■ අමන්දිකා කුරේ
සමගි ජන බලවේගය විසින් නොවැම්බර් 16 කොළඹ පැවැත්වූ විරෝධතාවලට විවිධ ප්‍රදේශවලින් පැමිණි පිරිස්වලට කළ පොලිස් බාධාකිරීම්වලට විරුද්ධව මූලික අයිතිවාසිකම් නඩු පැවරීමට බලාපොරොත්තු වන බව එම පක්ෂයේ මහ ලේකම් රංජිත් මද්දුමබණ්ඩාර පවසයි.
අප කළ විමසීමක දී ඒ මහතා පැවසුවේ ඊට අදාළ ලිපි ලේඛන සකස් කිරීම මේ වන විට නීතීඥවරුන්ට පවරා ඇති බවයි.
උද්ඝෝෂකයන්ට විරුද්ධව නඩු පැවරීමක් සිදු කරන්නේද යන්න පිළිබඳව අප පොලිස් මාධ්‍ය ප්‍රකාශක නිහාල් තල්දූවගෙන් විමසීමක් කළ අතර ඔහු පැවසුවේ එලෙස නඩු පැවරීමක් සිදු නොකරන බවයි.
පොලිසිය එදින උද්ඝෝෂකයන්ට බාධා කළේ නිරෝධායන නීති රීති අනුකූලව හා නියෝජ්‍ය සෞඛ්‍ය අධ්‍යක්ෂක ජනරාල්වරයෙකු විසින් සිදු කළ පැමිණිල්ලකට ද අනුව බව ඔහු වැඩි දුරටත් ප්‍රකාශ කළේ ය.■
