■ ඇන්තනී වෙරංග පුෂ්පික
උද්ගතවෙලා තියෙන ආර්ථික දේශපාලන අර්බුදය කොහොමද දකින්නෙ?
රටේ ඇතිවෙලා තියෙන දේශපාලන, ආර්ථික අර්බුද සියල්ලම කොරෝනා නැමති අමුඩෙන් වහන්න හදන ආණ්ඩුවේ හෙළුව බවට පත් කරගන්නයි ආණ්ඩුව හදන්නේ. මේ ඇතිවෙලා තියෙන අර්බුද ඇති වුණේ කිසිසේත්ම කොරෝනා වසංගතය නිසා නෙමෙයි. ආණ්ඩුව 20 වන සංශෝධනය ගෙනල්ලා ඇති කළ දේශපාලන අර්බුදය කොරෝනා නිසා ඇති වෙච්ච එකක් නෙමෙයි. රටේ සම්පත් විකිණීම නිසා ඇති කරලා තියෙන රටේ ආරක්ෂාව පිළිබඳ ප්‍රශ්නය කොරෝනා නිසා ඇති වුණ අර්බුදයක් නෙමෙයි. එල්.එන්.ජී ඒකාධිකාරය ඇමරිකානු තනි සමාගමකට දෙන්න කටයුතු කිරීම නිසා ඉදිරියේදී සිදු වෙන්න නියමිත අර්බුදය ආණ්ඩුවේ අත්තනෝමතික තීරණ නිසා ඇති කළ තත්වයක්. ඒ වගේම ලංකාවේ ආර්ථිකය කළමනාකරණය කොරෝනා වසංගතයත් සමග ගත යුතු ක්‍රියාමාර්ග පිළිබඳව ගැඹුරු සවිඥානිකත්වයකින් තොරව ක්‍රියාමාර්ගවලට පිවිසීම තුළ ආර්ථිකයට ඇතිවෙලා තියෙන වින්නැහිය ආණ්ඩුව හිතාමතාම නිර්මාණය කළ තත්වයක්. මේ ආණ්ඩුවේ කඩිමුඩි දඩිබිඩි තීරණ නිසා සමස්ත කෘෂිකර්මාන්තයට ඇති කළේ මකන්න බැරි අර්බුදයක්.
රට මෙවැනි අර්බුදයකට ගිහින් තියෙන මොහොතක අවශ්‍ය පිල් බෙදාගෙන ගහමරා ගන්නවා වෙනුවට ඔක්කොම එක අරමුණක් ඇතිව මේ අර්බුදයෙන් රට ගලවා ගැනීමට වැඩ කරන එක නේද?
විපක්ෂයේ ප්‍රධාන පක්ෂය විදියට අපි ඒ වෙනුවෙන් ඉන්නවා. ඒකෙ කිසිම ගැටලුවක් නැහැ. හැබැයි ආණ්ඩුව එහෙම තැනක නැ. විපක්ෂය විදියට අවස්ථා ගණනාවකදීම අපි ආණ්ඩුවට කිව්වා මේ කාරණාවෙදි පොදු එකඟතාවයකින් කටයුතු කරමු කියලා. නමුත් ආණ්ඩුවට එහෙම දෙයක් අවශ්‍ය නෑ. මේ නිසා අපි විපක්ෂයේ ප්‍රධාන පක්ෂය හැටියට අනෙකුත් විපක්ෂයේ කණ්ඩායම් ඒකරාශි කරගෙන ජනතා අරගලය වෙනසක් නැතිව ඉදිරියටම අරගෙන යනවා.
2022 අයවැය තුන්වන වර කියවීමේදී ආණ්ඩුවට පක්ෂව ඡන්ද 157 ක් හිමි වුණා. ආණ්ඩුව දුර්වලයි කිව්වාට විපක්ෂය තමයි ඇත්තටම දුර්වල වෙලා තියෙන්නේ.
ඒක පට්ටපල් බොරුවක්. ආණ්ඩුව කොයි විදියටද ඔය ඡන්ද 157 හදා ගත්තේ කියන කාරණය මුළු රටම දන්නවා. මේ ඡන්ද ප්‍රමාණය හදා ගත්තෙ කෘත්‍රිමව. මීට වැඩිය ශක්තිමත්ව ඡන්ද 12ක් ගත්ත ආණ්ඩුවක් තමයි 2015 ජනවාරි 8 වෙනිදා ගෙදර යැව්වෙ. එදා තිබුණෙ මීටත් වැඩිය දුර්වල විපක්ෂයක්. ආණ්ඩුව ශක්තිමත් කියලා පේන්නෙ මීට අවුරුදු දෙකකට කලින් ජනතාව රවට්ටලා ගත්ත ඡන්දවල ප්‍රතිඵලයක් විදියට. මේ මොහොතේ ආණ්ඩුවට ඒ සඳහා ජනතා අනුමැතියක් නෑ කියන කාරණය බලා ගන්න ඕන නම් ආණ්ඩුව මැතිවරණයකට යා යුතුයි. ආණ්ඩුව මැතිවරණවලට යන්නෙ නැත්තෙම ඒ සඳහා තිබෙන බය නිසාමයි.
දවස් කිහිපයකට කලින් පාර්ලිමේන්තුවේ වාර අවසානය කිරීම සිදු කළා. මේක පිටිපස්සෙ තියෙන දේශපාලනික කාරණාව මොනවගේ එකක් ද?
පාර්ලිමේන්තු වාර අවසන් කිරීම පිටිපස්සෙ දේශපාලනික කාරණා ගණනාවක්ම තියෙනවා. එකක් තමයි ආණ්ඩුවට නොගැළපෙන අණ පනත් ටික අහෝසිකර ගැනීම. හරි නම් පාර්ලිමේන්තුව කැඳවන්න තිබුණෙ ජනවාරි 04 වෙනිදා. නමුත් පාර්ලිමේන්තුවේ වාරය අවසන් කරලා කල් තැබීම පිටිපස්සේ තියෙන්නේ ආණ්ඩුව ඇතුළේ තියෙන අර්බුද, ඒ වගේම එල්.එන්.ජී බලාගාරය පිළිබඳ හෙළිදරව් වීම. මේ අර්බුද සියල්ල සම්බන්ධයෙන් කල් මැරීමේ ප්‍රතිපත්තියක් තමයි පෙනෙන්නට තියෙන්නේ.
එල්.එන්.ජී ගිවිසුමේ ගැටලුව සම්බන්ධයෙන් තිබෙන අනතුරෙන් රට ගලවාගන්න සමගි ජන බලවේගය විදිහට සිදු කරන මැදිහත්වීම ප්‍රමාණවත් කියලා හිතනවාද?
ඉතාම පැහැදිලිව අපි මේ ප්‍රශ්නයට මැදිහත් වෙනවා. ඒ වගේම ක්‍රියාමාර්ග ගන්නවා. එක මොහොතක විරෝධතා කරන්න පුළුවන් කාරණා ගණනාවක් තියෙනවා. ගොවියන් සමග සිදු කරන ගොවි උද්ඝෝෂණවලදී පවා මේ කාරණාව අපි මතු කරනවා. අපේ සෑම විරෝධතාවකදීම මේ ප්‍රශ්නය කතා කරනවා. මේ ප්‍රශ්නය ගැන විතරක් නෙමෙයි යෝජිත ත්‍රිපිටක පනත පිළිබඳව පවා අපි කතා කරනවා. ඒ වගේම තමයි මේ මොහොතේ අපි ගන්න සියලුම ක්‍රියාමාර්ග මාධ්‍යයේ කතා කරන්නේ නෑ. අපි සතියකට සැරයක් අපේ කළමනාකරණ කමිටුව සහ සියලුම කණ්ඩායම් රැස්වෙලා කරන්න පුළුවන් සියලුම ආකාරයේ මැදිහත්වීම් සම්බන්න්ධයෙන් ගන්න තියෙන සියලුම ක්‍රියාමාර්ග පිළිබඳව සැලසුම් කරලා ඒ සඳහා ක්‍රියාත්මක වෙනවා.
ගෑස් පිපිරීම් සම්බන්ධයෙන් තවමත් ආණ්ඩුවට හරිහමන් විසඳුමක් දෙන්න බැරි වෙලා තියෙනවා.
ආණ්ඩුව ගෑස් පිපිරීම් සම්බන්ධයෙන් විතරක් නෙමෙයි අනිත් සියලුම කාරණාවලටත් උත්තර නැතිව අසමත් වෙලා තියෙනවා. පහු ගිය දවස් තුනේම විපක්ෂ නායකතුමා දිගින් දිගටම ඒ සඳහා පියවර ගන්න කියලා පෙන්නලා දුන්නත. කිසිම විසඳුමක් මේ වෙනකන් දීලා නෑ. ඒ වගේම අපිට බරපතළ සැකයක් තියෙනවා මේ ගෑස් සමාගම් දෙකම පල්ලෙහාට දාලා අලුත් ගෑස් සමාගමක් ගෙන ඒමේ කුමන්ත්‍රණයක් දියත් වෙනවාද කියන කාරණය. අනිත් කාරණය තමයි ඩොලර් හිඟය නිසා පුළුවන් තරම් ගෑස් පරිභෝජනය අවම කරන්න කටයුතු කරනවාද කියන සැකයත් මතු වෙනවා.
ප්‍රතික්ෂේප වෙච්ච චීන පොහොර නැවට පොහොර වටිනාකමෙන් 70%ක මුදලක් ගෙවන්න ආණ්ඩුව තීරණයක් අරගෙන තියෙනවා. නමුත් රසායනික පොහොර තහනම නිසා ගොවියන්ට සිදු වෙච්ච වගා හානියට වන්දි මුදලක් හෝ ලබා දෙන්න කටයුතු කරන්නෙ නැහැ.
ආණ්ඩුව මේ වෙනකන් පෙනී හිටියෙ ගොවියාගෙ පැත්තෙ නෙවෙයි. කෘෂිකර්ම විශේෂඥයන් ගත්ත තීරණවලදීත් අපිට ඒක පෙනුණා. පැහැදිලිවම මේ වෙලාවෙ තේ වගාවට මකන්න බැරි පාඩුවක් වෙලා තියෙනවා. ලෝකයේ තේ කර්මාන්තයෙන් අපි හිටියෙ 4 වන තැන. නමුත් මේ වෙනකොට තුර්කිය සහ වියට්නාමයත් අපිව පහුකරගෙන ගිහිල්ලා අපි 6 වන තැනට වැටිලා තියෙනවා. ඒ වගේම තමයි එළවළු ගොවියා වී ගොවිතැනේ ඉන්න ගොවියා, කුරුඳු ගොවියා මේ සියලුම ගොවියන්ව නැත්තටම නැති කරලා තියෙනවා. මේ ආණ්ඩුව පොඩි මිනිහාගෙ කර මතින් බොරු කියලා බලයට ඇවිල්ලා කොම්පැනිකාරයෝ සහ ජාවරම්කාරයෝ රකින්න කටයුතු කරනවා.
මේ වෙන කොට කෘෂිකර්මාන්තය නගා සිටවන්න කියලාත් හමුදාව මැදිහත් කරගෙන තියෙනවා. මේ තත්වය කොහොමද දකින්නෙ?
හමුදාපතිවරයා සම්බන්ධයෙනුත් හමුදාව සම්බන්ධයෙනුත් මට විශාල ගෞරවයක් තියෙනවා. නමුත් මේ ආණ්ඩුව තමන්ගේ නොහැකියාවන් වහගන්න හැම දේකටම හමුදාපතිවරයාව පාවිච්චි කිරීමෙන් කෙළවර වෙන්නෙ එතුමාගේ ගෞරවය විතරක් නෙමෙයි, සමස්ත හමුදාවෙම ගෞරවය තමයි ජනාධිපතිතුමා විනාශ කරමින් ඉන්නෙ.
මේ ඇතිවෙලා තියෙන අර්බුදකාරී වාතාවරණයත් සමඟ තවත් අවුරුදු 3ක් මේ ආණ්ඩුවට ගමන් කරන්න පුළුවන් වෙයි කියලා හිතනවාද?
ආණ්ඩුවට අවුරුදු 3ක් නෙමෙයි මේ මොහොතෙ කළ යුත්තේ මොකද්ද කියන එකවත් හිතාගන්න බැරිව ඉන්නේ. රටේ අර්බුද කළමනාකරණය කිරීමේදී විපක්ෂයේ භූමිකාව අපි වගකීම් සහගතව ඉෂ්ට කරනවා. ඒ වගේම තමයි අපි කඩිකුලප්පුව හැදුණා වගේ ආණ්ඩු හදන තැනක නැහැ. ජාතික මැතිවරණයකින් ජනතා පරමාධිපත්‍යයට ගරු කරමින් ජන සම්මතව අපි බලය ගන්න අවශ්‍ය සැලසුම් සකස්කරමින් කටයුතු කරමින් ඉන්නේ.
නමුත් සමගි ජන බලවේගයට එකතුවුණ ප්‍රාදේශීය මන්ත්‍රීවරුන් එකා දෙන්නා ඉවත් වෙලා එක්සත් ජාතික පක්ෂයට හේත්තුවෙන තත්වයක් තමයි පෙනෙන්නට නම් තිබෙන්නේ..
පළාත් පාලන මන්ත්‍රීවරු සියලුදෙනාම පත්වෙලා තියෙන්නේ එක්සත් ජාතික පක්ෂයෙන්. එක්සත් ජාතික පක්ෂය ඒ මන්ත්‍රීවරුන්ට විනය පරීක්ෂණ කැඳවලා තියෙන්නේ. ඒ මන්ත්‍රීවරු විනය පරීක්ෂණ සඳහා මුහුණ දෙන්න ගියාම ඒ මිනිස්සුත් එක්ක ෆොටෝ එකක් ගහලා ඒ ෆොටෝ එක පෙන්නලා කියනවා මෙන්න සමගි ජන බලවේගයත් එක්ක හිටපු මන්ත්‍රීවරු එක්සත් ජාතික පක්ෂයට එකතු වුණා කියලා. මේවා මාධ්‍ය සංදර්ශන විතරයි.
රට මුහුණ දීලා තියෙන අර්බුදයට විසඳුමක් විදියට කෙටි කාලීනව ආණ්ඩුවට කරන්න තියෙන යෝජනාව මොකද්ද?
අපි කියන්නෙ වහාම මේ ආණ්ඩුව ජාත්‍යන්තර මූල්‍ය අරමුදලත් එක්ක සාකච්ඡා කරන්න ඕනෑ කියන දේ. නමුත් ආණ්ඩුව ඒකට සූදානම් නැහැ. ආණ්ඩුව ඒ කාරණයට අකමැති වෙන්න ප්‍රධාන හේතුව තමයි ඊට පස්සෙ ආණ්ඩුවට ඕනෑ විදියට පිස්සු නටන්න බැරි වෙන එක.
අවසාන වශයෙන් මේ දවස්වල ඔබගේ දිස්ත්‍රික්කය ඇතුළේ සිදු කරන දේශපාලන කටයුතු ගැන කතා කළොත්.
මාතර දිස්ත්‍රික්කයේ සමගි ජන බලවේගයේ දිස්ත්‍රික් නායකයා විදිහට මාතර දිස්ත්‍රික්කයේ සෑම මැතිවරණ කොට්ඨාසයකම ශක්තිමත් දේශපාලන ව්‍යාපාරයක් විදිහට ගොඩනගන්න මම නියෝජනය කරන අකුරැස්ස ආසනය ඇතුළු සියලුම ආසනවලට හැකියාව සහිත පුද්ගලයන් පත් කරලා කෙටි කාලීන, මධ්‍ය කාලීන සහ දිගු කාලීන සැලසුම් සකස් කරලා, ක්‍රියාවට නංවමින් සිටිනවා.■
