කොළඹ වරායේ බටහිර පර්යන්තය ඉන්දියානු අදානි සමාගමට හා ජෝන් කීල්ස් සමාගමට ලබාදීමේ ගිවිසුමේ සඳහන් කොටස් අනුපාතයන් සම්බන්ධයෙන් වරාය වෘත්තීය සමිතිවල දැඩි විරෝධය එල්ල වී ඇත.
ඒ බටහිර පර්යන්තය සම්බන්ධයෙන් එහි වෘත්තීය සමිති එහි පාලනාධිකාරිය සමග එකඟ වූ කරුණුවලට පටහැනි ලෙස අදානි සමාගමට හා ජෝන් කීල්ස් සමාගමට එහි කොටස් හිමිකම් ලබාදීම නිසාය. මේ සම්බන්ධයෙන් කළ විමසීමකදී වරාය ස්වාධීන සේවක සංගමයේ සභාපති ලාල් බංගමුවගේ පැවසුවේ වරාය නැගෙනහිර පර්යන්තය ඉන්දියාවේ අදානි සමාගමට ලබාදීමට එරෙහි අරගලයේදී බටහිර පර්යන්තය ආයෝජනය
ගැන එහි වෘත්තීය සමිති ලියවිල්ලකින් එකඟ වී ඇත්තේ යහපත් ආයෝජනයක් යන්න ගැන පමණක් බවය. නැගෙනහිර පර්යන්තයේ සියයට 51ක් වරාය අධිකාරියට හා සියයට 49ක් අදානි සමාගමට යනුවෙන් පැවති කොටස් අනුපාත කොන්දේසිය බටහිර පර්යන්තය සම්බන්ධයෙන්ද අදාල විය යුතු බව බංගමුව මහතා පැවසීය.
එහෙත් සැප්තැම්බර් 30 වැනිදා බටහිර පර්යන්තය සම්බන්ධයෙන් අත්සන් කළ ගිවිසුම අනුව එම පර්යන්තයේ සියයට 51ක කොටස් අයිතියක් අදානි සමාගමට හිම වන අතර සියයට 34ක කොටස් ප්‍රමාණයක් ජෝන් කීල්ස් සමාගමට හිමි වේ. වරාය අධිකාරියට එහි හිමිවන්නේ සියයට 15ක කොටස් ප්‍රමාණයක් පමණය.
ඒ සම්බන්ධයෙන් වරාය වෘත්තීය සමිති සැප්තැම්බර් 30 දින සාකච්ඡාවක් පවත්වා ඇති අතර එහිදී තීරණය වී තිබෙන්නේ ඒ සම්බන්ධයෙන් වහාම සාකච්ඡාවක් ඉල්ලා වරාය අධිකාරියේ සභාපතිවරයාට ලිපියක් යොමු කිරීමටය. ඒ බටහිර පර්යන්තය ලබාදීමේ ගිවිසුම සම්බන්ධයෙන් එහි වෘත්තීය සමිති දැනුවත් නොකිරීම හා ගිවිසුමේ කොන්දේසි සම්බන්ධයෙන්ය.■
