චීනයේ කාබනික පොහොර සාම්පල තුන්වන පාර්ශ්වයක් මගින් පරීක්ෂණයක් සිදු කිරීමට පොහොර පිළිබඳ රාජ්ය අමාත්ය ශෂීන්ද්ර රාජපක්ෂ චීන තානාපති කාර්යාලය සමග එකඟතාවකට එළැඹීම 1999 අංක 35 දරන ශාක ආරක්ෂණ පනත උල්ලංඝනය කිරීමක් මෙන්ම එම පනත යටතේ කෘෂිකර්ම අධ්යක්ෂ ජනරාල්වරයාට ලබාදී ඇති බලය උදුරා ගැනීමක් බව එම විෂය සම්බන්ධ නීති උපදේශකයන්ගේ මතය වී තිබේ.
එමෙන්ම එම උපදේශකයන්ගේ මතය වන්නේ තුන්වන පාර්ශ්වයේ පරීක්ෂණයක් සිදුකරන්නේ ප්රතික්ෂේප වූ චීන කාබනික පොහොරම නැවත ලබාගැනීමට බවය.
තවද එම නීති උපදේශකයන් පෙන්වා දෙන්නේ ශාක ආරක්ෂණ පනත උල්ලංඝනය කරමින් මේ ආකාරයට කෘෂිකර්ම අධ්යක්ෂ ජනරාල්වරයා අබිබවමින් තුන්වන පාර්ශ්වයේ රසායනාගාර පරීක්ෂණ මත කාබනික පොහොර හා වෙනත් ශාක කොටස් ආනයනයට ඉඩ ලබාදුනහොත් ඒ මගින් පසට හා කෘෂිකර්මයට දැඩි හානි ගෙනදිය හැකි අහිතකර පලිබෝධක රටට ඇතුල්වීම වැළැක්විය නොහැකි බවය. ඒ සඳහා හේතු වශයෙන් ඔවුන් පෙන්වා දෙන්නේ මෙම තුන්වන පාර්ශ්වයේ සමහර රසායනාගාරවලින් තමන්ට වාසි ආකාරයට මුදලට වාර්තා ලබාගත හැකි බවය.
ශාක ආරක්ෂණ පනත අනුව කාබනික පොහොර ආනයනය කරන්නේ නම් ඒ සඳහා ආනයන බලපත්රයක් කෘෂිකර්ම අධ්යක්ෂ ජනරාල්වරයාගෙන් ලබාගත යුතු අතර ඔහු එම බලපත්රය නිකුත් කරනු ලබන්නේ එසේ ආනයනය කිරීමට නියමිත කාබනික පොහොර සාම්පල ශාක නිරෝධායන සේවයේ රසායනාගාරයේ පරීක්ෂා කර ඒ තුළ අහිතකර පලිබෝධක නොමැති බවට තහවුරු වුවහොත් පමණය.
කෘෂිකර්ම දෙපාර්තමේන්තුවේ ශාක නිරෝධායන සේවයේ රසායනාගාරයේ පරීක්ෂණවලදී අහිතකර පලිබෝධක තිබෙන බවට චීනයේ කින්ඩාවෝ සමාගමේ කාබනික පොහොර සාම්පල අවස්ථා තුනකදී තහවුරු වීමෙන් පසු එම පොහොර ලබා ගැනීම ප්රතික්ෂේප වූ විය.
ඉන්පසු චීන තානාපති කාර්යාලය නිවේදනයක් නිකුත් කරමින් සඳහන් කර තිබුණේ එම පොහොර ශ්රී ලංකාව ප්රතික්ෂේප කිරීම මගින් දෙරට අතර හොඳහිත පළුඳුවීමක් සිදුවිය හැකි බවය.
ඉන්පසු කින්ඩාවෝ සමාගමද නිවේදනයක් නිකුත් කරමින් සඳහන් කර තිබුණේ ශ්රී ලංකාව එම පොහොර තොගය ලබාගත යුතු බව හා එසේ නොවුණහොත් එම පොහොර සම්බන්ධයෙන් මුදල් ගෙවීම් අත්හිටුවා ඇති මහජන බැංකුවට එරෙහිව නීති මගින් කටයුතු කරන බවය.
එසේම සිංගප්පූරුවේ එස්ජීඑස් රසායනාගාරයෙන් එම පොහොර සාම්පල නැවත පරීක්ෂණයකට ලක්කළ යුතු බවද එම සමාගම යෝජනා කර තිබුණි. රාජ්ය අමාත්ය ශෂීන්ද්ර රාජපක්ෂ චීන තානාපතිවරයා සමග එකඟ වී තිබුනේ එම යෝජනාවටය.
කෘෂිකර්ම අධ්යක්ෂ ජනරාල්වරයාගේ ආනයන බලපත්රයක් නොමැතිව චීන කාබනික පොහොර ලබාගැනීම සඳහා ණයවර ලිපි නිකුත් කළේ කෙසේද යන්න හා එම සමාගම ආනයන බලපත්රයක් නොමැතිව ශ්රී ලංකාවට ලබාදීමට පොහොර රැගෙන ආවේ කෙසේද යන්නද එම නීති උපදේශකයින්ගේ ප්රශ්න කිරීමට ලක්වී ඇත.
ඒ සඳහා හේතු වශයෙන් ඔවුන් පෙන්වා දෙන්නේ මෙම පොහොර ගෙන්වීම සිදුකරන ලංකා පොහොර සමාගම චීන සමාගමට මහජන බැංකුවේ ණයවර ලිපි විවෘත කිරීම හා පසුව ඒ මගින් මුදල් ගෙවීම අත්හිටුවීමේ නියෝගයක් ලබාගැනීමය.■
