2026 වර්ෂයේ පැවැත්වීමට නියමිත පොදු රාජ්‍ය මණ්ඩලීය ක්‍රීඩා උළෙල ශ්‍රී ලංකාවට ලබා ගැනීම සඳහා ක්‍රීඩා අමාත්‍ය නාමල් රාජපක්ෂගේ උපදෙස් මත ජාතික ඔලිම්පික් කමිටුව උත්සහයක නිරතවන බව මාධ්‍ය වාර්තා පළවී ඇත.
මේ සමගම මතකයට එන්නේ මීට පෙර 2018 පොදු රාජ්‍ය මණ්ඩලීය ක්‍රීඩා උළෙල හම්බන්තොට නගරයට ලබා ගැනීම සඳහා නාමල් රාජපක්ෂ, මහින්දානන්ද අලුත්ගමගේ, අජත් නිවාඩ් කබ්රාල් ඇතුළු පිරිස නැටූ නාඩගමය. කැරීබියන් රාජ්‍යක් වන සෙන් කිටිස්හා නේවිස්හි පැවති පොදු රාජ්‍ය මණ්ඩලීය මහා මණ්ඩල රැස්වීමට ගොස් 2011 වර්ෂයේදී එම හපන්කමේ ඡායාරූප ගැන නොදන්නා අයෙක් නැත.
අදත් මේ පිරිසට පොදුරාජ්‍ය මණ්ඩලීය ක්‍රීඩා උළෙල ලබා ගැනීම වෙනුවෙන් කෝච්චි නැටුම් නැටීමට හැකිය.
සීඩබ්ලිව්ජී හම්බන්තොට 2018 ප්‍රයිවට් ලිමිටඩ් යනුවෙන් ගිණුමක් මහින්දානන්ද අලුත්ගමගේ හා අජිත් නිවාඩ් කබ්රාල්ගේ සම සභාපතිත්වයෙන් ආරම්භ කර ඒ සඳහා රුපියල් මිලියන 700ක පමණ මුදලක් එකතු කර තිබූ අතර ඒ සඳහා රාජ්‍ය අරමුදල්ද රුපියල් මිලියන 200කට ආසන්න ප්‍රමාණයක් ලබාගෙන තිබුණි. පොදු රාජ්‍ය මණ්ඩල ක්‍රීඩා උළෙල ලබා ගැනීම සඳහා යැයි කියමින් එම මුදල් වියදම් කර තිබුණත් එම වියදම් ප්‍රශ්නකාරි විය. ඒ නිසාම අල්ලස් කොමිසමට ඒ සම්බන්ධයෙන් පැමිණිලි පවා ගියේය. පෙනෙන්ට තිබූ එකම දෙය වූයේ සෙන් කිට්ස් වෙත එම අවස්ථාවේ අනර්කලී ආකර්ෂා, මුත්තයියා මුරලිදරන්, අරවින්ද ද සිල්වා ඇතුළු 160 නඩයක් ගෙන යෑම පමණය.
සිහින දැකීම හොඳය. නමුදු එම
සිහින යථාර්ථයක් බවට පත්කර ගත හැකි සීමාවක තිබීම පිස්සු නොවැටීමට හොඳය. ලෝකයේ පවතින ක්‍රීඩා උළෙල අතරින් ඔලිම්පික්වලට පසු විශාලම ක්‍රීඩා උළෙල වශයෙන් පොදු රාජ්‍ය මණ්ඩලීය ක්‍රීඩා උළෙල හැඳින්විය හැකිය. ආසියාවෙන්ම එම ක්‍රීඩා උළෙල දැනට පවත්වා ඇත්තේ ඉන්දියාව හා මැලේසියාව පමණය. ශ්‍රී ලංකාව තවම පවත්වා ඇත්තේ දකුණු ආසියානු ක්‍රීඩා උළෙල පමණය. ඒ ද අවස්ථා දෙකකදීය. නේපාලය අවස්ථා තුනක පවත්වා අපට වඩා ඉදිරියෙන් සිටී.
ඊළඟට ඇති ආසියානු ක්‍රීඩා උළෙල පවා අපට තවම බොහෝ ඈතය. දකුණු ආසියානු රටවලින් එම ක්‍රීඩා උළෙල පවත්වා ඇත්තේ ඉන්දියාව පමණය. අසල්වැසි මහා බලගතු ඉන්දියාවට තවම ඔලිම්පික් ක්‍රීඩා උළෙලක් පවත්වන්නට හැකි වී නැත.
මේවූ කලී යථාර්ථයය. යථාර්ථයට ඔබ්බෙන් වූ සිහින වූ කලි ඒවා සැබෑ කර ගැනීම සඳහාම දකින ඒවා නොවේ. වෙනත් අරමුණක් සඳහා දකින ඒවා විය හැකිය.■
