■ අමන්දිකා කුරේ
හිටපු ඇමතිනි නිරූපමා රාජපක්ෂ හා ඇගේ සැමියා වන තිරුකුමාර් නඩේසන් සම්බන්ධයෙන් පැන්ඩෝරා පත්‍රිකාවලින් හෙළිදරව් කරන ලද කරුණු පිළිබඳව සිදු කෙරෙන පරීක්ෂණ තවම මූලික අදියරේ පවතින බව අල්ලස් හෝ දූෂණ විමර්ශන කොමිසමේ ලේකම් අප්සරා කල්දේරා අනිද්දා කළ විමසීමකදී ප්‍රකාශ කළා ය.
තිරුකුමාර් නඩේසන්ගෙන් ප්‍රකාශ සටහන් කරගත් බවත් දැනට දේශීය බැංකු හා දේශීය ආදායම් දෙපාර්තමේන්තුවෙන් ලබා ගත් මූලාශ්‍ර අධ්‍යයනය කරමින් පවතින බවත් ඇය ප්‍රකාශ කළා ය.
නිරූපමා රාජපක්ෂ ප්‍රකාශ සටහන් කර ගැනීම සඳහා තවම කැඳවූයේ නැත්තේ ඇයිදැයි කළ විමසීමේදී තවම ඒ ගැන තීරණයක් ගෙන නැති බව ඇය ප්‍රකාශ කළාය. පරීක්ෂණ මූලික අදියරේ පැවතීම ඊට හේතුව බව ඇය කීවාය. එමෙන්ම මෙම පරීක්ෂණ තවමත් මූලික අදියරේ පවතින බැවින් අධිකරණයට කරුණු දැක්වීමක් කර නොමැති බවද ඇය කීවාය.
මෙම පැන්ඩෝරා හෙළිදරව්ව සම්බන්ධයෙන් තිරුකුමාර් නඩේසන් හා නිරූපමා රාජපක්ෂ යන දෙදෙනා පිළිබඳව පරීක්ෂණ කරන ලෙස ඉල්ලන ජනාධිපතිවරයාගේ ඉල්ලීම ද ඇතුළුව පැමිණිලි හතක් අල්ලස් හෝ දූෂණ චෝදනා විමර්ශන කොමිසමට ලැබී තිබේ.
ගවේෂණාත්මක මාධ්‍යවේදීන්ගේ ජාත්‍යන්තර එකතුව විසින් පසුගිය ඔක්තෝබර් 03 වන දින පැන්ඩෝරා පත්‍රිකා හරහා ලොව පුරා වත්කම් හෙළි නොකළ පුද්ගලයන් රැසකගේ වත්කම් සම්බන්ධයෙන් හෙළි කළ අතර ඒ අනුව හිටපු ඇමතිවරියක් වන නිරූපමා රාජපක්ෂ හා ඇගේ සැමියා වන තිරුකුමාර් නඩේසන්ගේ වත්කම් සම්බන්ධයෙන් ද හෙළිදරව් කර තිබුණි.■
