■ ඉඳුවර බණ්ඩාර
ශ්‍රී ලංකා පොදුජන පෙරමුණේ පාර්ලිමේන්තු මන්ත්‍රී සමන්ප්‍රිය හේරත් ඇතුළු ප්‍රාදේශීය දේශපාලනඥයන් පිරිසක් ආර්ථික සංවර්ධන නිලධාරියෙකුට පහර දීමට උත්සාහ කිරීම හා බැන තර්ජනය කිරීම දැඩිව හෙළා දකින බව සංවර්ධන සේවා නිලධාරි සංගමය නිවේදනය කරයි.
මේ සම්බන්ධයෙන් ස්වදේශ කටයුතු රාජ්‍ය අමාත්‍යවරයාට ලිපියක් යවමින් එම සංගමය සඳහන් කරන්නේ කුලියාපිටිය බටහිර ප්‍රාදේශීය ලේකම් කාර්යාලයේ ජනවාරි 04 පැවති රැස්වීමකදී ආර්ථික සංවර්ධන නිලධාරියා අදහස් පළ කිරීමේදී මෙම සිද්ධියට මුහුණ දී ඇති බවයි.
2022 වර්ෂයට අදාළ රජයේ සංවර්ධන යෝජනා හා ජීවනෝපාය සංවර්ධනයගැන එම මන්ත්‍රීවරයාගේ ප්‍රධානත්වයෙන් එම රැස්වීම පැවැත්වී ඇති බවත් ජීවනෝපාය සංවර්ධනයට සුදුසු පුද්ගලයින් තෝරා ගැනීම ග්‍රාමීය කමිටු වලට පැවරිය යුතු බවට කළ අදහස් දැක්වීමකදී සංවර්ධන නිලධාරියාට මෙම සිදුවීමට මුහුණ පෑමට සිදුවී ඇති බවත් එහි වැඩිදුරටත් දැක්වේ.■
