‘අප ජාත්‍යන්තර නීතිවලට සම්මුතීන්ට ගරු කරන රටක්. පසුගිය කාලයේ අපේ රටේ මානව හිමකම් සම්බන්ධයෙන් ජාත්‍යන්තරයට ගෙනගිය වැරදි මතයක් නිවැරදි කරගන්නට අපට අවශ්‍යයි. මා වගකීමෙන් කියනවා මගේ පාලන කාලය තුළ කිසිදු ආකාරයක මානව හිමිකම් කඩකිරීමකට රජය අනුබල දී නැහැ. ඒ වාගේම ඉදිරියේදී එවැනි ක්‍රියාවක් සිදුවන්නට අප ඉඩ තබන්නේත් නැහැ.අප එවැනි ක්‍රියා කිසිසේත්ම අනුමත කරන්නේ නැහැ.
ජනාධිපතිවරයා මෙම අදහස් පළකර තිබුණේ ජනවාරි 18 වැනිදා පාර්ලිමේන්තුවේ නව සැසිය ආරම්භ කරමින් කළ සිය කතාවේදීය.
ඉහත සඳහන් කළ කොටස තුළ ජනාධිපතිවරයා කරුණු කිහිපයක්ම කියා තිබේ. එකක් ජාත්‍යන්තර නීතිවලට හා සම්මුතීන්වලට අප රටක් වශයෙන් ගරු කරන බවය. එය එසේ නොවන බව එක්සත් ජාතීන්ගේ මානව හිමිකම් කවුන්සිලයේ ශ්‍රී ලංකාව සම්බන්ධයෙන් වූ ඒකාබද්ධ යෝජනාවෙන් ඔහුගේ පාලනය යටතේ පවතින රජය ඉවත්වීමෙන් පෙන්නුම් කර ඇත.
රටේ මානව හිමිකම් ගැන වැරදි මතයක් ජාත්‍යන්තරයට ගෙන ගොස් ඇති බවත් එය නිවැරදි කරගැනීමට අවශ්‍ය බවත් ජනාධිපතිවරයා කියයි. ජාත්‍යන්තරයට ගෙනගොස් ඇත්තේ රටේ මානව හිමිකම් ගැන වැරදි මතයක් නොවේ. නීතියට පිටින් රාජ්‍ය මැදිහත්වීමෙන් සිදුකරන ලද ඝාතන, අතුරුදහන් කිරීම් හා අනිකුත් මානව හිමිකම් කඩකිරීම් ගැනය. ඒවා ඇත්ත මිස බොරු නොවේ. උදාහරණයකට ලියුම්කරු නියෝජනය කරන ජනමාධ්‍ය ක්ෂේත්‍රය ගත්කල පසුගිය මහින්ද රාජපක්ෂ ආණ්ඩු කාලයේදී ඝාතනය කරන ලද, අතුරුදහන් කරන ලද, පැහැරගෙන ගොස් වධහිංසාවට ලක්කරන ලද හා මාධ්‍ය ආයතනවලට පහරදීම් විශාල සංඛ්‍යාවක් තිබේ. එම කාලයේ ආරක්ෂක අමාත්‍යාංශයේ ලේකම්වරයා ලෙස කටයුතු කළේද ජනාධිපතිවරයාය. එම අපරාධ සම්බන්ධයෙන් ඒ කාලයේ කිසිදු පරීක්ෂණයක් සිදුකළේ නැත.
අපරාධකරුවන් තවමත් නිදැල්ලේය. අවශ්‍ය නම් ඒ කාලයේ ඒ ගැන වගකීමක් තිබූ ජනාධිපතිවරයාට ඊටත් වඩා බලයක් ඇති මෙකල ඒ ගැන පරීක්ෂා කර අපරාධකරුවන්ට නීතිය මගින් දඬුවම් ලබාදිය හැකිය. ඒවා අනුමත නොකරනවා යැයි පෙන්නුම් කළ හැක්කේ ඒ මගින් පමණය. එසේ නොකරන තාක් ජාත්‍යන්තරයේ ඇති එම වැරදි නොවන මතය නිවැරදි වන්නේ නැත.
එම අපරාධ සම්බන්ධයෙන් එවකට ආරක්ෂක අමාත්‍යාංශ ලේකම්වරයා දැන සිටි බවට වූ ඕනෑ තරම් සාක්ෂි අප මීට පෙර ලියා ඇත. ඒවා නැවත නැවත ලිවීමේ වැඩක් නැත.
ජනාධිපතිවරයාගේ වත්මන් පාලන කාලයේ බරපතළ මානව හිමිකම් කඩවීම් සිදුවී නැති බව ඇත්තය. ඒ ජනාධිපතිවරයා හොඳවීම නිසා නොවේ. කොවිඩ් වසංගතය හේතුවෙන් රට තුළ ඇති වී තිබූ තත්වය නිසා එවැන්නක් සඳහා අවශ්‍යතාවක් පැන නොනැඟුණ නිසාය. ඉදිරියේදී එසේ නොවේ යැයි අපට සහතිකයක් නැත. ආර්ථික අර්බුදය හා අනිකුත් අර්බුද හේතුවෙන් සිදුවන ජනතා නැගිටීම්වලදී ඔහුගේ සුපුරුදු ප්‍රතිකර්ම යළි කරළියට පැමිණිය හැකිය. මන්ද ඔහු දන්නේ මිලිටරි බලය ගැන මිස වෙනකක් ගැන නොවන නිසාය.
ඒ නිසා ජනාධිපතිවරයා මානව හිමිකම් ගැන ප්‍රසිද්ධියේ කියන මෙවැනි කතා අප ඒ ලෙසම අප ගණන් ගතයුතු නැත.■
