කල්කි
මත්ද්‍රව්‍ය අධිරාජ්‍යයට දෙවියන් වැඩමවීම

printgraphic2@gmail.com

ලෝකය අවසන් වෙමින් තිබේ.
මෙවැනි සඳහනක්, මෙවැනි පත්‍රිකාවක් ඔබ අත පත්වුවහොත් මේ අවිනිශ්චිත සමයේ ඔබේ සිතේ හටගන්නා හැඟීම කුමක් ද? මිහිමත සියලු මිනිසුන් ක්ෂණිකව ඝාතනය කිරීමේ හැකියාවක් රසායනික අවියකට හෝ කිසියම් බලසම්පන්න පුද්ගලයකුට හෝ ඇත්තේ ද? මරණීය වයිරස හා විෂ වර්ග තිබෙන පැළෑටියකට මේ හාස්කම කළ හැකි ද?

ඇමරිකානු ලේඛක Gore Vidal (ගෝර් විදාල්) ගේ KALKI (කල්කි) නවකතාව, වසංගත බිය පැතිර යමින් පවතින මෑතකාලයේදී දෙවන වරටත් කියවන්නට සිතුණේ කුමක් නිසා දැයි හරියටම කියන්නට බැරි ය. එකක් නම් පැහැදිලි ය. අවතාරවලට බිය වන මිනිසුන් හොරෙන් හොරෙන් හෝ ඇස්කොනින් හෝ අවතාර නරඹන්නට කැමති ය; අවතාරය මග හරින්නට නොකැමැති ය.

කල්කි නවකතාව, ගාමිණී වියන්ගොඩගේ සිත්ගන්නාසුලු බසින් සිංහලට පරිවර්තනය වී නොතිබුණේ නම් එය කියවීම, අවශෝෂණය කරගැනීම පාඨකයාට ගැටලු සහගත වීමට ද ඉඩ ඇති බව මගේ පෞද්ගලික අදහසයි. එහෙත් විජේසූරිය ග්‍රන්ථ කේන්ද්‍රයේ ප්‍රකාශනයක් වන ‘කල්කි’ සිංහල පරිවර්තනය කියවාගෙන යා හැක්කේ කජුකන්නාක් මෙන් ය.

නේපාලේ පදිංචි වෙලා ඉන්නවා ඇමරිකන් ගැටයෙක්. කත්මණ්ඩු නුවර. මිනිහා හින්දු. ඇත්තම කියනවා නං මිනිහා කියන්නේ එයා තමයි හින්දු ගැලවුම්කාරය කියලා. නම කල්කි. සමහර වෙලාවට ඔයත් දැකලා ඇති එයාගේ ගෝලයෝ. ඔය හැම තැනම ඉන්නේ පත්‍රිකා බෙද බෙදා. ඒ විතරක් නෙවෙයි. කඩදාසි මල් වගේකුත් බෙදනවා නොමිලේ ම!’ (කල්කි, 21 පිටුව)

බෙවර්ලි හිල්ස් පිහිනුම් තටාකය අසල මල්වැල් වැටුණ නානකොට කලිසමක් හැඳ සිටින මෝර්ගන් ඩේවිස් නම් වූ මාධ්‍යවේදියා – හිරු පත්‍රයේ කර්තෘ, කල්කි පිළිබඳ මේ හැඳින්වීම කරන්නේ ටෙඩී ඔටින්ජෙර් නම් වූ ගගනගාමිනියට ය. දරු දෙදෙනකුගේ මවක වුව ද මාතෘත්වයෙන් ඔබ්බට ගමනක් යමින් සිටින ටෙඩී, සැමියාට නඩත්තු මුදලක් මාසිකව ගෙවන වෙන් වූ බිරිඳකි. ඇය උරුම කොට ඇත්තේ විෂම ලිංගික අභිප්‍රේරණයන් ය. ලෝකයේ හොඳම අහස් යාත්‍රිකාව ලෙස සම්මානයට පාත්‍රව සිටිය ද, වාර්තාකාරියක හෝ මාධ්‍යවේදිනියක නොවන ටෙඩී දෙසට කපටි තැරැව්කාර බැල්මක් හෙළමින් හිරු කර්තෘ මේ කරන්නේ අමුතුම යෝජනාවකි.

තව සුමාන තුනකින් මයික් වොලස් සීබීඑස්. එකේ ‘විනාඩි හැටේ’ වැඩසටහනට කල්කිගේ සම්මුඛ සාකච්ඡාවක් කරන්න යනවා. සම්මුඛ සාකච්ඡාවට කල්කි නිකං කැමැත්ත දීලා තියෙනවා. එච්චරයි. දැන් මං කියන්න යන්නේ මේකයි. මට ඕනේ සී.බී.එස්. එකට කොකා පෙන්නන්න, ඔයා තමයි ඒකට යන්න ඕනේ. ‘හිරු’ පත්තරේ වෙනුවෙන් ඔයාට පුඵවන් කල්කිව සම්මුඛ සාකච්ඡාවට ගන්න.’ (22 පිටුව)

දෙකට දෙවාරණේ මේ යෝජනාව ගැන සිතා බලන ටෙඩී, ශාන්ත මොනිකා පාරේ පිහිටි කල්කි ආශ්‍රමයට ගොස් දවසක් නතරවී සිටිය ද ‘කල්කි’ දෙවියන් ලෙස හඳුන්වන්නේ කුමක් නිසා දැයි ඇයට සිතාගත හැකිවන්නේ නැත. ‘මණ්ඩාලි’ නමින් තමන් හඳුන්වාගන්නා, කසාවත් හැඳි කල්කිගේ ගෝලයෝ ද ලෝකාවසානය අතළඟ යැයි විශ්වාස කරති. මිනිස් වර්ගයාගේ ඊළඟ යුගචක්‍රය තුළ ඉපදීම සඳහා යාඥාවෙන්, මත්ද්‍රව්‍යයෙන් හා මස්මාංසයෙන් ද ලිංගික සේවනයෙන් ද වැළකී ආත්මය පවිත්‍රකරගත යුතු යැයි ද සිතති. සැබෑ ශුද්ධවන්තයන්, බුදුන් වහන්සේ දෙසූ නිර්වාණයට එනම් කිසිවක් නැති තත්ත්වයට පත්වනු ඇත. මේ සමස්ත අත්දැකීම ම ටෙඩීට ප්‍රහේළිකාවකි. කෙසේ වුව ද ඇය වැඩට බසින්නේ සතිදෙකක් මුඵල්ලේ උපනිෂද් ඇතුඵ හින්දු ආගමික කෘති ගණනාවක් කියවා හමාර කොට ය. නවදිල්ලියේ ඔබරෝයි හිල්ටන් හෝටලයට ටෙඩී එන්නේ ලී, දුම්, මාඵපිනි සහ අශුචි ගඳ සුවඳ මිශ්‍ර වාතය ආශ්වාස කරමිනි. මේ අතර ඇගේ කාමරයේ ඇඳ අසල දූරකථනයට ඇමතුමක් ලැබෙයි.

‘මිසිස් ඔටින්ජේර්…? මේ ලක්ෂ්මි… මං කල්කිගේ නෝනා. මං පල්ලෙහා ශාලාවේ ඉන්නවා’

ලොබියේ හිඳ සිටින රූබර ඇමරිකානු කෙල්ල අතින් ගෙන ඉන්නේ සැබෑම සුදු නෙඵමකි. ‘ප්‍රණාම්’ යි ආචාර කරන යුවතිය හිටිහැටියේම ටෙඩීගෙන් අසන්නේ ‘ඔයා අරගෙන ආව ද ඔයාගේ පයිලට් ලයිසන් එක?’ කියා ය. ‘ඔයාට පුඵවන් ද ලියර් ජෙට් එකක් එලවන්න?’ යි යළි අසන ලක්ෂ්මි, උදව්වක් ද ඉල්ලා සිටියි. ඒ යානය පැදවීම සම්බන්ධයෙනි.

‘දෙයියන්ටත් උදව් ඕනේ ද?’ මම ඇසුවෙමි. ‘මට සමාවෙන්න. මං කියපු දේට හිත රිදුණ නං.’

මුල සිට ම ගැහැනියක විදිහටත්, ලක්ෂ්මි විදිහටත් ඈ මගේ සිත් ගත්තා ය.
ඇගේ සිනාව සැලුණේ නැත.

‘අපෙන් හුඟක් දේවල් දෙයියන්ට ඕනේ කරනවා ටෙඩී. අපි ගත්තා ලියර් ජෙට් එකක්. මෙතන එයාර් පෝට් එකේ ඒක තියෙනවා. කත්මණ්ඩු ඉඳලා මං ඊයේ අවේ ඒක බාරගන්නමයි. ඒ වුණාට ඒක එළවන්න හිටපු පයිලට්ට පාචනේ හැදිලා. එයාගේ උදව්වට හිටපු පයිලට් ගැන කිසි විශ්වාසයක් නැහැ. දෙයියෝ එව්වා වගේ බලන්න. අද ඔයාම මෙතනට ආපු හැටි. ඔයා අපට උදව් කරනවා නේ?’ ඔයා එහෙනං එළවගෙන යන්න. ‘ගරුඬා’, අනේ’. (56 පිටුව)

‘ගරුඬා’ කියන්නේ විෂ්ණු දෙවියන්ගේ වාහනයට ය. ‘කල්කි’ යනු විෂ්ණුගේ දසවන අවතාරයයි. සුදු අසකු අරා ලොව පහළ වන කල්කි, වැරදිකරුවන්, අපරාධකරුවන් වනසා දමයි.

ගරුඬා යානය පරික්ෂා කිරීමේදී බඩු පටවන මැදිරියේ තාර තැවරූ රෙද්දක් යට බැටරි පෙළක් වැනි යමක් දකින ටෙඩී, සැණෙකින් එය හඳුනාගන්නේ කාලබෝම්බයක් ලෙස ය. සේවක ප්‍රධානියාගෙන් ඒ ගැන විමසූ විට ඔහු කියන්නේ මෙවැන්නකි.

‘බැටරි’ ඔහු කී ය. ‘අමතර බැටරි. හරි ප්‍රයෝජනයි. කත්මණ්ඩු නුවර අමතර කොටස් හොයාගන්න නැහැ. තිබුණත් හරි ගණං.’ (65 පිටුව)

අවදානම බාරගෙන බෝම්බයේ පුපුරණ යාන්ත්‍රණය ඉවත්කළ පසු ලක්ෂ්මිගෙන් ටෙඩී විමසා සිටින්නේ කල්කිගේ හෝ ඇගේ හෝ ජීවිතයට තර්ජනයක් එල්ල වූ ප්‍රථම අවස්ථාව මේ දැයි කියා ය.

‘ඔව්. පළවැනි අවස්ථාව’ ඇගේ ස්වරය උපශාන්ත ය. ‘ඒත් කල්කි කියන්නේ නං තවත් ඒ වගේ අවස්ථා තියෙන්න පුඵවන් කියලයි.’ …. ‘කලියුගේ ඉවර වෙන කොට භයානක දේවල් සිද්ධ වේවි’ (67 පිටුව)

‘හිරු’ පත්තරයට වැදගත් වන තොරතුරක් ලැබී ඇතැයි ටෙඩීට සිතෙයි. නැවුම් ප්‍රවෘත්තිය වන්නේ කිසිවකු නොදන්නා ඓතිහාසික කල්කිගේ බිරිඳ හෙවත් වර්තමාන ඩොරිස් පැස්කර් හමුවීම ය. ‘ඔයාට මුලින් ම කල්කිව හම්බ වුණේ කොහේ දි ද?’ ‘අපි දෙන්නා මහා සාගරෙන් මතු වුණු වෙලාවේ. නෙඵම් පොහොට්ටුවෙන්.’ (68 පිටුව)

ලක්ෂ්මි එසේ පවසන්නේ දෙවඟනකගේ ගැඹුරු ස්වරයෙනි; ඒ අතීත ලෝකයෙන් පසු මෙලොව උත්පත්තිය සිදු වූයේ කවදා දැයි ටෙඩී ඇසූ විට, 1970 අවුරුද්දේ චිකාගෝ නුවරදී තමා උපන්නේ සිසේරියන් සැත්කමකිනියි ඇය කියයි. කල්කි සමඟ විවාහ වූයේ චිකාගෝ නුවරදී දැයි ඇසූ ඇසිල්ලේම ඇගේ ස්වරූපය යළි වෙනස් වෙයි; ලක්ෂ්මි හෙවත් ස්වර්ග රාජිනිය ඇයට යළි ආරූඪ වෙයි.

කත්මණ්ඩු නුවර කිළිටි කුඩා කාමර කිහිපයක් සහිත ‘බ්ලූමූන්’ ආපනශාලාවේදී තුනපහ මිශ්‍ර එළවලු තැම්බුම් හොද්දකින් කුසගිනි නිවාගන්නා ටෙඩී සමඟ දෙවන වරටත් පෑහෙන්නට උත්සාහ කරන්නේ ඩොක්ටර් අශෝක් නම් වූ වියපත් ඉන්දියානුවා ය. ගුවන් යානයේදී ඇය හමුවූ මොහොතේ ඩොක්ටර් අශෝක් කියා සිටියේ කල්කි භයානක බොරුකාරයෙකියි කියා ය. අශෝක් සී.අයි.ඒ. සංවිධානයේ නියෝජිතයකු යැයි සිතා සිටින ටෙඩීට ඔහු සිය හැඳුනුම්පත පෙන්වන්නේ ‘බ්ලුමූන්’ හිදී ය. අනුරාගී හැසිරීම් රටාවක් ප්‍රකට කරන ඩොක්ටර් අශෝක්, වරක් ටෙඩීට මෙවැනි හෙළිදරව්වක් ද කරයි.
‘මට ඕනේ ඔයාගේ උදව්. ඇමරිකන් ආණ්ඩුවට ඕනේ ඔයාගේ උදව්. ඉස්සර අමෙරිකන් හමුදා වෛද්‍ය බළඇණියේ හිටපු මේ ජේ.ජේ. කෙලී කියන පුද්ගලයා. අපි අද මේ වාඩි වෙලා ඉන්න කත්මණ්ඩු නුවරින් ක්‍රියාත්මක වෙන ඊනියා ‘රත්තරන් ත්‍රිත්වය’ කියන මත්ද්‍රව්‍ය ජාවාරමේ ප්‍රධාන පුද්ගලයෙක් විතරක් නෙවෙයි. සමහරවිට වෙනස් වුවමනා එපාකම් උඩ වෙන්න පුඵවන්. සෝවියට් කේ.ජී.බි. ඔත්තු සේවයේත් ඒජන්තයෙක්. කේ.ජී.බී. එකට ඕනේ කරන්නේ මොකක් ද? නේපාලේ හරහා චීනෙ සහ ඉන්දියාව අතර පුඵවන් තරං ගැටුම් ඇති කරන්න. ඒ විතරක් නෙවෙයි. කල්කිගේ ආගම හරහා ඇමෙරිකාවටත් හොට දාගන්නයි. ඇයි ඒ? අමෙරිකාව දුර්වල කරන්න.’ (75-76 පිටු)

ජේ.ජේ. කෙලී හෙවත් ජිම් කෙලී යනු කල්කිගේ මුල් නම ය. එහෙත් කල්කි කියන්නේ ජිම් කෙලීට නොවේ. ජිම් කෙලී යනු කල්කි ද නොවේ. කල්කි යනු ජිම් කෙලීගේ සිරුර බද්දට ගත් තැනැත්තා ය.

කත්මණ්ඩු නුවර පිහිටි කල්කි ආශ්‍රමයෙදී දුටු කල්කිගේ බාහිර ස්වරූපය මෙන් ම ඔහුගේ හැසිරීම් හා කතාබහ ද ටෙඩී තුළ සිදුකරන්නේ කිසියම් විපර්යාසයකි. කහ සිවුරක් හැඳ සිටින කල්කිගේ පුෂ්ටිමත් දෙපා එකිනෙක පැටළී තිබේ; ඒවා රන් පැහැති ලෝමවලින් ගහණ ය. ඒ මුහුණ ක්‍රිස්තුන් වහන්සේට වෙනස් වන්නේ මුඵමනින්ම රැවුළ බා ඇති හෙයිනි. යටපත්ව පැවති සිය විෂම ලිංගික ප්‍රේරණ බලා සිටියදී අවදිවනු ටෙඩීට හැඟෙයි.

‘ප්‍රණාම්’

ඒ, කල්කිගේ ආකර්ෂණීය හඬ ය. එය කාමෝද්දීපිත හඬකි. ඒ ගීතවත්, ගැඹුරු පුරුෂ ස්වරය බැස යන සෙවණැල්ලක් සේ පහළ ස්වරයකට ක්‍රම-ක්‍රමයෙන් මාරු වී යයි.

‘මම තමයි අවතාරය’ ඔහුගේ ලීලාව සාධාරණ ය. ‘උත්තමයන්ගෙන් උත්තමයා මමයි. ඔබ ඔබට ආලය කරනවාටත් ඉහළින් ඔබ ඔබට ආලය කරවන දිව්‍ය ප්‍රේමය මමයි. මට කලින් හිටියේ සොරොස්තර්, රාමා, ක්‍රිෂ්ණා, බුද්ධ, ජේසුස් එතකොට මොහොමඩ්. දැන් මං ඇවිල්ලා ඉන්නවා. අච්චා. මං මෙතන. මං තමයි අවසාන අවතාරය. මේ කාල චක්‍රයේ එන අන්තිම උත්පත්තිය. ධූමකේතුවක් වන් නන්දක නම් වූ අසිපත දකුණතින් දරා සුදු අසු පිට මා නගින දාට මං දුෂ්ටයන් වනසනවා. (89 පිටුව)

කල්කි, ටෙඩීට සවන් යොමුකරන්නේ දයාවෙනි. ප්‍රථම වතාවට කල්කිගේ දරුණුකමක් ඇයට හැඟී යන්නේ අඩි හතළිස් දහසක් ඉහළට තමා රැගෙන යන්නට කල්කිට ඉඩදුන් දවසේ ය; කෙසේ වුව ද හිමාලය පැත්තට යොමු වූ කල්කිගේ ගුවන් ගමනට ටෙඩී එක්වන්නේ ප්‍රමෝදයෙනි. ‘මොනව ද මං හිරු පත්තරේට ලියන්න ඕන?’

‘මම, හිරු කියලා ලියන්න. ඒ වගේම තරු, සඳු මම කියලා ලියන්න.

‘ඔයා තමයි අන්තිම’

‘ඒ වගේම ආරම්භයත්’

ටෙඩී පසුවන්නේ සොඳුරු චකිතයකිනි. සිරුරේ සීතල වෙවුලීමක් හටගනිද්දී ඇය මෙසේ ද කියයි.

‘ඒ වුණාට මම දැනටමත් ලියල තියෙන්නේ ඔයා බ්‍රහ්මචාරියි කියල’

‘හැම වෙලාවකම තියෙනවා විශේෂ අවසර කියලා දෙයක්. දෙවියන්ට පුඵවන් ඔයාට ඇතුඵ වෙන්න. දෙවියන්ට පුඵවන් ඔයාව තෝරගන්න.’
‘ඒක ආරාධනාවක් ද?’ (99 පිටුව)

කල්කි විසින්ම (හොඳින් සිතාමතාම) ගෙනැවිත් තිබූ කම්බිලිය මත ඔවුන් වැතිර සිටින්නේ පැරණි දේවස්ථානයක් අසල ය. මේ දේවස්ථානය නරඹන්නට මීට කලින් ටෙඩී සමඟ පැමිණ සිටියේ ජෙරල්ඩීන් ය.

මම කලිසම උඩට ඇද ඇූඳගත්තෙමි. කල්කි ලෝගුව පහළට දාගත්තේ ය. මා සපත්තුවේ පටි ගැට ගසන අතරේ ඔහු කට්ට කෑලි දෙක කකුලට දාගත්තේ ය.
‘ඉතින්’ මම කීමි.
‘සෑහුණා ද?’ (123 පිටුව)

මෙය දේවත්වය කෙලෙසීමක් ලෙස වරදවා වටහාගත යුතු ද? සම්‍යග්දෘෂ්ටික, මහේශාඛ්‍ය යැයි කියන බොfාහ් දෙවියෝ බහුභාර්යා සේවනයේ යෙදුණෝ නොවෙත් ද?

නිව් ඕර්ලියන්ස් නගරයේ පිහිටි ‘ඝර්ම කලාපීය පක්ෂි සහ මත්ස්‍ය සමාගම’ කරා ටෙඩී ගමන් කරන්නේ අරමුණු දෙකක් ඇතිව ය. මේ වන විට ඇය සිටින්නේ කල්කි ව්‍යවසායේ සේවිකාවක ලෙස සේවය කිරීමට අත්සන් තබා ඇති අතරේ ජාතික හිරු පුවත්පතට ද තොරතුරු සපයමිනි. නිව් ඕර්ලියන්ස් ගමනට තුඩුදුන් මේ ද්විපාක්ෂිකත්වය සිත පිනවන්නකියි ඇය කියයි. පක්ෂි සහ මත්ස්‍ය සාප්පුවේ ‘පෞද්ගලික’ යනුවෙන් ලියැවුණු දොරක් අසල ටෙඩී රැඳී සිටියදී වැසූ දොර විවර කරමින් විධායක බෑගයක් ද රැගෙන එළියට එන්නේ ජාත්‍යන්තර මත්ද්‍රව්‍ය මර්දන ඒකකයේ ප්‍රමුඛ පෙළේ නියෝජිතයෙකි. ඔහුගේ බෑගය පිරී ඇත්තේ නෝට්ටුවලිනි. ඝර්මකලාපීය පක්ෂි සහ මත්ස්‍ය සමාගමේ හිමිකරු වන ඩොක්ටර් ලොයෙල් ජාත්‍යන්තර මත්ද්‍රව්‍ය ජාවාරමේ ප්‍රමුඛයෙකි; කල්කි ව්‍යාපාරයේ ද සමීපතමයෙකි.

කල්කිගේ අවසාන නිවේදනය මිනිසුන් හමුවේ එළිදක්වන්නට නියමිතව ඇත්තේ මැඩිසන් චතුරස්‍ර උද්‍යානයේදී ය. චතුරස්‍රයට එදා එක්රොක්වන්නේ අමෙරිකානුවන් පමණක් නොවේ. විසිවන සියවසේ ආධ්‍යාත්මික සම්මෝහනය වූ ‘බීට්ල්ස්’ කණ්ඩායම වෙනුවෙන් ගැලූ ජනගංගාවට ද වැඩි ජනසන්නිපාතයක් එදා එහි පැමිණෙන්නේ ඩොලර් තුන්දහස බැගින් දී කඵකඩයෙන් මිලදී ගත් ප්‍රවේශපත්‍ර ද සමඟිනි. ‘අවසානය’ ප්‍රාසංගික ලෙස ප්‍රතිනිර්මාණය කිරීමේ කාර්යය පැවරී ඇත්තේ මහාචාර්ය ලුඩ්වින් ජොසී නම් වූ නොබෙල් ත්‍යාගලාභී විද්‍යාඥයාට ය. වේදාන්ත දර්ශනය ද හැදෑරුවකු වන මහාචාර්ය ජොසී, කල්කි ආශ්‍රමයේ සාමාජිකත්වය ලැබූ (මණ්ඩාලියකු වූ) මුල්ම විද්‍යාඥයා ද වෙයි. කිසියම් අවස්ථාවක ටෙඩීට ඒ ගැන පැහැදිලි කරමින් මහාචාර්ය ජොසී කියන්නේ පරමාණුවේ පැහැදිලි හා අසාමාන්‍ය චිත්‍රයක් එහිදී ප්‍රාසංගිකව ඉදිරිපත් කෙරෙන බව ය. ලෝක විනාශයට පසු (ටික දෙනෙක් හෝ) වෛකුන්තයට යන අවස්ථාව ප්‍රාසංගිකව සංකේතවත් කෙරෙන්නේ (නිරූපණය කෙරෙන්නේ) පෙර නුදුටු විරූ වර්ණ මංජරියකිනි යි ඔහු වැඩිදුරටත් කියයි.

කල්කි අසුන් ගැනීමට නියමිත ස්තුපය හා ප්‍රවෘත්ති සාකච්ඡා කාමරය අතරේ ඉදිකොට ඇත්තේ හතර අතට අත් දිගුකරගත් යෝධ විෂ්ණු ප්‍රතිමාවකි. සීලිමේ දිදුළන නිල් විදුලි බුබුඵ චතුරස්‍රය තුළ සිටින සියල්ලන්ටම විෂ්ණු වර්ණය දී තිබේ.

කල්කිගේ ප්‍රාසංගිකත්වයට වසඟව සිටිය ද ටෙඩී මැඩිසන් චතුරස්‍රයේ හිඳ සිටින්නේ මහාචාර්ය ජොසීගේ කෘත්‍රිම ගිනිකෙළි පිළිබඳ බියකින් මැඬෙමිනි. හෙලිකොප්ටරයෙන් බසින කල්කි, සුදු අසු පිටට මාරු වෙයි; සුදු අසු ඉදිරියට ඇදෙයි. ටෙඩීගේ කන් අගුඵවට්ටමින් පිපුරුමක හඬක් නැගෙයි. කල්කිගේ විධානයෙන් ජොසී න්‍යෂ්ටික ප්‍රතික්‍රියා පද්ධතියක් මුදා හැර තිබිණි. මහ පොළොව ගිනි ඇවිඵණේ ය. වැනසුණේ ය. එය නිවැරදිව පෙරදැක තිබීම ගැන මම කුරිරු සතුටක් ලැබුවෙමි.

එහෙත් මුල් පිපිරීම, ශබ්ද තරංග තුළ දිය වී ගිය පසු ලෝකය තවමත් නිරුපද්‍රිතව තිබුණේ ය. මම ද එසේ ය. ජෙරල්ඩින් ද, විෂ්ණු ප්‍රතිමාව ද එසේ ය. ඛණ්ඩනය කෙරුණු පරමාණුවේ අනුකැබිලිති, වියරු වැටුණු ධූමකේතුවක් සේ ප්‍රදර්ශනය කෙරුණු පුඵල් තිරය ද සීරීමක් වත් නොලැබ දිග හැරී තිබුණේ ය. මේ මහ පොළොව මත වූ කිසිවක් ඉන් නොනැසිණි. වැනසුණේ සුදු අශ්වයාත්, අශ්වාරෝහකයාත් පමණි. ඔවුන් සහමුලින්ම සුනුවිසුනු වී ගොස් ය. ලේ හැම තැනකම ය. මුලින්ම මරළතෝනි දුන්නේ මම ය. (239 පිටුව)

සුවහසක් රූපවාහිනී තිරවල එදා ප්‍රදර්ශනය කෙරෙන්නේ රූපවාහිනී මාධ්‍ය ඉතිහාසයේ නොවූ විරූ සිදුවීමකි. කෙනඩි ඝාතනය හෝ මාටින් ලූතර් කිං ඝාතනය හෝ නුදුටු කැමරා ඇස් පැහැදිලිව, සජීවීව සටහන් කරගන්නේ කල්කි ඝාතනයයි. දහස් සංඛ්‍යාත මිනිස්සු හඬා වැළපෙති. මනා ලෙස පුහුණු කළ පොලිස් බල්ලෝ ඝාතකයෝ සොයති. ටෙඩී ශෝක වෙමින් සිටින අතරවාරයේ දිනෙක ‘නිව්යෝර්ක් ඩේලිනිවුස්’ පත්තරය නිකුත් වන්නේ මෙවැනි ශීර්ෂ පාඨයක් ද සමඟිනි.

කල්කි මළවුන්ගෙන් නැගිට විත්

එහි අනුකතාව සැකවින් දැක්වෙන්නේ මෙසේ ය.

මගඩියක් පිළිබඳ සැකයක්; උද්‍යාන මිනීමැරුම කැඩපතකින් කළ විජ්ජාවක් ද?

කල්කි ව්‍යවසාය ඩොලර් හතළිස් ලක්ෂයක් ආණ්ඩුවට ගෙවිය යුතු බව මේ අතර කියැවෙද්දී කල්කි අත්අඩංගුවට ගැනීමේ පසුබිමක් ද නිර්මාණය වෙමින් පවතී. විෂ්ණු වශයෙන් මෙන් ම ශිව වශයෙන් ද විවිධ අවස්ථාවන්හිදී තමන් හඳුන්වාගනු ලැබූ ගැලවුම්කාර ජේම්ස් ජේ. කෙලී, පෙරදිග වේලාවෙන් දහවල් 12ට හඩ්සන් නදියේ පාරුවක හෝ නැවක සිට ජනතාව ඇමතීමටත් ශිව දෙවියන්ගේ සනාතන නැටුම ඇරඹීමටත් නියමව තිබේ. පුරාතන හින්දු ආගමික විශ්වාසයනට අනුව මුඵ ලොවම විනාශ වී යන්නේ ශිව දෙවියන් මේ නැටුම අරඹන විට ය. මධ්‍යහ්නයේ නළාව හැඬවෙයි; ශබ්ද විකාශන යන්ත්‍ර සංගීත රාව නංවයි; සිතාර, නළා, හක්ගෙඩි වැයෙද්දී කල්කි නැව්තට්ටුවේ පෙනී සිටියි.

‘කල්කිගේ සදාතන නැටුම’ අවසන් වෙද්දී කලියුගය නිමාව දකියි. මිනිස්සු කෝටි හාරසියයක් පමණ මිය යති.

එහෙත්…? මේ මහා විනාශය සිදුවන්නේ දෙවියන්ගේ අණකින් ද?■