‘ශ්‍රී ලංකා ගුවන් විදුලි සංස්ථාවේ ප්‍රාදේශීය නාලිකාවන්හි ගුවන් කාලයන් ප්‍රමිතියකින් යුත් නිර්මාණාත්මක වැඩසටහන් හා විවිධ ප්‍රචාරණ කටයුතු සඳහා විකාශනය කිරීමට පෞද්ගලික මෙන්ම රාජ්‍ය අංශයේ ආයතන සහ වෙනත් පිළිගත් සංවිධාන වෙත ලබාදීමට සංස්ථා පාලනාධිකාරිය තීරණය කර ඇත.’
මෙසේ සඳහන් වන්නේ රජරට සේවය, රුහුණු සේවය, කඳුරට සේවය, වයඹ සේවය, පිරෙයි එෆ් එම් හා යාල් එෆ් එම් යන ප්‍රාදේශීය සේවාවල ගුවන් කාලය විකිණීම සම්බන්ධයෙන් ශ්‍රී ලංකා ගුවන් විදුලි සංස්ථාව පලකළ දැන්වීමෙහිය.
එම දැන්වීම පළවී දින 14ක කාලයක් ඇතුලත ඒ සඳහා අයදුම්පත් ඉදිරිපත් කරන ලෙස දැනුම් දී ඇති අතර අයදුම් කරන ආයතනයේ නම හා විස්තර, යෝජිත වැඩසටහන්, වැඩසටහන්වල අරමුණු හා පරමාර්ථයන්, ඉල්ලුම් කරන නාලිකාව/නාලිකා සහ පැය ගණන් (අපේක්ෂිත කාලය), බලාපොරොත්තු වන කාල සීමාව මාස /වර්ෂ ආදී වශයෙන් සහ පැයක ගුවන් කාලයක් සඳහා යෝජනා කරනු ලබන මිල ගණන් ඉදිරිපත් කළ යුතු බව දන්වා ඇත.
මේ දැන්වීම ප්‍රකාශයට පත්වීමත් සමඟ විශේෂයෙන් රජරට සේවයට සම්බන්ධව කටයුතු කළ ප්‍රවීණයන් එම කටයුත්තට විරුද්ධත්වය පලකර ඇත. ඊට හේතු වී ඇත්තේ රජරට සේවය ප්‍රාදේශීය සේවයක් ලෙස මෙතෙක් කරගෙන ආ කාර්යභාරය මේ මගින් තවදුරටත් අවගමනය වේදෝ යන බිය නිසාය. ඊට අමතරව රජරට සේවය යම් මූල්‍ය අපහසුතාවයන්ට ලක්වීමේදී උතුරු මැද පළාත් සභාවේ මූල්‍ය දායකත්ව ලබාගෙන එය පවත්වාගෙන යෑමේ අත්දැකීම්ද තිබී ඇති නිසාය.
මේ විරෝධයන් කෙතරම් වූවත් කොළඹ සිට කටයුතු කරන ශ්‍රී ලංකා ගුවන් විදුලි සංස්ථාවේ සභාපති හඩ්සන් සමරසිංහ, අධ්‍යක්ෂ ජනරාල් චන්ද්‍රපාල ලියනගේ ඇතුළු බළධාරීන් රජරට සේවයේ ගුවන් කාලය මේ වනවිට පෞද්ගලික ආයතනයකට කුණු කොල්ලයට ලබාදී තිබේ. මෙහි පහත සටහන් වන්නේ එසේ කුණු කොල්ලයට රජරට සේවයේ ගුවන් කාලය ලබාදීමේ කුණු කතාවේ කුණු ඕජස්ය.
රජරට සේවයේ පෙරවරු 9 සිට මධ්‍යහන 12 දක්වා වන කාර්ය බහුල වේලාව සතියේ දින 7ම වසර 3ක කාලයක් භාවිතා කිරීම සඳහා මේ වනවිට කොළඹ ටොරින්ටන් මාවතේ අංක 1/88 හි මායා සොලූෂන්ස් ප්‍රයිවට් ලිමිටඩ් නැමැති ආයතනයට ලබාදී තිබේ. ඒ මාසයකට රුපියල් ලක්ෂ 3ක මුදලකටය. ඒ අනුව පැයක ගුවන් කාලයක් සඳහා මාසයකට රුපියල් ලක්ෂයකි. මාසයකට දින 30ක් නම් දිනක පැයක ගුවන් කාලයට රුපියල් 3300ක පමණ මුදලකි.
අපගේ රජරට සේවයේ ආරංචි මාර්ග පවසන්නේ එහි කාර්ය බහුල නොවන පැයක ධර්ම දේශනාවක් සඳහාත් රුපියල් 6000කට වැඩි මුදලක් අයකරන බවයි. කාර්ය බහුල පැයක නම් ධර්ම දේශනාවකට වුව රුපියල් 12,000ට වැඩි මුදලක් අය කරන බවයි.
මෙම ගනුදෙනුව සම්බන්ධයෙන් ශ්‍රී ලංකා ගුවන් විදුලි සංස්ථාවත් මායා සොලූෂන්ස් ආයතනයත් අතර ඇතිකරගෙන තිබෙන ගිවිසුම අනුව ගිවිසුම ක්‍රිියාත්මක වන පළමු මාසයේදී මාසික සොච්චම් ගාස්තුව වන රුපියල් ලක්ෂ 3ක මුදල අය කරන්නේ නැත. ඒ සඳහා හේතු වශයෙන් සඳහන් කර ඇත්තේ අනුග්‍රාහකයින් නිර්මාණය කරගැනීමේ කාලයක් සේ සලකා එම කාලයට අදාළ ගාස්තුව ශ්‍රී ලංකා ගුවන් විදුලි සංස්ථාව අත්හරින බවය.
දැන් එම ගනුදෙනුවේ අනුහසින් ‘රජ නඳ’ යනුවෙන් එම ආයතනය විකාශයන් ආරම්භ කර ඇත.
මෙම ගනුදෙන්ව කුණු කොල්ලයට සිදුවී ඇති බව අප සඳහන් කළේ හේතුවක් ඇතිවය. ඒ මෙම ගුවන් කාලය විකිනීමේ දැන්වීම පලකිරීමෙන් පසු තවත් පාර්ශව කිහිපයක්ද මේ සඳහා ඉල්ලීම් කර තිබීම හා එම ඉල්ලීම්වලදී මීට වඩා වැඩි ගාස්තුවක් ගුවන් කාලය සඳහා ලබාදෙන්නට එම ඉල්ලුම්කරුවන් යෝජනා කර තිබීමය.
ඉන් එක් ඉල්ලුම්කරුවෙක් වන්නේ කඳාන පොල්පිතිමූකලාන ජය මාවතේ තරුපති ලයිෆ් ෆොටෙක්ෂන් ෆවුන්ඩේසන්ය. ඔවුන් එම ඉල්ලුම් පත්‍රයේ සඳහන් කර ඇත්තේ ජේෂ්ඨ ගුවන් විදුලි මාධ්‍යවේදී සීලරත්න සෙනරත් මහතා මෙම විකාශයන් සඳහා උපදේශකයකු වශයෙන් කටයුතු කිරීමට කැමැත්ත පලකර ඇති බවය. ඔවුන් වසර 5ක කාලයක් සඳහා ඉල්ලුම් කර ඇති අතර ඉන් පළමු වසර 3 සඳහා මාසයකට රුපියල් ලක්ෂ 16ක මුදලක් යෝජනා කර ඇත. ඒ පෙරවරු 4.30 සිට රාත්‍රී 10.30 දක්වා කාලයටය. ඒ අනුව එහි ඇත්තෙත් මාසයකට පැයකට රුපියල් ලක්ෂයක මුදලකි. එහෙත් එය කාර්ය බහුල සහ කාර්ය බහුල නොවන සියලු පැය සඳහාය. එහි පළමු මාසය සඳහා ගාස්තු කපා හැරීමක් ඉල්ලා නැති අතර පළමු අවුරුදු 3න් පසු ඉතිරි අවුරුදු 2 සඳහා මාසයකට රුපියල් ලක්ෂ 20ක් හෙවත් පැකට රුපියල් 125,000ක් යෝජනා කර ඇත.
මේ සඳහා වඩාත් සුවිශේෂම යෝජනාව ඉදිරිපත් කර ඇත්තේ රජරට හෙවත් උතුරු මැද පළාතට අයත් මාර්ගස්ථ ප්‍රවාහන සේවා අධිකාරියය. ඔවුන් ඒ සඳහා ඉදිරිපත් වී ඇත්තේ උතුරු මැද පළාත් සභාවෙන් ඊට පෙර රජරට සේවයට කරන ලද දායකත්වය පිළිබඳ අත්දැකීම් සතුව හා බාහිර පාර්ශවයන්ට රජරට සේවයේ ගුවන් කාලය දීම මගින් එයට යම් හානියක් වේ නම් එය වළක්වා ගැනීම සඳහාය. එම අධිකාරිය පළමු වසර 3 සඳහා මසකට රුපියල් ලක්ෂ 17ක් යෝජනා කරන අතර ඒ පෙරවරු 9 සිට රාත්‍රි 9 දක්වා කාලයටය. ඒ කාර්ය බහුල හා කාර්ය බහුල නොවන සෑම පැයකටම රුපියල් 141,666ක් බැගින්ය. එමෙන්ම එම මුදල ඊලඟ වසර 2ක කාලයේදී රුපියල් ලක්ෂ 20 දක්වා වැඩි කිරීමේ පදනම යටතේය.
මේ යෝජනාව එම අධිකාරිය ගෙන එන්නේ උතුරු පළාත් ආණ්ඩුකාර මහීපාල හේරත් දැනුවත් කරමින් වන අතර එහි සඳහන් කරන්නේ රජරට සේවයේ ගරු අනුශාසකත්වය හා උපදේශකත්වය පිරිනමා සිටින පල්ලේගම හේමරතන හිමි, මහාචාර්ය සේන නානායක්කාර, රජරට සේවයේ ප්‍රවීණ ගුවන් විදුලි ශිල්පි රංජිත් රූපසිංහ හා ප්‍රවීණ ගීත රචක මහින්ද චන්ද්‍රසේකර ඇතුළු රජරට සේවයෙන් බිහිවූ විශිෂ්ටයන්ගෙන් සමන්විත උපදේශක මණ්ඩලයක් යටතේ එම කටයුතු මෙහෙයවන බවය.
එහෙත් මේ කිසිවක් ගුවන් විදුලි සංස්ථාවේ සභාපතිවරයා, අධ්‍යක්ෂ ජනරාල්වරයා ඇතුළු පාලනාධිකාරියට වැදගත් වී නැත. ඒ වෙනුවට වෙන කිසියම් කරුණක් වැදගත් වී ඇත. ඔවුන්ට වැදගත් කරුණ අනිකුත් ඉල්ලුම්කරුවන් සතු නොවීම එයට හේතුව වන්නට ඇත. විශේෂයෙන්ම රාජ්‍ය ආයතනයක් වන උතුරු මැද මාර්ගස්ථ ප්‍රවාහන සේවා අධිකාරියට ගුවන් විදුලි ප්‍රධානීන් බලාපොරොත්තු වන ‘වැදගත් කරුණට’ රාජ්‍ය ආයතනයක් නිසාම අනුකූල වීමට නොහැකි කම නුසුදුසු කමක් වන්නට ඇත. ඒ නිසා ඔවුන්ට සුදුසු පාර්ශවය තෝරා ගෙන ඇත.
ගුවන් විදුලි බලධාරීන් බලාපොරොත්තු වන වැදගත්කම මෙම ගුවන් කාලය ලබාදී ඇති මායා සොලූෂන්ස් ආයතනයට තිබේය යන්න අපට අනුමාන කළ හැකි වන්නේ අන්තර්ජාලය පිරික්සීමේදී කොළඹ නාරාහෙන්පිට විජය කුමාරතුංග මාවතේ පිහිටි මායා සොලූෂන්ස් ප්‍රයිවට් ලිමිටඩ් නැමැති ආයතනයක් මිස ටොරින්ටන් මාවතේම පිහිටි එම නමින්ම යුත් ආයතනයක් සොයා ගැනීමට නොහැකි නිසාය. ඒ නිසාම මේ මායා සොලූෂන්ස් ආයතනය ගැන සෙවීමත් මෙම ගනුදෙනුව ගැන සෙවීමත් විගණකාධිපතිවරයාගේ වගකීමකි.■
