ජනාධිපතිවරයාගේ නිල නිවස ලෙස කොළඹ කොටුවේ පිහිටි ජනාධිපති මන්දිරය භාවිත කරමින් සිටියදී ආරක්ෂක ඇමතිවරයා ලෙස ජනාධිපතිවරයා තවත් නිල නිවසක් භාවිත කරන බව අනාවරණය වේ.
ජනාධිපතිවරයා ආරක්ෂක ඇමතිවරයා ලෙසත් නිල නිවසක් භාවිත කරන බව අනාවරණය වන්නේ පාර්ලිමේන්තුවට ඉදිරිපත් කර ඇති ශ්‍රී ලංකා යුද හමුදාවේ 2020 වර්ෂයට අදාළ කාර්ය සාධන වාර්තාවේය.
එම වාර්තාවට අනුව ශ්‍රී ලංකා යුද හමුදාව අමාත්‍යාංශ හා රජයේ වෙනත් ආයතන වෙනුවෙන් සපයන ලද සේවා වෙනුවෙන් මූල්‍ය ප්‍රතිපාදන ලැබී ඇති අතර එසේ ලැබී ඇති එක් මූල්‍ය ප්‍රතිපාදනයක් වන්නේ ආරක්ෂක අමාත්‍යවරයාගේ නිල නිවස අලුත්වැඩියව සම්බන්ධයෙන් ලැබී ඇති මූල්‍ය ප්‍රදානයය. එම මූල්‍ය ප්‍රදානය ආරක්ෂක අමාත්‍යාංශය වෙතින් ශ්‍රී ලංකා යුද හමුදාවට ලැබී ඇති අතර එසේ ලැබී ඇති මුදල් ප්‍රමාණය රුපියල් 14,999,581.78ක් හෙවත් ආසන්න වශයෙන් රුපියල් මිලියන 15කි. එම ලැබී ඇති මුළු මුදලම ආරක්ෂක ඇමතිවරයාගේ නිවස අලුත්වැඩියා කිරීම සඳහා යොදාගෙන ඇති බව එම වාර්තාව සඳහන් කරයි.
ජනාධිපතිවරයා ආරක්ෂක ඇමති ධුරයට අමතරව තාක්ෂණ ඇමති ධුරයද දරයි.
අමාත්‍යවරයකු අමාත්‍යාංශ කිහිපයක් දැරුවද එක් නිල නිවාසයක් පමණක් ඔහුට හෝ ඇයට ලැබෙන අතර ජනාධිපතිවරයා ආරක්ෂක ඇමති ධුරය හා වෙනත් අමාත්‍යාංශ දැරුවද ජනාධිපති මන්දිරය හැර වෙනත් නිල නිවාස ලබා ගන්නේ නැත.
එම ක්‍රමවේදය කඩකරමින් මහින්ද රාජපක්ෂ මහතා ඔහු ජනාධිපති පදවිය දරන සමයේ ජනාධිපති මන්දිරය මෙන්ම අගමැති නිල නිවස වන අරලිය ගහ මන්දිරයද එකවර භාවිත කළ අතර මේ වනවිටද ඔහු අගමැතිවරයා වශයෙන් අරලිය ගහ මන්දිරයට අමතරව කොළඹ විජේරාම මාවතේ රජයේ නිල නිවාසයක් භාවිත කරයි.
ජනාධිපතිවරයා ආරක්ෂක ඇමතිවරයා ලෙස ජනාධිපති මන්දිරයට අමතරව භාවිත කරන නිල නිවස කුමක්ද යන්න දැන ගැනීමට අමාත්‍යවරුන්ගේ හා රජයේ නිලධාරීන්ගේ නිල නිවාස සම්බන්ධයෙන් කටයුතු කරන රාජ්‍ය සේවා, පළාත් සභා සහ පළාත් පාලන අමාත්‍යාංශයේ ලේකම් ජේජේ රත්නසිරි දූරකථනයට සම්බන්ධ කරගත්තත් ඔහු කාර්ය බහුල බව පවසා එම ඇමතුමෙන් ඉවත් විය.
යුද හමුදා වාර්තාවේ ඇති අලුත්වැඩියා සිදුකළ මෙම නිල නිවස ඇත්තේ කොහිදැයි යුද හමුදා මාධ්‍ය ප්‍රකාශක බි්‍රගේඩියර් නිලන්ත ප්‍රේමරත්නගෙන් කළ විමසීමේදී ඒ සම්බන්ධයෙන් ආරක්ෂක අමාත්‍යාංශයේ මාධ්‍ය අධ්‍යක්ෂ කර්නල් නලින් හේරත්ගෙන් විමසන ලෙස දැනුම් දුන් අතර කර්නල් හේරත්ගෙන් ඒ ගැන විමසූ විට පිළිතුරු ලබාදීමට නැවත දූරකථන ඇමතුමක් අපට ලබා ගන්නා බව පැවසුවද පුවත්පත මුද්‍රණයට යන අවස්ථාව වනවිටත් ඔහුගෙන් පිළිතුරු ලබාදීමේ ඇමතුමක් ලැබුණේ නැත. ඒ වෙනුවට එම තොරතුරු ඇතුළත් වාර්තාව කුමක්දැයි ඔහු අපගෙන් යළි විමසීය.■
