කිසිම ආරක්ෂක විධිවිධානයක් අපට නැහැ
මාධ්‍යවේදී චමුදිත සමරවික්‍රම
මම තමයි පිළියන්දල පොලිසියට යෝජනා කළේ සිදුවීම වුණු දවසේ විතරක් නෙවෙයි ඊට කලින් සීසීටීවී දර්ශනත් පරීක්ෂා කරලා මේ ප්‍රහාරකයන් මීට පෙරත් ඇවිත් ගිහින් තියෙනවාද බලන්න කියලා. බොරැල්ල බෝම්බ සිද්ධියේදීත් කාදිනල්තුමා කියනකන් පොලිසිය උදේ සීසීටීවී දර්ශන පරීක්ෂා කළේ නෑ. ඒ මැදිහත් වීම නිසා තමයි බොරැල්ල පල්ලියේ හරි පරීක්ෂණයක් කෙරුණේ. ඒ කරුණු අපි ද පොලිසියට මතක් කරලා දෙන්න ඕනෑ?
■ අමන්දිකා කුරේ
පවතින රාජ්‍ය යාන්ත්‍රණය විසින් මාධ්‍ය මර්දනය කිරීම යනු ශ්‍රී ලංකාව වැනි රටක නිතරම කතා කරන්නට සිදුව ඇති මාතෘකා වී තිබීම කනගාටුවට කරුණකි. කලින් කලට අසන්නට ලැබෙන මාධ්‍යවේදීන් පැහැරගෙන යාම, අතුරුදන් කිරීම, ඝාතනය කිරීම, මාධ්‍යවේදීන්ගේ නිවෙස්වලට පහර දීම ඇතුළු සිදුවීම් ගණනාවක් නොවිසඳුණු කාරණා ලෙසින් තවමත් කෙළවරක් නොමැතිව පවතියි.
වර්තමාන ආණ්ඩුව බලයේ සිටි 2015ට පෙර කාලවකවානුව තුළ දී මෙවැනි සිදුවීම් රාශියක් සිදු වූ අතර යුක්තිය ඉටුවූවෙකු සොයාගැනීම නොමළ ගෙයකින් අබ සෙවීමක් වී ඇත. එවැනි මාධ්‍ය මර්දනයක් තිබ්විය දී ආරක්ෂක ලේකම්ව සිටි ගෝඨාභය රාජපක්ෂ මහතා වර්තමාන ජනාධිපතිවන අතර එවකට ජනාධිපතිවරයා වර්තමාන අගමැතිවරයායි. වර්තමාන ආණ්ඩුව බලයට පැමිණි කාලයේ සිට මේ දක්වාම මාධ්‍යවේදීන්ට යම් යම් අපහසුතාවන්ට මුහුණ දෙන්නට සිදු වූ අතර මාධ්‍යවේදීන් ගණනාවක් ම විවිධ කරුණු මත පදනම් ව අපරාධ පරීක්ෂණ දෙපාර්තමේන්තුවට කැඳවූ අවස්ථා ද රැසකි.
මෙවැනි වටපිටාවක් තුළ පසුගිය පෙබරවාරි 14 වන දින අලුයම් කාලයේ දී මාධ්‍යවේදී චමුදිත සමරවික්‍රමගේ පිළියන්දල පිහිටි නිවසට ගල් මුල් හා අශූචි ප්‍රහාරයක් එල්ල වී තිබුණි.
පිළියන්දල, වෑවල, කේම්බි්‍රජ් කෝර්ට් නිවාස සංකීර්ණයේ පිහිටි ඒ මහතාගේ නිවසට මෙම ප්‍රහාරය එල්ල කර තිබුණේ සුදු පැහැති කුඩා ප්‍රමාණය වෑන් රථයකින් පැමිණි හිස් ආවරණ යොදාගත් සිවුදෙනෙකුගේ කණ්ඩායමකි. නිවාස ආශ්‍රිතව සිටි ආරක්ෂක නිලධාරියා පිස්තෝලයක් පෙන්වා බිය කර මෙම පුද්ගලයන් නිවාස සංකීර්ණයට ඇතුළු වී චමුදිත මහතාගේ නිවසට පහර දෙන ආකාරට සීසීටීවී දර්ශනවල ඇතුළත්ව තිබුණි.
මේ සම්බන්ධයෙන් පක්ෂ විපක්ෂ දේශපාලනඥයන්ගේ අවධානය යොමු වූ අතර ජනමාධ්‍ය ඇමති ඩලස් අලහප්පෙරුම ඇතුළු දේශපාලනඥයන් විශාල ප්‍රමාණයක් ද පැමිණ ඒ පිළිබඳ තොරතුරු විමසා තිබුණි.
චමුදිත සමරවික්‍රම මහතාගේ මාධ්‍ය භාවිතාව සම්බන්ධයෙන් ප්‍රශ්නකාරී තත්වයන් තිබෙන නිසා මෙම තත්වය නොසලකා හැරිය යුතු බවට ඇතැම් පාර්ශ්ව අදහස් දක්වා තිබුණ ද මාධ්‍ය භාවිතය සම්බන්ධ ප්‍රශ්නයක් තිබුණත් මාධ්‍යවේදියෙකු වශයෙන් ඔහුට එල්ල වූ ප්‍රහාරය පිළිබඳව නිසි පරීක්ෂණයක් සිදු කර එයට අදාළ යුක්තිය ඉටු කළ යුතු ය.
චමුදිත සමරවික්‍රම මහතා පසුගිය කාලය පුරාවට ම විවිධ මාතෘකා ඔස්සේ කලින් කලට සාකච්ඡාවට බඳුන් වූ පුද්ගලයෙකු වූයේ ඔහුගේ වැඩසටහන්වල දී සිදු සිදු වූ යම් යම් සිදුවීම් හේතුවෙනි.
සමරවික්‍රම මහතාගේ නිවසට මෙම ප්‍රහාරය එල්ල කිරීමට ප්‍රථමව දින කිහිපයකට පෙර ඩේලි මිරර් ආයතනයේ මාධ්‍යවේදියෙකු වන ධනූ ඉනසිතම්බි මහතාට ද දුරකථන ඇමතුමක් හරහා තර්ජනයක් එල්ල වී තිබුණි. ඒ පසුගිය දිනවල පැවති ලෝක විවාහක රූ රැජින තරගය පිළිබඳව ශ්‍රී ලංකාව නියෝජනය කරමින් සහභාගි වූ පුෂ්පිකා ද සිල්වා මහත්මිය ඉදිරිපත් කළ විවාදසම්පන්න කරුණු පිළිබඳව ධනූ ඉනසිතම්බි හා ලෝක විවාහක රූ රැජින සංවිධායිකාවක අතර සිදු කළ සාකච්ඡාව ඩේලි මිරර් වෙබ් අඩවියේ පළ කිරීමෙන් අනතුරුවයි.
මෙම සිදුවීමට අදාල පුෂ්පිකා ද සිල්වා මහත්මිය විසින් සිදු කළ ආන්දෝලනාත්මක ප්‍රකාශ සිදු කළේ චමුදිත සමරවික්‍රම මහතා සමග සිදු කළ සම්මුඛ සාකච්ඡාවක දීයි. ඉන්පසුව ධනූ ඉනසිතම්බි සමග ලෝක විවාහක රූ රැජින තරගාවලියේ සංවිධායකවරියක සිදු කළ සම්මුඛ සාකච්ඡාව පළ කිරීමෙන් පසුව පුෂ්පිකා ද සිල්වා මහත්මිය තමා දුරකථනයෙන් අමතා තර්ජනය කළ බවට පවසමින් ධනූ ඉනසිතම්බි රුපියල් මිලියන 200ක වන්දියක් පුෂ්පිකාගෙන් ඉල්ලා එන්තරවාසියක් ද යොමු කරන ලදි. චමුදිත සමරවික්‍රම මහතාගේ නිවසට ප්‍රහාරය එල්ල වීමට දින කිහිපයකට පෙර මෙම ගැටලුව පිළිබඳව ලෝක විවාහක රූ රැජින තරගාවලියේ ශ්‍රී ලංකාවේ සංවිධායකයා වන චන්දිමාල් ජයසිංහ සමග චමුදිත සමරවික්‍රම මහතා සම්මුඛ සාකච්ඡාවක් ද පවත්වා තිබුණි. එම සාකච්ඡාව තුළ දී පුෂ්පිකා මහත්මිය කලින් ප්‍රකාශ කළ කරුණු සාවද්‍ය කරුණු බවටත් ඇය දේශපාලනඥයෙකු විසින් හසුරුවන බවටත් චන්දිමාල් ජයසිංහ මහතා පැහැදිලිවම ප්‍රකාශ කළේ ය. මෙම ප්‍රහාරය එල්ල වූයේ එවැනි පසුබිමක් ද තිබූ මොහොතක ය.
මෙම සිදුවීම සම්බන්ධයෙන් සිදුකරනු ලබන පරීක්ෂණවල ප්‍රගතිය පිළිබඳව අපි පොලිස් මාධ්‍ය ප්‍රකාශක නිහාල් තල්දූවගෙන් විමසීමක් ද සිදු කළෙමු.
‘මෙම සිදුවීම සම්බන්ධයෙන් පරීක්ෂණ තවමත් ක්‍රියාත්මකයි. දැනට 26 දෙනෙකුගෙන් ප්‍රකාශ සටහන් කරගෙන තියෙනවා. ඒ වගේ ම සීසීටීවී දර්ශන 91ක් පරීක්ෂා කරලා තියෙනවා. දැනට සැකකටයුතු පුද්ගලයෙකු හඳුනාගෙන හෝ අත්අඩංගුවට ගැනීමක් නම් සිදු වෙලා නෑ. නමුත් මෙම වාහනය බොරලැස්ගමුව ප්‍රදේශයේ සිට පිළියන්දලට පැමිණි බවට සීසීටීවී දර්ශන අධ්‍යයනය කිරීමේ දී පෙනී යනවා. වැඩිදුර පරීක්ෂණ තවදුරටත් ක්‍රියාත්මකයි.’
පොලිසිය භාර ඇමති සරත් වීරසේකරයේ පුත්‍රයා ද මුහුණු පොතේ මෙම සිදුවීම පිළිබඳව අදහසක් පළ කර තිබූ අතර එය එම ප්‍රහාරය සාධාරණය කරන ලද ප්‍රකාශයක් බවට විවේචන එල්ල වී තිබුණි. එම පුත්‍රයා ද පොලිසියේ වෛද්‍ය අංශයේ සේවයේ නිරත වන අයෙකු වන අතර එම අදහසට විවේචන එල්ල වීමත් සමග ඔහු සිය අදහස ෆේස්බුක් වෙතින් ඉවත් කරගෙන තිබේ.
මෙම සිදුවීම සම්බන්ධයෙන් සහ පරීක්ෂණ කටයුතු සම්බන්ධයෙන් තමාට පවතින අදහස කුමක්දැයි අප චමුදිත සමරවික්‍රම මහතා අමතා විමසා සිටියෙමු.
‘ලංකා ඉතිහාසයේ මාධ්‍යවේදීන්ට එල්ල වුණු ප්‍රහාර ගැන පරීක්ෂණ කටයුතු සිදුවෙනවා අපි දැකලා නෑ. ඒ නිසා අපි සාධාරණ පරීක්ෂණයක් බලාපොරොත්තු වෙනවා. මේ ප්‍රහාරය කෙනෙක්ට සුළුවෙන් තකන්නත් පුළුවන් අශූචි ටිකක්නෙ ගැහුවේ ගල් කෑල්ලක්නේ ගැහුවේ කියලා. එහෙම නැතිනම් මේක අනතුරු ඇඟවීමක් හැටියට හිතන්නත් පුළුවන්. මේක පළමු ප්‍රහාරය. දෙවනි ප්‍රහාරයකින් අපි ජීවතුන් අතර නැතිවෙන්නත් පුළුවන්. අපි දන්නේ නෑ මේ ප්‍රහාරය එල්ල කළ පුද්ගලයාගේ අරමුණ. ඒ නිසා අපිට මෙතන දී වැදගත් වෙන්නේ මේ පරීක්ෂණ කරන්න දාලා ඉන්න පොලිස් කණ්ඩායමක් ගැනවත්, නිලධාරීන් ගැනවත් නෙවෙයි. අපට අවශ්‍ය යුක්තියක් සාධාරණත්වයක් ඉටුවීම කියන ප්‍රතිඵලයයි.
අද අපි ඉන්නේ බරපතළ අනාරක්ෂිත තත්වයක. මට අවුරුදු 13ක දරුවෙක් සහ මගේ නිවසේ මගේ බිරිඳ ඉන්නවා. අද වෙනතෙක් කිසිදු ආරක්ෂක විධිවිධානයක් අපට ලබා දීලා නෑ. අපිව සතුරා සඳහා නිරාවරණය කර තිබෙන තත්වයක් තමයි දැනට පෙනෙන්නට තිබෙන්නේ. විවිධ අය විධ අයව සැක කරනවා. නමුත් මට කිසිවෙක් සැක කරන්න බෑ. පරීක්ෂණ කණ්ඩායම්වල වගකීම තමයි අංග සම්පූර්ණ පරීක්ෂණයක් සිදු කරලා සත්‍යය හෙළිදරවු කරන එක.
එහෙම අංග සම්පූර්ණ පරීක්ෂණයක් සිදු කෙරුණේ නැතිනම් ඩලස් අලහප්පෙරුම ඇමතිවරයා කියන විදිහටම මේ සිදුවීමට ආණ්ඩුවට ඇඟිල්ල දිගුවීම වළක්වන්න බැරි වෙනවා. මොකද ප්‍රහාරය එල්ල කළේ කවුරු වුණත් පරීක්ෂණ පවත්වන්න අවශ්‍ය උපදෙස් දෙන්න ඕනෑ ආණ්ඩුව විසින්. ඒ නිසා ඩලස් අලහප්පෙරුම අමාත්‍යවරයාම කියන කතාවට අනුව චුදිතයෙක් සොයාගන්න බැරි වුණොත් එහි වගකීම ආණ්ඩුවට යන එක වළක්වන්න බෑ.
මට ප්‍රශ්නයක් තියෙනවා ඇයි අපිට තවම කිසිම ආරක්ෂක විධිවිධානයක් ලබා දීලා නැත්තේ කියන එක ගැන. ඒ වගේ ම මම තමයි පිළියන්දල පොලිසියට යෝජනා කළේ සිදුවීම වුණු දවසේ විතරක් නෙවෙයි ඊට කලින් සීසීටීවී දර්ශනත් පරීක්ෂා කරලා මේ ප්‍රහාරකයන් මීට පෙරත් ඇවිත් ගිහින් තියෙනවාද කියලා බලන්න කියලා. බොරැල්ල බෝම්බ සිද්ධියේදීත් කාඩිනල්තුමා කියනකන් පොලිසිය උදේ සීසීටීවී දර්ශන පරීක්ෂා කළේ නෑ. ඒ මැදිහත් වීම නිසා තමයි බොරැල්ල පල්ලියේ හරි පරීක්ෂණයක් කෙරුණේ. ඒ කරුණු අපි ද පොලිසියට මතක් කරලා දෙන්න ඕනෑ? පොලිස් දෙපාර්තමේන්තුවේ ඕනෑ තරම් වෘත්තීයමය හා දක්ෂ විමර්ශකයන් ඉන්නවා.
සමහර අය කියනවා මම දේශපාලන රැකවරණය ලබා ගන්න මම විසින් ම සිදුකරගත්ත දෙයක් කියලා. එහෙම නම් මාව වැරදිකරුවෙක් කියලා හෙළි වෙන්න හරි මේ විමර්ශනය කරන්න. තරුණියගේ හිස නැති මළ කඳක් හමුවුණ වෙලාවේ දී කොළඹ සිට බඩල්කුඹුර වෙනකන් සීසීටීවී බලලා සිද්ධියේ අග මුල ඉතාම ඉක්මනින් හොයාගත්තානේ. මේ සිදුවීමේ අග මුලත් ඒ විදිහට හොයාගන්න පුළුවන් කියලා තේරෙනවා. ජ්‍යෙෂ්ඨ පොලිස් අධිකාරි මංගල දෙහිදෙණිය අයටතේ තමයි පරීක්ෂණය සිදු කරන්නේ.
අගමැතිවරයාත් කතා කරලා අහනවා මට සැක අය කවුද කියලා. මම කරන වැඩසටහන් ඇතුළේ දේශපාලනඥයො, ජාවාරම්කාරයො, අන්තවාදීන්, ආගමික නායකයන්, කිරුළු සඳහා තියන තරඟවල ප්‍රශ්නවලට මැදිහත් වුණු අය තරහ වෙන්න පුළුවන්. ඒ නිසා මට මේ කෙනා මේ කෙනා කියලා කියන්න බෑ. ඒ නිසා මම හිතනවා සාධාරණ පරීක්ෂණයක් සිදුකරලා වහාම මෙම සිදුවීමට අදාළව අපට යුක්තිය ඉටු කළ යුතුයි කියලා.”
චමුදිත සමරවික්‍රම මහතා පෙන්වා දෙන අන්දමට ම තවමත් කිසිදු සැකකරුවෙකු හෝ හඳුනාගෙන නොමැතිවීම ද ප්‍රශ්න සහගත කාරණයකි. එමෙන් ම එය ඔහුව තවදුරටත් අනාරක්ෂිතභාවයකට ඇද දැමීමක් වන්නේ මෙය සිදු කළ පුද්ගලයා කුමන අරමුණකින් සිදු කළා ද යන්න පවා දැන ගැනීමට නොහැකි නිසාය. කෙසේවුවත් මීට පෙර ද මාධ්‍යවේදීන්ගේ නිවෙස්වලට මාධ්‍යා ආයතනවලට එල්ල වූ ප්‍රහාර සම්බන්ධයෙන් මෙතෙක් කිසිදු පරීක්ෂණ ප්‍රතිඵලයක් ලබා දී නැත.
කලක් මාධ්‍යවේදියෙකු වශයෙන් කටයුතු කළ ඩලස් අලහප්පෙරුම මහතා වර්තමාන ජනමාධ්‍ය ඇමතිවරයා ය. මාධ්‍යවේදීන් සම්බන්ධයෙන් ඔහුට යම් සහකම්පනයක් තිබේදැයි බලාසිටිය යුතු කාලය එළැඹී තිබේ.■
