■ ඉඳුවර බණ්ඩාර
ශ්‍රී ලංකා ටෙලිකොම් ආයතනයේ ආරක්ෂක අංශය මඟහැර එහි ඉහළ ආරක්ෂක රාජකාරි එම ආයතනයේ ආරක්ෂක සේවාවන් සඳහා පිටතින් ලබාගෙන ඇති රක්නා ආරක්ෂක සේවයේ නිලධාරීන්ට ලබාදීම සම්බන්ධයෙන් එහි වෘත්තීය සමිතිවල විරෝධය එල්ල වී ඇත.
මේ සම්බන්ධයෙන් එහි වෘත්තීය සමිති පාලනාධිකාරියට ලිඛිතවම විරෝධය දක්වා ඇති අතර ඒ මගින් වෘත්තීය සමිති පෙන්වා දී ඇත්තේ ටෙලිකොම් ස්ථීර ආරක්ෂක අංශයේ පුරප්පාඩු බාහිර සේවා ලබාගෙන ඇති පෞද්ගලික ආරක්ෂක සේවා ආයතනයක නිලධාරීන්ගෙන් පිරවීම ටෙලිකොම් ආයතනයේ ආරක්ෂාවට තර්ජනයක් බවයි.
එමෙන්ම ටෙලිකොම් ආයතනයේ අභ්‍යන්තර සේවකයන්ගෙන් පවා රහස්‍ය ලෙස පවත්වාගෙන යන ස්ථානවලට පෞද්ගලික ආරක්ෂක ආයතන නිලධාරීන් අනුයුක්ත කිරීමට යන බව දැනගන්නට ලැබී ඇති බවද ආයතනයේ රහස්‍යභාවය සම්බන්ධයෙන් එය දැඩි අවදානම් තීරණයක් බවද එහි සඳහන් කර තිබේ.■
