සූම් සාකච්ඡාවකදී කරන ලද අදහස් දැක්වීමක් ගැන රාජ්‍ය බුද්ධි අංශ ප්‍රධානි මේජර් ජෙනරාල් සුරේෂ් සලේ කරන ලද පැමිණිල්ලක් මත සීඅයිඩීය සිදුකරන පරීක්ෂණය සම්බන්ධයෙන් මූලික අයිතිවාසිකම් පෙත්සමක් ඉදිරිපත් කිරීමට කතෝලික සභාවේ ජනසන්නිවේදන අධ්‍යක්ෂ සිරිල් ගාමිණි පියතුමා තීරණය කර ඇතැයි වාර්තාවේ.
එම සීඅයිඩී පරීක්ෂණය සම්බන්ධයෙන් ප්‍රකාශයක් ලබාදීම සඳහා සිරිල් ගාමිණී පියතුමාට ඔක්තෝබර් 28 වැනිදා පෙනී සිටින ලෙස දැනුම් දී තිබූ අතර සිය නීතිඥයන්ගෙන් උපදෙස් ලබාගැනීම සඳහා සතියක කාලයක් ලබාදෙන ලෙස සිරිල් ගාමිණී පියතුමා සීඅයිඩීයට දැනුම් දී තිබේ.
පාස්කු ඉරුදින ප්‍රහාරයේ නායක සහරාන් හෂීම්ට මූල්‍යමය හා වෙනත් ආකාරයේ සහාය බුද්ධි අංශ විසින් ලබාදී ඇති බවට එම සූම් සාකච්ඡාවේදී සිරිල් ගාමිණී පියතුමා කරන ලද අදහස් දැක්වීමක් හේතුවෙන් තමාට හා බුද්ධි අංශ සාමාජිකයන්ට අපහාසයක් වී ඇතැයි එම පැමිණිල්ලෙන් කියා තිබේ.
එම පැමිණිල්ල සම්බන්ධයෙන් අපරාධ පරීක්ෂණ දෙපාර්තමේන්තුව මහේස්ත්‍රාත් අධිකරණයට කරුණු වාර්තා කර ඇති අතර අධිකරණය දැනුම් දී ඇත්තේ එම පැමිණිල්ලේ විමර්ශන ප්‍රගතිය අධිකරණයට දැනුම් දෙන ලෙසය.■
