■ ඇන්තනී වෙරංග පුෂ්පික
කොළඹ නාලන්දා විද්‍යාලයෙන් ක්‍රිකට් ක්‍රීඩාවට අත්පොත් තබන ඔහු තුන් ඉරියව්වෙන්ම කැපී පෙනෙන දක්ෂතා දැක් වූ ක්‍රීඩකයෙකු මෙන්ම 2009 සිට ජාත්‍යන්තර ක්‍රිකට් තරග විනිසුරුවරයෙකු ලෙස මේ වන විට කටයුතු කරයි. ජාත්‍යන්තර ක්‍රිකට් කවුන්සිලයෙන් පිදෙන හොඳම විනිසුරුවරයාට හිමි සම්මානය අවස්ථා දෙකකදීම දිනාගෙන ඇති අතර ක්‍රිකට් ලෝක කුසලාන තරගාවලියක අවසන් තරගයට ක්‍රීඩා කළ ක්‍රීඩකයෙකු ජාත්‍යන්තර ක්‍රිකට් තරගවල ප්‍රධාන විනිසුරෙකු ලෙස කටයුතු කරන ලොව ප්‍රථම සහ එකම පුද්ගලයා ඔහුය.
කුමාර් ධර්මසේන පොඩි කාලේ ඉඳන්ම හිතාගෙන හිටියේ ක්‍රිකට් ක්‍රීඩකයෙක් වෙන්නම කියල ද?
පොඩි කාලෙ ක්‍රිකට් ක්‍රීඩකයෙක් වෙන්නම කියලා බලාපොරොත්තුවක් තිබුණේ නැහැ. හැබැයි ක්‍රීඩා කරන්න පටන්ගත්තාට පස්සේ ඇතිවුණ ආශාවත් එක්ක ක්‍රිකට් එක්ක දිගටම ඉන්න තමයි වුවමනාව තිබුණේ. මම නාලන්ද විද්‍යාලය ඉස්සරහ පොඩි කාලෙ පදිංචිවෙලා හිටියේ. ඒක නිසා හැමදාම දකිනවා නාලන්දෙ ක්‍රිකට් ටීම් එකේ සෙල්ලම් කරන අය යනවා එනවා. ඒකේ ආභාසය නිසා තමයි මට ක්‍රිකට් ක්‍රීඩාවට ළැදිකමක්, ළෙන්ගතුකමක් සහ සෙල්ලම් කරන්න ආසාවක් ඇති වුණේ.
දැන් වගේ නෙමෙයි ඒ කාලේ. සාමාන්‍ය පවුලකින් එන කෙනෙක්ට ශ්‍රී ලංකා ජාතික ක්‍රිකට් කණ්ඩායමට එනවා කියන එක ලේසි දෙයක් නෙමෙයි.
ඕනෑම ක්ෂේත්‍රයකින් රට නියෝජනය කරන්න සුවිශේෂ වූ හැකියාවක් තිබෙන අයෙක් විය යුතුයි. ඒ දවස්වල ක්‍රිකට් සෙල්ලම් කරද්දි කම්කටොලු රාශියකට මුහුණ දෙන්නට සිදුවුණා. ඒ හැම අවස්ථාවකදීම මගේ දෙමවුපියන් සහ සහෝදර සහෝදරියො මාත් සමග සිටියා. ඒ අය මට ලොකු ශක්තියක් වුණා.
1993 දී දකුණු අප්‍රිකාවත් සමඟ තමයි ඔබ මංගල ටෙස්ට් තරඟයට සහභාගි වෙන්නේ. මොනවගේ මතකයක් ද තියෙන්නේ මංගල ටෙස්ට් තරගය ගැන?
මට දකුණු අප්‍රිකාවත් එක්ක ඒ තරගය සෙල්ලම් කරන්න ලැබෙන්නෙ අහම්බෙන් වගේ. මම අවුරුදු ගාණක් ඒ කාලෙ නැෂනල් ස්කොඩ් එකේ හිටියා. ඒ ඉන්න අතරතුර තමයි තුන්දින තරගයක් ක්‍රීඩා කරන්න හම්බවෙන්නේ කුරුණෑගල වෙලගෙදර ක්‍රීඩාංගණයේ දී. මම ගියේ ඒ තරගයේ සෙල්ලම් කරන්න නෙමෙයි, අමතර ක්‍රීඩකයෙකු ලෙසයි. තරගය තිබෙන දවසේ චන්දික හතුරුසිංහට හොඳටම උණ ගැනුණා. ඒ නිසා මට ඔහු වෙනුවට කණ්ඩායමේ 11 දෙනා අතර ක්‍රීඩා කරන්න අවස්ථාව හම්බ වුණා. මම ඒ තරගයේ දී කඩුලු 07ක් ලබා ගත්තා. ඒ පෙන්වපු දක්ෂතා නිසා මම ශ්‍රී ලංකා දකුණු අප්‍රිකා ටෙස්ට් සංචිතයට නම් වුණා. පළවෙනි ටෙස්ට් මැච් එක මොරටුවේ දී ක්‍රීඩා කළේ දකුණු අප්‍රිකාවත් එක්ක. ඒ මැච් එකේ මට අවස්ථාවක් ලැබුණේ නැහැ. අපි ඒ මැච් එක පරාද වුණා. දෙවැනි ටෙස්ට් මැච් එකේදි තමයි මට අවස්ථාව ලැබෙන්නෙ කණ්ඩායමේ 11 දෙනා අතර ක්‍රීඩා කරන්න. මම එදා ඉඳන් සෑහෙන්න කාලයක් ජාතික කණ්ඩායමේ ක්‍රීඩා කළා.
ප්‍රේක්ෂකයන්ට කුමාර් ධර්මසේන කියනවාට වඩා මතක හිටින්නේ ‘උනන්දුවා’ කියලා.
උනන්දුවා කියන නම මට ප්‍රේක්ෂකයන් විසින්ම දාලා තිබෙන නමක්. මම හිතන්නේ මම ක්‍රීඩා කරන විලාසය හැමෝටම පෙනෙන්න ගත්තා. මම තනියම කියවනවා. මම අනෙක් අයව දිරි ගන්වනවා. නැත්නම් කණ්ඩායම වැටිලා තිබෙන වෙලාවක ඇවිල්ලා කොහොම හරි අවශ්‍ය ලකුණු ප්‍රමාණය ගන්නවා. එහෙම නැත්නම් කණ්ඩායමට අවශ්‍යම මොහොතක කඩුල්ලක් දෙකක් ලබාගෙන ඒ පාර්ට්නර්ෂිප් එක බිඳ දමනවා. නමුත් මම කිසිම වෙලාවක සනත් ජයසූරිය, අරවින්ද ද සිල්වා වගේ ලොකු ලකුණු සංඛ්‍යා රැස්කරලා ලොකු ඉනිම්වලට ගියෙත් නැහැ. මුරලිලා වාස්ලා වගේ ලොකු කඩුලු සංඛ්‍යාවක් බිඳදැමුවේත් නැහැ, ඒ වුණාට කණ්ඩායමට අවශ්‍ය දේ අවශ්‍ය මොහොතේ දී ඉටුවුණාය කියන හැඟීම තමයි මගේ තියෙන්නේ. මම ඒ දේ කළ නිසාම තමයි ප්‍රේක්ෂකයෝ මට ඒ වගේ පටබැඳි නාමයක් දාන්න ඇත්තේ කියලා මම හිතනවා.
1996 ලෝක කුසලාන තරගාවලියේ ඉන්දියාවත් සමග තිබුණු අවසන් පූර්ව තරගයේ සනතුයි, කළුවිතාරණයි දෙන්නාම ඉනිම පටන් ගනිද්දිම දැවී යනවා. ඒ තීරණාත්මක තරගයේ මොනවගේ පීඩනයක් ද දැනුණේ.?
අපි ඒ තරගයේ ටොස් එක පැරදිලා බැට් කරන්න වුණා. අපි හිතාගෙන හිටියෙත් ටොස් එක දින්නත් බැට් කරන්නම තමයි. නමුත් පළවෙනි ඕවරේදීම සනතුයි, කළුයි දෙන්නාම අවුට් වෙනවා. ඒක කණ්ඩායමට ලොකු පීඩනයක්. කොහොම හරි අපි ලකුණු 251 ලබා ගන්නවා. ඉන්දියාවත් ඉතාමත් හොඳ ආරම්භයක් ගන්නවා ඒ තරගයේදී. නමුත් සචින්ගෙ විකට් එක ගත්තාට පස්සෙ අපේ පන්දු යවන්නන් ලොකු පීඩනයක් ඉන්දියාවට එල්ල කරලා, ඉතාමත් අඩු ලකුණු ප්‍රමාණයකට ඉන්දියාව දවාගන්නවා. මම හිතනවා ලෝක කුසලාන අවසාන මහා තරගයට වඩා ලොකු පීඩනයකින් මේ තරගය ක්‍රීඩා කළේ. ඉන්දියාවෙදි ඉන්දියානුවන් පරද්දවලා ලෝක කුසලාන අවසාන මහා තරගයට යන්න ලැබීම සුවිශේෂී ජයග්‍රහනයක්.
අතීතයට ගිහිල්ලා යම් තරගයක් වෙනස් කරන්න තිබුණා නම් මොකද්ද ඔබ තෝරාගන්න තරගය?
1995දී බටහිර ඉන්දීය කොදෙව් සහ ඕස්ටේ්‍රලියාව සමග පැවති බෙන්සන් ඇන්ඩ් හෙජස් තුන්කොන් තරගාවලියේ අවසාන තරගයට සුදුසුකම් ලැබුවෙ අපියි ඕස්ටේ්‍රලියාවයි. මේ තරගාවලිය සෙල්ලම් කරේ ඕස්ටේ්‍රලියාවේ. තරගාවලියේ කණ්ඩායම් අතර ලකුණු සටහනේ මුලින්ම ඉන්න කණ්ඩායම් දෙක තමයි ෆයිනල් එකට තේරෙන්නේ. ඒ කණ්ඩායම් දෙක අතර තිබෙන තරග තුනෙන් දෙකක් ජයග්‍රහණය කරන කණ්ඩායම තමයි දිනන්නේ. අපි පළවෙනි මැච් එක පරාද වුණා ඕස්ටේ්‍රලියාවට. නමුත් මම හිතනවා අපි තව ටිකක් වෙලාව අරගෙන ගැහුවා නම් අපිට පළවෙනි මැච් එකම දිනලා, ඉතුරු මැච් දෙකෙන් තව එක මැච් එකක් කොහොමහරි ජයග්‍රහණය කරලා, බෙන්සන් ඇන්ඩ් හෙජස් කුසලානය ශ්‍රී ලංකාවට ගේන්න තිබුණා. ඒ නිසා මට වෙනස් කරන්න පුළුවන් නම් මම ඒ තරගය තමයි තෝරාගන්නේ.
2005 දී ක්‍රිකට් ක්‍රීඩාවෙන් සමුගනිද්දී හිතුවාද ජාත්‍යන්තර තරග විනිශ්ච කරුවෙක් වෙන්න ඕනෑ කියලා.
මම සාමාන්‍යයෙන් මගේ ජීවිතය ගැන සැලසුමකට වැඩ කරන කෙනෙක්. ඒ සැලසුම අනුව තමයි මම හිටියේ. මම අනිවාර්යයෙන්ම අම්පයර් කෙනෙක් වෙනවා කියලා හිතුවේ නෑ. මම හිතාගෙන හිටියේ ක්‍රිකට් ක්‍රීඩා කිරීමෙන් සමු ගත්තට පස්සේ අම්පයර් කෙනෙක් හරි කෝච් කෙනෙක් හරි වෙනවා කියන එක තමයි හිතේ තිබුණේ. නමුත් අම්පයර් කෙනෙක් වෙන්න ගොඩක් වාසි තිබුණා, මම 2005 රිටයර් වෙනකොට. අම්පයර් කෙනෙක් වෙන්න ඕනෑ දැනුම, වපසරිය මම රිටයර් වෙච්ච ගමන්ම හදා ගත්තා. ඒ වගේම රිටයර් වෙන්න අවුරුදු දෙකකට කලින් ඉඳන්මත් මම ඒකට සූදානමෙන් හිටියේ.
පහුගිය කාලේ ශ්‍රී ලංකාව සමග තරග කරන සමහර තරගවලදීත් ඔබට අම්පයර් කෙනෙක් විදිහට ඉන්න සිද්ධ වුණා. එවැනි තරගයක රට ගැන තිබෙන හැඟීමත් එක්ක මොන විදිහෙ අභියෝගයක්ද තීරණ ලබා දෙන එක?
මම ගොඩක් ආසාවෙන් හිටියේ ශ්‍රී ලංකාව නියෝජනය කරන තරගයක අම්පයර් කෙනෙක් විදිහට එකතු වෙන්න. කොරෝනා වසංගතයත් සමග බලපෑ තත්වය නිසා ඒ අවස්ථාව ලැබුණා. ඒ වගේ තරගයකදී වෙනත් තරගවල නැති පීඩනයක් තියෙනවා. මොකද අපේ ක්‍රීඩකයන් සිංහලෙන් කතා කරද්දී ඒ දේවල් හොඳට ඇහෙනවා, දැනෙනවා. අපේ ක්‍රීඩකයන්ගේ මානසිකත්වය තේරෙනවා. ඒ වගේ තරගවල දෙන සමහර තීරණ අපක්ෂපාතී නැතිවෙන්න පුළුවන්. ඒක වෙන්නෙ ගොඩක් වෙලාවට මනුෂ්‍ය හැඟීම් එක්ක. රට ගැන තිබෙන හැඟීමුත් එක්ක දැනෙන දේවල් වැඩියි. මේ දේවල් එක්ක ඒ වගේ තරග විනිශ්චය කරන්න ගොඩාක් අමාරුයි.
2019 එංගලන්තය සහ නවසීලන්තය අතර ලෝක කුසලාන අවසාන මහා තරගයේ අවසන් පන්දුවාරයේ තුන්වන පන්දුවේදී දුවද්දී දවාගැනීමකට මාර්ටින් ගප්ටිල් කඩුල්ලට යොමු කරන පන්දුව බෙන්ස් ස්ටොක්ගෙ පිත්තෙ වැදිලා හතරේ සීමාව පහු කරනවා. ඔබ ඒ මොහොතේ ලබා දුන් තීරණය සම්බන්ධව ලෝකයේ ලොකු කතාබහක් ඇතිවුණා.
ක්‍රිකට් නීති පොතට අනුව නම් ඒ මොහොතේ අපි ගත්ත තීරණය විනිසුරුවන් හැටියට හරි. නමුත් නැවත රූපවාහිනියේ පුනරූපණ බැලුවාම නම් වෙනසක් කළ යුතුයි. ක්‍රිකට් නීති පොත හදලා තිබෙන්නේ ටෙක්නොලජි එකත් එක්ක සෙල්ලම් කරන්න නෙමෙයි. ඒ තරගයෙන් පස්සෙ හදලා තියෙනවා කරන්න ඕනෑ විදිහ ගැන. මේ වෙනකොට ටෙක්නොලොජි එකත් එක්ක නීති පොතත් පොඩ්ඩ පොඩ්ඩ වෙනස් කරමින් යනවා. 2019 ලෝක කුසලාන අවසන් තරගය සුවිශේෂ තරගයක්. ඒ තරගය තව සැරයක් බලන්න තිබුණා නම්, අම්පයර් කරන්න තිබුණා නම් මම තෝරාගන්නෙ ඒ තරගය. හැමෝම දන්නවා ඒ තරගයේ රිසල්ට් එක මොකද වුණේ කියලා. ක්‍රිකට් ලෝක කුසලානයක එවැනි වූ අවසන් තරගයක් නරඹන්න පුළුවන් වෙන්නේ හරිම කලාතුරකින්. ඒ තරගයේ විනිසුරුවරයෙක් විදිහට කටයුතු කරන්න ලැබීමම ලොකු සතුටක්. ඕනෑම ජාත්‍යන්තර තරගයක් විනිශ්චය කරද්දී යම් කිසි පීඩනයක් තිබෙනවා. සුවිශේෂ අවස්ථාවක් තමයි ලෝක කුසලානයක අවසාන තරගයක් විනිශ්චය කරන්න ලැබෙනවා කියන්නේ. මට වාසනාව තිබුණා 2015 සහ 2019 ලෝක කුසලාන දෙකේම අවසාන තරගය විනිශ්චය කරන්න. මම හිතනවා ඒක මම ලබපු භාග්‍යයක් වගේම රට ලබපු භාග්‍යයක් කියලා.
ක්‍රිකට්වලට අමතරව වගා කටයුතුවලටත් ලොකු කැමැත්තක් තියෙනවා ඔබේ?
මම ගොඩාක් වගාවට කැමතියි. පින්තැන්න ප්ලාන්ටේෂන් එක මම තමයි පටන් ගත්තේ. 2002 වගේ ඉඳන් තේ, කුරුඳු, ගම්මිරිස් වගේ දේවල් වගා කරනවා. 2008 විතර වගෙ කාලයක අගාවුඩ් කියන ශාකය ගැන මම දැනගන්නවා. ඒකෙන් පස්සෙ අගාවුඩ් ශාකයත් මගේ වත්තෙ වවන්න පටන් ගන්නවා. ලංකාවෙ පළවෙනි වතාවට තමයි වුඩ් ඔයිල් නිෂ්පාදනය කරන කර්මාන්ත ශාලාවක් හදන්නේ. මගේ යටතේ සේවකයන් 400ක් වැඩ කරනවා. මම කරන්නේ හරිත වන වගාවක්.
මොනවාද කුමර් ධර්මසේනගෙ ඉදිරි බලාපොරොත්තු?
ඉදිරියටත් ක්‍රිකට් එක්කම ඉන්න තමයි හිතාගෙන ඉන්නේ. තව අවුරුදු දෙක තුනකින් මොනව වෙයිද කියන්නත් බැහැ. මම ගොඩක් කාර්යබහුල වෙලා ඉන්නෙ ව්‍යාපාරික කටයුතුත් එක්ක.■
