■ අමන්දිකා කුරේ
ශිෂ්යයෙකු උසස් පෙළ විභාගයෙන් සමත් වී විශ්වවිද්යාලයට තේරී පත් වූ පසුව උසස් පෙළට පෙනී සිටි අවස්ථාවේ පටන් විශ්වවිද්යාලයට බඳවා ගන්නා කාලය වනතෙක් විශාල කාලයක් බලාසිටීමට සිදුවෙයි. එයට විවිධ හේතු බලපෑවද සිසුන් ලියාපදිංචි කරගන්නා ක්රමවේදයේ තිබූ ප්රමාදයද ඊට බලපෑවේ ය.
ඒ අනුව මේ වන විට අන්තර්ජාලය හරහා විශ්වවිද්යාලවලට ලියාපදිංචි වීම අනිවාර්ය කර ඇති අතර එම ලියාපදිංචි වීමේ ක්රමවේදයේ පවතින ගැටලු නිසා සිසුහු දැඩි අපහසුතාවකට පත් වී සිටිති.
සාමාන්යයෙන් පෙර පැවති ක්රමවේදය අනුව තැපෑල හරහා මෙම ලියාපදිංචි වීම සිදු කෙරුණි. උසස් පෙළ ප්රතිඵල පැමිණි පසුව විශ්වවිද්යාල ප්රවේශ අයදුම්පත්රය මිලදීගෙන එය සම්පූර්ණ කර තැපැල් මාර්ගයෙන් විශ්වවිද්යාල ප්රතිපාදන කොමිෂන් සභාවට එවිය යුතුය. එලෙස අතිවිශාල අයදුම්පත්ර සංඛ්යාවක් විශ්වවිද්යාල ප්රතිපාදන කොමිෂන් සභාවට පැමිණෙන්නේ සියලුම විශ්වවිද්යාල ප්රවේශය අපේක්ෂා කරන සිසුන් මෙම අයදුම්පත්රය යොමු කරන බැවින් ය.
ඉන්පසුව විශ්වවිද්යාල ප්රවේශය සඳහා සුදුසුකම් ලබන කඩඉම් ලකුණු නිකුත් කර සිසුන් තේරීඇති විශ්වවිද්යාල ඔවුන්ට දැන්වීම මුල් කාලයේදී තැපැල් මාර්ගයෙන් සිදු කළද දැන් වසර ගණනාවක සිටම කඩඉම් ලකුණු නිකුත් කිරීම අන්තර්ජාලය හරහා සිදු කළ බැවින් එහි යම් කාර්යක්ෂමතාවක් දකින්නට ලැබුණි. එම පියවරෙන් පසුව තේරී පත් වූ විශ්වවිද්යාලයේ ලියාපදිංචි වීම සඳහා සම්පූර්ණ කළ යුතු අයදුම්පත්රය, මහපොළ ශිෂ්යාධාරය සඳහා සම්පූර්ණ කළ යුතු අයදුම්පත්රය හා නවක වදයට සම්බන්ධ නොවන බවට ලබා දෙන දිවුරුම් ප්රකාශය සිසුන්ට තැපැල් මාර්ගයෙන් යොමු කරන අතර සිසුන් ඒවා සම්පූර්ණ කර නැවත තැපැල් මාර්ගයෙන් එම ලියකියවිලි මහපොළ භාරකාර අරමුදලට හා විශ්වවිද්යාල ප්රතිපාදන කොමිෂන් සභාවට එවිය යුතු ය. යම්කිසි හෙයකින් පළමු පියවරෙන් ම යම් සිසුවෙකු විශ්වවිද්යාලයට තේරී පත් වූයේ නැති නම් ඔහුගේ අභියාචන ඉදිරිපත් කිරීමේ කටයුතුද සිදු කෙරෙන්නේ තැපැල් මාර්ගයෙනි. මෙය බැලූ බැල්මටම අතිශය සංකීර්ණ හා විශාල කාලයක් ගත වන ක්රියාවලියකි.
එයට විසඳුමක් වශයෙන් 2015 විශ්වවිද්යාල අයදුම්පත්ර කැඳවීමේදී අයදුම්පත්ර අන්තර්ජාලය හරහා යොමු කරන ක්රමවේදයක් විශ්වවිද්යාල ප්රතිපාදන කොමිෂන් සභාව විසින් හඳුන්වා දෙන ලදි. එය අනිවාර්ය නොවූ අතර කැමති සිසුන්ට එමගින් අයදුම්පත්ර යොමු කිරීමට හැකි වූ අතර අනෙකුත් කටයුතු තැපැල් මාර්ගයෙන් සිදුකරන ලදි. පසුගිය වසරේ සිට අන්තර්ජාලය හරහා අයදුම්පත්රය යොමු කිරීම අනිවාර්ය වූ අතර අන්තර්ජාලය හරහා අයදුම්පත්රය යොමු කිරීමෙන් අනතුරුව බාගත කරගත යුතු ලියකියවිලි හා අනෙකුත් අවශ්ය ලියකියවිලි තැපැල් මාර්ගයෙන් විශ්වවිද්යාල ප්රතිපාදන කොමිෂන් සභාවට යැවිය යුතුය.
කඩඉම් ලකුණු නිකුත් වීමෙන් පසුව සිසුන්ට තේරී පත් වූ විශ්වවිද්යාලයට ලියාපදිංචි වන ලෙස විශ්වවිද්යාල ප්රතිපාදන කොමිෂන් සභාවෙන් කෙටි පණිවුඩයක් හරහා සිසුන්ට දැනුම් දෙනු ලැබීය. ඒ අනුව ලියාපදිංචි කටයුතු විශ්වවිද්යාල ප්රතිපාදන කොමිසමේ වෙබ් අඩවිය හරහා ලියාපදිංචි වීම සිදු කළ යුතු ය. තේරීපත් වීම පිළිබඳ ලිපිය, මහපොළ අයදුම්පත්රය හා නවකවදයට සම්බන්ධ නොවන බවට ලබා දෙන දිවුරුම් ප්රකාශය බාගත කරගැනීමට අවශ්ය ලියාපදිංචි කටයුතුවලදී සිසුන් ඇතුළත් කළ යුතු කේතයන් ඇතුළත් ඊමේල් පණිවුඩය සිසුන්ට නොලැබීම නිසා ලියාපදිංචි කටයුතු කරගැනීමට නොහැකිව සිසුහු අපහසුතාවට පත් වී සිටිති. එම ඊමේල් පණිවුඩය ලැබුණු සිසුන්ට ද ජංගම දූරකථනයට කේතය නොලැබුණු අවස්ථා ද විශාල සංඛ්යාවකි. මෙම පද්ධතියේ පවතින යම් දෝෂයක් හේතුවෙන් එලෙස ඊමේල් පණිවුඩ නොලැබෙන බවට සිසුහු චෝදනා කරති.
ඒ සම්බන්ධයෙන් සිසුහු කිහිපදෙනෙකුම අප සමග අදහස් පළ කළහ.
‘මම ජීවත් වෙන්නේ මොනරාගල හම්බේගමුව ප්රදේශයේ. අපට අන්තර්ජාල සිග්නල් නෑ. ඒ නිසා සිග්නල් තියෙන පැත්තක ඉන්න අපේ යාළුවෙක්ට කියලා තමයි අයදුම්පත්රය යොමු කළෙත්. දැන් මේ ලියාපදිංචියට අදාළ කේතය එන ඊමේල් පණිවුඩය ගන්න දවස් ගානක් තිස්සෙ උත්සාහ කළා. නමුත් ඒ ඊමේල් පණිවිඩය ආවෙ නෑ. සමහර දවස්වලට පාන්දරට, රෑ වෙලා එහෙමත් උත්සාහ කළා. අපි ජීවත් වෙන පැත්තට වන අලි කරදර තියෙනවා. ඒ නිසා පාන්දර හෝ රෑ හෝ සිග්නල් තියෙන තැනකට යන්න මට බෑ. සිග්නල් තියෙන පැත්තක ඉන්න කෙනෙක්ට කියලා තමයි පාන්දරට සහ රෑටත් ලියාපදිංචි වෙන්න උත්සාහ කළේ. දවස් තුනක් තිස්සේ උත්සාහ කළා. ඒත් ඊමේල් පණිවුඩය ආවේ නෑ. විශ්වවිද්යාල ප්රතිපාදන කොමිසමේ අංකවලට කතා කළත් ගොඩක් වෙලාවට කෙනෙක්ව සම්බන්ධ කරගන්න බෑ. කලින් අපට කියලා තිබුණේ නැණසල මධ්යස්ථානවලට යන්න කියලා පහසුකම් නැති නම්. නමුත් රෑට හරි පාන්දරට හරි ඒවා ඇරලා නෑනේ. ගොඩක් අය ලියාපදිංචි වෙන නිසා පද්ධතිය හිර වෙනවා කියලා තමයි විශ්වවිද්යාල ප්රතිපාදන කොමිසමෙන් කියන්නේ. දවස් තුනක් උත්සාහ කරලා තමයි මම ලියාපදිංචි වුණේ.”
සමාජ මාධ්යවල විශ්වවිද්යාලවලට තේරී ඇති සිසුන් විසින් නිර්මාණය කර තිබෙන සමූහ තුළ ද මෙම ගැටලුව සම්බන්ධයෙන් සිසුන් විශාල ප්රමාණයක් සාකච්ඡා කර තිබේ.
මෙම ලියාපදිංචි කටයුතු දෙසැම්බර් 10 වන දිනට පෙර සිදු කළ යුතු අතර මෙම දෝෂය නිසා හෝ එම දින දීර්ඝ කිරීමක් සිදු කර නොමැත. සිසුන් චෝදනා කරන්නේ ගැටලු ඉදිරිපත් කිරීමට විශ්වවිද්යාල ප්රතිපාදන කොමිසමේ අංක වලට ඇමතුවද බොහෝ අවස්ථාවල ඔවුන් සම්බන්ධ කරගැනීමට නොහැකි බවයි. සම්බන්ධ කරගැනීමට හැකි වුවද මෙම ගැටලුවට ඔවුන් තවමත් නිසි විසඳුමක් සම්බන්ධයෙන් නොකියන බවයි.
ඒ නිසා අප ද විශ්වවිද්යාල ප්රතිපාදන කොමිසමේ වෙබ් අඩවියේ සඳහන් කර ඇති දූරකථන අංක හතරටම කිහිපවරක් ඇමතුවද එමගින් ඔවුන් සම්බන්ධ කරගැනීමට නොහැකි විය.
යම් හෙයකින් සිසුවෙකුට අවසන් දිනයට පෙර ලියාපදිංචිය සම්පූර්ණ කිරීමට නොහැකිවුවහොත් ඔහුට විශ්වවිද්යාල ප්රවේශය ලැබිය නොහැකි ය. මෙම තත්වය සිසුන්ගේ ගැටලුවක් නොවන නිසා විශ්වවිද්යාල ප්රතිපාදන කොමිසම විසින් ඊට අදාළ විසඳුමක් ලබා දිය යුතුව තිබුණද තවමත් ලබා දී නොමැත.
අප සමග අදහස් දැක්වූ තවත් සිසුවෙකු පැවසුවේ ඇපල් ජංගම දූරකථනවලින් එම ලියාපදිංචි කටයුතු සිදු කිරීමේ දී එම දූරකතනවලට එන බ්රවුසරය වන සෆාරි බ්රවුසරයෙන් ද ලියාපදිංචි කටයුතු කිරීමට නොහැකි බවයි. ඔහුද මේ සම්බන්ධයෙන් විශ්වවිද්යාල ප්රතිපාදන කොමිසම දැනුවත් කර ඇත. ඔවුන් ඔහුට දැනුම් දී තිබෙන්නේ මෙම පද්ධතියේ මෙහෙයුම් කටයුතු සිදුවන්නේ එස් එල් ටී ආයතනය හරහා බැවින් දෙසැම්බර් 06 වන දින නැවත විමසන ලෙසයි.
විශ්වවිද්යාල ප්රතිපාදන කොමිසම සම්බන්ධ කරගෙන මෙම ගැටලුව ඉදිරිපත් කළ සිසුන් සියල්ලන්ටම පාහේ ලැබී තිබුණේ මෙවැනි පිළිතුරු ය. ඇතැම් සිසුන් විශ්වවිද්යාල ප්රතිපාදන කොමිසමේ සභාපති මහාචාර්ය සම්පත් අමරතුංග මහතාට දැනුම් දී තිබූ අතර එක් සිසුවෙකු පැවසුවේ එලෙස දෝෂයක් පවතින්නේ නම් ඒ සම්බන්ධයෙන් සොයා බැලීමක් සිදු කරන බවට මහාචාර්යවරයා ප්රකාශ කළ බවයි.
මෙම ගැටලුව සම්බන්ධයෙන් විමසීමට අප විශ්වවිද්යාල ප්රතිපාදන කොමිසමේ සභාපති මහාචාර්ය සම්පත් අමරතුංග මහතා සම්බන්ධ කරගත් අතර ඔහු පැවසුවේ මෙවන් අදහසකි.
‘මේ කරන්නේ විශ්වවිද්යාල ලියාපදිංචි කටයුතු වුණාට ඒ මෘදුකාංගයේ අයිතිකරුවන් වෙන්නේ එස් එල් ටී මොබිටෙල් සමාගම. එයාලගේ පූර්ණ වගකීම තමයි මේ බඳවා ගැනීමේ කටයුතු අපේ ගිවිසුම්වලට අනුව නිවැරදිව කිරීම. මේ දවස්වල තියෙන තදබදය නිසාත් වෙන්න පුළුවන් මේ ගැටලු ඇති වෙලා තියෙන්නේ. නමුත් මේ වෙනකොටත් දරුවෝ දහ දාහකටත් වඩා වැඩි ප්රමාණයක් ලියාපදිංචි වෙලා තියෙනවා. එහෙම ප්රශ්න තියෙනවා නම් ඒ අයට අපේ තොරතුරු මධ්යස්ථානයට කතා කරලා ඒ හරහා ගැටලුවලට උත්තර ලබා ගන්න පුළුවන්. එතනටත් දිනකට විශාල ඇමතුම් ප්රමාණයක් එනවා. ඒ නිසා මම හිතනවා දරුවන්ට ලියාපදිංචි වෙන්න බැරි වෙන එකක් නෑ කියලා නියමිත දිනයට පෙර. දැනට මොකුත් තීරණයක් අරගෙන නෑ ලියාපදිංචිය අවසන් කරන දින දීර්ඝ කරනවාද කියලා. දැනට අපට සෑහීමකට පත්වෙන්න පුළුවන් විදිහට ලියාපදිංචි කටයුතු සිදුකෙරෙනවා.’
අන්තර් විශ්වවිද්යාලයීය ශිෂ්ය බලමණ්ඩලයේ කැඳවුම්කරු වසන්ත මුදලිගේ ද මෙම ගැටලුව සම්බන්ධයෙන් අදහස් පළකළේ ය.
‘කොරෝනා වසංගතය ඇවිල්ලා අවුරුදු දෙකක් වගේ වෙන මේ කාලයේ දී විශ්වවිද්යාලවල අධ්යාපන කටයුතු, ලියපාදිංචි කටයුතු වගේ හැම දෙයක්ම මාර්ගගත ක්රමයට කරන්න පටන් ගත්තා. එහෙම වුණායින් පස්සෙ සිසුන්ට යම් යම් අපහසුතාවන්ට ලක් වෙන්නත් සිද්ධ වුණා. දැන් සිදුවෙන විශ්වවිද්යාල ලියාපදිංචියට අදාලව ගැටලුවලට මුහුණ දුන්න සිසුන් විශාල ප්රමාණයක් දූරකථනයෙන් අපට කතා කරලා ප්රශ්න ගැන කියලා තියෙනවා. අපි ඊට පස්සෙ විශ්වවිද්යාල ප්රතිපාදන කොමිසමට මේ ඇති වෙලා තිබෙන නිශ්චිත ප්රශ්න ගැන ඉදිරිපත් කළාම කොමිසමේ සභාපතිවරයා අපට කිව්වේ එහෙම ගැටලුවක් තියෙනවා නම් ඒ ගැන හොයලා බලන්නම් කියලා. නමුත් තවමත් ගැටළු ඒ විදිහටම පවතිනවා. ඒ ගැටලු තිබියදීත් ලියාපදිංචියට අදාළ දින දීර්ඝ කිරීමක් සිදු කරලා නෑ. ඒ නිසා ඒ ප්රශ්න ටික තාම එහෙමම තියෙනවා. යම්කිසි ශිෂ්යයෙක්ට මේ ගැටලු නිසා ලියාපදිංචි කටයුතු කරගන්න නොහැකි වුණොත් ඔවුන්ගේ ඒ ප්රශ්නය විසඳෙනකන් ඊට අදාළ මැදිහත්වීම අන්තර් විශ්වවිද්යාලයීය ශිෂ්ය බලමණ්ඩලය විදිහට අපි කරනවා. වසංගතයත් එක්ක ගොඩක් දේවල් මාර්ගගත ක්රමයට කරන්න පටන් අරන් තියෙනවා. මෙතන තියෙන ප්රශ්නෙ තමයි ඒක අනිවාර්ය සහ එකම ක්රමය බවට පත් කිරීම. අතිරේක ක්රමයක් වශයෙන් අන්තර්ජාලය හරහා ලියාපදිංචිය සිදු කළාට ප්රශ්නයක් නෑ. නමුත් ලංකාවේ තියෙන පහසුකම් අනුව ඒ වගේ දෙයක් අනිවාර්යය සහ එකම ක්රමය කරන එක ප්රශ්නයක්.”■
