ඉදිරි සතියේදී සිදුකෙරෙතැයි මේ වනවිට මත පළවී ඇති කැබිනට් මණ්ඩල සංශෝධනයේදී ශ්‍රී ලංකා නිදහස් පක්ෂයට ලබාදී ඇති අමාත්‍ය ධුර ඉවත් කෙරෙනු ඇතැයි එම පක්ෂය තුළම කතාබහට ලක්වෙමින් ඇත.
ආණ්ඩුවේ අභ්‍යන්තරයෙන් ලැබෙන තොරතුරු මත එසේ ශ්‍රී ලංකා නිදහස් පක්ෂ සාමාජිකයන් ඇමති ධුරවලින් ඉවත් කිරීමේ කතාබහ ඇති වී ඇත.
මේ සම්බන්ධයෙන් එම පක්ෂයේ ඉහළම නිලධාරියෙකුගෙන් කළ විමසීමකදී පැවසුවේ ඇමති ධුරවලින් ඉවත් කිරීම ගැන ලැබී ඇති තොරතුරු මත එවැනි කතාබහක් ඇති වී ඇති බවය. එමෙන්ම එම පක්ෂයේ කැබිනට් ඇමතිවරයකුට සම්බන්ධ සමීප නිලධාරියකුගෙන් කළ විමසීමකදී ඔහුද ප්‍රකාශ කළේ ඇමති ධුරයෙන් ඉවත් කිරීම ගැන එවැනි ආරංචියක් ලැබී ඇති බවය.
ඊට අමතරව මේ වනවිට ආණ්ඩුවට එරෙහිව එම පක්ෂයේ නායක මෛත්‍රීපාල සිරිසේන, සුසිල් ප්‍රේම්ජයන්ත මහතා ඉවත් කිරීම සම්බන්ධයෙන් දැඩි ප්‍රහාරයක් එල්ල කිරීමත්, පසුගිය කාලය පුරා ආණ්ඩුව විවේචනය කරමින් ඕනෑම අවස්ථාවක පක්ෂයේ තීරණය අනුව ආණ්ඩුවෙන් ඉවත් වීමට සූදානම් බව එම පක්ෂයේ අමාත්‍ය ධුර දරන්නන් ප්‍රකාශ කිරීමත්, සුසිල් ප්‍රේම්ජයන්ත මහතා රාජ්‍ය අමාත්‍ය ධුරයෙන් ඉවත් කිරීමට පෙර පැවති කැබිනට් මණ්ඩල සාකච්ඡාවේදී ප්‍රේම්ජයන්ත මහතාට මෙන්ම ආණ්ඩු විවේචනය කරන්නන්ට එරෙහිව ජනාධිපතිවරයා පළකර ඇති අදහස් මෙම කතාබහට හේතුවී ඇත.
ශ්‍රී ලංකා නිදහස් පක්ෂය ආණ්ඩුව තුළ කැබිනට් ඇමති ධුර දෙකක් හා රාජ්‍ය ඇමති ධුර තුනක් දරන අතර එම පක්ෂයට ආණ්ඩුව තුළ මන්ත්‍රීවරු 14 දෙනෙක් සිටිති. නිමල් සිරිපාල ද සිල්වා හා මහින්ද අමරවීර එම පක්ෂයෙන් කැබිනට් ඇමති ධුර දරන අතර දයාසිරි ජයසේකර, දුමින්ද දිසානායක හා ලසන්ත අලගියවන්න රාජ්‍ය ඇමති ධුර දරති.■
