■ අමන්දිකා කුරේ
ඔබ කලාවට යොමු වුණේ කොහොම ද?
මට මම පොඩි කාලේ අවස්ථාවක් ලැබුණා සෝමරත්න දිසානායක අධ්‍යක්ෂණය කළ, රේණුකා බාලසූරිය නිෂ්පාදනය කළ සරෝජා චිත්‍රපටයේ චරිතයකට රංගනයෙන් සහභාගි වෙන්න. ඒ නිර්මාණයට අවුරුදු ගානකට පස්සේ නදී කම්මැල්ලවීර ‘සයපෙති කුසුම’ චිත්‍රපටයට මගේ නම යෝජනා කරනවා. මම වේදිකා නාට්‍යවලට සම්බන්ධ වෙන්නේ සෝමලතා සුබසිංහ මහත්මියගේ ප්ලේ හවුස් ආයතනයට සම්බන්ධ වෙලා. මම මුලින් ම ගියේ ‘හිම කුමාරි’ කියන වේදිකා නාට්‍යයට. ඒ විදිහට තමයි මම මේ දක්වා කලා ක්ෂේත්‍රයේ ඉදිරියට ආවේ.
ඔබ දැන් වේදිකා නාට්‍ය කිහිපයකටම සම්බන්ධ වෙලා ඉන්නවා. ඒ අත්දැකීම ගැන විස්තර කළොත්?
මම 2011 අවසාන කාලයේ තමයි සෝමලතා සුබසිංහ මහත්මියගේ ප්ලේ හවුස් ආයතනයට සම්බන්ධ වුණේ. ඇය හැම අවුරුද්දක ම අවසානයේ නාට්‍ය උළෙලක් කරනවා ලයනල් වෙන්ඩ්ට් රඟහලේ දී. ඒ නාට්‍ය උළෙලේ හිම කුමාරි නාට්‍යයට තමයි මුලින් ම සම්බන්ධ වුණේ. 2012 දී ”විකෘති” නාට්‍යයට මාව තෝරා ගත්තා. ‘පුංචි අපට දැන් තේරෙයි’ සහ ‘තොප්පි වෙළෙන්දා’ නාට්‍යයේත් රංගනයෙන් දායක වෙන්න ලැබුණා. මම වැඩි ප්‍රමාණයක් සම්බන්ධ වුණු නාට්‍ය සෝමලතා සුබසිංහ මහත්මියගේ නාට්‍ය. ඒ අතරේ ම චමිල ප්‍රියංකරගේ ‘මෙය තුවක්කුවක් නෙවෙයි’ නාට්‍යයටත් සම්බන්ධ වෙන්න ලැබුණා. පසුගිය දිනවල ප්‍රදර්ශනය කළ ‘සඟ වෙද ගුරු ගොවි කම්කරු’ චමිල ප්‍රියංකරගේ නාට්‍යටත් සම්බන්ධ වෙන්න ලැබුණා.
රංගනය සම්බන්ධයෙන් විවිධ ක්ෂේත්‍රවල ඔබට තිබෙන අත්දැකීම විස්තර කළොත්?
මම විශාල නිර්මාණ ප්‍රමාණයකට සම්බන්ධ වෙලා නැති නිසා මම සම්බන්ධ වුණු සියලුම නිර්මාණ මට මතකයේ රැඳිලා තියෙනවා. ඒ අතරින් එක නිර්මාණයක් තෝරාගෙන එය සුවිශේෂ නිර්මාණයක් කියන්න අමාරුයි. මම කරලා තියෙන්නේ ම මම කැමති නිර්මාණ විතරයි. ඒ නිස මම ඒවාට සහභාගි වුණෙත් ඉතාම කැමැත්තෙන්.
සරෝජා චිත්‍රපටයට මම සම්බන්ධ වුණේ කුඩා කාලයෙදිනේ. නමුත් මිනිස්සු මාව අඳුරගන්නේ සයපෙති කුසුම චිත්‍රපටය හරහා. මම සෑහෙන්න සතුටු වෙනවා මට තේරුමක් තියෙන කාලෙදි ලැබුණු පළවෙනි චිත්‍රපටයේ විසාකේස චන්ද්‍රසේකරම් වගේ අධ්‍යක්ෂවරයෙක් එක්ක වැඩ කරන්න ලැබීම ගැන. ඔහු ඉතාම හොඳ ඉතා ම දක්ෂ වෘත්තීය මට්ටමේ අධ්‍යක්ෂවරයෙක්. ඉතාම සුහදශීලීයි වගේ ම ලංකාවේ ගොඩාක් අයට වඩා වෙනස් විදිහට හිතන මනුස්සයෙක්. එවැනි පුද්ගලයෙක් සමග වැඩ කරන්න ලැබීමත් ඉතාම වටිනා දෙයක්.
මම රංගනයෙන් සම්බන්ධ වුණු ‘තාත්තා’ ටෙලිනාට්‍යයේ අධ්‍යක්ෂවරයා වුණේ ලලිත් රත්නායක මහතා. ඒ නාට්‍යයේ තේමාවත් මම ඒ නාට්‍යට කැමති වෙන්න එක හේතුවක්. ඒ වගේම ලලිත් රත්නායක කියන්නේ ඉතාම සාමකාමී පුද්ගලයෙක්. අපි රූගත කිරීම්වලට ගියාමත් ඒ ස්ථානවල වැඩත් හරිම සාමකාමී විදිහට වෙනවා. කිසිම කලබලයක් නැතිව. අපේ වැඩේ වෙනුවෙන් තමයි අවධානය දෙන්නේ. ඒ වගේ තැන්වල වැඩ කරන්න ආසයි. ඒ රූගත කිරීම අවසන් වෙනකොට හිතුණේ අයියෝ අපරාදෙ ඉවර වුණේ, මේ දවස් ගාන ගෙවිලා ගියා තේරුණේවත් නෑ වගේ හැඟීමක්.
ඒ වගේ ම මම සෝමලතා සුබසිංහ මහත්මියගේ නාට්‍යවල රඟපාන්නේත් ඒවා මම කැමති විදිහේ නිර්මාණ නිසා. මම දකින්නේ වේදිකාව කියන්නේ රංගනය ගැන ඉගෙන ගන්න පුළුවන් තැනක් විදිහට.
මම මෙගා ටෙලිනාට්‍ය වගේ ඒවාට නම් සම්බන්ධ වෙලා ම නෑ. මම වැඩ කරපු නිර්මාණවලින් මම මොනවාහරි දෙයක් ලබාගෙන තියෙනවා. ඒවායින් මට හොඳ දැනුමක් ලැබුණා.
ඔබ නිර්මාණයකට සම්බන්ධ විමේ දී නිර්මාණ තෝරා ගැනීමක් කරනවාද?
මගේ පෙනුමත් එක්ක මට බොළඳ චරිත වගේ ඒවා එන්නෙත් නෑ. ඒ වගේම මෙගා ටෙලිනාට්‍ය එන්නෙත් නෑ. මෙගා ටෙලි නාට්‍ය කිහිපයකට සම්බන්ධ වෙන්න ආරාධනා ලැබුණා. කතාව මොකක්ද කියලා අහන්නේවත් නැතිව මම ඒවා ප්‍රතික්ෂේප කරලා තියෙනවා. ඒකට හේතුව තමයි උදේ වැඩට ගිහින් හවසට එන රස්සාවක් වගේ මම රංගනය කරන්න කැමති නෑ. ඒ නිසා කලාතුරකින් වුණත් ලැබෙන නිශ්චිත කොටස් සංඛ්‍යාවක් තියෙන නිර්මාණයකට සම්බන්ධ වෙන එක මට වටිනවා. මේ වගේ සිදුවීම් ඇරෙන්න වෙනත් තෝරාබේරා ගන්න තරම් නිර්මාණ වලට මට ආරාධනා ලැබිලා නෑ.
විවිධ තලවල චරිත නිරූපණය කිරීමේ දී ඒ චරිතවලට ඇතුල් වෙන්නේ කොහොමද?
මුලින් ම ඒ ඒ නිර්මාණවල අධ්‍යක්ෂකවරු එයාලාට අවශ්‍ය දේ කියනවා. ඒ අදහසත් මම සැලකිල්ලට ගන්නවා චරිතයක් නිරූපණය කිරීමේ දී. ඒ වගේම මම අනිවාර්යයෙන් ම නිර්මාණයට සහභාගි වෙන්න කලින් පිටපත ඉල්ලා ගන්නවා. පිටපත අවබෝධ කරගැනීමෙන් ඒ ඒ චරිත නිවැරදිව නිරූපණය කරන්න පුළුවන් කියලා මම හිතනවා. පිටපත ලැබුණාම මට පුළුවන් ඒ වැඩේට යන්න කලින් ඊට සූදානම් වෙන්න.
නමුත් දැන් මට නිර්මාණයකට ආරාධනාවක් ලැබුණොත් ඒ නිර්මාණවල අධ්‍යක්ෂවරුන්ගේ ආකල්ප සම්බන්ධයෙන් මම සැලකිලිමත් වෙනවා. මට හිතුණොත් යම් නිර්මාණයක අධ්‍යක්ෂවරයාගේ ආකල්ප සහ මගේ ආකල්ප ගැළපෙන්නේ නෑ කියලා, මම ඒ නිර්මාණයට සම්බන්ධ නොවේවි.
කෙටි චිත්‍රපටයක ඉතා කුඩා කාලයකින් සමාජයට පණිවුඩයක් දෙන එක අභියෝගයක් ද?
මට හිතෙන විදිහට කෙටි චිත්‍රපට කියන්නෙත් රංගනය ගැන ඉගෙන ගන්න පුළුවන් තැනක්. මට ඒ වගේ වැඩ ලැබුණු අවස්ථාවල මම ඒවා ඉතා ම කැපවීමෙන් කරලා තියෙනවා. කෙටි චිත්‍රපට වුණත් දිගු චිත්‍රපට වුණත් මට පුළුවන් ඒවාට හැඩගැහෙන්න ඒ ඒ නිර්මාණ වලදී. ලංකාවේ දීර්ඝ චිත්‍රපට කරන්න ටිකක් අමාරුයි ගොඩාක් අයට. අනාගතයේ අධ්‍යක්ෂවරයෙක් වෙන්න ඉන්න කෙනෙක්ට හෝ නිර්මාණයක් සමාජයට ඉදිරිපත් කරන්න පුළුවන් කෙනෙක්ට කෙටි චිත්‍රපට කියන්නේ ගොඩක් හොඳ අවස්ථාවක්. සමාජයේ ලොකු ප්‍රේක්ෂකයන් පිරිසක් අතරට යන නිර්මාණයක් නෙවෙයි කෙටි චිත්‍රපට කියලා කියන්නේ. ලංකාවේ දැනට හැදෙන කෙටි චිත්‍රපට හැම එකම වගේ ම යම්කිසි අර්ථවත් දෙයක් ඒ තුළින් ඉදිරිපත් කරලා තියෙනවා. කතාබහට ලක් කරන්න පුළුවන් නිර්මාණ තියෙනවා.
පසුගිය දිනවල ඔබ සම්මානයට පාත්‍රවුණා.
මම 2011 සිට වේදිකා නාට්‍ය කළාට ගිය අවුරුද්දේ පළමු වතාවට තමයි මම කෙටි නාට්‍යයකට සම්බන්ධ වුණේ. ඒ යොවුන් නාට්‍ය උළෙලේ. ඒ නාට්‍යයට මට හොඳම සහාය නිළියට හිමි සම්මානය ලැබුණා. ඒ වගේම කෙටි චිත්‍රපට අංශයේත් මමත් රන්දික ගුණතිලකත් හොඳම නළුවා සහ නිළියට හිමි සම්මාන හිමිකරගත්තා.
ඉදිරි කලා නිර්මාණ මොනවා ද?
පසුගිය කාලේ මම සම්බන්ධ වුණු නිර්මාණ ඔක්කොම විකාශය වුණා. ටෙලිනාට්‍යයකට ආරාධනා ලැබිලා තිබෙනවා. එහි රූගතකිරීම්වලට මම ජනවාරිවල සම්බන්ධ වෙනවා. ඊට අමතරව අලුත් වේදිකා නාට්‍යයකටත් සම්බන්ධ වෙමින් ඉන්නවා. මේ නිර්මාණ ඉදිරියේදී විකාශය වෙයි. ■
