ආරක්ෂක වැය වැඩිවෙයි
බැසිල්ටත් වැඩිවෙයි, මහින්දටත් වැඩිවෙයි
මහින්දානන්දට වඩා ශෂීන්ද්රට දෙයි
සෞඛ්ය වැය අඩුවෙය
ඔක්තෝබර් 07 දින පාර්ලිමේන්තුවට ඉදිරිපත් කළ 2022 වර්ෂයට අදාළ විසර්ජන පනත් කෙටුම්පත අනුව මුළු රාජ්ය වැයෙන් සියයට 30කට අධික ප්රමාණයක් ජනාධිපති ගෝඨාභය, අගමැති මහින්ද, චමල්, බැසිල්, නාමල් හා ශෂීන්ද්ර යන ආණ්ඩුව තුළ තනතුරු දරන රාජපක්ෂවරුන් 6 දෙනා අතර බෙදී ගොස් ඇත.
මෙම තත්වය විශේෂත්වයක් වන්නේ ජනාධිපති අගමැති ඇතුළු මුළු කැබිනට් මණ්ඩල සාමාජික සංඛ්යාව 28ක් වීමත්, රාජ්ය අමාත්යවරුන් සංඛ්යාව කැබිනට් අමාත්යාංශ දරන චමල් හා නාමල් රාජපක්ෂ හැරුණු විට 37ක් වීමත් තුළය.
2022 රාජ්ය වැයෙන් ආසන්න වශයෙන් රුපියල් බිලියන 778 මුදලක් ජනාධිපති කාර්යාලය, අගමැති කාර්යාලය ඇතුළු ජනාධිපති, අගමැති ඇතුළු රාජපක්ෂවරුන් යටතේ ඇති කැබිනට් අමාත්යාංශ හා රාජ්ය අමාත්යාංශවලට වෙන්කර ඇති අතර එම වර්ෂයට
අදාළ මුළු රාජ්ය වැය රුපියල් බිලියන 2505කි.
රුපියල් බිලියන 373ක් වන වැඩිම වැය ආරක්ෂක අමාත්යාංශයට වෙන්කර ඇති අතර එය 2021 ආරක්ෂක අමාත්යාංශ වැය ශීර්ෂයට වඩා වැඩිය. එම වර්ෂයේ ආරක්ෂක අමාත්යාංශ වැය ශීර්ෂය වූයේ රුපියල් බිලියන 355කි.
මීට අමතරව රාජ්ය ආරක්ෂක රාජ්ය අමාත්යවරයා වශයෙන් වෙන්කර ඇති රුපියල් බිලියන 10ක මුදලද ආරක්ෂක වැය ශීර්ෂය යටතට වැටේ.
එමෙන්ම මුදල් අමාත්ය බැසිල් රාජපක්ෂගේ වැය ශීර්ෂයද 2022 දී වැඩිවී ඇති අතර එය රුපියල් බිලියන 185කි. විසර්ජන පනත් කෙටුම්පත පාර්ලිමේන්තුවට ඉදිරිපත් කරන අවස්ථාව වනවිට අහෝසි කර මුදල් අමාත්ය බැසිල් රාජපක්ෂ යටතට පත්කර ඇත.
අජිත් නිවාඩ් කබ්රාල් යටතේ තිබූ මුදල්, ප්රාග්ධන වෙළඳපොල හා රාජ්ය ව්යවසාය ප්රතිසංස්කරණ අමාත්යාංශයටද රුපියල් බිලියන 45ක මුදලක් වෙන්කර ඇති අතර එම මුදල්ද ඒ අනුව මුදල් අමාත්යාංශය යටතට පත්වේ.
අගමැති කාර්යාලය සඳහා වෙන්කර ඇති මුදලද වැඩිවී ඇති අතර එය රුපියල් මිලියන 1391කි. 2021 වසරේ එය තිබී ඇත්තේ රුපියල් මිලියන 1051ක් වශයෙන්ය.
වාරිමාර්ග ඇමති චමල් රාජපක්ෂගේ වැය ශීර්ෂයද වැඩි වී ඇති අතර එය රුපියල් මිලියන 47,847කි. 2021 වර්ෂයේ එම වැය රුපියල් මිලියන 46,687කි.
රාජ්ය අමාත්ය ශෂීන්ද්ර රාජපක්ෂට වෙන්කර ඇති මුදල රුපියල් බිලියන 45ක් වන අතර එය එම විෂයේ කැබිනට් අමාත්යවරයා වන මහින්දානන්ද අලුත්ගමගේට වෙන්කර ඇති මුදල මෙන් දෙගුණයකට ආසන්නය. කෘෂිකර්ම අමාත්යාංශයට වෙන්කර ඇති මුදල රුපියල් බිලියන 24කි.
රාජපක්ෂවරුන්ගේ වැය ශීර්ෂවලට අදාළ මෙම වැඩිවීම් සිදුවී ඇත්තේ 2021 වර්ෂයට සාපේක්ෂව 2022 රාජ්ය වැය ඇස්තමේන්තු අඩුවී ඇති තත්වයක් තුළය. 2021 ඇස්තමේන්තුගත රාජ්ය වැය රුපියල් බිලියන 2675ක් වන අතර 2022 දී එය රුපියල් බිලියන 172 කින් අඩුවී ඇත.
එසේ වුවද කොවිඩ් වසංගත රෝග තත්වයක් රටේ පවතිද්දී සෞඛ්ය අමාත්යාංශ සඳහා වෙන්කර ඇති මුදල රුපියල් බිලියන 153ක් වන අතර එය 2021 හා සැසැඳීමේදී අඩුවී ඇත. 2021 සෞඛ්ය අමාත්යාංශය සඳහා රුපියල් බිලියන 158ක් වෙන්කර ඇත.■
