■ අමන්දිකා කුරේ
ඉටුකම කොවිඩ් 19 සමාජ ආරක්ෂණ අරමුදල විගණකාධිපතිවරයා යටතේ විගණනය නොවන බව සමගි ජන බලවේගයේ පාර්ලිමේන්තු මන්ත්‍රී මයන්ත දිසානායක අගමැතිවරයාට යොමු කළ ප්‍රශ්නයකට පිළිතුරු දෙමින් නොවැම්බර් 08 දින පාර්ලිමේන්තුවේ දී සෞඛ්‍ය ඇමති කෙහෙළිය රඹුක්වැල්ල ප්‍රකාශ කළේ ය.
එම අරමුදල පවතින්නේ ජනාධිපති ලේකම් කාර්යාලය යටතේ බව රඹුක්වැල් ඇමතිවරයා එහිදී කීවේය.
එය විගණනනය කරන්නේ ද යන කාරණය තීරණය කරනු ලබන්නේ ඉටුකම අරමුදල වෙනුවෙන් ජනාධිපති ලේකම් කාර්යාලය විසින් පත් කර ඇති දාහත් දෙනෙකුගෙන් සමන්විත විද්වත් කමිටුව විසින් බවද ඔහු ප්‍රකාශ කළේ ය.
දැනට අරමුදල තුළ එකසිය අසූ හය කෝටි හතලිස් දෙලක්ෂයක් පමණ මුදලක් පවතින බවත් වියදම් වී ඇති මුදල දහනව කෝටි හැත්තෑ හත් ලක්ෂයක් පමණ වන බවත් කෙහෙළිය රඹුක්වැල්ල අමාත්‍යවරයා පාර්ලිමේන්තුවට ප්‍රකාශ කළේ ය.
එම මුදල් දැනට වැය වී ඇත්තේ ජාතික එන්නත්කරණ වැඩපිළිවෙළට, පීසීආර් පරීක්ෂණ, නිරෝධායන කටයුතු හා දැඩි සත්කාර පහසුකම් සඳහා බවත් ඉදිරියේදී ඒ සම්බන්ධයෙන් මුදල් වාර්තාවක් පාර්ලිමේන්තුවට ඉදිරිපත් කිරීමට බලාපොරොත්තුවන බවත් අමාත්‍යවරයා වැඩි දුරටත් කියා සිටියේ ය.■
