ඩුවට තිබෙන්නේ.■
