මහා බැංකු අධිපතිවරයා සඳහන් කර ඇති ආකාරයට ශ්‍රී ලංකාවේ විදේශ විනිමය සංචිතය ඩොලර් බිලියන 3.1 දක්වා එක්වරම වැඩි වූයේ කෙසේදැයි පැහැදිලි කළ යුතු බව පාර්ලිමේන්තු මන්ත්‍රී ආචාර්ය හර්ෂ ද සිල්වා ප්‍රකාශ කරයි.
මෙතෙක් විදේශ විනිමය සංචිතයට විදේශ විනිමය ලැබෙන ආකාරය එම මුදල් ලැබුණු ආකාරයද සඳහන් කරමින් ප්‍රකාශයට පත්කළ බවත්, මෙම විදේශ මුදල් වැඩිවීම සම්බන්ධයෙන් මුදල් ලැබුණු ආකාරය පැහැදිලි කර නැති බවත්, විදේශ විනිමය සම්බන්ධයෙන් මෙම තත්වය හොරා පොලිස් සෙල්ලමක් නොවන බවත් ඔහු පැහැදිලි කරයි.
චීනයේ හුවමාරු ණය පහසුකම හෙවත් ස්වොප් යටතේ ලබාගත් ඩොලර් බිලියන 1.5කට ආසන්න මුදල මෙම වැඩිවූවා යැයි කියන විදේශ විනිමය ලෙස අනුමාන කරන බවත්, එහෙත් එම පහසුකම ඩොලර්වලට හැරවීමට හැකිද යන්න පැහැදිලිකමක් නැති බවත්, එය භාවිත කළ හැකි ආකාරය ගැන ශ්‍රී ලංකා මහා බැංකුව පැහැදිලි කළ යුතු බවත් ආචාර්ය සිල්වා වැඩිදුරටත් පැවසීය.
ඒ මහතා වැඩිදුරටත් පැවසුවේ ඩොලර් ස්වාභාවිකව ගලාඒමට අවශ්‍ය පරිසරය සැකසිය යුතු බවත්, ඒ සඳහා ඩොලරයට සාපේක්ෂව රුපියල යළි සකස් කළ යුතු බවත්ය. එමෙන්ම දැනට උද්ධමනයට වඩා පහළින් තිබෙන පොළී අනුපාතද වැඩි කළ යුතු බවය.■
