■ අමන්දිකා කුරේ
ජ්යෙෂ්ඨ නියෝජ්ය පොලිස්පති රන්මල් කොඩිතුවක්කු විසින් තම සේවාදායකයා ශාරීරික හා ලිංගික හිංසනයන්ට ලක් කර ඇති බවට කරුණු ඉදිරිපත් කරමින් ප්රසිද්ධ නීතිඥ සමාගමක් වන නීලකන්දන් හා නීලකන්දන් සමාගමෙන් ජනාධිපතිවරයාට ලිපියක් යොමු කර තිබේ.
ඔක්තෝබර් 25 වන දින ජ්යෙෂ්ඨ නියෝජ්ය පොලිස්පතිවරයා විසින් තරුණයෙකුට මහමගදී පහරදෙන වීඩියෝවක් සමාජ මාධ්ය ජාලා ඔස්සේ ප්රචාරය වූ අතර ඒ නිසා ඔහු වෛද්ය සේවා සහ සුබසාධන කොට්ඨාසයේ ජ්යෙෂ්ඨ නියෝජ්ය පොලිස්පතිවරයා ලෙස ස්ථාන මාරු කර තිබේ. මෙම සිදුවීමේ දී පහර කෑ තරුණයා වන මිශාර රණසිංහ මහතා වෙනුවෙන් පෙනී සිටින නීතිඥ සමාගම ජනාධිපතිවරයාට මේ ලිපිය යොමු කර තිබේ.
ඔක්තෝබර් 25 වන දින පස්වරු දෙකට පමණ තම සේවාදායකයා රත්නපුර සිට පානදුරට ගමන් කරමින් සිටිය දී නිල් පැහැති ජීප් රථයක් ඉස්සර කරමින් ගමන් කර ඇති බවටත් ඉන්පසු එම ජීප් රථයේ ගමන් කළ අය සේවාදායකයා ගමන් කළ වාහනය නවතා ඇති බවත් ඔවුහු මේ ලිපියේ සඳහන් කරති. ඉන්පසුව එම ජීප් රථයේ සිටි නිල ඇඳුමින් සැරසුණු නිලධාරීන් තිදෙනෙකු මිශාර රණසිංහ මහතාගේ වාහනයේ රියදුරු අසුන අසළ ඇති දොරටුව විවෘත කර හේතු විමසීමකින් තොරව එක්වරම ඔහුට පහර දී තිබේ. පළමුව දොර විවෘත කළ නිලධාරියා පසුව හඳුනාගත් පරිදි ජ්යෙෂ්ඨ නියෝජ්ය පොලිස්පති රන්මල් කොඩිතුවක්කු වන අතර ඔහු අධික වේගයෙන් රිය පැදෙව්වේ යැයි චෝදනා කරමින් මිශාරට බැන වැදී තිබෙන අතර ඒ මොහොතේ ඔහුගෙන් ඇල්කොහොල් ගඳක් දැනුණු බැවින් ඔහු බීමත්ව සිට ඇති බවටද මේ ලිපියේ සඳහන් කර තිබේ.
ඉන්පසුව මිශාර මහතා බලහත්කාරයෙන් කිරිඇල්ල පොලිස් ස්ථානය වෙත ගෙන ගොස් ඇති අතර එහිදී ඔහු පොලිස් නිලධාරීන් පස් දෙනෙකු විසින් බලහත්කාරයෙන් වාහනයෙන් එළියට ගෙන තිබේ. පසුව අඳුරු සිරමැදිරියක් තුළට දමා ඇති අතර ඔහුගේ ජංගම දූරකථනය ද පොලිසිය භාරයට ගෙන ඇත.
ලිපියේ සඳහන් කර ඇති අන්දමට ඉන්පසුව සිය සේවාදායකයා නිරුවත් කර දණගස්වා ඇති බව නීිතිඥ සමාගම සඳහන් කරයි. ජ්යෙ. නියෝජ්ය පොලිස්පති රන්මල් කොඩිතුවක්කු ද ඔහුගේ නිල ඇඳුමේ කමිසය ගලවා පැමිණ ඔහුට දිගටම බැන බැදී ඇති බව එම ලිපියේ සඳහන් ය. ජ්යෙ. නියෝජ්ය පොලිස්පතිවරයා මිශාර මහතාගේ හිසට,බෙල්ලට, බඩට හා ලිංගික අවයවවලට පහර දී ඇති අතර ඔහුගේ බූට් සපත්තුවෙන් ගෙල තද කර තිබෙන බවටද නීතිඥයෝ සඳහන් කරති. නිරුවත් කර සිටි තම සේවාදායකයාගේ ඡායාරූප රන්මල් කොඩිතුවක්කු විසින් තම දුරකථනයෙන් ලබාගෙන ඇති අතර ඒවා අන්තර්ජාලයට මුදාහරින බවට ද තර්ජනය කර තිබේ. ඊට අමතරව ඔහුට ලිංගික හිංසන කරන බවට තර්ජනය කර තිබේ. මේ වන විටත් රන්මල් කොඩිතුවක්කුගේ මුවින් මත්පැන් ගඳ වහනය වූ බව තම සේවාදායකයා ප්රකාශ කළ බව නීතිඥ සමාගම මේ ලිපියේ සඳහන් කර ඇත.
ඉන්පසු ඔහු සිරමැදිරියේ රඳවාගෙන සිට ඇති අතර ඔහුගේ ඥාතීන් හා මිතුරන් ඔහු හමුවීමට පොලිස් ස්ථානය ඉදිරිපටට පැමිණ තිබුණද ඊට අවස්ථාවක් ලබා දී නොමැත. පසුව මිශාර මහතා වෙනුවෙන් පෙනී සිටි නීතිඥවරයා කිරිඇල්ල පොලිසියට පැමිණ සාකච්ඡා කිරීමෙන් අනතුරුව ඔහුට ඇප ලබා දී තිබේ.
එහිදී මේ වන විට තම සේවාදායකයා වෛද්ය ප්රතිකාර ලබා ගන්නා බවත් මානසික කඩා වැටීමකට ලක්ව සිටින බවත් ඔහුගේ හා පවුලේ අයගේ ජීවිත සම්බන්ධයෙන් තර්ජනයක් පවතින්නේ යැයි සැකයක් ඇති බැවින් බියෙන් ජීවත් වන බවත් ලිපියේ සඳහන් කර ඇත. ඒ නිසා මේ සම්බන්ධයෙන් පරීක්ෂණයක් කර සාධාරණය ඉටු කරන ලෙස මිශාර මහතා වෙනුවෙන් පෙනී සිටින නීතිඥ සමාගම ජනාධිපතිවරයාගෙන් ඉල්ලා තිබේ. ලිපියේ පිටපත් අගමැතිවරයාට, අධිකරණ අමාත්යවරයාට. පොලිසිය භාර ඇමති ඇතුළු පාර්ශ්ව හතකට යොමු කර ඇත.
මේ වන විට මෙම සිදුවීමට සම්බන්ධ ජ්යෙ. නියෝජ්ය පොලිස්පති රන්මල් කොඩිතුවක්කු ස්ථාන මාරුවක් ලබා සිටින අතර ඔහු සම්බන්ධයෙන් ඉදිරියට ගනු ලබන ක්රියාමාර්ග මොනවාදැයි අපි පොලිස් මාධ්ය ප්රකාශක නිහාල් තල්දූවගෙන් විමසීමක් කළෙමු. ඔහු ප්රකාශ කළේ මේ වන විට ඒ පිළිබඳව පරීක්ෂණයක් පවතින බවත් එහි කටයුතු සාමාන්ය පරිදි සිදු කෙරෙමින් පවතින බවත්ය.
නොවැම්බර් 03 වැනි දින මඩකලපුව මාධ්ය සමාජය කැඳවා තිබූ මාධ්ය හමුවකට එක් වෙමින් දමිළ ජාතික සංධානයේ පාර්ලිමේන්තු මන්ත්රී ශානකියන් රාසමාණික්කම්ද මේ ගැන අදහස් පළකළේ ය. ”පහුගිය දවසක මඩකලපුවේදී පොලිස් නිලධාරියෙක් තරුණයක් කිහිපදෙනෙක්ට පහරදෙන වීඩියෝ එකක් පැතිරුණා. පහුවදාම ඒ නිලධාරියාරේ වැඩ තහනම් කළා. දැන් ජ්යෙ. නියෝජ්ය පොලිස්පති රන්මල් කොඩිතුවක්කු තරුණයෙක්ට පහරදීලා ලිංගික හිංසන කළා කියලා නීතිඥ සමාගමක් ජනාධිපතිවරයාට ලිපියක් යවලා තියෙනවා. ඔහුට විරුද්ධව මොකුත් කරලා නෑ. ස්ථාන මාරුවක් දීලා විතරයි. ඇයි බැරි ඔහුගේත් වැඩ තහනම් කරන්න. එක රටක් එක නීතියක් කිව්වාට ලොක්කන්ට එකක් පොඩි අයට එකක් තියෙන්නේ‘ ඔහු කීවේය.■
