රට ආර්ථික වශයෙන් අගාධයට ගොස් තිබියදී හා කොවිඩ් වසංගත තත්වයේ පැහැදිලි අඩුවක් නොතිබියදී අගමැති මහින්ද රාජපක්ෂ අභියෝගතා කුසලාන පාපන්දු තරගාවලියක් ආරම්භ වී තිබේ.
ශ්‍රී ලංකා පාපන්දු සම්මේලනය නිල වශයෙන් සංවිධානය කරන මෙම පාපන්දු තරගාවලියේ කැපී පෙනෙන කාර්යභාරය ක්‍රීඩා අමාත්‍ය නාමල් රාජපක්ෂගේය.
කණ්ඩායම් හතරක සහභාගිත්වයෙන් සිදුකරන මෙම පාපන්දු තරගාවලියේ කැපී පෙනෙන තෝරා ගැනීම වන්නේ සී ෂෙල්ස් රාජ්‍යය තෝරා ගැනීමය. අනික් කණ්ඩායම් වන්නේ ශ්‍රී ලංකාව, මාල දිවයින හා බංගලිදේශයය.
සී ෂෙල්ස් යනු නැගෙනහිර අප්‍රිකානු රටකි. ශ්‍රී ලංකාව දකුණු ආසියාවේය. අවශ්‍ය කණ්ඩායම් හතරක් නම් අසල්වැසි ඉන්දියාව, පාකිස්ථානය, නේපාලය, ඇෆ්ගනිස්ථානය ආදි දකුණු ආසියාවේම කණ්ඩායම් තිබේ. එසේත් නැත්නම් ආසියාව දෙසට යොමුවිය හැකිය. විශේෂයෙන්ම ශ්‍රී ලාංකිකයන් විශාල පිරිසකට රැකියා අවස්ථා ලබාදී ඇති සවුදි අරාබිය, එක්සත් අරාබි එමීර් රාජ්‍යය, කුවේට්, කොරියා ආදි ලෙස ලැයිස්තුවක් සකස් කළ හැකිය. නැත්නම් අපට අපි නොඉල්ලන ව්‍යාපෘති ලබාදෙන චීනය, අඩු පොළී ණය දෙන ජපානය ආදිය දෙසට යොමුවිය හැකිය.
එසේ නොවී නැගෙනහිර අප්‍රිකානු රටක් වන සී ෂෙල්ස් මෙම තරගාවලියට තෝරා ගැනීම ශ්‍රී ලංංකා පාපන්දු සම්මේලනයේ හුදු තේරීමක් නම් විය නොහැකිය. අනිවාර්යෙන්ම එහි රාජපක්ෂවරුන්ගේ තේරීමක් විය හැකිය. ඉතාම අඩු අඩු ශ්‍රී ලාංකිකයින් පිරිසක් සිටියදී සී ෂෙල්ස්හි ලංකා බැංකු ශාඛාවක් විවෘත කිරීම, කොළඹ සිට සී ෂෙල්ස් දක්වා ශ්‍රී ලන්කන් ගුවන් සේවයේ ගුවන්
ගමන් වාරයක් ආරම්භ කිරීම ආදිය පසුගිය කාලයේ සිදුවූයේ රාජපක්ෂවරුන්ගේ ආශීර්වාදය යටතේය. ඉන්පසු රාජපක්ෂ හිතවත් ව්‍යාපාරිකයන්ද සිය ව්‍යාපාර කටයුතු සඳහා යැයි කියමින් සී ෂෙල්ස් යන අයුරු අපි දුටුවෙමු.
සී ෂෙල්ස් සැලකෙන්නේද කළු සල්ලි සුදු කළ හැකි පාරාදීසයක් ලෙසය. බහු ජාතික සමාගම්වලට ඒ තුළ ව්‍යාපාර ලියාපදිංචි කිරීමේ නීති රීති බාධාවන් අවමය. එය හැඳින්වෙන්නේ බදු නිදහස් තෝතැන්නක් ලෙසය. ලෝකයේ බොහෝ කළු ගනුදෙනු ව්‍යාපාරිකයෝ ඒ නිසාම සී ෂෙල්ස්වලට කැමතිය.
ශ්‍රී ලංකාවේ පාලකයෝත් සී ෂෙල්ස්වලට කැමති ඒ නිසාද? අගමැති මහින්ද රාජපක්ෂ අභියෝගතා කුසලාන සිව්කොන් පාපන්දු තරගාවලියට ශ්‍රී ලංකාවට බොහෝ ඈත සී ෂෙල්ස් රාජ්‍යය තෝරා ගැනීම මගින් පෙන්නුම් කරන්නේ එය මිස වෙනකක් නොවේ.■
