ලංවිම අර්බුදය මෙතනින් කොතැනටද?
ඉංජිනේරු ඉල්ලීම ඉටුවේ, සභාපති ඉවත්වේ

යම් රාජ්‍ය ආයතනයක සේවකයන්, පරිපාලනය හා වෘත්තීය සමිති අතර ඇත්තේ ආරවුල් සහගත තත්වයක් නම් එම රාජ්‍ය ආයතනයෙන් එහි පාරිභෝගිකයන්ට අගතියක් සිදුවිය හැකි බව අමුතුවෙන් කිවයුතු නැත. මේ තත්වය මේ මොහොතේ වඩාත් දැනෙන ආකාරයට තේරුම් ගැනීම සඳහා අපට සෞඛ්‍ය අමාත්‍යාංශය ගත හැකිය.

අප රට පමණක් නොව ලෝකයම වෙළාගෙන ඇති කොවිඩ් වසංගත තත්වය සම්බන්ධයෙන් අවධානය යොමු කිරීමේදී සෞඛ්‍ය අමාත්‍යාංශ සේවකයින්, පරිපාලකයින් හා වෘත්තීය සමිති අතර ඇත්තේ ආරවුල් සහගත තත්වයක් නම් කොවිඩ් මර්දන කටයුතු නිසි ලෙස සිදුවන්නේ නැත. රජයේ වෛද්‍ය නිලධාරීන්ගේ සංගමය සිය ඉල්ලීම් සම්බන්ධයෙන් කරන කේවල් කිරීම, අනෙකුත් වෘත්තීය සමිති කරන කේවල් කිරීම් ඒ සම්බන්ධයෙන් පාලනාධිකාරිය දක්වන ප්‍රතිචාරවලින් අපට අපට පෙන්නුම් කළේ කොවිඩ් මර්දනය ඔවුන්ගේ ප්‍රමුඛ කාර්යය නොවන බවයි.

මේ පූර්විකාව මේ මොහොතේ අපට අවශ්‍ය වන්නේ විදුලිය හෙවත් ලංකා විදුලි බල මණ්ඩලය සම්බන්ධයෙන් සාකච්ඡා කිරීමටය. කොවිඩ් මෙන්ම මේ මොහොතේ විදුලිය කැපීමේ අර්බුදයකටද රට මුහුණ දී ඇත. එහෙත් පසුගිය කාලය පුරාම අප දුටුවේ ලංකා විදුලි බල මණ්ඩලයේ පාලනාධිකාරිය හා එහි වෘත්තීය සමිති අතර ගැටුම්ය. මේ ගැටුම්වලට විදුලි බල අමාත්‍යාංශය හා ආණ්ඩුවද සම්බන්ධ දැයි සිතෙන තරමට ව්‍යාකූලය.

මුලින්ම ලංකා විදුලි බල මණ්ඩලයේ ඉංජිනේරු සංගමය විශේෂ ලෙස පසුගිය කාලයේ මාධ්‍යයට ආවේ කෙරවළපිටිය යුගදනවි විදුලි බලාගාරයේ සියයට 40ක කොටස් අයිතිය සහ පාවෙන ගෑස් පර්යන්තයක් ඇතුළු නල මාර්ගයක් ඉදිකිරීම හා ගෑස් සැපයීම ඇමරිකාවේ නිව් ෆෝට්රස් සමාගමට ලබාදීමට සැලසුම් කිරීමේදී එයට විරෝධය දක්වමින්ය. එම විරෝධයන්ට සම්බන්ධ යම් යම් ක්‍රියාමාර්ග ඉංජිනේරු සංගමය ප්‍රකාශයට පත්කරමින් සිටියදී ලංකා විදුලි බල මණ්ඩලයේ අනෙකුත් වෘත්තීය සමිතිද එම විරෝධය පවත්වා ගනිමින්ම ඓතිහාසිකව පවතින ඉංජිනේරු සංගම් විරෝධයද එළියට දමන අයුරක් ප්‍රදර්ශනය කළේය.

ඒ සමඟම අපට දකින්නට ලැබුණේ ලංවිම ඉංජිනේරු සංගමයට විකල්පව එහි ජේ්‍යෂ්ඨ ඉංජිනේරුවන්ගේ සංගමය නම් සංගමයක් පිහිටුවීම හා එම සංගමය ඉංජිනේරු සංගමයේ යම් යම් ක්‍රියාමාර්ගවලට එරෙහිව ආණ්ඩුවට සම්බන්ධ කණ්ඩායමක්දැයි සිතෙන තරමේ ප්‍රකාශ නිකුත් කිරීමය.

ඉහත කී නිව් ෆෝට්රස් ගනුදෙනුවට විරුද්ධව ඉංජිනේරු සංගමය සිය වෘත්තීය ක්‍රියාමාර්ග ප්‍රකාශයට පත්කළ අතර පියවරෙන් පියවර ඉදිරියට විත් මේ වනවිට එම සංගමය සිටින්නේ අකුරට වැඩ කිරීමේ වෘත්තීය ක්‍රියාමාර්ගයකය. මෙම අකුරට වැඩ කිරීම මේ වනවිට අර්බුදයක් බවට පත්වී ඇත්තේ ජල විදුලිය නිපදවීම ඉතාම අවම මට්ටමකට පත්වීමත්, තාප විදුලි බලාගාර ක්‍රිියාත්මක කිරීමට අවශ්‍ය ඉන්ධන සපයා ගැනීමේ අර්බුදයත් නිසාය.

මේ අර්බුදකාරී වාතාවරණය මත විදුලිය කැපීම් පිළිබඳ අනතුරු ඇඟවීමෙන් එහා ගොස් විදුලිය කැපීමේ කාල අන්තරයන් පවා ප්‍රකාශයට පත්කිරීමට ඉංජිනේරු සංගමය ක්‍රියා කරමින් තිබේ. විදුලි බල මණ්ඩලයේ පාලනාධිකාරියත්, විදුලි බල ඇමති ඇතුළු අමාත්‍යාංශයත්, විදුලි බල ක්ෂේත්‍රයේ නියාමකයා වන ශ්‍රී ලංකා මහජන උපයෝගිතා කොමිසමත් සිටින්නේ මෙම මතයේ නොවේ. විදුලිය නොකපා කෙසේ හෝ දිය හැකිය යන ස්ථාවරයේය. මෙහිදී සිහියට නැඟෙන්නේ සෞඛ්‍ය අමාත්‍යාංශය හෝ සෞඛ්‍ය දෙපාර්තමේන්තුව ගත යුතු තීරණ රජයේ වෛද්‍ය නිලධාරීන්ගේ සංගමය ප්‍රකාශයට පත්කිරීමේ ක්‍රියාවලියය.

මේ සටහන ලියන මොහෝ විදුලි බල ක්ෂේත්‍රය සම්බන්ධයෙන් අලුත්ම ආරංචිය වූයේ විදුලි බල මණ්ඩල සභාපති එම්එම්සී පර්ඩිනැන්ඩු සිය තනතුරෙන් ඉල්ලා අස්වී ඇති බවය. ඊට පෙර දින ඔහු විසින් කරන ලද රාජකාරිමය කටයුත්ත වූයේ විදුලි බල මණ්ඩලයේ වැඩබලන සාමාන්‍යාධිකාරිවරයා ලෙස ආචාර්ය රොහාන්ත අබේසේකරට පත්වීම් ලිපියක් ලබාදීමය. (මෙය මේ වනවිට මාධ්‍යවල පළවෙමින් යන්නේ එම තනතුරට කරන ලද ස්ථීර පත්වීමක් ලෙසය.)
රොහාන්ත අබේසේකර එම තනතුරට පත්කරන ලෙස විදුලි බල මණ්ඩල ඉංජිනේරු සංගමය දැඩි ඉල්ලීම් කරනු ලැබූ අතර ඒ වෙනුවෙන් වෘත්තීය ක්‍රියාමාර්ගද ප්‍රකාශයට පත්කළේය. ඒ සාමාන්‍යාධිකාරි තනතුරේ වැඩ බැලීම සඳහා විදුලි බල අමාත්‍යාංශයේ අතිරේක ලේකම්වරයකු ලෙස කටයුතු කළ ආචාර්ය සුසන්ත පෙරේරා පත් කිරීමට විරෝධය දක්වමින්ය. සුසන්ත පෙරේරා මහතාගේ එම පත්කිරීම ලංවිම සභාපති පර්ඩිනැන්ඩු මහතාගේ වුවමනාව අනුව සිදුකළ එකක් බවට චෝදනා එල්ල වූ අතර ඒ අනුව අබේසේකර මහතාට පත්වීම ලබාදී තවදුරටත් එම තනතුරේ සිටීමේ අවුලක් ඇතිවීම හේතුවෙන් ඔහු ලංවිම සභාපති තනතුරෙන් ඉවත් වන්නට ඇති බව සිතිය හැකිය. එම ඉංජිනේරු සංගමයේ ස්ථාවරය වූයේ එම තනතුර සඳහා විදුලි බල මණ්ඩලයේ ජේ්‍යෂ්ඨතම ඉංජිනේරුවා පත්කළ යුතු බව හා මෙතෙක් කරගෙන ආ පිළිවෙත පරිදි එයට පිටතින් පත්නොකළ යුතු බවය.

මේ ආකාරයට විදුලි බල මණ්ඩලයේ සාමාන්‍යාධිකාරි තනතුරට වැඩ බැලීම සඳහා පුද්ගලයකු පත්කිරීමට සිදුවූයේ සාමාන්‍යාධිකාරි තනතුරේ අවසන් වරට කටයුතු කළ එම්ආර් රණතුංග මහතා රජයේ අලුත්ම ප්‍රතිපත්ති තීරණය අනුව ඔහුට තවත් වසර දෙකක් විශ්‍රාම නොයා සේවය කිරීමට හැකි බවට ගන්නා ලද අධිකරණ ක්‍රියාමාර්ගය නිසාය. විදුලි බල මණ්ඩල පනත අනුව වයස අවුරුදු 60 පිරීමේදී තනතුරෙන් විශ්‍රාම යා යුතු අතර පසුගිය අයවැය ප්‍රතිපත්ති ප්‍රකාශය මගින් විශ්‍රාම කාලය දික්කිරීම රණතුංග මහතාගේ මෙම ඉල්ලීමට හේතු වී තිබුණි.

රණතුංග මහතා විශ්‍රාම යෑමත් සමඟ ඊළඟට සිටි ජේ්‍යෂ්ඨයා ලෙස ආචාර්ය රොහාන්ත අබේසේකර පත්කිරීම සඳහා විදුලි බල අමාත්‍යවරයාගේ අනුමැතිය ලැබී තිබුණි. රණතුංග මහතාගේ අධිකරණ ක්‍රියාමාර්ගය අනුව එම අධිකරණ කටයුත්ත අවසන් වන තුරු ලංකා විදුලි බල මණ්ඩලයට ස්ථීර සාමාන්‍යාධිකාරිවරයකු පත්කළ නොහැකි අතර පත්කළ හැක්කේ වැඩබලන සාමාන්‍යාධිකාරිවරයකු පමණය.

සාමාන්‍යාධිකාරි තනතුරේ වැඩබැලීම සඳහා පත්කර ඇති රොහාන්ත අබේසේකරට ජල හා ඉන්ධන අර්බුදයක් නොමැති කාලයේ සිදුවූ විදුලි බිඳවැටීමක් සම්බන්ධ පොලිස් පරීක්ෂණයකට බාධා කිරීමක් ගැන චෝදනා එල්ල වූ අතර එම චෝදනාව ඉංජිනේරු සංගමයටද එල්ල විය.
ඊට අදාළ සිද්ධිය වූයේ පසුගිය වර්ෂයේ දෙසැම්බර් 02 දන රාත්‍රි 11.30 සිට පසුවදා උදෑසන 6 දක්වා පැය හයාමාරක කාලයක් ශ්‍රී ජයවර්ධනපුර වැලිවිට ප්‍රදේශයේ විදුලිය බිඳවැටීම සම්බන්ධයෙන් පරීක්ෂණයක් සිදුකරන ලෙසට ලැබී තිබුණ පැමිණිල්ලය. එම පැමිණිල්ල කොළඹ අපරාධ කොට්ඨාසයට කර තිබුණේ ලංකා විදුලි බල මණ්ඩලයේ ව්‍යාපාර හා මෙහෙයුම් ක්‍රමෝපාය පිළිබඳ ප්‍රධාන ඉංජිනේරු කහදුගොඩ මානගේ ප්‍රදීප් පුෂ්පකුමාර වන අතර පසුව ඔහු එම කොට්ඨාසයට ගොස් අදාළ පැමිණිල්ල ඉල්ලා අස්කරගන්නා බව දැනුම් දී ඇත. එසේ පැමිණිල්ල ඉල්ලා අස්කර ගන්නේ ලංකා විදුලි බල මණ්ඩලයේ අතිරේක සාමාන්‍යාධිකාරි රොහාන්ත අබේසේකර හා එහි ඉංජිනේරු සංගමයේ කිහිප දෙනෙකුගෙන් සිදුවන බලපෑම් මත බව ප්‍රකාශ කර ඇත.

මේ බවම ලංකා විදුලි බල මණ්ඩලයේ එවක සාමාන්‍යාධිකාරි එම්ආර් රණතුංගට කොළඹ අපරාධ කොට්ඨාශයේ අධ්‍යක්ෂ ජේ්‍යෂ්ඨ පොලිස් අධිකාරි ජීජේ නන්දන 2021.12.15 දින, ඩී/සීසීඩී/10931/2021 දරන ලිපිය මගින් දැනුම් දී ඇති අතර එම ලිපිය මගින් වැඩිදුරටත් දැනුම් දී ඇත්තේ එසේ පැමිණිල්ල ඉල්ලා අස්කර ගත්තද ඒ සම්බන්ධයෙන් ආරම්භ කර ඇති විමර්ශනය ඉදිරියට ගෙනයන බව දන්වා ඇත.

එම විදුලිය බිඳවැටීම ගැන ඉංජිනේරු සංගමයට චෝදනා එල්ල වූ අතර ඒ සඳහා හේතු වශයෙන් දැක්වුණේ එම දිනවල පැවති ඇමරිකානු නිව් ෆෝට්රස් සමාගමේ ගනුදෙනුවට එරෙහි ඉංජිනේරු සංගමයේ ක්‍රියාමාර්ගවල ප්‍රතිඵලයක් ලෙස කඩාකප්පල්කාරී ක්‍රියාවක් වශයෙන් එම විදුලි බිඳ වැටීම සිදුවී ඇති බවය.

වැඩ බලන සාමාන්‍යාධිකාරි තනතුරෙන් ආචාර්ය සුසන්ත පෙරේරා ඉවත් කර ඒ සඳහා ආචාර්ය රොහාන්ත අබේසේකර පත් කිරීම මගිනුත් එම්එම්සී පර්ඩිනැන්ඩු මහතා සභාපති තනතුරෙන් ඉවත් වීමත් සමඟ මේ මොහොතේ ලංවිම ඉංජිනේරු සංගමය ඔවුන් එරෙහි වූ දේවල් සම්බන්ධයෙන් යම් ජයග්‍රහණයක් ලබා ඇති බව පෙනේ. විශේෂයෙන්ම විදුලිය බිඳවැටීම සම්බන්ධයෙන් එම සංගමයට එරෙහිව එල්ල වූ චෝදනාව ඉදිරියට ගෙන නොයන ලෙස බලපෑම් කිරීමෙන් ආධාර කළ බවට මේ වනවිට හෙළිදරව් වී ඇති පුද්ගලයකු වෙනුවෙන් පෙනී සිටිමින් එම ජයග්‍රහණය ලබන්නට ඉංජිනේරු සංගමයට හැකිවී ඇත.

ඒ සම්බන්ධයෙන් ඉංජිනේරුවන් නොවන ලංවිම අනිකුත් වෘත්තීය සමිතිවල මෙන්ම ඉංජිනේරු සංගමයෙන් බෙදීගිය ජේ්‍යෂ්ඨ ඉංජිනේරු සංගමය පිහිටුවා ගත් පිරිස දක්වන ප්‍රතිචාරය කුමක්ද යන්න පැහැදිලි නැතත් මෙතෙක් වූ සිදුවීම් දෙස බලන විට එම පිරිස්ද කුමක් හෝ කරනු ඇතැයි සිතිය හැකිය.

එහිදීත් අවසාන ප්‍රතිඵලය වනු ඇත්තේ ඇතිවී ඇති මෙම විදුලි අර්බුදයට විසඳුම් සෙවීම වෙනුවට ලංවිම වෘත්තීය අරගල ඉස්මත්තට පැමිණීමය. ජනතාවට තවදුරටත් කළුවර භුක්ති විඳිමින් සිටීමට හෝ විදුලිය කැපේද නැද්ද යන බියෙන් කල් ගෙවීමට සිදුවීමය.■