විෂයභාර ඇමති උදය ගම්මන්පිල ප්‍රකාශයට පත්කර ඇති ආකාරයට සපුගස්කන්ද තෙල් පිරිපහදුව දින පනහක කාලයක් වසා දැමුවහොත් හා ඒ අතරතුර කාලයේදී විදුලි බලාගාරවලට අවශ්‍ය දැවි තෙල් ආනයනය නොකළහොත් විදුලිය නිපදවීමේ අර්බුදයක්ද පැන නගිනු ඇතැයි ලංකා ඛනිජ තෙල් සංස්ථා ආරංචි මාර්ග ප්‍රකාශ කරයි.
ඒ සඳහා හේතුව වශයෙන් එම ආරංචි මාර්ග ප්‍රකාශ කරන්නේ දැනට සපුගස්කන්ද තෙල් පිරිපහදුව සතුව දැවි තෙල් ඇත්තේ මේ වනවිට විදුලිබල මණ්ඩල බලාගාර ඉල්ලුම් කරන අවශ්‍යතාවෙන් දින විස්සකට පමණක් ප්‍රමාණවත් ව වීමය. මේ දිනවල පවතින අධික වැසි සහිත කාලගුණ තත්වය හේතුවෙන් ජල විදුලි බලාගාර උපරිම ධාරිතාවෙන් ධාවනය වීම නිසා දැවි තෙල් බලාගාර ධාවනය අඩුවී ඇති අතර ඒ නිසාම දැවි තෙල් ඉල්ලුමද මේ වනවිට අඩුවී ඇත.
ඒ අනුව අනිකුත් ඉන්ධන මෙන් දැවි තෙල්ද ඇමතිවරයා පිරිපහදුව ආරම්භ කරනවා යැයි පවසන දිනට ප්‍රථම ආනයනය නොකළහොත් පවත්නා දැවි තෙල් තොග අවසන් වීමෙන් පසු විදුලි බලාගාර ධාවනයට දැවි තෙල් නොමැති වනු ඇත. එසේම කර්මාන්තශාලා සඳහාද අවශ්‍ය කරන දැවි තෙල් ලබාදීමට නොහැකි වීමෙන් එම කර්මාන්තශාලා නිෂ්පාදනවලටද බාධා ඇතිවිය හැකි බව එම ආරංචි මාර්ග වැඩිදුරටත් ප්‍රකාශ කරයි.■
