මුදල් අමාත්‍යාංශයේ නිලධාරී කණ්ඩායමක් සමග පාර්ලිමේන්තු මන්ත්‍රීවරු දෙදෙනෙකු ශ්‍රී ලංකා රක්ෂණ සංස්ථාවට පැමිණ එම සංස්ථාව ඉදිරිපත් කර ඇති මූල්‍ය තොරතුරු නිවැරදි නොවන බව එහි කළමනාකාරිත්වයට දැනුම් දී ඇතැයි වාර්තාවේ.
මෙසේ පැමිණ ඇති මන්ත්‍රීවරුන් දෙදෙනා වන්නේ මධුර විතානගේ හා සංජීව එදිරිමාන්නය.
ඔවුන් පැමිණ ඇත්තේ ඔක්තෝබර් 7 වැනිදා වන අතර පැමිණි කණ්ඩායම එහිදී ජනාධිපතිවරයාගේ සෞභාග්‍යයේ දැක්ම ප්‍රතිපත්ති
ප්‍රකාශනයේ ඇති කරුණුවලට රක්ෂණ සංස්ථාව කිසිදු සහයෝගයක් ලබාදී නැති බවට දොස් පැවරීමක් කර ඇති බව එම සංස්ථාවේ නිලධාරියෙක් අනිද්දාට පැවසීය.
මෙම සිදුවීමෙන් පසු රක්ෂණ සංස්ථාවේ වෘත්තීය සමිති කිහිපයක් එක්ව එම ආයතනය තුළ පසුගිය කාලයේ සිදුවී ඇති නාස්තිකාර වියදම් සම්බන්ධයෙන් කරුණු ඇතුළත් පත්‍රිකාවක් බෙදා හැර ඇති අතර එම වියදම් සම්බන්ධයෙන් පරීක්ෂණයක් පැවැත්විය යුතු බව අවධාරණය කර ඇත.
මුදල් අමාත්‍යාංශයේ නිලධාරීන් පිරිසක් සමග පාර්ලිමේන්තු මන්ත්‍රීවරුන් පිරිසක් පැමිණියේ ඇයිද යන්න ගැන එම සංස්ථාවේ වෘත්තීය සමිති අතර සැකයක් ඇතිවී ඇත.
එම පැමිණීම රක්ෂණ සංස්ථාව යළි පෞද්ගලීකරණයට ලක්කිරීමේ උත්සාහයක්ද යන්න ගැන සාකච්ඡාවට ලක්වී ඇත.■
