‘හරිත කෘෂිකර්මය තිරසාරව පවත්වා ගැනීම සඳහා ක්‍රමවත් වැඩපිළිවෙළක් සකස් කිරීම, විවිධ බෝගයන්ට අවශ්‍ය කාබනික පොහොර හඳුනා ගැනීම හා එම පොහොර නිෂ්පාදනය දියුණු කිරීම, කෘමිනාශක හා වල්නාශක නිෂ්පාදන දේශීයව නිෂ්පාදනය කිරීම, දේශීය නිෂ්පාදන මගින් අවශ්‍යතා සැපිරීමේදී ඇතිවිය හැකි හිඟයන් උසස් ප්‍රමිතියෙන් හා ශ්‍රී ලංකා ප්‍රමිති ආයතනයේ අනුමැතීන් යටතේ සීමිත ලෙස ආනයනය කිරීමේ ක්‍රමවේදයන් හා අධීක්ෂණ හඳුනා ගැනීම, කාබනික ආහාර නිෂ්පාදනය හා පරිභෝජනයේ සෞඛ්‍ය සමාජ හා ආර්ථික ප්‍රතිලාභ ජනගත කිරීමේ සන්නිවේදන කටයුතු ප්‍රචලිත කිරීම, මෙම ක්‍රියාවලිය සඳහා රාජ්‍ය සේවයේ සක්‍රීය දායකත්වය ලබා ගැනීම හා ක්ෂේත්‍ර මට්ටමින් කාබනික කෘෂිකර්ම ව්‍යාප්ත සේවා පුළුල් කිරීම’
ඉහත සඳහන් අරමුණු මේ මොහොතේ කාගේ වියහැකි යැයි ඔබට සිතාගත හැකිද? එසේ අසන්නට හේතුව දියුණු ලෝකයේ කිසිදු රටක නැති හා සාර්ථක වී නැති සියයට සියයක කාබනික ගොවිතැනක් පිළිබඳ හදිසි තීන්දුවක් ගෙන එය අසාර්ථක බවට දසතින් චෝදනා එල්ල වද්දී තවදුරටත් මේ මොහොතේ එවැන්නක් ගැන කිසිවකු කටයුතු කරනවා තබා සිතන්නේ වත් නැති බව සිහිබුද්ධිය ඇත්තෙකුට සිතෙන නිසාය.
පසුගිය යල කන්නයටත් අවශ්‍ය පොහොර නැතිව අස්වැන්න පාළුවූ හා ඉදිරි මහා කන්නයට හෝ පොහොර ඉල්ලා රට පුරා උද්ඝෝෂණ පැවැත්වෙන කාලයක හා කෙසේ හෝ ගොවීන්ට පොහොර ලබාදිය යුතු බවට ආණ්ඩු පක්ෂයේ සාමාජිකයන් පවා ප්‍රසිද්ධියේ කියන තත්වයට පත්වී ඇති කාලයක තවදුරටත් කාබනික පොහොරවල එල්ලී සිටීමට උත්සහ දරන්නේ කවුද?
විශේෂයෙන්ම මෙම පොහොර අර්බුදයද හේතුකොටගෙන තමාගේ අතින්ද වැරදි සිදුවූ බව හා එම වැරදි හදාගෙන ඉදිරියට යමු ලෙස ආණ්ඩු පක්ෂ සාමාජිකයන්ගෙන් ඉල්ලා සිටි ජනාධිපතිවරයා තවදුරටත් එවැන්නක එල්ලී සිටිතැයි අපට සිතන්නට හැකිද? නැත, එහෙත් සිදුවී ඇත්තේ එම අරමුණු ජනාධිපතිවරයා 2021 ඔක්තෝබර් 15 දින සිට ක්‍රියාත්මක වන පරිදි 2021 ඔක්තෝබර් 15 අංක 2249/49 අති විශේෂ ගැසට් පත්‍රය මගින් ප්‍රකාශයට පත්කිරීමය. ඒ හරිත කෘෂිකර්මාන්තය පිළිබඳ ජනාධිපති කාර්ය සාධක බලකායක් ස්ථාපිත කිරීම වෙනුවෙන්ය.
ඒ සඳහා පූර්විකාව සඳහන් කරන්නේ මේ ආකාරයටය. ‘සෞභාග්‍යයේ දැක්ම ප්‍රතිපත්ති ප්‍රකාශනය මගින් සංවර්ධිත කෘෂි ආර්ථිකයක් ගොඩනැඟීම, ඉදිරි දශකය තුළ දේශීය හා ජාත්‍යන්තර පාරිභෝගිකයාට වස විසෙන් තොර කෘෂි නිෂ්පාදන ලබා ගැනීමට අවස්ථාව උදාකිරීම හා පරිසර හිතකාමී වගාවන් හඳුන්වා දීමට කටයුතු කරන බව අවධාරණයට ලක්කර ඇති හෙයින්ද,
පසට හා ජලයට එකතු වන රසායන අපද්‍රව්‍ය අවම කරමින්, ජීවනෝපාය මාර්ග තුළින් පරිසර හිතකාමී සෞඛ්‍යාරක්ෂිත හරිත කෘෂිකර්මයක් බිහි කිරීම රජයේ ප්‍රමුඛ පරමාර්ථයක් වන හෙයින්ද,
නවීන තාක්ෂණ උපක්‍රම භාවිත කරමින්, පරිසර හිතකාමී හා කාබනික වගාවන් සිදුකිරීමෙන් තිරසර හරිත කෘෂිකර්මයක් කරා ගමන් කිරීම තුළින් දේශීය හා ජාත්‍යන්තර වශයෙන් ප්‍රතිලාභ අත්කර ගැනීමට ඇති හැකියාව පිළිබඳ අවධානයට ලක්කරමින්ද,
පර්යේෂණ හා නව නිපැයුම් තුළින් අහිතකර කෘෂි රසායන ද්‍රව්‍ය අවම කිරීමට හා පරිසර හිතකාමී දේශීය පරිසර තත්වයන්ට ගැළපෙන කාබනික පොහොර නිෂ්පාදනයට අවශ්‍ය දිරිගැන්වීම් ලබාදීමේ අවශ්‍යතාව සැලකිල්ලට ගනිමින්ද,’ එම ජනාධිපති කාර්ය සාධක බලකාය පත්කරන බවයි.
විජිත් වැලිකල (සභාපති වයිල්ඩ් හොලිඩේස් පුද්ගලික සමාගම), ලලිත් සෙනෙවිරත්න, එස්කේබී කසුන් තාරක අමල් (අධ්‍යක්ෂ ජෛව ජනන හරිත තාක්ෂණ පර්යේෂණ ආයතනය), මාලින්ද සෙනෙවිරත්න (අධ්‍යක්ෂ හෙක්ටර් කොබ්බෑකඩුව ගොවි කටයුතු පර්යේෂණ හා පුහුණු ආයතනය), ආර්බී රසික තුසිත කුමාර (දේශගුණික කෘෂිකාර්මික සම්බන්ධීකාරක/වවුනියාව හා මන්නාරම දිස්ත්‍රික්ක පරිසර හිතකාමී කෘෂිකාර්මික පුහුණු උපදේශක), ආචාර්ය බීකේජේ කාවන්තිස්ස (ප්‍රධාන විධායක අධ්‍යක්ෂ සියපත ජාත්‍යන්තර අධ්‍යාපන හා පුහුණු කිරීමේ ආයතනය පුද්ගලික සමාගම), සමන්ත ප්‍රනාන්දු (කාන්ගර හෝල්ඩිංග්ස් පුද්ගලික සමාගම), සමුදිත කුමාරසිංහ (ලංකා බයෝ ෆර්ටිලයිසර්ස් පුද්ගලික සමාගම), අජිත් රන්දුනු (ග්‍රීන් ෆෝර්ස් ඇග්‍රිකල්චර් පුද්ගලික සමාගම), එන් එම් කලීඩ් (ලංකා නේචර් පවර් පුද්ගලික සමාගම), ශම්මි කිරින්දේ (බයෝ ෆුඩ්ස් පුද්ගලික සමාගම), නිර්මලා කරව්ගොඩ (හයිසෝන්ග් ඕඑන්බී පුද්ගලික සමාගම), චමින්ද හෙට්ටිකන්කානම්ගේ (ආර්කේජී බයෝ ග්‍රීන් ෆාර්ම්), නිශාන් ද සිල්වා (ලෝරන්ස් ලිකිවිඩ් ෆර්ටිලයිසර්) යන මහත්ම මහත්මීන් මෙම කාර්ය සාධක බලකායේ සාමාජිකයෝ වෙති.
කාර්ය සාධක බලකායේ සභාපතිවරයා වන්නේ විජිත් වැලිකල මහතාය. ඔහු හිටපු හමුදා නිලධාරියෙකි. හෝටල් හිමියෙකි. පාරිසරික ක්‍රියාකාරකම් සමග කාලය ගෙවන්නට ඔහුගේ හෝටල්වලදී හැකිය. එසේ නොමැතිව කාබනික කෘෂිකර්මාන්තය ගැනවත්, කෘෂිකර්මාන්තය ගැනවත් ඔහුට විශේෂඥතාවක් හෝ අත්දැකීමක් තිබෙන බවක් දැනගන්නට නැත. එම කාර්ය සාධක බලකායේ අනිකුත් සාමාජිකයන් ගත්තද තත්වයේ වෙනසක් නැත. එහි ඉන්නේ ඉතා සුළු වෙළඳපොළක් සඳහා පෞද්ගලික ව්‍යාපාරයක් ලෙස යම් කාබනික වගාවන් සිදුකරන ව්‍යාපාරිකයන් පිරිසක්, කාබනික කෘෂිකර්මය පිළිබඳ රාජ්‍ය නොවන සංවිධානවල කටයුතු කරන පිරිසක් හා කෘෂිකර්මයට සම්බන්ධ රජයේ ආයතනවලට දේශපාලනික පත්වීම් ලෙස පත්කර ඇති අය පමණය. කෘෂිකර්මය සම්බන්ධයෙන් රජයේ පර්යේෂණ ආයතනවල කටයුතු කරන විෂය සම්බන්ධ ප්‍රාමාණිකයන් හෝ විශ්වවිද්‍යාලවල හෝ උසස් අධ්‍යාපන ආයතනවල කෘෂිකර්මය පිළිබඳ ප්‍රාමාණිකයන් යැයි සැලකෙන කිසිවකු මෙම ජනාධිපති කාර්ය සාධක බලකායේ නැත.
එවැනි පිරිසකගෙන් හරිත කෘෂිකර්මාන්තයක් පිළිබඳ වැඩපිළිවෙළක් බලාපොරොත්තු වීම කෙතරම් සුදුසුද යන්න ප්‍රශ්නාර්ථයකි. කාබනික කෘෂිකර්මාන්තය යනු මහා පරිමාණයෙන් සිදු කරන්නක් නොවේ. එම කෘෂිකර්මාන්තයේ පිරිවැය වැඩිය. අස්වැන්න අඩුය. ඒ නිසාම එහි මිල වැඩිය. එම වැඩි මිල පරිභෝජනය කළ හැක්කේ සමාජයේ ඉතා සුළු ස්තරයකට පමණි. මෙම කාර්ය සාධක බලකායේ සිටිනා බහුතරයක් සිදුකරන්නේ එයය. එය රටකට අදාළ කරගෙන එම රටේ ජනතාවගේ ආහාර අවශ්‍යතාව හිඟයකින් තොරව හා අඩු මිලට සැපයිය හැකිනම් එය විශ්වකර්ම වැඩකි. ජනාධිපතිවරයා මෙතෙක් පත්කර ඇති අතේ ඇඟිලි ගණනටත් වැඩි ජනාධිපති කාර්ය සාධක බලකාවලින් එම විශ්වකර්ම වැඩේ සිදුවී නැති නිසා මේ බලකායත් හුදු බලකායක්ම පමණක් අනුමාන කිරීමට බැරිකමක් නැත.
ආර්ථික පුනර්ජීවනය හා දරිද්‍රතාව තුරන් කිරීම සඳහා වන කාර්යසාධක බලකාය සහ දේශගුණික විපර්යාසයන්ට තිරසාර විසඳුම් සහිත හරිත ශ්‍රී ලංකාවක් ඇති කිරීමේ ජනාධිපති කාර්ය සාධක බලකාය සමඟ මෙම කාර්ය සාධක බලකාය සම්බන්ධීකරණයෙන් කටයුතු කළ යුතු බව ජනාධිපතිවරයා සිය අති විශේෂ ගැසට් නිවේදනය මගින් තවදුරටත් නියම කර තිබේ.
ආර්ථික පුනර්ජීවනය හා දරිද්‍රතාව තුරන් කිරීම සඳහා කාර්ය සාධක බලකායේ ප්‍රධානියා වන්නේ වත්මන් මුදල් ඇමති බැසිල් රාජපක්ෂය. ඔහු එයට පත්කළේ ඇමතිකම බාරගන්නට පෙර ජනාධිපතිවරයාගේ විශේෂ නියෝජිතයා ලෙසය. ඒ මීට වසරකටත් පෙර කාලයකදීය. එහි සෙසු සාමාජිකයන් ලෙස යුද හමුදාපති, පොලිස්පති, පාරිභෝගික කටයුතු පිළිබඳ අධිකාරියේ සභාපති විශ්‍රාමික මේජර් ජෙනරාල් ශාන්ත දිසානායක හා වෙළඳ කටයුතුවලට සම්බන්ධ රාජ්‍ය ආයතනවල ප්‍රධානීන් මෙන්ම පෞද්ගලික අංශයේ ව්‍යාපාරවල ප්‍රධානීහුද සිටිති. එහෙත් රටේ ජනතාවගේ ආර්ථික පුනර්ජීවනයටත්, දරිද්‍රතාව තුරන් කිරීමටත් කළ කෙංගෙඩියක් නැත. ජනතාවගේ තිබුණ ආර්ථිකයත් නැති වී ඇති අතර දරිද්‍රතාවේ නොසිටි ජනයාද දරිද්‍රතාවට ඇද දමා ඇත. එම කාර්ය සාධක බලකාය සමග හරිත කෘෂිකර්මාන්තයක් සඳහා බලකායට සම්බන්ධීකරණයෙන් කටයුතු කරන්නට යැයි කියන්නේ තවදුරටත් රටේ ගොවි ජනතාව ආර්ථික අගාධයට හා දරිද්‍රතාවේ පතුලට ඇද දැමීමටදැයි සැකයක් ඇතිවේ.
දේශගුණික විපර්යාසයන්ට තිරසාර විසඳුම් සහිත හරිත සමාජ ආර්ථිකයක් බවට ශ්‍රී ලංකාව පත්කිරීමේ ජනාධිපති කාර්ය සාධක බලකායේද ප්‍රධානියා මුදල් අමාත්‍ය බැසිල් රාජපක්ෂ වන අතර එහි සෙසු සාමාජිකයන් වශයෙන් චමල් රාජපක්ෂ, සීබී රත්නායක, මහින්ද අමරවීර, මහින්දානන්ද අලුත්ගමගේ, රමේෂ් පතිරණ, දුමින්ද දිසානායක, අරුන්දික ප්‍රනාන්දු, රොෂාන් රණසිංහ, කනක හේරත්, ජානක වක්කුඹුර, මොහාන්ද සිල්වා, විමලවීර දිසානායක, කංචන විජේසේකර, සදාසිවම් වියාලේන්ද්‍රන්, ඩීබී හේරත්, ශෂීන්ද්‍ර රාජපක්ෂ, නාලක ගොඩහේවා, සීතා අරඹේපොල, චන්න ජයසුමන යන රාජ්‍ය හා කැබිනට් ඇමතිවරුන් මෙන්ම ආණ්ඩුකාරවරුන් වන ජනාධිපති දේශපාලන නියෝජිතයින්ද, විවිධ ආයතන හා පර්යේෂණ ආයතනවල නියෝජිතයන්ද, ආණ්ඩුවට සම්බන්ධ වෙනත් විශේෂඥයෝද සිටිති.
මේ අය අතර සිටින දේශපාලනඥයන් ඇතුළු බොහෝ අය දැන් කියන්නේ මේ දඩිබිඩි කාබනික වගාව දැන් රට තුළ අර්බුදයක් ඇති කර ඇති බවය. එය ආපසු හැරවිය යුතු බවය. එවන් තත්වයක් සමග ඔවුන් සමග සම්බන්ධ වී හරිත කෘෂිකර්මාන්තයක් ඇති කරන්නේ කෙසේද යන ප්‍රශ්නයද පැනනඟී. එසේම දේශගුණ විපර්යාසයන්ට එම කාර්ය සාධක බලකාය මෙතෙක් කළ කෙංගෙඩියක් නැති බවද අප තේරුම් ගත යුතුය.
එවන් තත්වයක් තුළ මෙතෙක් රටට දැනෙන කිසිවක් නොකළ කාර්ය සාධක බලකා සමග සම්බන්ධීකරණයෙන් හෝ තනිවම මෙම කාර්ය සාධක බලකායටත් කළ හැකි කිසිවක් මේ මොහොතේ නැති බව පැහැදිලිය. ඒ අනුව ජනාධිපතිවරයාගේ මෙම කාර්ය සාධක බලකාය තවත් එක් කාර්ය සාධක බලකායක් වනවාට කිසිදු සැකයක් නැත. ඊට හේතුව මේ කාර්ය සාධක බලකා බොහොමයක සිටින්නේ කාර්ය සාධක බලකා කිහිපයක සිටින පුද්ගලයින් පිරිසක් වීමත්, ඔවුන්ට පවරා ඇති කාර්යයන් මේ මොහොතේ මහා පොළවේ යථාර්තයක් බවට පත් නොවූ හා යථාර්තයක් බවට පත්කළ හැකි ඒවා නොවන නිසාය.■
