■ අමන්දිකා කුරේ
ඇමරිකානු පුරවැසියෙකු වන බැසිල් රාජපක්ෂ පාර්ලිමේන්තු මන්ත්‍රීවරයෙකු වශයෙන් පත්වීම, මුදල් ඇමති ලෙස දිවුරුම් දීම හා එම ධූරයේ කටයුතු කිරීම අභියෝගයට ලක් කරමින් අභියායචනාධිකරණයට යොමු කළ රීට් පෙත්සම පෙබරවාරි 07 යළි කැඳවීමට දින නියම කර තිබේ.
උලපනේ සුමංගල හිමියන් ඇතුළු තිදෙනෙක් ගොනු කළ මෙම රීට් පෙත්සම සඳහා පෙත්සම්කාර පාර්ශවය වෙනුවෙන් පෙනී සිටියේ ජනාධිපති නීතීඥ විජේදාස රාජපක්ෂය.
ඇමරිකානු පුරවැසිභාවය ලබා ගැනීමේ දී ඇමරිකානු ආණ්ඩුක්‍රම ව්‍යවස්ථාවට පක්ෂපාතීව කටයුතු කිරීම හා ඇමරිකාව වෙනුවෙන් අනෙකුත් රටවල් සමග යුධ වැදීමට වුවද දිවුරුම් ලබා දෙන හෙයින් යුගදනවි බලාගාර ගිවිසුම රහසිගතව අත්සන් කළේ එම පක්ෂපාතීත්වය වෙනුවෙන් දැයි සැකයක් මතුවන බව විජේදාස රාජපක්ෂ මහතා එම නඩුව කැඳවූ ජනවාරි 12 වැනිදා අධිකරණයේ දී පෙන්වා දුන්නේ ය.
වෙනත් රටක ආණ්ඩු ක්‍රම ව්‍යවස්ථාවකට යටත්ව කටයුතු කරන බවට දිවුරුම් දී තිබියදී තවත් රටක මුදල් ඇමති ධූරය තබා කාර්යාල කාර්ය සහායක තනතුරක්වත් නීත්‍යානුකූලව දැරීමට නොහැකි බව විජේදාස රාජපක්ෂ මහතා අධිකරණයට කරුණු ඉදිරිපත් කරමින් පැවසුවේ ය.
මෙම පෙත්සම ගොනු කරන්නේ බැසිල් රාජපක්ෂ මහතාගේ පත්වීම අභියෝගයට ලක් කරනවාටත් වඩා ඔහු එම ධූරයේ කටයුතු කිරීම වළක්වන අධිකරණ නියෝගයක් ලබා ගැනීමට බව පෙත්සම්කාර පාර්ශවය පෙන්වා දෙයි.
නීතිපතිවරයා වෙනුවෙන් පෙනී සිටි අතිරේක සොලිසිටර් ජෙනරාල් මෙරිල් පුල්ලේ විසින් මෙම පෙත්සම විභාගයකින් තොරව ඉවත දමන ලෙසට අධිකර්ණයෙන් ඉල්ලා සිටිය ද විත්තිකරුවන් වන බැසිල් රාජපක්ෂ, පාර්ලිමේන්තු මහ ලේකම් හා නීතිපතිවරයා යන තිදෙනාට එරෙහිව නොතීසි නිකුත් කරන ලෙස පැමිණිලි පාර්ශවයට නියෝග කරන ලදි.
අභියායචනාධිකරණ විනිසුරුවරුන් වන සෝභිත රාජකරුණා හා ධම්මික ගනේපොළ යන විනිසුරුවරුන් ඉදිරියේ මෙම රීට් පෙත්සම කැඳවන ලදි.■
