ජනාධිපති ගෝඨාභය රාජපක්ෂ ගලගොඩඅත්තේ ඥානසාර හිමි ප්‍රධානත්වයෙන් එක රටක්, එක නීතියක් නම් වූ කාර්ය සාධක බලකාය පත්කිරීමේ ගැසට් නිවේදනය යළි සංශෝධනය කර තිබේ. ඒ නොවැම්බර් 06 වැනිදා තවත් අති විශේෂ ගැසට් නිවේදනයක් නිකුත් කරමින්ය. පළමු නිවේදනය සමඟ සැසැඳූ කල එහි වෙනස්කම් කිහිපයක් තිබේ. එකක් අලුතින් දෙමළ ජාතිකයින් තිදෙනෙකුගේ නම් එයට ඇතුළත් කිරීමය. එසේ ඇතුළත් කර ඇත්තේ රාමලිංගම් චක්‍රවර්ති කරුණාකරන්, යෝගේෂ්වරී පත්ගුණරාජා හා අයියාම්පිල්ලෙයි දයානන්දරාජා යන මහත්ම මහත්මීන්ය. කිසිදු දෙමළ ජාතිකයකු එම කාර්ය සාධක බලකායේ නොසිටීම යන චෝදනාවට ඒ මගින් පිළිතුරු ලබාදී ඇති සේය. එමෙන්ම පළමු පත්වීම්ලාභීන් අතර සිටි මහාචාර්ය දයානන්ද බණ්ඩාර හා කථිකාචාර්ය මොහොමඩ් ඉන්තිකාබ් යන අය එම කාර්ය සාධක බලකායෙන් ඉවත් වී ඇති බවද එහි සඳහන් කර තිබේ. එහි තේරුම වන්නේ මෙම පත්කිරීම් එම පුද්ගලයින්ගේ කිසිදු අනුදැනුමකින් තොරව කිසියම් පුද්ගලයකුගේ නම් කිරීම මත සිදුකර ඇති බවය.
නැතිනම් එහි ජනාධිපතිවරයකුට නොගැළපෙන ලෙස සම්පූර්ණ නමවත් නොදන්නා මවුලවි මොහොමඩ් ගාල්ල උලමා සභාව යන නමක් තිබිය නොහැකිය. එහි මවුලවි යන්න ඉස්ලාම් පූජකත්වය හඳුන්වන නමය. එය පුද්ගල නාමයට අයත් එක්ක නොවේ. තනි මොහොමඩ් යන නමක් ඇති පුද්ගලයන් සිටිය නොහැකිය. ගාල්ල උලමා සභාව යන්න එම නම සමඟ යොදා ඇත්තේ හරියට නමවත් නොදන්නා මවුලවි මොහොමඩ් යන පුද්ගලයා ගාල්ල උලමා සභාවේ ඉන්නා බව දන්නා නිසාය. ජනාධිපති කාර්ය සාධක බලකාවලටත් ගිය කළ යැයි සිතෙන්නේ මෙම විගඩම් දකින විටය. සංශෝධනයේදී එම නම නිවැරදි කර ඇත. ඒ මවුලවි එම් ඉසෙඩ් ඒ එස් මොහොමඩ් (බාරි) ලෙසය. එසේම නීතිඥ සංජය මාරඹේගේ නමට, එරන්ද නවරත්නගේ නමට හා අසීස් නිසාර්දීන්ගේ නමට කෑලි එකතු කිරීම් මෙම සංශෝධනයේදී සිදුකර ඇත. වඩාත් විහිළු සහගත නම් සංශෝධනය කිරීම වන්නේ පළමු නිවේදනයේ මහාචාර්ය සුමේධ සිරිවර්ධන ලෙස තිබූ නම සංශෝධනයේදී ජේ්‍යෂ්ඨ කථිකාචාර්ය වීරවර්ධනලාගේ සුමේධ මංජුල ලෙස වෙනස් වී තිබීමය.
එහි ඇති විශේෂම සංශෝධනය වන්නේ එම කාර්ය සාධක බලකායට පවරා ඇති කාර්යයන් සංශෝධනය කිරීමය. සංශෝධිත කාර්යයන් දක්වා ඇත්තේ මේ ලෙසය.‘ ශ්‍රී ලංකාව තුළ ‘එක රටක් එක නීතියක්’ යන සංකල්පය ක්‍රියාත්මක කිරීම සම්බන්ධයෙන් විවිධ පාර්ශ්වයන් දරන අදහස් හා මතවාදයන්ද සැලකිල්ලට ගනිමින් එකී සංකල්පය අධ්‍යයනය කිරීමෙන් අනතුරුව ඒ සඳහා ශ්‍රී ලංකාවට ආවේණික වූ සංකල්පමය රාමුවක් සකස් කිරීම සම්බන්ධයෙන් යෝජනා ඉදිරිපත් කිරීම’
පළමු ගැසට් නිවේදනයේ එම කාර්යයන් සඳහන් කර තිබුණේ ‘ශ්‍රී ලංකාව තුළ එක රටක්, එක නීතියක් ක්‍රියාත්මක කිරීම සම්බන්ධයෙන් අධ්‍යයනය කර ඒ සඳහා පනත් කෙටුම්පතක් සකස් කිරීම’ හා
‘අධිකරණ අමාත්‍යාංශය විසින් මේ වනවිට මෙයට අදාළව සකස් කර ඇති නීති කෙටුම්පත් හා සංශෝධනයන් අධ්‍යයනය කොට ඒවායේ යෝග්‍යතාව හා සුදුසු සංශෝධන වේ නම් ඒ සඳහා යෝජනා ඉදිරිපත් කිරීම හා යෝග්‍ය පරිදි අදාල කෙටුම්පතට ඇතුළත් කිරීම’ ලෙසය.
අධිකරණ අමාත්‍යාංශය සකස් කළ යුතු පනත් කෙටුම්පත් සකස් කිරීමේ කාර්යය හා මේ වනවිටත් අධිකරණ අමාත්‍යාංශය සකස් කර ඇති පනත් කෙටුම්පත් හා සංශෝධන අධ්‍යයනය කිරීම සහ සුදුසු සංශෝධනයන්ට ලක්කිරීමේ කාර්යය කැළෑ නීතිය පිළිබඳව මිස නීතිය ගැන කිසිවක් නොදන්නා ගලගොඩඅත්තේ ඥනසාරගේ ප්‍රධානත්වයෙන් යුත් කමිටුවකට බාරදීම ජනාධිපති නීතිඥයෙකු වන අලි සබ්රි ඇමතිවරයාට ගසන ලද කනේ පාරකටත් වඩා එහා ගිය එකක් බව අමුතුවෙන් කිවයුතු නැත. අලි සබ්රි ඇමතිවරයාගේ ඉල්ලා අස්වීම එන්නේ ඊට විරෝධය දැක්වීමක් වශයෙන්ය. ජනාධිපතිවරයාගේ ස්කොට්ලන්ත සංචාරයෙන් පසු අධිකරණ අමාත්‍ය අලි සබ්රි සිය ඉල්ලා අස්වීමේ ලිපිය ජනාධිපතිවරයාට බාරදීමට ගොස් ඇත්තේ ඒ අනුවය. එහෙත් ජනාධිපතිවරයා එම ඉල්ලා අස්වීම බාරගෙන නොතිබූ අතර ඇමති අලි සබ්රිද සිය ඉල්ලා අස්වීම ආපස්සට ගෙන ඇති බවක් පෙන්නුම් කළේය.
අලි සබ්රි ඇමතිවරයා ඉල්ලා අස්වීමට තිබුණේ ජනාධිපතිවරයා ස්කොට්ලන්තයට ගොස් එනතුරු දක්වා සිට නොව එම ගැසට් නිවේදනය දුටු විගසමය. ඊට හේතුව එම කාර්ය සාධක බලකායට පවරා ඇති කාර්යය දුටු විට යම් හෝ ආත්ම ගෞරවයක් ඇති කිසිවකුට අධිකරණ ඇමති ධුරය දැරිය නොහැකි නිසාය. ආවේ රට හදන්න නම් ඒ රට හදන්න යන්නේ ගලගොඅත්තේ ඥානසාර නම් කැළෑ නීතිකාරයකු පෙරටු කරගෙන නම් ජනාධිපති නීතිඥ අලි සබ්රි ජනාධිපතිවරයාගේ කිනම් ඉල්ලීමක් මත හෝ තවදුරටත් මේ ආණ්ඩුව තුළ සිටීම යනු නිවට කමක් මිසක් වෙනකක් නොවන බව ඒ මොහොතේ යමකුට සිතීම වැළැක්විය නොහැක්කකි.
තමාට ඉල්ලා අස්වීමට වුවමනා නම් එම ඉල්ලා අස්වීමේ ලිපියත් රැගෙන ජනාධිපතිවරයා හමුවන්නට යෑමේ අවශ්‍යතාවක් නම් මන්ත්‍රීවරයකුට හෝ ඇමතිවරයකුට පැන නඟින්නේ නැත. ඊට හේතුව එම ඉල්ලා අස්වීම හමුනොවී දැනුම් දිය හැකි බැවිනි. යම් හේතුවක් නිසා ඇමතිකමෙන් හෝ මන්ත්‍රීකමෙන් ඉල්ලා අස්විමට තීරණය කර ඇති පුද්ගලයකුට එම ඉල්ලා අස්වීම ප්‍රතික්ෂේප කිරීම ඉල්ලා අස්වීම ආපස්සට ගැනීමට හේතුවක් නොවේ. මන්ද ස්ථීර රැකියාවකදී වැනි ඉල්ලා අස්වීම සඳහා යම් කාලයකට පෙර දැනුම් දීමක් කළ යුතු යැයි කොන්දේසියක් මන්ත්‍රීකම හෝ ඇමතිකම සම්බන්ධයෙන් නොමැති නිසාය.
තවදුරටත් අලි සබ්රි ඇමතිවරයාට ජනාධිපතිවරයාට බය පක්ෂපාතීව සිටීමට හේතුවක් තිබිය හැකි යැයි අපට පෙනෙන්නේ නැත. ඒ වංවා දූෂණ සම්බන්ධයෙන් තවමත් ඔහුගේ නම ගෑවී නැති නිසාය. ඔහු ලබාගත් එකම වරප්‍රසාදය වූයේ ජාතික ලැයිස්තු මන්ත්‍රීකමෙන් පළමුවරට පාර්ලිමේන්තුවට තේරී පත්වී එම පළමු අවස්ථාවේම කැබිනට් ඇමති ධුරයක් ලබා ගැනීමය. ඒ සඳහා ඔහුගේ සුදුසුකම වූයේ ජනාධිපතිවරයාට එරෙහිව තිබූ වංවා දූෂණ නඩු සඳහා නොමිලේ පෙනී සිටිමින් කළ සේවයය. මිල කළා නම් එහි මිල රුපියල් කෝටි ගණනක් වන එකකි.
ජනාධිපතිවරයා හා අලි සබ්රි ඇමතිවරයා අතර ඇති එම සම්බන්ධය නිසා හමුවී කරුණු පැහැදිලි කිරීමකින් තොරව එසේ කිරීම නොමැනවැයි අලි සබ්රි ඇමතිවරයා සිතන්නට ඇත.
අලි සබ්රි මහතා අමාත්‍ය ධුරය දරන අධිකරණ අමාත්‍යාංශයේ වෙබ් අඩවියේ සඳහන් වන්නේ අමාත්‍ය මණ්ඩලයේ අනුමැතිය සහිතව අධිකරණ අමාත්‍යවරයා විසින් සිවිල් නීතිය ප්‍රතිසංස්කරණයට, අපරාධ නීතිය ප්‍රතිසංස්කරණයට, වාණිජ නීතිය ප්‍රතිසංස්කරණයට, අධිකරණ පද්ධතිය ඩිජිටල්කරණයට හා යටිතල පහසුකම් සංවර්ධනයට කමිටු පහක් පත්කර ඇති බවයි. එම කමිටුවලින් නීති ප්‍රතිසංස්කරණයට අදාළ කමිටුවල ඉන්නවා ඇත්තේ අප මතවාදීමය වශයෙන් පිළිගත්තත් නැතත් නීතිය පිළිබඳ සුදුසකම් ඇති වෘත්තිකයන් විය හැකිය. මෙම ගලගොඩඅත්තේ ඥානසාර හිමි කාර්ය සාධක බලකාය එම නීති ප්‍රතිසංස්කරණ කමිටුවල ඉන්නා අයටද කරන අවමානයක් බව අමුතුවෙන් කිවයුතු නැත. තමා ගැන පමණක් නොව ඒ ගැනත් අලි සබ්රි ඇමතිවරයා ජනාධිපතිවරයාට කියන්නට ඇත.
රටට අවශ්‍ය නීති කෙටුම්පත් කිරීමට හා විශේෂඥයන් කෙටුම්පත් කර ඇති නීති අධ්‍යයනයට ගලගොඩඅත්තේ ඥනසාර හිමිට බාරදීම තරම් තවත් විහිළුවක් තිබිය නොහැකිය. එවැනි අතිභයංකර විහිළුවක් කළ හැක්කේ හිසේ අමාරුවක් ඇති පුද්ගලයකුට පමණකි.
දැන් එම අතිභයංකර විහිළුව එක රටක් එක නීතියක් සම්බන්ධයෙන් වූ නව ගැසට් නිවේදනයත් සමඟ යම් දුරකට ජනාධිපතිවරයා ආපස්සට හරවා ඇත. ඒ අලි සබ්රි ඇමතිවරයා තවදුරටත් තබා ගැනීමේ වුවමනාවෙන් විය හැකිය. මෙහිදී ජනාධිපතිවරයා සංශෝධනයට ලක්කර ඇත්තේ අලි සබ්රි ඇමතිවරයාගේ අධිකරණ අමාත්‍යාංශ විෂයට උඩින් ගලගොඩඅත්තේ ඥානසාර හිමි පිහිටුවීමේ කාර්යය පමණය. ඥානසාර කාර්යයේ අනිකුත් කාර්යයන්ට අත තබා නැත. රට සම්බන්ධයෙන්ම නොවෙතත් මේ මොහොතේ අලි සබ්රි ඇමතිවරයා පමණක් ඥානසාර ද්වන්ද්ව සටනින් යම් පමණකට ජය ලබා ඇත. සංශෝධිත නව ගැසට් පත්‍රය ඒ වෙනුවෙනි. අලි සබ්රි ඇමතිවරයා තවදුරටත් තනතුරුවල ඉන්නේ එයින් සතුටු වන නිසා හෝ තෘප්තිමත් වන නිසා විය හැකිය. එහිදී සතුට හෝ තෘප්තිය යම් පමණකට හෝ ගිලිහෙන්නේ ඥානසාර හිමිගේය. මන්ද ඥානසාර හිමි පත්කිරීම සාධාරණය කරමින් ස්කොට්ලන්ත සංචාරයෙන් පසු පළමු ප්‍රසිද්ධ කතාවේදීම ජනාධිපතිවරයා රටටම කියූ නිසාය. මේ පරාජය ගැන ඥානසාර හිමි කියනු ඇත්තේ හෝ කරනු ඇත්තේ කුමක්ද?■
