ලංකාවේ නම් දරාපු දේශපාලනඥයන් බොහෝ දෙනෙකුට බලය භුක්ති නොවිඳ ජීවත් වෙන්නට බැරි තත්වයකි විද්‍යමාන වන්නේ. දේශපාලන බලය භුක්ති විඳීමට පර්යාය කියමන හරි හම්බ කර ගැනීම ය. අප කුඩා කාලයේ ඇසුවේ දේශපාලනයට යන්නා හිඟමනට වැටෙනවා යන කියමනය. එහෙත් අද දේශපාලනය යනු සාර්ථක ව්‍යාපාරයකි. එබැවින් මොන විදිහේ සෙප්පඩ විජ්ජාවකින් හෝ රාජ්‍ය බලය භුක්ති විඳීමට පිඹුරු පත් සැකසීමට ජ්‍යෙෂ්ඨ දේශපාලනඥයන් පිරිසක් දිවා රෑ නොතකා මහන්සි වෙන බව මේ වන විට කුප්‍රකට රහසකි.
ජාතික ආණ්ඩුවක් උවමනා කරන්නේ රට පත්ව තිබෙන උගුලෙන් රට බේරාගන්නට ද? නැත. ආර්ථිකය ශක්තිමත් කරන්නට ද? නැත. ජාතික සමගිය ප්‍රතිෂ්ඨාපනය කිරීමට ද? නැත. එහෙනම් කුමට ද? ඒ ප්‍රශ්නයට පැහැදිලි පිළිතුරක් අවශ්‍ය නම් යෝජනාවේ සැබෑ මොළකරු තේරුම් ගත යුතු ය. සැබෑ ම මොළකරු බැසිල් රෝහණ රාජපක්ෂ මිස වෙන කෙනෙක් නොවේ. ඔහුට ජාතික ආණ්ඩුවක් අවශ්‍ය කුමට ද? නෞකාව මූදු බත් වන එක වළක්වා ගන්නටය.
බැසිල් රෝහණ රාජපක්ෂ සෙල්ලිපි භාෂාවෙන් අයවැය කියෙව්වත් දේශපාලන වැඩ බිමේ සූදු කෙළින්නේ පැණි බේරෙන නිරවුල් භාෂාවෙනි. දේශපාලන වැඩ බිමේ නම් දරා සිටින කාගේත් යට ඇඳුම්වල මිම්මට ඒවා මසා සුදුසු විදිහට අන්දවන්නට ඔහු ගජ සමතෙකි. පොහොට්ටු ලේකම් ටයිකෝට් ඇඳගෙන සුළු පක්ෂවලට කෝචොක් කරන්නේ, යනවානං යන්නකො ඔහෙලා කියා රෙඩි මේඩ් වැකිවලින් පුන පුනා නිතරම කියන්නේ බැසිල් රෝහණ නමැති හාම්පුතාගේ උපදෙස් පරිදි මිස ඔහුගේ ලේකම් පිරුවටයේ හයියෙන් නොවන බව නොරහසකි. මේ වන විට සුළු පක්ෂ නායකයන්ව පමණක් නොව සිරිසේනවත්, බැසිල් රෝහණ රාජපක්ෂ බිත්තියටම හේත්තු කර අවසන්ය. ඉතින් ප්‍රාණයත් – බලයත් වෙනුවෙන් ජාතික ආණ්ඩුව අහෝ සැපයි නොකියා කොහොමද?
මඟුලට කලින් හනිමූන් යාම
ගෝඨාභය රාජපක්ෂට පීඩනය දරා ගත නොහැකිව උන් හිටි ගමන් රහසේම මව් රටට ගියහොත් මේ ආණ්ඩුවට පැවැත්මක් නැත. එයා ගියාට කමක් නෑ මහින්ද රාජපක්ෂ ඉන්නවා කියා කටමැත දෙඩුවත් ආණ්ඩුවට ඉදිරි පැවැත්මක් නැත. එහෙත් සරලව කියනවා නම් මේ ආණ්ඩුව ජන වරමට අදාළ කාලය පවතිනු ඇත. මුළු රටම පාරට බැස්සත් රාජපක්ෂලා කාලය ඉවර වෙනතුරු බලය අත හරින්නේ නැත. හරි හම්බ කිරීම තවත් වේගවත් කරමින් උපරිම ඵල නෙළාගනු ඇත. එළඹෙන හැම මැතිවරණයකින්ම තමන් පරදින බව හොඳටම දන්නේ ඔවුන් නිසා ඉදිරියට තිබෙන හැම දවසක්ම ඔවුන්ට වැදගත් ය.
එළඹෙන මැතිවරණයේ දී රාජපක්ෂවරුන් මොන උත්සාහයක් ගත්තත් රනිල් වික්‍රමසිංහට ජනාධිපති වෙන්නට ජන වරමක් ලැබේ යයි සිතන්නට සාධක දැනට මහ පොළොවේ නැත. සමහර විට පොහොට්ටුවෙන් අපේක්ෂකයෙකු ඉදිරිපත් නොකළ හොත් හෝ දිනේෂ් ගුණවර්ධන වැනි කෙනෙකු ඉදිරිපත් කළ හොත් රනිල්ගේ බඹරේ කැරකෙන්නට තිබෙන ඉඩ වැඩි ය.
මේ හැම කාරණයක්ම බලය අතට ගන්නේ කොයි මොහාතකදැයි සිහින දකින දේශපාලනඥයන්ට තද සිත් වේදනා ඇති කර තිබෙනවා විය යුතු ය. සිරිසේන සහ ගෝඨාභය අතර විශ්වාසය බිඳී යාම හේතුවෙන් තමන්ට අත්විය හැකි ඉරණම ගැන සිරිසේන ද භීතියකින් පෙළෙනවා වන්නට පුළුවන. බැසිල් ශ්‍රීලනිපය නටවන්නේ ලොකු තුරුම්පුවක් අතේ තියාගෙනය. අනෙක් පැත්තෙන්, ජනාධිපතිවරණයේ දී රාජ්‍ය බලය පරිහරණය වැදගත්ය යන අවබෝධයෙන් මඬනා ලද රනිල් වික්‍රමසිංහත් ජාතික ආණ්ඩුවකට කැමති වන්නට පුළුවන. සමහර විට ඔහු සහ බැසිල් මේ වන විට එක මේසයක වාඩි වී ජාතික ආණ්ඩුව සැලසුම් කර අවසන් වෙන්නටත් පුළුවන.
මොන මොන දේවල් තිරය පිටුපස සිද්ධ වුණත් බලහත්කාරයෙන් ආණ්ඩුවක් පිහිටුවන්නට බැරි බැවින් සිදුවිය හැකි අනතුරු අවම වශයෙන් ඇතිවන, බලය පරිහරණය කරන්නට ඉක්මන් අවස්ථාව ලෙස සලකා ‘එජාප – ශ්‍රීලනිප‘ කඳවුරු දෙකේම වියපත් ජ්‍යෙෂ්ඨ දේශපාලනඥයෝ ජාතික ආණ්ඩුවක් වෙනුවෙන් එක කුඩයක් යට සිට ගන්නට ලෑස්ති වෙති. හේතුව ගතවෙන හැම දවසක්ම ඔවුන්ගේ වයසින් අඩු වෙන බැවිනි.
මේ ආණ්ඩුවට පරාද වෙන්නට ඉඩ හැර ශක්තිමත් බලවේගයක් ලෙසින් එළඹෙන ජනාධිපතිවරණයේ දී බලය ලබා ගැනීමට තිබෙන අවකාශය ඉතා පැහැදිලි ය. ඒ වූ කලී මංගල උත්සවය කිසිම අඩුවකින් තොරව පවත්වා එක වහලක් යට ජීවිතයක් පටන් ගැනීමට තිබෙන හැකියාව හා සමානය. එහෙත් පොඩි කාලයක් ඉවසා නොසිට දෙපාර්ශ්වයට රහසින් ජෝඩුව හනිමූන් යන්නට ලෑස්ති වන්නේ ඇයි?
රහස කුමක් ද?
ජාතික ආණ්ඩුවක් හැකි ඉක්මනින් පිහිටුවා ගතහොත් වැඩේට අවතීර්ණව සිටින ජ්‍යෙෂ්ඨ දේශපාලනඥයන් කිහිප දෙනාට හොඳම අමාත්‍ය පදවි හිමි වෙයි. මහින්ද රාජපක්ෂ අගමැති පදවියෙන් ඉල්ලා අස්වී ප්‍රාණ මිත්‍ර රනිල්ට අගමැති පදවිය ලබා දෙනවා නම් ගොඩේ ගොඩ ය. ආර්යාව ඊට කිසි ලෙසකින් කැමති වේ යයි සිතිය නොහැකි මුත් සිදු විය නොහැකි දේ සිදු වෙන බව අපි දනිමු. ආර්යාවටත් ඥාති මිත්‍ර රනිලුන් කළ සේවාව අමතක කර දමන්නට අසීරුය. පවුල පිටින්ම හිරේ නොගියේ මේ සුමිතුරු – ඥාතියා නිසා බව කාටත් වඩා දන්නේ ඔවුන්ම යැ.
ගත වෙන හැම දවසකම ආණ්ඩුව තව තවත් පහළටම රූටන බව දැන දැනත් ජාතික ආණ්ඩුවක් හදාගෙන ඇමතිකම් ලබාගෙන හරි හම්බ කර ගත හැකි වෙතත් ඉන් රටේ අනාගතය එහෙම පිටින්ම විනාශ වනු ඇත. ජාතික ආණ්ඩුවට පේවී සිටින ජ්‍යෙෂ්ඨ දේශපාලනඥයන්ට ඒ ගැන ප්‍රශ්නයක් නැත. ඊට අදාළ තව වැදගත් හේතුවක් තිබේ. ඒ කුමක් ද? මේ ජ්‍යෙෂ්ඨයන් සියලු දෙනාගේම දේශපාලන අනාගතය හරි ඉක්මනින් අවසන් වෙන ලකුණු පහළව ඇත. ඇතමෙකුට ජනවරමක් ලබන්නටම අපහසුය. තවත් අය මැතිවරණයක් එක්ක ඔට්ටු වෙන්නට අපහසු තත්වයකය. ජ්‍යෙෂ්ඨයන් හුඟ දෙනෙකු බලය භුක්ති වින්දේ තනිවම නොවන බව කිව යුතු නැත. රජ පවුල සේම පවුල් පිටින් බලය භුක්ති විඳි උදවියගේ බඩගිනි මේ වන විට හොඳටම වැඩි තිබෙනවා විය යුතුය.
ජාතික ආණ්ඩු කුමන්ත්‍රණය තුළ තිබෙන බරපතළම කාරණාව නම් එළඹෙන ජනාධිපතිවරණයට ශක්තිමත් බලවේගයක් ගොඩ නැගෙන එක වළක්වන්නට බැරි තත්වයක් තිබීම ය. ඒ බලවේගය තුළ ඇතැම් ජ්‍යෙෂ්ඨයන්ට තැනක් හෝ හඬක් නැත. ජනතාව ඉදිරියට යන්නට ශක්තියක් තිබෙන හැම දේශපාලනඥයෙකුම විනිවිද දකින සන්දර්භයක් තුළය ජනතාව ඒකරාශී වන්නේ. මිනී මරුවත් – හොරකම් කළත් ඒ සියල්ලට තිත තබා වෙනස්ම ගමනක් යනු ඇත, සිස්ටම් චේන්ජ් කරනු ඇත, චෞරයන් පවුලෙනුත් අතුගානු ඇත, යනාදි සිහින සියල්ලම බිඳ වැටීම රටට උගන්වා ඇති පාඩම බරපතළ ය. තව දුරටත් හොර පාරවල්වලින් ජන විඥානය දූෂණය කොට ජන වරමක් කොල්ලකෑමට තත්වයක් ඉදිරි වසර එක හමාර ගත වන විට නැත්තටම නැති වී යනු නියතය. නොසිතූ විරූ අන්දමට ජනතාව ශක්තිමත් බලවේගයකට ඒකාරාශී වන තත්වයක් තිබේ. ජන මනස හැඩගැහෙමින් පවතින්නේ ඉතිහාසයේ කවරදාටවත් වඩා වෙනස්ම රිද්මයකට ය.
මර්දනය සහ ජාතික ආණ්ඩුව
ගෝඨාභය රාජපක්ෂට ඉදිරියේ දී කළ හැකි එකම කටයුත්ත – ඔහු අත තිබෙන එකම බර අවිය මර්දනය උපරිමයට පත් කිරීම ය. එහෙත් බැසිල්-මහින්ද යන දේශපාලනඥයන් දකින්නේ මර්දනය නොව විසඳුම, ජාතික ආණ්ඩුවකින් පැවැත්ම ආරක්ෂා කර ගැනීම බව ය.
බැසිල් – ජයසුන්දර නුවණ මේ වන විට කළ දේ හා තව ඉදිරියට සිදු වන දේ නිසා රටේ ජන ජීවිතය එහෙම පිටින්ම අවුල් වී යන තරමට ජනතා විරෝධය මතු වනු ඇත. තව කොරෝනා වටයක් කැන්දා ගතහොත් විනා ජනතා විරෝධයන් මැඬලීමට පුළුවන්කමක් නැත. ජාතික ආණ්ඩුවක් අටවා ගත හොත් සියලු පව් බේරුවල් බොක්කට සේ ජාතික ආණ්ඩුවට හිලව් කොට පවතින්නට පුළුවන් බව බැසිල් කල්පනා කළා විය හැකිය. මර්දනය පහසුම විසඳුම නොවන බව අද වන විට ගෝඨාභය ද තේරුම් ගෙන තිබෙනවා විය යුතුය. ජාතික ආණ්ඩුවක් අටවා ගතහොත් ඉදිරි කාලය තමන්ට සැනසිල්ලේ ගත කර මව්බිම කරා පිටත්ව යා හැකි යයි ඔහුට වැටහහෙනු ඇත.
බැසිල්ගේ ඉන්දියානු සංචාරයෙන් පසුව දෙමළ ජාතික සන්ධානයේ ප්‍රබලයන් ඉන්දියාවට යනු ඇත. නැතහොත් අගමැති මෝඩි ඔවුන් කැඳවනු ඇත. දේශ ප්‍රේම වස්තරය ගලවා දැමීමට මහින්ද නොසතුටු නිසා ජාතික ආණ්ඩුවට සිදු වන – සිදුවිය හැකි සියල්ලට කර ගැසීමට සිදු වනු ඇත. මෙහිදී වැදගත්ම ප්‍රශ්නය වන්නේ සට කපට ක්‍රියාවකින් ජාතික ප්‍රශ්නයට විසඳුමක් ලැබේ ද? යන්නය. විසඳුමක් ලැබෙනු නැත. සිදු වන්නේ තවත් වටයකින් මුළාවීමක් විය හැකි ය. මර්දනය හරියන්නැති වැඩක් සේම බැසිල්ගේ උප්පරවැට්ටිය ද හරියනු නැත. මේ කාරණය වටහාගෙන දේශපාලනය කිරීමට සමත් විය යුත්තේ කවුරුන් ද?
දේශපාලන අනාගතයක්
මේ වන විට මැති සභය හොබවන මහින්ද රාජපක්ෂ – රනිල් වික්‍රමසිංහ සිට පහළට සැලකිය යුතු ජ්‍යෙෂ්ඨ දේශපාලනඥයන් ඉදිරි පාර්ලිමේන්තුවක චරිත වන්නේ නැත. රනිල් වික්‍රමසිංහට මන්ත්‍රී ආසනයකට තරම් ජන වරමක් නොලැබීම ඔස්සේ ඉගැන්වූ පාඩම ඉතා වැදගත්ය. ‘කෝ ජාතික නායකයන්‘ යන පැනය ඉක්මනින්ම නිරාකරණය වනු ඇත. අලුත් පරම්පරාවකින් රාජ්‍ය පාලනයට දක්ෂයන්ට මතු වෙන්නට තිබෙන අවස්ථාව පැහැදිලි ය. ජවිපෙද ඇතුළුව දේශපාලන වැඩ බිමේ සිටින කැපවුණ උදවිය වේ නම් ඔවුන්ට දේශපාලන අනාගතයක් උදා වෙන බවට හේතු කාරණා මතු වෙන්නට පටන් ගෙන තිබේ. බහුතර ජනතාව තව දුරටත් වහලුන් හෝ ගවයන් සේ ඔහේ යනු නැත. වහලුන් සේම ගවයන් ද අසරණව සිටින බව ද ඇත්තකි. මේ අවකාශය තුළ දේශපාලනය ගැන උනන්දු පුරවැසියන් අපේක්ෂා කරන්නේ තව දුරටත් කයිවාරුකාරයන් නොවේ. යථාර්ථවාදී විසඳුම් ඇත්තවුන්ය. එහිදී ‘චරිතයක්‘ නොව ‘චරිත‘ ගැන ජනතා විශ්වාසය ගොනු වෙන්නට තිබෙන හොඳ අවස්ථාවක් ඇත. ආර්ථික දැක්මක් – දේශපාලන පළපුරුද්දක්- ලෝකය සමඟ ගනු දෙනු කිරීමට පුළුවන් කමක් ඇති චරිත කිහිපයක් රටේ අනාගතය ගැන අවබෝධයකින් හා නිසි වැඩ පිළිවෙළකින් කටයුතු කළහොත් ඔවුන්ගේ දේශපාලන අනාගතය පමණක් නොව රටේ දේශපාලන අනාගතය ද පවතින තත්වයෙන් වෙනස් තත්වයක් කරා ගමන් කරන්නට අවස්ථාව උදා වේ. එය ඉබේ සිදු වන්නක් නම් නොවේ.
තව දුරටත් බැණ වැදීම් – විවේචන හෝ මඬගැසීම් ඔස්සේ ජන වරමක් දිනා ගැනීම වෙනුවට ජනතාව ඒකරාශී කොට ජන වරමක් දිනා ගැනීමට හැකි වැඩ පිළිවෙළක් නිර්මාණය විය යුතු ය. මේ වන විට මේ සඳහා විවිධ පාර්ශ්වයන් සමාජයේ සීරුවට සක්‍රිය වී ඇත. ඒ බහුතරය කල්පනා කරන්නේ ජනතාවට ‘සිහිනයක්‘ පෙන්වීම නොවේ. ‘යථාර්ථය‘ අවබෝධ කර දීම ය. මේ අවබෝධය අත් කර දීම ඉලක්ක කර ගත යුත්තේ වැඩිහිටි – තරුණ දෙපාර්ශ්වයටම එකවර ය. තව දුරටත් තම තමන්ගේ ප්‍රතිරූපය වෙනුවෙන් කටයුතු නොකොට, රාජ්‍ය පාලනයක් වෙනුවෙන් අවශ්‍ය වැඩ පිළිවෙළ සම්පාදනය උදෙසා නිරවුල් මනසකින් ශීලාචාර දේශපාලනඥයන් කටයුතු කළ යුතු ය.
එකම අරමුණක් කරා ගමනක්
සමහර විට ජාතික ආණ්ඩු කුමන්ත්‍රණය හරි යන්නට පුළුවන. හරි ගියත් ඊට කිසිම පැවැත්මක් තිබිය නොහැකි ය. සිදු වන්නේ දේශපාලන තක්කඩිකම්වල වැඩි වීමකි. චෞර පිරිස වැඩි වීමකි. රට දශමයකින් හෝ ඉදිරියට ගෙන යන්නට ජාතික ආණ්ඩුවකට පුළුවන් කමක් නැත. ජනතාවට මුහුණ දෙන්නට සිදු වෙන අසීරුතාවන් නරකම අන්දමින් උග්‍ර වනු ඇත.
ජාතික ආණ්ඩුවකට රාජපක්ෂවරුන් කැමති වන්නේ, විශේෂයෙන් ජනාධිපති කැමති වන්නේ ඇයි? තුනෙන් දෙකක බලයක් ඇත, ‘ඕනෑම දෙයක් කරන්නට පුළුවන‘ යනුවෙන් වහසි බස් දොඩවන ජනාධිපතිට රාජ්‍ය පාලනය පුදුමාකාර වදයක් වී තිබෙන බව පැහැදිලි ය. ඉතින් බැසිල් වෙර දරන්නේ වේගයෙන් සිදු වෙන විනාශය වළකා ගැනීමට ය.
නිරුවත්ව නන්නත්තාරවීමෙන් මිදෙන්නටය. සිහි මොළයක් තිබෙන දේශපාලනඥයන් අද ජාතික ආණ්ඩුවකට කැමති වන්නේ නැත. ජාතික ආණ්ඩුවකට මුක්කු ගහන්නට යම් කෙනෙකු කල්පනා කරනවා නම් ඔවුන්වත් ඒ නැවේම පටවා පිටත් කළ යුතුය. කිසියම් පිරිසක් නිශ්චිත අරමුණක් වෙනුවෙන් සැදී පැහැදී අකම්පිතව වැඩ කළ යුතු ය. එහෙත් තනි අලියන් ලෙස නම් අරමුණක් කරා ගමනක් තිබිය නොහැකි ය.
දැන් රටට අත්ව තිබෙන ඉරණම පැහැදිලිය. විනාශය ඇවිළෙන ගින්නක් සේ ය.
ගින්නෙන් දැවෙන්නේ විනාශය කළවුන් පමණක් නොවේ, සියල්ලන් ය. එබැවින් රාජ්‍ය බලය ලබා ගැනීමට වඩා අසීරු වන්නේ රාජ්‍ය පාලනයයි. රාජ්‍ය පාලනය බොරුවෙන් හා සාහසිකකම්වලින්ද ලබා ගන්නට සමත් වුණ අන්දම පැහැදිලිය. ලබා ගත් අන්දමට ඉදිරි ගමනක් නොතිබුණේ ඇයි? ගල් ගෙඩි පැළවෙනවා යයි කිව්වාට ගල් ගෙඩි පැළ වෙන්නේ නැත. ගෝඨාභය වෙනුවෙන් රචනා කෙරුණු සියලු සිහින වාර්තා බලය අතට ලැබුණ පසුව සුන් වී ගියේ යථාර්ථවාදී වැඩ පිළිවෙළක් නොතිබුණ නිසා ය. ඉතින් තව දුරටත් බොරු නොකියන – කළ යුතු දේ හා කළ හැකි අන්දම කියන බලවේගයකට ජනතාවගේ සහයෝගය ලබා ගැනීම සිහිනයක් වන්නේ නැත. අරමුණ හොඳින්ම පැහැදිලි විය යුතු ය.
විවිධ මත විවිධ විභවතාවන්
‘කාටත් එකඟ විය හැකි ‘- ‘සියලු දෙනාගේම අදහස්වලින් සමන්විත‘ යනුවෙන් වැඩපිළිවෙලක් ඉදිරිපත් කිරිමට නොහැකි ය. මනුෂ්‍යයා සම්බන්ධ යථාර්ථය මතය හැම දෙයක්ම තීන්දු වන්නේ. නිර්මාංශික ආහාරයට කැමති අයට නිර්මාංශ අහාර බැහැ මස් මාළු බිත්තර කොහොම හරි කන්නයයි කියා සාමූහික ගමනක් පටන් ගත නොහැකි ය. මත්පැන් පානය කරන්නන්ට ඊට ඉඩ තිබිය යුතු ය. කසාද බඳින්නට මෙන්ම දික්කසාද වෙන්නටත් අවසර අවශ්‍ය වේ. බුද්ධාගම එකම ආගම විය යුතු ද නැත.
රට ගොඩ ගැනීමට විවිධ මත දරන්නෝ අවශ්‍ය වෙති. විවිධ මත සමඟ විවිධ විභවතාවන් ද ඇත. අලුත් වැඩ පිළිවෙළක් යනු ‘කාටත් එකඟ විය හැකි‘ එකක් විය නොහැකිය. ‘සියලු දෙනාගේම අදහස්වලින් සමන්විත‘ එකක් ද විය නොහැකි ය. සියලු අදහස් උදහස් ඔස්සේ නිරාකරණය කර ගත යුතු ප්‍රධාන කාරණා සම්බන්ධයෙන් පැහැදිලි එකඟතාවන්ය අවශ්‍ය වන්නේ. නිදසුනක් විදිහට ආර්ථිකය ගොඩ නැඟීම යන කාරණය සලකා බලමු. ලංකාවේ ආර්ථික පුනර්ජීවනය ගොවිතැන දියුණු කිරීමෙන් කළ යුතුය, කළ හැකිය යන්න හරියන එකක් නොවේ. පසු ගිය දශක කිහිපය තුළ ලංකාවේ ආර්ථික ව්‍යුහය සකස්ව ගොඩ නැඟුණ අන්දමට එහෙම පිටින්ම පටහැනි යෝජනා ඉදිරිපත් කළහොත් සිදු වන්නේ කාබනික වගාවක් ගැන කටමැත දොඩවා අනා ගැනීමකටත් එයා යන අනාගැනීමකි.
විවිධ මත සහ විවිධ විභවතාවන් තුළ මිථ්‍යාව ඉස්මත්තට එන්නේ නම් ආර්ථිකය ගොඩ නඟන්නට නොහැකි ය. හැම මතයකම – හැම විභවතාවකම පදනම විද්‍යානුකූල විය යුතු ය. යථාර්ථවත් විය යුතුය. හැමදාම මැතිවරණයක් ළඟා වන විට පිරිසක් එකතු වී එක එක දේ යෝජනා කොට ‘දැක්මවල්‘ සකස් කිරීමකි කරන්නේ. ඒ හැම දැක්මක්ම පොදු ලක්ෂණය වන්නේ ඒවා මහ පොළොවේ යථාර්ථයක් බවට පත් කළ නොහැකි බව ය. හැම එකකම පදනම වූයේ ජන වරමක් ලබා ගැනීම වෙනුවෙන් ජනතාව මුසපත් කිරීමය. කිසිවක් යථාර්ථයක් බවට පත් කරන අන්දම – ක්‍රියා පිළිවෙත් නොවීය. අනෙක ‘දැක්මවල්‘ ලියන්නන් ජන වරම ලැබුණ පසුව පැත්තක ය. නායකයන් – දේශපාලකයන් – සහ ජයසුන්දරලාය බලය පරිහරණය කරනමින් තීන්දු තීරණ ගන්නේ. මේ ආණ්ඩුව බලයට පත් වන කියපු අමූලික බොරුවකි ජාතික සම්පත් රැක ගැනීම යන්න. විකුණපු ඒවාත් ගන්නවා යන්න. මේ කුණුහරුපවලින් ජනතාවට ආතල් දීමෙන් රටකට අත් කළ ඉරණම අද පැහැදිලි ය.
යහ පාලනය තුළ සමාජ දේශපාලන ප්‍රතිසංස්කරණ වෙනුවෙන් වූ යෝජනා යම් අන්දමකට යථාර්ථයක් වූයේ දේශපාලන නායකත්වය නිසා නොව සිවිල් බලවේගවල අනවරත අරගලය නිසා ය. ඉන් උගත යුතු වැදගත් පාඩමක් ඇත. එය නම් ජන වරමක් වෙනුවෙන් ඉදිරිපත් කරන දැක්ම හෝ වැඩ පිළිවෙළ මහ පොළොවේ යථාර්ථයක් බවට පත් කර ගැනීමට ක්‍රමවේදයක් ජනතාව වෙනුවෙන් ආණ්ඩුවෙන් බාහිරව ප්‍රතිෂ්ඨාපනය විය යුතු ය. රහසේම ජයසුන්දරලා ගන්නා තීරණ අබිමුව ඔලුවෙන් හිට ගත්තාට රටට ගොඩ නැගෙන්නේ නැත. එකෙළොස් දෙනාගේ කල්ලිය සේ ඇතුළේ උදවිය ද මාධ්‍ය සංදර්ශන පවත්වා යට ඇඳුම් ගලවා ගැනීමක් සිදු නොවිය යුතුය.
ඉතින් කෙටියෙන්ම කියනවා නම් කන්දෙන් පල්ලට රූටන ආණ්ඩුව රැක ගැනීමට ජාතික ආණ්ඩු ඕනෑ යයි යෝජනා කරන අයටත් – ඊට උඩ ගෙඩි දෙන අයටත් අසූචි සාගරයක කිමිදෙන්නට ඉඩ දෙනවා විනා එහි හැමෝම ගිලිය යුතු නැත, විවිධ මත – විවිධ විභවතාවන් යථාර්ථවත් දැක්මකින් පොදු අරමුණක් වෙනුවෙන් ශක්තිමත්ව ඒකරාශී විය යුතුය. ඒ වෙනුවෙන් කැපවෙන උදවියට රට ගොඩ නැඟීමට අවශ්‍ය ආණ්ඩුකරණයක නිමග්න විය හැකි ය. ඒ වෙනුවෙන් ජන වරමක් ද නියත වශයෙන්ම ලැබෙනු ඇත.■
